ចំនួនទឹកប្រាក់ដែលកម្ពុជា រកបានពីការនាំទំនិញទៅទីផ្សារអន្តរជាតិនៅក្នុងរយៈពេល ១០ ខែ ឆ្នាំ ២០២៣ បានបង្ហាញសញ្ញាវិជ្ជមានឡើងវិញខ្លះៗ។ ហេង ជីវ័ន
ភ្នំពេញៈ បន្ទាប់ពីធ្លាក់ចុះជាបន្តបន្ទាប់ក្នុងរយៈពេលច្រើនខែជាប់ៗគ្នា ចំនួនទឹកប្រាក់ដែលកម្ពុជា រកបានពីការនាំទំនិញទៅទីផ្សារអន្តរជាតិនៅក្នុងរយៈពេល ១០ ខែ ឆ្នាំ ២០២៣ បានបង្ហាញសញ្ញាវិជ្ជមានឡើងវិញខ្លះៗ ហើយដោយសម្រេចបានជាង ១៨ ពាន់លានដុល្លារ កើនតិចតួចធៀបរយៈពេលដូចគ្នាឆ្នាំ ២០២២ ខណៈឱនភាពជញ្ជីងពាណិជ្ជកម្មបានបន្តធ្លាក់មកនៅសល់ត្រឹមជិត ១,៥ ពាន់លានដុល្លារ។ នេះបើតាមអគ្គនាយកដ្ឋានគយ និងរដ្ឋាករកម្ពុជា (GDCE)។
បើយោងតាមរបាយការណ៍របស់ GDCE ចន្លោះពីខែមករា ដល់ខែតុលា ឆ្នាំ ២០២៣ កម្ពុជាបាននាំទំនិញទៅទីផ្សារអន្តរជាតិចំនួន ១៨,៥៩ ពាន់លានដុល្លារ កើន ០,២ ភាគរយ ធៀបរយៈពេលដូចគ្នាឆ្នាំ ២០២២។ ជាមួយគ្នានេះកម្ពុជាក៏បាននាំទំនិញពីទីផ្សារអន្តរជាតិក្នុងទឹកប្រាក់ ២០,០៧ ពាន់លានដុល្លារ ធ្លាក់ចុះ ៦ ភាគរយពីចំនួន ២១,៣៦ ពាន់លានដុល្លារ។
បើតាមស្ថិតិខាងលើ គឺទំហំពាណិជ្ជកម្មអន្តរជាតិរយៈពេល ១០ ខែ ឆ្នាំ ២០២៣ មានសរុប ៣៨,៦៧ ពាន់លានដុល្លារ ធ្លាក់ចុះ ៣,១ ភាគរយ បើធៀបរយៈពេលដូចគ្នានៅក្នុងឆ្នាំ ២០២២។ សម្រាប់តុល្យភាពជញ្ជីងពាណិជ្ជកម្មអន្តរជាតិកម្ពុជា គឺកម្ពុជាមានឱនភាព ១,៤៨ ពាន់លានដុល្លារ ខណៈរយៈពេលដូចគ្នាឆ្នាំ ២០២២ កម្ពុជាមានឱនភាព ២,៨ ពាន់លានដុល្លារ។
សេដ្ឋកិច្ចវិទូនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ ភ្នំពេញ ប៉ុស្តិ៍ កាលពីថ្ងៃទី ១២ ខែវិច្ឆិកាថា កំណើនទឹកប្រាក់នាំចេញគឺបញ្ជាក់ថា កម្ពុជាកំពុងធ្វើពិពិធកម្មទំនិញនាំចេញរបស់ខ្លួនបានកាន់តែល្អស្របតាមការចង់ បានរបស់ទីផ្សារអន្តរជាតិ។ ក្រៅពីការមានទំនិញចម្រុះកាន់តែច្រើននោះ ទំនិញកម្ពុជាក៏មានគុណភាព និងអាចឆ្លើយតបទៅនឹងកំណើនបរិមាណតម្រូវការដែរ។
លោកថ្លែងថា៖ «កំណើនទឹកប្រាក់នាំចេញរយៈពេល ១០ ខែ ឆ្នាំ ២០២៣ ទោះមានតិច ប៉ុន្តែវាជាមោទនភាពភាពមួយសម្រាប់កម្ពុជានៅក្នុងដំណាក់កាលដែលសេដ្ឋកិច្ចពិភពលោកនៅបន្តជួបភាពស្មុគស្មាញដែលបណ្តាល មកពីការដណ្តើមឥទ្ធិពលភូមិសាស្ត្រនយោបាយ និងសង្គ្រាមប្រទេសមួយចំនួន»។
លោកបញ្ជាក់ថា៖ «ទឹកប្រាក់ពីការនាំចេញកើនឡើង ស្របពេលការនាំចូលធ្លាក់ចុះក្នុងចរន្តពាណិជ្ជកម្មអន្តរជាតិបែបនេះ គឺវាជួយឱ្យកម្ពុជាអាចរក្សាបានរូបិយប័ណ្ណអន្តរជាតិសម្រាប់ប្រើពេលមានវិបត្តិកើតឡើង»។
អគ្គនាយិកាក្រុមហ៊ុនផលិតនំស្រួយ លីលី លោកស្រី កែវ មុំ បាននិយាយថា ប្រទេសកម្ពុជា ក្លាយជាទីតាំងដ៏មានសក្តានុពលសម្រាប់ការបណ្តាក់ទុនលើការដាំដុះ ផលិត និងកែច្នៃដើម្បីបំពេញតម្រូវការប្រើប្រាស់ក្នុងស្រុក និងនាំចេញ។
លោកស្រីបន្តទៀតថា ការដាក់ចេញគោលនយោបាយរបស់រាជរដ្ឋាភិបាលដើម្បីទាក់ទាញអ្នកវិនិយោគថ្មីៗឱ្យមកបណ្តាក់ទុន និងពង្រីកការវិនិយោគបន្ថែម កំពុងជួយឱ្យសមត្ថភាពនាំចេញរបស់កម្ពុជាកាន់តែខ្លាំង។
លោកស្រីថ្លែងថា៖ «ខ្ញុំរំពឹងថាការនាំទំនិញរបស់កម្ពុជាទៅក្រៅប្រទេសនឹងមានកាន់តែច្រើននៅពេលខាងមុខ។ កម្ពុជានឹងមានទំនិញកាន់តែច្រើនប្រភេទសម្រាប់នាំចេញ»។
ក្នុងឆ្នាំ ២០២២ ពាណិជ្ជកម្មអន្តរជាតិកម្ពុជា មានទឹកប្រាក់សរុប ៥២,៤២ ពាន់លានដុល្លារ កើន ៩,២ ភាគរយធៀបនឹងឆ្នាំ ២០២១។ ទឹកប្រាក់កម្ពុជានាំទំនិញទៅទីផ្សារអន្តរជាតិ មាន ២២,៤៨ ពាន់លានដុល្លារ កើន ១៦,៤ ភាគរយ និងទំនិញដែលកម្ពុជានាំចូលពីទីផ្សារអន្តរជាតិ ២៩,៩៤ ពាន់លានដុល្លារ កើនឡើង ៤,៣ ភាគរយ។ នេះបើតាមអគ្គនាយកដ្ឋានគយ និងរដ្ឋាករកម្ពុជា៕
