ទិដ្ឋភាពភ្ញៀវទេសចរចូលទស្សនាប្រាសាទអង្គរវត្ត កាលពីខែកក្កដា ឆ្នាំ ២០២៣។ រូបថត ហុង មិនា
ភ្នំពេញៈ ភ្ញៀវទេសចរបរទេសជិត ៥៤ ម៉ឺននាក់ បានទិញសំបុត្រចូលទស្សនារមណីយដ្ឋានអង្គរ ដោយស្មើនឹងទឹកប្រាក់ជិត ២៥ លានដុល្លារ កើនឡើងជាង ៣៦០ ភាគរយបើធៀបនឹងរយៈពេលដូចគ្នាឆ្នាំ ២០២២ ប៉ុន្តែបើធៀបនឹងរយៈពេលដូចគ្នាក្នុងឆ្នាំ ២០១៩ (ឆ្នាំកម្ពុជាទទួលបានភ្ញៀវទេសចរបរទេសច្រើនបំផុតក្នុងកំណត់ត្រា) គឺធ្លាក់ចុះជាង ៦៦ ភាគរយ។ នេះបើយោងតាមគ្រឹះស្ថានអង្គរ។
គ្រឹះស្ថានអង្គរ គឺជាគ្រឹះស្ថានសាធារណៈរដ្ឋបាលដែលត្រូវបង្កើតឡើងនៅក្នុងឆ្នាំ ២០១៦ ដោយស្ថិតក្រោមអាណាព្យា និង ស្ថិតនៅក្រោមអាណាព្យាបាលហិរញ្ញវត្ថុរបស់ក្រសួងសេដ្ឋកិច្ច និងហិរញ្ញវត្ថុ។ ការប្រមូលចំណូលរបស់គ្រឹះស្ថាននេះរួមមាន រមណីយដ្ឋានអង្គរ, ប្រាសាទកោះកេរ, និងសំបុត្រទូកកំពង់ផែចុងឃ្នៀស។ សម្រាប់តម្លៃសំបុត្រចូលទស្សនារមណីយដ្ឋានអង្គរ ត្រូវបានចែកចេញជា ៣ ប្រភេទ គឺចូលទស្សនា ១ ថ្ងៃមានតម្លៃ ៣៧ ដុល្លារ, ៣ ថ្ងៃតម្លៃ ៦២ ដុល្លារ និង ៧ ថ្ងៃ តម្លៃ ៧២ ដុល្លារអាមេរិក។
សេចក្តីប្រកាសព័ត៌មានរបស់គ្រឹះស្ថានអង្គរ ឱ្យដឹងថា ចន្លោះពីខែមករា ដល់ខែសីហា ឆ្នាំ ២០២៣ ភ្ញៀវបរទេសដែលទិញសំបុត្រចូលទស្សនារមណីយដ្ឋានអង្គរ មានសរុប ៥៣៩ ៥៦១ នាក់កើន ៣០២,២ ភាគរយធៀបរយៈពេលដូចគ្នាឆ្នាំ ២០២២។ រីឯថវិកាដែលបានពីការលក់សំបុត្រ គឺ ២៤,៩៥ លានដុល្លារ កើន ៣៦៤,៤២ ភាគរយ។ ទោះបីយ៉ាងណាសមិទ្ធផលដែលគ្រឹះស្ថានអង្គរសម្រេចបានក្នុងរយៈពេល ៩ ខែ (៣ ត្រីមាស) នៃឆ្នាំ២០២៣ គឺនៅមានកម្រិតទាបនៅឡើយបើធៀបនឹងឆ្នាំ ២០១៩ ដោយពេលនោះមានភ្ញៀវបរទេសទិញសំបុត្រចូលរមណីយដ្ឋានអង្គរ ១ ៦៦២ ៥១៣នាក់ និងប្រមូលប្រាក់បាន ៧៤,៣៤ លានដុល្លារ។
បើយោងតាមគ្រឹះស្ថានអង្គរ ក្រៅពីប្រាក់ចំណូលពីការលក់សំបុត្រឱ្យភ្ញៀវបរទេសចូលទស្សនារមណីយដ្ឋានអង្គរ គ្រឹះស្ថាននេះក៏រកចំណូលបាន ៥២៨ ៣៨៩ ដុល្លារផងដែរពីការលក់សំបុត្រឱ្យភ្ញៀវបរទេសចូលទស្សនានៅប្រាសាទកោះកេរ និងសំបុត្រទូកនៅកំពង់ផែចុងឃ្នៀស។
