![](https://pppkhmer.sgp1.digitaloceanspaces.com/image/main/202312/21_12_2023_412217112_687738646825721_6120478470026400575_n.jpg)
ពិធីសម្ពោធសមាគមក្រុមហ៊ុនមូលបត្រកម្ពុជា កាលពីថ្ងៃទី ១៥ ធ្នូ។ រូបថត SERC
ភ្នំពេញៈ សមាគមក្រុមហ៊ុនមូលបត្រកម្ពុជា (CASF) ត្រូវបានដាក់ឱ្យដំណើរការជាផ្លូវការ ដើម្បីបម្រើជាចំណុចកណ្តាល និងជាក្រុមហ៊ុនតែ ១ គត់ ដែលទាក់ទងដោយផ្ទាល់ជាមួយភាគីពាក់ព័ន្ធទាំងអស់ក្នុងឧស្សាហកម្មនេះជាប្រចាំ ដែលវាជាការរួមចំណែកដល់ការអភិវឌ្ឍទីផ្សារមូលបត្រនៅកម្ពុជា។
លោក អ៊ីវ រ៉ាណ្ណារិទ្ធ ប្រធានសមាគមក្រុមហ៊ុនមូលបត្រកម្ពុជា (CASF) បានថ្លែងនៅក្នុងពិធីសម្ពោធ CASF កាលពីថ្ងៃទី ១៩ ខែធ្នូថា CASF ដែលបង្កើតឡើងកាលពីថ្ងៃទី ១៩ ខែកក្កដា ឆ្នាំ ២០២៣ គឺជាសមាគមថ្នាក់ជាតិតែមួយគត់ដែលត្រូវបានទទួលស្គាល់ដោយនិយតករមូលបត្រកម្ពុជា (SERC) ដើម្បីតំណាងឱ្យក្រុមហ៊ុនមូលបត្រទាំងអស់ក្នុងប្រទេសកម្ពុជា។
លោកថ្លែងថា៖ «គោលបំណង CASF គឺនឹងលើកកម្ពស់ និងអភិវឌ្ឍឧស្សាហកម្មមូលបត្រនៅកម្ពុជា អនុវត្តសកម្មភាពរបស់ខ្លួនដោយមានកិច្ចសហការយ៉ាងជិតស្និទ្ធ និងបម្រើជាបណ្តាញទំនាក់ទំនងជាមួយ SERC»។
លោកបន្តថា ក្រុមហ៊ុនមូលបត្រ ក្រុមហ៊ុនប្រឹក្សាយោបល់ផ្នែកហិរញ្ញវត្ថុ និងការវិនិយោគទាំងអស់ដែលទទួលបានអាជ្ញាប័ណ្ណពី SERC គឺជាសមាជិករបស់ CASF។ ដូច្នេះគិតត្រឹមថ្ងៃទី ១៥ ខែធ្នូ ឆ្នាំ ២០២៣ CASF មានក្រុមហ៊ុនចំនួន ១៦ ជាសមាជិក ដែលរួមមានក្រុមហ៊ុនមូលបត្រចំនួន ១៣ និងក្រុមហ៊ុនប្រឹក្សាយោបល់ផ្នែកហិរញ្ញវត្ថុ និងវិនិយោគចំនួន ៣។
លោកបញ្ជាក់ថា ទីផ្សារមូលបត្រដើរតួនាទីយ៉ាងសំខាន់ក្នុងសេដ្ឋកិច្ច។ ក្រុមហ៊ុនអាចប្រមូលមូលនិធិពីទីផ្សារមួយនេះ ដើម្បីវិនិយោគលើអាជីវកម្ម ការបង្កើតការងារ និងរួមគ្នារក្សាសេដ្ឋកិច្ចឱ្យរីកចម្រើន។
លោក ស៊ូ សុជាតិ អគ្គនាយក SERCបានថ្លែងក្នុងពិធីនោះថា រយៈពេលជាង ១ ទសវត្សរ៍កន្លងមកនេះ គ្រប់ភាគីពាក់ព័ន្ធបានចាប់ផ្តើមជាមួយគ្នា ដោយរៀនបណ្តើរ ធ្វើបណ្តើរ ចេញពីចំណុចសូន្យ រហូតដល់ពេលនេះផ្សារមូលបត្រកម្ពុជាមានក្រុមហ៊ុនចំនួន ២១ បោះផ្សាយលក់មូលបត្រ និងចុះបញ្ជីលក់មូលបត្រនៅផ្សារមូលបត្រកម្ពុជា ដែលក្រុមហ៊ុនទាំងនេះបានប្រមូលប្រាក់ប្រមាណ ៣៤៧,១៨ លានដុល្លារ។
លោកថ្លែងថា៖ «នេះជាមោទនភាពមួយសម្រាប់កម្ពុជា ដែលថ្វីដ្បិតតែប្រទេសយើងចាប់ផ្តើមទីផ្សារក្រោយគេ ទំហំទីផ្សារនៅតូច តែការអនុវត្ត និងការអភិវឌ្ឍទីផ្សារគឺស្របនឹងនិន្នាការតំបន់ និងសកល»។
យោងតាមលោក សុជាតិ គិតមកដល់ថ្ងៃទី ១៩ ខែធ្នូ SERC បានផ្តល់អាជ្ញាបណ្ណ ការអនុញ្ញាត និងការទទួលស្គាល់ដល់ក្រុមហ៊ុនធ្វើអាជីវកម្ម និងផ្តល់សេវាក្នុងវិស័យមូលបត្រ ចំនួន ១២០ ដែលក្នុងនោះ ក៏បានផ្តល់អាជ្ញាបណ្ណដល់ក្រុមហ៊ុនមូលបត្រចំនួន ១៣, ក្រុមហ៊ុនទីប្រឹក្សាហិរញ្ញវត្ថុ ៤, ក្រុមហ៊ុនទីប្រឹក្សាវិនិយោគ ២, ក្រុមហ៊ុនចែកចាយលក់មូលបត្រ ៣, ក្រុមហ៊ុនសមភាគីកណ្តាល ៥, ក្រុមហ៊ុនឈ្មួញជើងសាឧបករណ៍និស្សន្ទ ២២, ក្រុមហ៊ុនគ្រប់គ្រងមូលនិធិ ១៦, ក្រុមហ៊ុនថែរក្សាទ្រព្យសម្បត្តិជំនួស ៨, ក្រុមហ៊ុនចែកចាយលក់-ទិញត្រឡប់មកវិញ ឬទូទាត់សង ៤, និងក្រុមហ៊ុនអភិបាលមូលនិធិចំនួន ៣, និងបានផ្តល់អនុញ្ញាត និងការទទួលស្គាល់ដល់ក្រុមហ៊ុនផ្សេងៗទៀត។ គិតត្រឹមថ្ងៃទី ១៣ ខែធ្នូ ឆ្នាំ ២០២៣ SERC បានផ្តល់លេខអត្តសញ្ញាណវិនិយោគិនសរុប ៤៥.៨៧០៕