វិភាគដោយ៖ លោក ញឹម កុសល អនុប្រធានចាត់ការទូទៅនៃក្រុមហ៊ុនមូលបត្រ ភីភី លីង។
តម្លៃប្រេងឆៅបន្តធ្លាក់ចុះកាន់តែទាបចាប់តាំងពីខែកញ្ញា ឆ្នាំ២០២៣ ពីតម្លៃខ្ពស់បំផុតរបស់ខ្លួន ៩៥,៣០ ដុល្លារក្នុងមួយបារ៉ែល មកក្រោម ៦៩ ដុល្លារក្នុងមួយបារ៉ែល នៅវគ្គជួញដូរកាលពីថ្ងៃអង្គារ។
កាលពីថ្ងៃទី៣០ ខែវិច្ឆិកា កិច្ចប្រជុំរបស់ OPEC+ បានប្រកាសពីការកាត់បន្ថយផលិតកម្មចំនួន ១ លាន បារ៉ែលក្នុងមួយថ្ងៃ បន្ថែមទៅលើការកាត់បន្ថយផលិតកម្មចំនួន ១ លានបារ៉ែលក្នុងមួយថ្ងៃរបស់អារ៉ាប៊ីសាអ៊ូឌីត។ ក្រោយពីការប្រកាសរបស់កិច្ចប្រជុំ OPEC+ តម្លៃប្រេងឆៅបានកើនឡើង ២ដុល្លារ ដល់ ៧៩,៥០ ដុល្លារ ហើយ បន្ទាប់មក វាបានធ្លាក់ចុះវិញត្រឹម ៧៥,៦០ ដុល្លារក្នុងមួយបារ៉ែល។
នៅថ្ងៃទី១៤ វិច្ឆិកា ភ្នាក់ងារថាមពលអន្តរ- ជាតិបានដំឡើងការព្យាករណ៍របស់ខ្លួនលើតម្រូវការប្រេងសម្រាប់ឆ្នាំនេះ និងឆ្នាំ ២០២៤ ដោយកែប្រែពី ៨៨០ ពាន់បារ៉ែល ទៅ ៩៣០ពាន់បារ៉ែលក្នុងមួយថ្ងៃ។ យ៉ាងណាមិញទិន្នន័យ គឺទាបជាងការព្យាករណ៍របស់ OPEC ដែលមាន ២,២៥ លានបារ៉ែលក្នុងមួយថ្ងៃ។
យោងតាមរបាយការណ៍របស់ The Wall Street Journal ដែលចេញផ្សាយកាលពីថ្ងៃទី៦ ខែធ្នូ ស្តុកប្រេងរបស់សហរដ្ឋអាមេរិក បានកើនឡើងដល់ ២៩,៦ លានបារ៉ែល ខណៈដែលស្តុកទុកប្រេងយុទ្ធសាស្ត្រ បានកើនដល់ ៣៥១,៩ លានបារ៉ែល។ បន្ទាប់ពីការចេញផ្សាយទិន្នន័យខាងលើ តម្លៃប្រេងឆៅបានបន្តធ្លាក់ចុះដល់ក្រោម ៧០ ដុល្លារ ក្នុងមួយបារ៉ែល ដោយសារទីផ្សារ មានការព្រួយបារម្ភអំពីការថយចុះនៃតម្រូវការនិងការសង្ស័យលើការប្តេជ្ញាកាត់បន្ថយផលិតកម្មប្រេងបន្ថែមដែលគាំទ្រដោយ OPEC និងសម្ព័ន្ធភាពរបស់ខ្លួន។
ទន្ទឹមនឹងនេះ សន្ទស្សន៍ថ្លៃទំនិញប្រើប្រាស់របស់សហរដ្ឋអាមេរិក ក្នុងខែវិច្ឆិកា ធ្លាក់ចុះនៅត្រឹម៣,១% ខណៈដែលសន្ទ-ស្សន៍ថ្លៃទំនិញប្រើប្រាស់ស្នូលបានកើនឡើងដល់ ០,៣%។ កត្តានេះ ធ្វើឱ្យទីផ្សារបារម្ភថា ធនាគារកណ្ដាលសហរដ្ឋអាមេរិក ទំនងនឹង កាត់បន្ថយអត្រាការប្រាក់នៅដើមឆ្នាំក្រោយ។ អត្រាការប្រាក់ខ្ពស់ក្នុងរយៈពេលវែង អាចនាំឱ្យមានការថយចុះនៃតម្រូវការប្រេង។
ជាមួយនឹងកិច្ចប្រជុំរបស់គណៈកម្មាធិការទីផ្សារបើកចំហសហព័ន្ធ និងការសម្រេចចិត្តលើអត្រាការប្រាក់នៅយប់ថ្ងៃពុធ ខ្ញុំរំពឹងថាតម្លៃប្រេងឆៅនឹងមានការជួញដូរក្នុងចន្លោះពី ៦៩ ដុល្លារទៅ ៦៥ ដុល្លារ ក្នុងមួយបារ៉ែលនៅក្នុងសប្តាហ៍នេះ៕
