ការប្រមូលចំណូលពន្ធពីប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក មានចំនួនជិត ៦៣ លានដុល្លារ។ រូបថត ហ្វេសប៊ុក
ភ្នំពេញៈ កម្ពុជារកបានចំណូលពន្ធពីប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក (E-Commerce) ចំនួន ៦២,៨២ លានដុល្លារ ក្នុងរយៈពេល ១០ ខែដើមឆ្នាំ ២០២៣ ដែលជាការឆ្លុះបញ្ចាំងពីការកើនឡើងប្រតិបត្តិការទិញ-លក់ទំនិញ និងសេវាកម្មតាមអេឡិចត្រូនិកក្នុងរយៈពេលប៉ុន្មានឆ្នាំថ្មីៗនេះ។
បើតាមស្ថិតិបានពីអគ្គនាយកដ្ឋានពន្ធដារ (GDT) ប្រាក់ចំណូលពន្ធខាងលើ គឺបានមកពីអ្នកជាប់ពន្ធមិនមែននិវាសនជនចំនួន ៨២ នៃសហគ្រាសការផ្គត់ផ្គង់ទំនិញ និងសេវាកម្មតាមអេឡិចត្រូនិកពីបរទេស។
អគ្គនាយក GDT លោក គង់ វិបុល បានឱ្យដឹងក្នុងរបាយការណ៍ថា VAT ពីពាណិជ្ជកម្មតាមអេឡិចត្រូនិកគឺជាប្រភពចំណូលដ៏មានសក្តានុពលមួយសម្រាប់កម្ពុជា។
រដ្ឋាភិបាលបានចាប់ផ្តើមអនុវត្តអាករលើតម្លៃបន្ថែមតាមប្រព័ន្ធអេឡិចត្រូនិកកាលពីខែមេសាឆ្នាំនេះ ហើយក្រុមហ៊ុនដែលជាប់ពន្ធរួមមាន ក្រុមហ៊ុន Google, Facebook, YouTube, Alibaba, Microsoft និង ក្រុមហ៊ុន TikTok។
លោកថ្លែងថា៖ «កម្ពុជាមានសក្តានុពលក្នុងការបង្កើនប្រាក់ចំណូលថវិកាជាតិបន្ថែមទៀត»។
លោកបន្ថែមថា ពន្ធលើប្រតិបត្តិការពាណិជ្ជកម្មតាមអេឡិចត្រូនិកបរទេសក៏ធ្វើឱ្យប្រតិបត្តិករពាណិជ្ជកម្មតាមអេឡិចត្រូនិកនៅក្នុងស្រុកមានកម្រិតស្មើគ្នាផងដែរ។
វេទិកាទិញទំនិញតាមអ៊ីនធឺណិតកំពុងក្លាយជានិន្នាការរបៀបរស់នៅដ៏សំខាន់នៅកម្ពុជា ដោយបង្កើតឱកាសជាច្រើនសម្រាប់អាជីវកម្មខ្នាតតូច។
អគ្គនាយកដ្ឋានពន្ធដារ (GDT) បានឱ្យដឹងទៀតថា សម្រាប់រយៈពេល ១០ ខែ ឆ្នាំ ២០២៣ គឺការប្រមូលចំណូលពន្ធសម្រេចបានចំនួន ៣ ពាន់លានដុល្លារដែលតំណាងឱ្យ ៨៥,៨ ភាគរយនៃផែនការថវិកា។
លោក គង់ វិបុល លើកឡើងទៀតថា ការធ្វើទំនើបភាវូបនីយកម្មបានធ្វើឱ្យអត្រានៃការចុះបញ្ជីកាន់តែប្រសើរ និងធ្វើឱ្យប្រសើរឡើងនូវសេវាកម្មអ្នកជាប់ពន្ធ និងការបំពេញឯកសារប្រកាសពន្ធបន្ថែមលើការពង្រីកបរិក្ខាររក្សាទុកទិន្នន័យក្នុងចំណោមរបស់ផ្សេងៗទៀត។
