ទិដ្ឋភាពកប៉ាល់ដឹកទូកុងតឺន័រនៅកំពង់ផែស្វយ័តព្រះសីហនុ កាលពីខែមេសា ឆ្នាំ ២០២៣។ ហុង មិនា
ភ្នំពេញៈ ជំនួបធុរកិច្ចរវាងពាណិជ្ជករកម្ពុជា-ជប៉ុន នឹងក្លាយជាចំណែកសំខាន់មួយក្នុងការជួយទាក់ទាញវិនិយោគិនជប៉ុនឱ្យចូលមកបណ្តាក់ទុនផ្ទាល់នៅកម្ពុជាកាន់តែច្រើន ខណៈទឹកប្រាក់ការផ្លាស់ប្តូរពាណិជ្ជកម្មរវាងប្រទេសទាំង ២ រយៈពេល ១០ ខែនៃឆ្នាំ ២០២៣ មានជាង ១,៥ ពាន់លានដុល្លារ។
ប្រធានអគ្គនាយកប្រតិបត្តិនៃធនាគារអេស៊ីលីដា លោក អ៊ិន ចាន់នី បានលើកឡើងក្នុងឱកាសនៃជំនួបរវាងវិនិយោគិនកម្ពុជា និងជប៉ុន ដែលរៀបចំនៅទីស្នាក់ការកណ្តាលនៃធនាគារ អេស៊ីលីដា កាលពីថ្ងៃទី ២០ ខែវិច្ឆិកាថា ជំនួបធុរកិច្ចរវាងដៃគូពាណិជ្ជកម្មកម្ពុជា-ជប៉ុន គឺជាឱកាសល្អសម្រាប់វិនិយោគិនប្រទេសទាំង ២ ដើម្បីប្រាស្រ័យទាក់ទងគ្នា និងសិក្សាស្វែងរកអត្ថប្រយោជន៍រួមនៃការវិនិយោគដ៏មានសក្តានុពលនៅកម្ពុជា។
លោកថ្លែងថា៖ «វិនិយោគិនជប៉ុន គឺបានធ្វើការសម្រេចចិត្តដ៏ត្រឹមត្រូវក្នុងការវិនិយោគនៅលើទឹកដីកម្ពុជា ដែលជាកន្លែងផ្តល់នូវសុខសន្តិភាពពេញលេញ និងសម្បូរបែប។ ទាំងនេះជាជម្រើសដ៏ត្រឹមត្រូវដែលប្រទេសកម្ពុជាផ្តល់នូវលក្ខខណ្ឌវិនិយោគដ៏ល្អដើម្បីបំពេញតម្រូវការជូនវិនិយោគិន»។
បើតាមធនាគារអេស៊ីលីដា នេះជាលើកទី៣ ហើយដែលធនាគាររបស់ខ្លួនសហការជាមួយសមាគមជប៉ុន-កម្ពុជា រៀបចំវេទិកានេះឡើង។ ក្នុងជំនួបខាងលើមានក្រុមហ៊ុនកម្ពុជា ៣០ និងក្រុមហ៊ុនជប៉ុន ២៨ ចូលរួម។
អនុប្រធានសភាពាណិជ្ជកម្មកម្ពុជា លោក លឹម ហេង ថ្មីៗនេះបានប្រាប់ ភ្នំពេញ ប៉ុស្តិ៍ថា ទោះបីទឹកប្រាក់នៃការផ្លាស់ប្តូរទំនិញរវាងប្រទេសទាំង ២ ធ្លាក់ចុះ ប៉ុន្តែលោកនៅតែមានសុទិដ្ឋិនិយមថា ចំនួននេះនឹងកើនឡើងវិញនៅក្នុងពេលឆាប់ៗ ខណៈប្រទេសទាំង ២ គឺសុទ្ធតែជាសមាជិកកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP)។
លោកលើកឡើងទៀតថា៖ «ដើម្បីជំរុញកិច្ចសហប្រតិបត្តិការផ្នែកពាណិជ្ជកម្មរវាងប្រទេសទាំង ២ ឱ្យកាន់តែធំថែមទៀត កន្លងមកសភាពាណិជ្ជកម្មកម្ពុជាក៏បានបើកការិយាល័យតំណាងរបស់ខ្លួន នៅទីក្រុងសែនដាយ (ប្រទេសជប៉ុន)។ ការិយាល័យនេះកំពុងជួយទាក់ទាញវិនិយោគិនជប៉ុនឱ្យចូលមកបណ្តាក់ទុននៅកម្ពុជា ក៏ដូចជាទាក់ទាញក្រុមហ៊ុនជប៉ុនឱ្យមកបញ្ជាទិញទំនិញពីកម្ពុជាផងដែរ»។
លោកប្រាប់ទៀតថា ការធ្លាក់ចុះទឹកប្រាក់នាំចូលពីជប៉ុនរហូតដល់ជិត ២០ ភាគរយ គឺដោយសារសមត្ថភាពនៃការដាំដុះ កែច្នៃ និងផលិតនៅកម្ពុជាមានកាន់តែច្រើន។
បើតាមលោក លឹម ហេង ផលិតផលសំខាន់ៗដែលកម្ពុជានាំទៅជប៉ុន មានដូចជា សម្លៀកបំពាក់ ស្បែកជើង គ្រឿងបង្គុំ និងកសិផល ចំណែកជប៉ុននាំចូលមកកម្ពុជាវិញមាន ផលិតផលគ្រឿងម៉ាស៊ីន រថយន្ត គ្រឿងអេឡិចត្រូនិក និងគ្រឿងចក្រសម្រាប់វិស័យកសិកម្មជាដើម។
ទិន្នន័យអគ្គនាយកដ្ឋានគយ និងរដ្ឋាករកម្ពុជាឱ្យដឹងថា ការធ្វើពាណិជ្ជកម្មរវាងកម្ពុជា-ជប៉ុន រយៈពេល ១០ ខែដើមឆ្នាំ ២០២៣ មានចំនួន ១,៥ ពាន់លានដុល្លារ ធ្លាក់ចុះ ៨,៥ ភាគរយបើធៀបរយៈពេលដូចគ្នាឆ្នាំ ២០២២។
ក្នុងចំនួននេះ គឺការនាំចេញរបស់កម្ពុជា ៩៧៤,៩៤ លានដុល្លារ ធ្លាក់ចុះ ១,៤ ភាគរយ និងជប៉ុននាំចូលមកកម្ពុជា ៥២៩,០៣ លានដុល្លារ ធ្លាក់ចុះ ១៩,៣ ភាគរយ។ បើតាមតួលេខខាងលើ គឺជញ្ជីងពាណិជ្ជកម្មកម្ពុជា មានឧត្តមភាព ៤៤៥,៩១ លានដុល្លារ៕
