ទេសចរអន្តរជាតិ ត្រូវបានគេរំពឹងថានឹងកើនឡើងដល់ជិត ៩០% នៃចំនួនអ្នកទេសចរមុនវិបត្តិកូវីដ១៩ នៅត្រឹមចុងឆ្នាំនេះ។ AFP
ទេសចរអន្តរជាតិត្រូវបានគេរំពឹងថានឹងកើនឡើងដល់ជិត ៩០% នៃចំនួនអ្នកទេសចរមុនវិបត្តិកូវីដ១៩ នៅត្រឹមចុងឆ្នាំនេះ។ អង្គការទេសចរណ៍ពិភពលោក ឬហៅកាត់ថា UNWTO រាយការណ៍ថា ភ្ញៀវទេសចរប្រមាណ ៩៧៥ លាននាក់បានធ្វើដំណើរចេញក្រៅប្រទេស គិតចាប់ពីខែមករា ដល់ខែកញ្ញា ឆ្នាំ២០២៣ កើនឡើង ៣៨% បើធៀបនឹងរយៈពេលដូចគ្នាក្នុងឆ្នាំ២០២២។
នៅក្នុងត្រីមាសទី៣នៃឆ្នាំ២០២៣នេះ ចំនួនភ្ញៀវទេសចរសកលបានកើនឡើង ២២% បើធៀបនឹងរយៈពេលដូចគ្នាកាលពីឆ្នាំមុន។ ការកើនឡើងនេះគឺបណ្ដាលមកពីកត្តាជំរុញមួយចំនួន ដូចជារដូវក្តៅនៅអឌ្ឍគោលខាងជើងជាដើម។ ជាក់ស្ដែង ចំនួនអ្នកទេសចរអន្តរជាតិបានកើនដល់ ៩១% នៃចំនួនអ្នកទេសចរមុនវិបត្តិកូវីដ១៩ ហើយឈានដល់ ៩២% នៅក្នុងខែកក្កដា ដែលជាចំនួនខ្ពស់បំផុតបើគិតចាប់តាំងពីជំងឺរាតត្បាតកូវីដ១៩ បានចាប់ផ្តើម។
ជារួម វិស័យទេសចរណ៍បានបង្ហាញពីការស្ទុះងើបឡើងវិញយ៉ាងខ្លាំង ពោលគឺ ៨៧% បើធៀបនឹងស្ថានភាពមុនវិបត្តិកូវីដ១៩ រាប់ចាប់ពីខែមករា ដល់ខែកញ្ញា ឆ្នាំ២០២៣ ហើយនឹងស្ទុះងើបឡើងរហូតដល់ទៅ ៩០% នៅចុងឆ្នាំនេះ។ រីឯប្រាក់ចំណូលទេសចរអន្តរជាតិវិញ អាចឈានដល់ប្រមាណ ១,៤ ទ្រីលានដុល្លារសហរដ្ឋអាមេរិកក្នុងឆ្នាំ២០២៣ ដែលស្មើនឹងជិត ៩៣% នៃចំណូលកាលពីឆ្នាំ២០១៩ ដែលកាលនោះមានចំនួន ១,៥ ទ្រីលានដុល្លារសហរដ្ឋអាមេរិក។
អគ្គលេខាធិការអង្គការទេសចរណ៍ពិភពលោក លោក ជូរ៉ាប ប៉ូឡូលីកាសវីលី (Zurab Pololikashvili) បានមានប្រសាសន៍ថា «ទេសចរអន្តរជាតិបានស្ទុះងើបឡើងវិញស្ទើរតែទាំងស្រុងពីវិបត្តិកូវីដ១៩។ មិនត្រឹមតែប៉ុណ្ណោះ កន្លែងជាច្រើនបានមានចំនួនអ្នកទេសចរលើសពីកម្រិតស្ថានភាពមុនវិបត្តិកូវីដ១៩ ទាំងចំនួនមនុស្ស និងប្រាក់ចំណូល។ នេះគឺជាកត្តាសំខាន់ចំពោះតំបន់ដែលពឹងផ្អែកខ្លាំងលើវិស័យទេសចរណ៍សម្រាប់កំណើនសេដ្ឋកិច្ច និងសហគមន៍របស់ពួកគេ»។
នៅតំបន់មជ្ឈិមបូព៌ា គឺឈានមុខគេតែម្ដងក្នុងការងើបឡើងវិញពីវិបត្តិកូវីដ១៩ បើប្រៀបធៀបទៅនឹងតំបន់ផ្សេងៗទៀត ដោយគិតចាប់ពីខែមករា ដល់ខែកញ្ញា ឆ្នាំ២០២៣ ចំនួនអ្នកទេសចរគឺខ្ពស់ជាង ២០% នៃចំនួនអ្នកទេសចរមុនវិបត្តិកូវីដ១៩។
