លោក ឌិត ទីណា ពេលជួបក្រុមប្រឹក្សាធុរកិច្ច EU-ABC។ រូបថត ក្រសួងកសិកម្ម
ភ្នំពេញៈ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានណែនាំឱ្យភាគីក្រុមប្រឹក្សាធុរកិច្ចសហភាពអឺរ៉ុបអាស៊ាន (EU-ABC) និង EuroCham កម្ពុជា សហការជាមួយអង្គភាពជំនាញរបស់ក្រសួងដើម្បីសិក្សានិងស្វែងយល់បន្ថែមក្នុងការវិនិយោគ ការនាំចេញកសិផលកម្ពុជាទៅសហគមន៍អឺរ៉ុប។
ក្នុងជំនួបជាមួយប្រតិភូ EU-ABC និង EuroCham កម្ពុជា នៅទីស្តីការក្រសួង កាលពីថ្ងៃទី ២៤ ខែតុលា ឆ្នាំ ២០២៣ លោករដ្ឋមន្ត្រីក្រសួងកសិកម្មបានស្វាគមន៍គណៈប្រតិភូសម្រាប់កិច្ចសហប្រតិបត្តិការនិងស្វែងរកឱកាសវិនិយោគវិស័យកសិកម្មនៅកម្ពុជា និងបានលើកឡើងអំពីគោលនយោបាយស្នូលរបស់កម្ពុជា ដែលផ្ដោតលើការអភិវឌ្ឍនិងនិរន្តរភាពសន្តិសុខ និងសុវត្ថិភាពស្បៀង។
គេហទំព័រក្រសួងបញ្ជាក់ថា៖ «ភាគីទាំង ២ បានលើកឡើងអំពីការបន្តកិច្ចសហការបន្ថែមទៀត ដោយក្នុងនោះ ឯកឧត្តមរដ្ឋមន្ត្រី បានណែនាំឱ្យភាគីដៃគូ សហការជាមួយអគ្គនាយកដ្ឋានជំនាញសិក្សា និងស្វែងយល់ បន្ថែមក្នុងការវិនិយោគនាំចេញកសិផលកម្ពុជាទៅសហគមន៍អឺរ៉ុប ពិសេសអង្ករនិងស្វាយចន្ទី ព្រមទាំងផលិតផលកសិកម្មមានសក្តានុពលផ្សេងៗទៀត»។
លោក ឌិត ទីណា បានបញ្ជាក់ថា កម្ពុជាមានសក្តានុពលក្នុងច្រវាក់ផលិតកម្ម (Up Stream) និងមានសន្តិសុខស្បៀង ព្រមទាំងមានអតិរេកស្រូវប្រមាណ ៦,៥ លានតោន ក្នុង ១ ឆ្នាំ ដែលជាឱកាសសម្រាប់អ្នកវិនិយោគលើការកែច្នៃនាំចេញ (Down Stream) ប្រកបដោយគុណភាព និងមានតម្លៃបន្ថែមខ្ពស់សម្រាប់នាំចេញ។
នៅក្នុងវិស័យកសិកម្ម លោករដ្ឋមន្ដ្រីបានបន្ថែមថា កម្ពុជាផ្តោតសំខាន់ទៅលើគុណភាព រសជាតិ សុវត្ថិភាព តាមរយៈការផលិតផលិតផលដែលមានតម្លៃបន្ថែមខ្ពស់ជាជាងការបង្កើនបរិមាណ ជាអាទិ៍ ម្រេចកំពត អង្ករផ្ការំដួល និងសែនក្រអូប ជាដើម។
លោករដ្ឋមន្ត្រីក៏បានលើកឡើងអំពីសហគមន៍កសិកម្មតាមគំរូថ្មីដែលនឹងដើរតួនាទីយ៉ាងសំខាន់ក្នុងខ្សែច្រវាក់ផ្គត់ផ្គង់ក្នុងកម្រិតទ្រង់ទ្រាយធំ ធានាគុណភាពតាមស្តង់ដាគោលនយោបាយសម្រាប់នាំចេញ និងមានលទ្ធភាពគ្រប់គ្រាន់ក្នុងការអនុវត្តកសិកម្មតាមកិច្ចសន្យា ដែលនឹងផ្តល់ផលចំណេញដល់កសិករ និងអ្នកវិនិយោគ។
