លោក អ៊ុក រ៉ាប៊ុន នៅក្នុងកម្មវិធីកាលពីថ្ងៃទី៧ វិច្ឆិកា ។ រូបថត CARD
ភ្នំពេញៈលោកទេសរដ្ឋមន្ត្រី អ៊ុក រ៉ាប៊ុន ប្រធានគណៈកម្មាធិការជាតិជំរុញចលនាភូមិ ១ ផលិតផល ១ និងជាប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម បានស្នើឱ្យស្ថាប័នពាក់ព័ន្ធរួមគ្នា បង្កើនការផ្សព្វផ្សាយដើម្បីជំរុញចលនាភូមិ១ផលិតផល១សំដៅលើកកម្ពស់ការអភិវឌ្ឍសេដ្ឋកិច្ចមូលដ្ឋានឱ្យកាន់តែប្រសើរឡើង។
ការស្នើរបស់លោក អ៊ុក រ៉ាប៊ុន ដូច្នេះបានឡើងក្នុងពិធីបិទសិក្ខាសាលាផ្សព្វផ្សាយស្តីពីការចងក្រងសមាជិកចលនាភូមិ ១ ផលិតផល ១ ឆ្នាំ២០២៣ និងចែកវិញ្ញាបនបត្រទទួលស្គាល់ផលិតផលភូមិ ១ ផលិតផល ១ ឆ្នាំ២០២២ នៅទីស្តីការគណៈរដ្ឋមន្ត្រី កាលព្រឹកថ្ងៃទី៧ ខែវិច្ឆិកា ឆ្នាំ២០២៣។
លោកបានថ្លែងថា៖«ចលនាភូមិ ១ ផលិតផល ១ គឺជាយន្តការដ៏មានប្រសិទ្ធភាពមួយក្នុងការលើកកម្ពស់ការអភិវឌ្ឍសេដ្ឋកិច្ចមូលដ្ឋាន បង្កើតការងារ និងកាត់បន្ថយចំណាកស្រុក ហើយចលនាភូមិ ១ ផលិតផល ១ នេះមានភាពចាំបាច់សម្រាប់មូលដ្ឋានក្នុងការរួមចំណែកធ្វើឱ្យកម្ពុជាឈានទៅសម្រេចបានចក្ខុវិស័យប្រែក្លាយជាប្រទេសមានចំណូលមធ្យម កម្រិតខ្ពស់នៅឆ្នាំ២០៣០ និងក្លាយជាប្រទេសមានចំណូលខ្ពស់នៅឆ្នាំ២០៥០»។
លោកអ៊ុក រ៉ាប៊ុន បានបន្តថា៖«ដើម្បីសម្រេចទិសដៅចលនាភូមិ១ផលិតផល១ ប្រកបដោយប្រសិទ្ធភាព សូមឱ្យអ្នកពាក់ព័ន្ធរួមគ្នាអនុវត្តធ្វើការណែនាំ ពន្យល់ពលរដ្ឋ និងអ្នកផលិតតាមមូលដ្ឋានឱ្យយល់ច្បាស់ថែមទៀតពីសារៈសំខាន់ និងផលប្រយោជន៍ក្នុងការចូលរួមក្នុងការងារជំរុញចលនាភូមិ១ផលិតផល១ដើម្បីកម្ពុជាមានផលិតផលសម្បូរបែប និងឈានដល់ការពង្រឹងចំណូលសេដ្ឋកិច្ចប្រជាជនតាមមូលដ្ឋាន»។
យោងតាមគេហទំព័រក្រុមប្រឹក្សាស្តារអភិវឌ្ឍន៍វិស័យកសិកម្មបានឱ្យដឹងថា នៅក្នុងឱកាសនោះ លោក ផល សុជាតិ អគ្គលេខាធិការនៃអគ្គលេខាធិការដ្ឋានគណៈកម្មាធិការជាតិជំរុញចលនាភូមិ១ផលិតផល១បានលើកឡើងថា គិតមកទល់ពេលនេះ គណៈកម្មាធិការជាតិបានប្រមូលចងក្រងផលិតផលភូមិ ១ ផលិតផល ១ ចំនួន ២ លើករួចមក។
លោកបានបន្តថា គណៈកម្មាធិការជាតិទទួលបានផលិតផលទទួលស្គាល់ជាផលិតផលភូមិ ១ ផលិតផល ១ ចំនួន ៥៥៩ ផលិតផល ដែលក្នុងនោះ សម្រាប់រាជធានីភ្នំពេញមានចំនួន ៥៦ ផលិតផល ខណៈផលិតផលទាំងនេះ នឹងត្រូវវាយតម្លៃដាក់ចំណាត់ថ្នាក់ផលិតផលផ្កាយ១ ផ្កាយ២ ផ្កាយ៣ ផ្កាយ៤ និងផ្កាយ៥ដែលល្អជាងគេផងដែរ។
លោកបានបញ្ជាក់ថា៖«តាមរយៈសកម្មភាពនេះ វានឹងក្លាយទៅជាកម្លាំងអូសទាញមួយថែមទៀតក្នុងការទាក់ទាញទឹកចិត្តផលិតករក្នុងស្រុកឱ្យមានការខំប្រឹងប្រែងពង្រឹងគុណភាពផលិតផលរបស់ខ្លួនដើម្បីទទួលបានចំណាត់ថ្នាក់ល្អនិងបង្កើនឱកាសទីផ្សារ និងសមត្ថភាពប្រកួតប្រជែងរបស់ខ្លួន»។
ជុំវិញការលើកឡើងនេះ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា លោក ហុង វណ្ណៈ បានបង្ហាញការគាំទ្រលើការជំរុញចលនាភូមិ ១ ផលិតផល ១ និងការយកចិត្តទុកដាក់លើការអភិវឌ្ឍសេដ្ឋកិច្ចមូលដា្ននបន្ថែមទៀតដោយលោកបានចាត់ទុកថាជារឿងមួយល្អ។
លោកបានបញ្ជាក់ថា៖«ដើម្បីឈានទៅសម្រេចកិច្ចការងារទាំងនេះ គឺទាក់ទងនឹងហិរញ្ញវត្ថុ និងធនធានមនុស្ស ហើយក៏សូមជំរុញឱ្យភាគីពាក់ព័ន្ធ បង្កើតវេទិកាចលនាភូមិ ១ ផលិតផល ១ ឱ្យបានច្រើន ពិសេសខិតខំរិះរកទីផ្សារថ្មីៗសម្រាប់ទីផ្សារផលិតផលនៅតាមមូលដ្ឋានដែលប្រជាពលរដ្ឋផលិត និងកែច្នៃបានបន្ថែមទៀត ដើម្បីនាំចេញផលិតផលកម្ពុជាឱ្យកាន់តែទូលាយជាងនេះ»។
សូមបញ្ជាក់ដែរថា គណៈកម្មាធិការជាតិជំរុញចលនាភូមិ១ផលិតផល១ ក៏បានប្រកាសពីគោលនយោបាយជាតិ ស្តីពីការជំរុញចលនាភូមិ ១ ផលិតផល ១ ឆ្នាំ ២០១៦-២០២៦ និងផែនការយុទ្ធសាស្ត្រ ដែលជាឯកសារតម្រង់ទិសដ៏សំខាន់សម្រាប់ការជំរុញចលនាភូមិ ១ ផលិតផល ១ របស់កម្ពុជា ឱ្យមានការអនុវត្តបែបប្រទាក់ក្រឡារវាងក្រសួងស្ថាប័នពាក់ព័ន្ធឱ្យកាន់តែមានប្រសិទ្ធភាពថែមទៀត៕