តួលេខនេះ បានធ្វើឱ្យតំបន់នេះក្លាយជាតំបន់តែមួយគត់ដែលមានចំនួនអ្នកទេសចរលើសពីកម្រិតឆ្នាំ២០១៩ ហើយការកើនឡើងនេះ គឺបណ្ដាលមកពីកត្តាជាច្រើនដូចជា ការធ្វើសាមញ្ញកម្មទៅលើទិដ្ឋាការ ការបង្កើតកន្លែងទេសចរណ៍ថ្មី ការវិនិយោគលើគម្រោងទេសចរណ៍ថ្មី និងការរៀបចំព្រឹត្តិការណ៍ធំៗជាដើម។
នៅទ្វីបអឺរ៉ុប ដែលជាគោលដៅទេសចរណ៍ធំជាងគេនៅទូទាំងពិភពលោក បានទទួលភ្ញៀវទេសចរអន្តរជាតិចំនួន ៥៥០ លាននាក់ ស្មើនឹង ៥៦% នៃចំនួនភ្ញៀវទេសចរអន្តរជាតិសរុបទូទាំងពិភពលោក។ តួលេខនេះបានបង្ហាញពីការងើបឡើងវិញរហូតដល់ ៩៤% នៃចំនួនអ្នកទេសចរមុនវិបត្តិកូវីដ១៩។ ការកើនឡើងនេះគឺដោយសារតែតម្រូវការខ្លាំងនៅក្នុងតំបន់ និងការចាប់អារម្មណ៍ខ្ពស់ពីភ្ញៀវទេសចរមកពីសហរដ្ឋអាមេរិក។
ដោយឡែក ក្នុងអំឡុងពេល ៩ ខែមកនេះ ទ្វីបអាហ្រ្វិកទទួលបានភ្ញៀវទេសចរចំនួន ៩២% នៃចំនួនអ្នកទេសចរមុនវិបត្តិកូវីដ១៩ ខណៈដែលនៅទ្វីបអាមេរិកមានចំនួន ៨៨%។ ជាការកត់សម្គាល់ ចំនួនភ្ញៀវទេសចរនៅទ្វីបអាមេរិកមានការកើនឡើងនេះ គឺបណ្ដាលមកពីកត្តាតម្រូវការនៅសហរដ្ឋអាមេរិក ជាពិសេសទិសដៅទេសចរណ៍សំខាន់ៗនៅតាមបណ្ដាប្រទេសតំបន់ការ៉ាប៊ីន។
រីឯទ្វីបអាស៊ី និងតំបន់ប៉ាស៊ីហ្វិកវិញ ចំនួនភ្ញៀវទេសចរបានកើនឡើងត្រឹមតែ ៦២% នៃចំនួនអ្នកទេសចរមុនវិបត្តិកូវីដ១៩ប៉ុណ្ណោះ ដោយសារតែការបើកឱ្យមានការធ្វើដំណើរអន្តរជាតិឡើងវិញមានភាពយឺតយ៉ាវ។ អត្រានៃការងើបឡើងវិញមានភាពខុសប្លែកគ្នានៅទូទាំងអនុតំបន់។ ជាក់ស្ដែង តំបន់អាស៊ីខាងត្បូងមានចំនួន ៩៥% ប៉ុន្តែតំបន់ភាគឦសានមានត្រឹមតែ ៥០% ប៉ុណ្ណោះ។
គួរដឹងដែរថា ប្រទេសសំខាន់ៗជាច្រើនមានតម្រូវការខ្ពស់ក្នុងការដែលប្រជាជនត្រូវធ្វើដំណើរចេញក្រៅប្រទេសក្នុងរយៈពេលចុងក្រោយនេះ ពោលគឺលើសពីកម្រិតចំនួនអ្នកដំណើរមុនវិបត្តិកូវីដ១៩ទៅទៀត។ ឧទាហរណ៍ អាល្លឺម៉ង់បានបង្កើនការចំណាយលើការធ្វើដំណើរទៅក្រៅប្រទេសចំនួន ១៣% និងសហរដ្ឋអាមេរិក ១១% បើធៀបនឹងរយៈពេល ៩ ខែដូចគ្នាក្នុងឆ្នាំ២០១៩។ រីឯប្រទេសអ៊ីតាលីវិញ បានបង្កើនការចំណាយរហូតដល់ទៅ ១៦% ក្នុងខែសីហា៕