ដោយឡែកក្នុងជំនួបជាមួយ កញ្ញា Moonjung Choi នាយកទីភ្នាក់ងារសហប្រតិបត្តិការអន្តរជាតិកូរ៉េ (KOICA) នៅថ្ងៃទី ២៦ ខែតុលា នាទីស្តីការក្រសួងកសិកម្ម លោក ឌិត ទីណា បានស្វាគមន៍ចំពោះកិច្ចសហប្រតិបត្តិការ និងបន្តសហការជិតស្និទ្ធជាមួយ KOICA ដើម្បីចូលរួមជួយវិស័យកសិកម្មកម្ពុជាស្របតាមគោលនយោបាយនៃរាជរដ្ឋាភិបាលកម្ពុជានីតិកាលទី៧ ឱ្យមានសន្តិសុខស្បៀង និងប្រសិទ្ធភាពសេដ្ឋកិច្ចពិតប្រាកដ ជាពិសេសចូលរួមជំរុញសហគមន៍កសិកម្មតាមគំរូថ្មី។
លោកបានបញ្ជាក់ថា គោលនយោបាយវិស័យកសិកម្មថ្មីផ្តោតអាទិភាពលើការដាក់ពង្រាយមន្ត្រីផ្សព្វផ្សាយកសិកម្មឃុំ ដើម្បីជួយគាំទ្រដល់កសិករក្នុងខ្សែច្រវាក់ផលិតកម្ម និងអន្តរាគមន៍ផ្សេងៗបានទាន់ពេលវេលា ជំរុញសហគមន៍កសិកម្មគំរូថ្មីដែលមានទុននិងធនធានគ្រប់គ្រាន់ក្នុងការធ្វើផលិតកម្មកសិកម្មក្នុងទ្រង់ទ្រាយធំ និងអាចធ្វើកិច្ចសន្យាជាមួយអ្នកវិនិយោគបានប្រកបដោយទំនុកចិត្ត។
លោកបានបន្ថែមថា កម្ពុជាមានមន្ទីរពិសោធន៍ជាតិដែលមានសមត្ថភាពត្រួតពិនិត្យគុណភាពផលិតផលកសិកម្ម ដើម្បីធានាសុវត្ថិភាពផលិតផលសម្រាប់អ្នកប្រើប្រាស់ហើយជាគោលនយោបាយគឺត្រូវធ្វើយ៉ាងណាត្រូវកាត់បន្ថយថ្លៃដើមផលិតដើម្បីឱ្យកសិករទទួលបានផលចំណេញច្រើន។ ក្នុងនោះមានកិច្ចការមួយចំនួនដែលត្រូវការសហការចូលរួមដោះស្រាយដោយយកចិត្តទុកដាក់ ដូចជា ផ្នែកថាមពលនិងប្រព័ន្ធស្រោចស្រពតាមរបៀបឆ្លាតវៃ ព្រមទាំងការគ្រប់គ្រងគុណភាពដីកសិកម្ម។
គេហទំព័រក្រសួងបញ្ជាក់ថា លោករដ្ឋមន្ត្រីបានណែនាំឱ្យភាគីកូរ៉េ ពិនិត្យលទ្ធភាពសហការជាមួយសាកលវិទ្យាល័យកសិកម្មលើការសិក្សាស្រាវជ្រាវបន្តនូវកសិកម្មឆ្លាតវៃទំនើប។ ភាគីទាំង ២ បានលើកឡើងអំពីការបន្តកិច្ចសហការបន្ថែមទៀត ដោយធ្វើការពិនិត្យតាមដានជាមួយគ្នាក្នុងការអនុវត្តគម្រោងឱ្យមានប្រសិទ្ធភាព និងមាននិរន្តរភាពពិតប្រាកដ ដែលនឹងជួយនិងផ្តល់ប្រយោជន៍ដល់កសិករ៕
