លោក សុខ ចិន្តាសោភា រដ្ឋមន្ត្រីការបរទេសនិងសហប្រតិបត្តិការអន្តរជាតិ និងលោក E.P. Chet Greene រដ្ឋមន្ត្រីការបរទេសកសិកម្ម ពាណិជ្ជកម្ម និងកិច្ចការ បាប៊ុយដានៃប្រទេសអង់ទីហ្កា និងបាប៊ុយដា។ ក្រសួងការបរទេសកម្ពុជា
កម្ពុជា និង អង់ទីហ្កានិងបាប៊ុយដា បានប្តេជ្ញាចិត្តបង្កើនកិច្ចសហប្រតិបត្តិការទ្វេភាគី ដើម្បីផ្តល់ផលប្រយោជន៍ទៅវិញទៅមក ខណៈភាគីទាំងពីរ ក៏បានពិភាក្សាលើទំនិញដែលមានសក្តានុពលសម្រាប់ការធ្វើពាណិជ្ជកម្ម ជាពិសេស អង្ករ និងគ្រាប់ស្វាយចន្ទីជាដើម។
ការបង្ហាញឆន្ទៈនេះធ្វើឡើងនៅក្នុងជំនួបរវាង លោក សុខ ចិន្តាសោភា ឧបនាយករដ្ឋមន្ត្រី និងរដ្ឋមន្ត្រីការបរទេសនិងសហប្រតិបត្តិការអន្តរជាតិ និងលោក E.P. Chet Greene រដ្ឋមន្ត្រីការបរទេសកសិកម្ម ពាណិជ្ជកម្ម និងកិច្ចការ បាប៊ុយដានៃប្រទេសអង់ទីហ្កា និងបាប៊ុយដា ក្នុងឱកាសអញ្ជើញមកបំពេញទស្សនកិច្ចការងារនៅកម្ពុជា កាលពីថ្ងៃទី២៤ ខែវិច្ឆិកា ឆ្នាំ ២០២៣។
សេចក្តីប្រកាសព័ត៌មានស្តីពីជំនួបនោះបានឱ្យដឹងថា «ដំណើរទស្សនកិច្ចនេះគឺជាវឌ្ឍនភាពមួយដ៏សំខាន់ក្នុងការលើកកម្ពស់ទំនាក់ទំនងរវាងប្រទេសទាំងពីរ។ ទោះបីប្រទេសទាំងពីរស្ថិតក្នុងទីតាំងភូមិសាស្ត្រឆ្ងាយពីគ្នា ក៏រដ្ឋមន្ត្រីការបរទេសទាំងពីរ បានបញ្ជាក់នូវការប្តេជ្ញាចិត្តឥតងាករេ ក្នុងការបង្កើននូវកិច្ចសហប្រតិបត្តិការតាមវិស័យរវាងប្រទេសទាំងពីរ ដើម្បីជាប្រយោជន៍រួមដល់ប្រជាជននៃប្រទេសទាំងពីរ»។
នាឱកាសនោះ លោក សុខ ចិន្តាសោភា បានជម្រាបជូនលោករដ្ឋមន្ត្រី Greene នូវទិដ្ឋភាពគ្រប់ជ្រុងជ្រោយស្តីពី ស្ថានភាពនយោបាយនិងសេដ្ឋកិច្ចរបស់កម្ពុជា។
ចំណែក លោក Greene បានវាយតម្លៃខ្ពស់ចំពោះកំណើនសេដ្ឋកិច្ចរបស់កម្ពុជា និងស្នើកម្ពុជាពិចារណាជ្រើសរើសយកប្រទេសអង់ទីហ្កានិង បាប៊ុយដា ធ្វើជាច្រកចូលទៅកាន់ទីផ្សារនៃតំបន់ការ៉ាបៀន (Caribbean)។
បើតាមក្រសួងការបរទេសកម្ពុជា ភាគីទាំងពីរពិភាក្សាក៏បាន ផ្តោតលើទំនិញដែលមានសក្តានុពលសម្រាប់ការធ្វើពាណិជ្ជកម្ម ជាពិសេស អង្ករ និងគ្រាប់ស្វាយចន្ទី ព្រមទាំងកិច្ចសហប្រតិបត្តិការក្នុងវិស័យទេសចរណ៍និងកសិកម្ម។ ការណ៍នេះបង្ហាញនូវការប្តេជ្ញាចិត្ត របស់កម្ពុជា ក្នុងការជំរុញការផ្លាស់ប្តូរផ្នែកសេដ្ឋកិច្ច។
ភាគីទាំងពីរបានពិភាក្សាលើផែនការសកម្មភាព សំដៅលើកកម្ពស់កិច្ចសហប្រតិបត្តិការក្នុង ក្របខ័ណ្ឌទ្វេភាគីនិងពហុភាគី។
បន្ថែមពីនេះ លោក សុខ ចិន្តាសោភា បានទទួលយកដោយក្ដីរីករាយនូវការអញ្ជើញទៅបំពេញទស្សនកិច្ចនៅប្រទេសអង់ទីហ្កានិងបាប៊ុយដា ក្នុងពេលវេលាសមស្រប។ ភាគីទាំងពីរបានសង្កត់ធ្ងន់លើសារៈសំខាន់នៃការគាំទ្រគ្នាទៅវិញទៅមក នៅក្នុងវេទិកាពហុភាគី រួមទាំង ក្នុងស្ថាប័ននានារបស់អង្គការសហប្រជាជាតិ។ រដ្ឋមន្ត្រីការបរទេសនៃប្រទេសទាំងពីរក៏បានផ្លាស់ប្តូរទស្សនលើបញ្ហាតំបន់និងអន្តរជាតិដែលជាប្រយោជន៍និងកង្វល់រួមផងដែរ៕
