បុរសម្នាក់កំពុងពិនិត្យមើលរបៀបចុះបញ្ជីក្រុមហ៊ុនតាមអនឡាញ។ ហុង មិនា
ភ្នំពេញៈ ក្រុមហ៊ុនអាជីវកម្មជាង ៣ ម៉ឺន ដែលមានដើមទុនសរុបជិត ៩ ពាន់លានដុល្លារ បានទទួលជោគជ័យលើការចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានដំណាក់កាលទី១ ខណៈកាលពីដើមឆ្នាំ ២០២៣ ចំនួនក្រុមហ៊ុនចុះបញ្ជីមានត្រឹមតែ ២០ ៦៩៣ និងមានដើមទុនជាង ៥,៨១ ពាន់លានដុល្លារ។ នេះបើតាម Online Business Registration Service។
បើតាមបណ្តាញសង្គមផ្លូវការរបស់ Online Business Registration Service គិតត្រឹមថ្ងៃទី ៩ ខែតុលា ឆ្នាំ ២០២៣ ចំនួនក្រុមហ៊ុនដែលចុះបញ្ជីដោយជោគជ័យតាមប្រព័ន្ធ Single Portal មានសរុប ៣០ ២១៧ ស្មើនឹងដើមទុនចុះបញ្ជីសរុប ៨,៨១ ពាន់លានដុល្លារ។ កាលពីដើមឆ្នាំ ២០២៣ (ថ្ងៃទី ២ ខែមករា) ក្រុមហ៊ុនដែលបានទទួលជោគជ័យលើការចុះបញ្ជី មាន ២០ ៦៩៣ ក្រុមហ៊ុន និងមានដើមទុនចុះបញ្ជី ៥,៨១ ពាន់លានដុល្លារ។
ផ្អែកតាមតារាងគឺក្នុងចំណោមទុនវិនិយោគទាំង ៨,៨១ ពាន់លានដុល្លារ គឺផ្នែកសាងសង់អគារ មានដើមទុនប្រមាណ ១,១ ពាន់លានដុល្លារ ស្មើ ១២,៤ ភាគរយ, សកម្មភាពសេវាកម្មស្នាក់នៅ ៩៤៥ លានដុល្លារ ស្មើនឹង ១០,៧ ភាគរយ ផ្នែកអចលនទ្រព្យ(ប្រើអចលនទ្រព្យផ្ទាល់ខ្លួន ឬជួលពីគេ) ៩៤៥ លានដុល្លារ ស្មើ ១០,៧ ភាគរយ,សកម្មភាពពិគ្រោះយោបល់ផ្នែកគ្រប់គ្រង ៤៨៥ លានដុល្លារ ស្មើ ៥,៥ ភាគរយ, កម្មន្តសាលសម្លៀកបំពាក់ (លើកលែងសម្លៀកបំពាក់ធ្វើពីរោមសត្វ) ៤៥៥ លានដុល្លារ ស្មើនឹង ៥,២ ភាគរយ, និងផ្នែកផ្សេងៗមានដើមទុនប្រមាណ ៤,៨៩ ពាន់លានដុល្លារ ស្មើ ៥៥,៥ ភាគរយ។
Online Business Registration Service ឱ្យដឹងទៀតថា ក្រៅពីនេះក្រុមហ៊ុនខាងលើ ក៏មានក្រុមហ៊ុន ១៦ ៨៨៦ ផ្សេងទៀតដែលទទួលជោគជ័យលើការសុំនាមករណ៍បម្រុងទុក និងចំនួន ២ ត្រូវបានបដិសេធ។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ ភ្នំពេញ ប៉ុស្តិ៍ នៅថ្ងៃទី ១១ ខែតុលាថា នៅពេលគ្រប់អាជីវកម្មត្រូវបានចុះបញ្ជី គឺវានឹងផ្តល់ផលវិជ្ជមានច្រើនទាំងសម្រាប់រដ្ឋាភិបាល និងផ្នែកឯកជន ជាពិសេសជួយឱ្យគេអាចដឹងអំពីចំនួនប្រភេទអាជីវកម្មដែលកំពុងមានប្រតិបត្តិការដើម្បីអាជ្ញាធររៀបចំគោលនយោបាយក្នុងការកំណត់ពន្ធ បើកវគ្គបណ្តុះបណ្តាល ឬដាក់ចេញនូវគោលនយោបាយជួយគាំទ្រជាដើម។
លោកថ្លែងថា៖«តាមរយៈទិន្នន័យនេះ គឺវានឹងជួយឱ្យការប្រកួតប្រជែងកាន់តែមានតម្លាភាពជាងមុន ខណៈនីតិវិធីចុះបញ្ជីក៏ត្រូវបានសម្រួលកាន់តែងាយស្រួលផងដែរ»។
លោកនាយករដ្ឋមន្ត្រី ហ៊ុន ម៉ាណែត នៅក្នុងពិធីប្រកាសដាក់ឱ្យអនុវត្តជាផ្លូវការយុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ ២០២៣-២០២៨ កាលពីថ្ងៃទី ១០ ខែតុលា បានលើកឡើងពីកម្លាំងចលករដ៏សំខាន់របស់អ្នកប្រកបអាជីវកម្មសម្រាប់សេដ្ឋកិច្ចជាតិ និងបានជំរុញឱ្យម្ចាស់អាជីវកម្មទាំងអស់ត្រូវទៅចុះបញ្ជីដើម្បីអាចឱ្យរដ្ឋាភិបាលមានព័ត៌មាន និងអាចជួយរកដោះស្រាយបានទាន់ពេលវេលានៅពេលមានបញ្ហាអ្វីមួយកើតឡើង៕