លោកនាយករដ្ឋមន្ត្រី ហ៊ុន ម៉ាណែត នៅក្នុងពិធីជួបសំណេះសំណាលជាមួយកម្មករជិត ២ ម៉ឺននាក់ ក្នុងខណ្ឌដង្កោ និងមានជ័យ រាជធានីភ្នំពេញ កាលពីថ្ងៃទី ៣ ខែតុលា បានលើកឡើងថា លោកកំពុងបញ្ជាឱ្យលោកទេសរដ្ឋមន្ត្រី ថោង ខុន និងរដ្ឋមន្ត្រីក្រសួងទេសចរណ៍ លោក សុខ សូកេន ពិនិត្យលទ្ធភាពនៅក្នុងការសម្រួលលក្ខខណ្ឌមួយចំនួនបន្ថែមទៀតដើម្បីទាក់ទាញភ្ញៀវទេសចរបរទេសឱ្យធ្វើដំណើរមកកម្ពុជា។
ប្រធានសមាគមមគ្គុទ្ទេសក៍ទេសចរអង្គរ លោក ខៀវ ធី បានប្រាប់ ភ្នំពេញ ប៉ុស្តិ៍ នៅថ្ងៃទី ៣ ខែតុលាថា បើទោះបីក្តីបារម្ភពីការឆ្លងរាលដាលជំងឺកូវីដ ១៩ បានបិទបញ្ចប់ស្ទើរទាំងស្រុង ប៉ុន្តែការមកដល់របស់ភ្ញៀវបរទេសនៅកម្ពុជា គឺនៅមានកម្រិតនៅឡើយហើយភាគច្រើនជាអ្នកនៅក្នុងតំបន់តែប៉ុណ្ណោះ។
លោកបន្តថា អ្វីៗអាចនឹងមានការប្រែប្រួលខ្លាំងនៅក្នុងត្រីមាសចុងក្រោយដែលជារដូវកាលមានភ្ញៀវទេសចរធ្វើដំណើរច្រើនជារៀងរាល់ឆ្នាំ។ បច្ចុប្បន្នអ្នកដែលធ្លាប់នៅក្នុងវិស័យនេះពីមុនមក ក៏បានត្រៀមខ្លួនរួចជាដើម្បីចូលរួមបម្រើសេវាកម្មនេះឡើងវិញ។
លោកបញ្ជាក់ថា៖«យើងរំពឹងថា រយៈពេលនៅសល់ក្នុងឆ្នាំ ២០២៣ នេះនឹងមានភ្ញៀវទេសចរអន្តរជាតិកាន់តែច្រើនបន្ថែមទៀតធ្វើដំណើរមកកម្ពុជាពិសេសមកទស្សនាប្រាសាទបុរាណនានានៅទូទាំងប្រទេស»។
ទិន្នន័យក្រសួងទេសចរណ៍ បង្ហាញថា ចន្លោះពីខែមករា-ខែសីហា ឆ្នាំ ២០២៣ កម្ពុជាទទួលបានភ្ញៀវបរទេសសរុប ៣ ៥០១ ៩៨១ នាក់ កើនឡើង ២៥០,៨ ភាគរយបើធៀបនឹងរយៈពេល ៨ ខែឆ្នាំ ២០២២ ដែលមានចំនួន ៩៩៨ ២៧២ នាក់ ។ យ៉ាងណាចំនួននេះបើធៀបនឹងរយៈពេលដូចគ្នាក្នុងឆ្នាំ២០១៩ គឺនៅទាបជាង ១៩,៧ ភាគរយ។
ក្រសួងឱ្យដឹងទៀតថា ក្នុងចំណោមភ្ញៀវបរទេសទាំងអស់ខាងលើ គឺភ្ញៀវមកពីប្រទេសថៃមានច្រើនជាង គឺចំនួន ១ ១៨៦ ៩៩៩ នាក់, វៀតណាម ៦៤១ ៧៥៨ នាក់, ចិន ៣៦៤ ៨៤៤ នាក់, និងឡាវ ២១២ ៩៨៤ នាក់ ក្រៅពីនោះគឺមកពីអាមេរិក, កូរ៉េខាងត្បូង, ឥណ្ឌូនេស៊ី, និងបារាំង ជាដើម។
ឆ្នាំ ២០២២ គ្រឹះស្ថានអង្គររកចំណូលពីការលក់សំបុត្រឱ្យភ្ញៀវបរទេសបាន ១១ ៧៨៣ ៩១៦ ដុល្លារ ដោយក្នុងនោះចំណូលពីរមណីយដ្ឋានអង្គរ ១១ ៥២៨ ១៥៨ ដុល្លារ, ប្រាសាទកោះកេរ ៩០ ៤៥០ ដុល្លារ និងកំពង់ផែចុងឃ្នៀស ១៦៥ ៣០៨ ដុល្លារ៕