សេដ្ឋវិទូនៃរាជបណ្ឌិត្យសភាកម្ពុជា លោក ហុង វណ្ណៈ ឱ្យដឹងថា ការណ៍នេះឆ្លុះបញ្ចាំងពីអ្វីដែលក្រុមហ៊ុនចំណូលថ្មីរបស់ប្រទេសកម្ពុជា គឺការប្រមូលពន្ធលើប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក។ លោកបន្តថា ការទិញទំនិញតាមអ៊ីនធឺណិតកំពុងទទួលបានចំណែកទីផ្សារស្ទើរតែគ្រប់ប្រទេស។
លោក វណ្ណៈ បានបញ្ជាក់ថា ការកើនឡើងការប្រមូលពន្ធទាំងនេះនឹងបង្ហាញពីការកើនឡើងសកម្មភាពពាណិជ្ជកម្មតាមអេឡិចត្រូនិកនៅកម្ពុជា។
លោកនិយាយថា៖ «វាគឺជារឿងជោគជ័យមួយសម្រាប់ GDT ដោយវាកើតចេញពីការកែលម្អដើម្បីធ្វើឱ្យការគ្រប់គ្រងពន្ធកាន់តែច្បាស់លាស់ និងមានតម្លាភាពសម្រាប់អ្នកជាប់ពន្ធ។ ចំណូលពន្ធបានពីប្រតិបត្តិការពាណិជ្ជកម្មតាមអេឡិចត្រូនិកនឹងនៅស្ថិតលើផ្លូវកំណើនខ្ពស់»។ លោកបន្តថា ជារួមការកើនឡើងការវិនិយោគក្នុងស្រុកថ្មីៗបាននាំឱ្យប្រាក់ចំណូលពន្ធកើនឡើងជាលំដាប់។
ក្នុងវេទិការដ្ឋាភិបាល និងផ្នែកឯកជនលើកទី១៩ ដែលធ្វើកាលពីសប្តាហ៍មុនថា ដោយសារតែកំណើនសេដ្ឋកិច្ចដ៏រឹងមាំ ចំណូលពន្ធនៅកម្ពុជាមានការកើនឡើងគួរឱ្យកត់សម្គាល់ ដែលអាចឱ្យរាជរដ្ឋាភិបាលកសាងហេដ្ឋារចនាសម្ព័ន្ធសំខាន់ៗ ដូចជាផ្លូវថ្នល់ ស្ពាន អគារ សាលារៀន និងមន្ទីរពេទ្យនៅទូទាំងប្រទេស។
លោកថ្លែងថា៖ «រដ្ឋាភិបាលនឹងមិនបង្កើតពន្ធថ្មី ឬដំឡើងអត្រាពន្ធដើម្បីបន្ថែមបន្ទុកដល់ប្រជាជននោះទេ»។
កម្ពុជាមានស្ថាប័ន ២ សម្រាប់ប្រមូលពន្ធ គឺអគ្គនាយកដ្ឋានពន្ធដារ និងអគ្គនាយកដ្ឋានគយ និងរដ្ឋាករកម្ពុជា ដែលប្រមូលពន្ធលើទំនិញនាំចូល-នាំចេញពីប្រទេសកម្ពុជា។ អគ្គនាយកដ្ឋានពន្ធដារផ្តោតលើការប្រមូលពន្ធផ្ទៃក្នុង ដូចជា ពន្ធលើប្រាក់ចំណូល ពន្ធប្រាក់ខែ ពន្ធលើតម្លៃបន្ថែម និងពន្ធអចលនទ្រព្យ ជាដើម។
នៅក្នុងឆ្នាំ ២០២៣ រដ្ឋាភិបាលកម្ពុជាបានកំណត់គោលដៅប្រាក់ចំណូលពីពន្ធដារ និងពន្ធគយចំនួន ៥,៥ ពាន់លានដុល្លារ កើនឡើងជិត ១៦ ភាគរយធៀបនឹងឆ្នាំ ២០២២៕
