លោក សុខ វឿន ប្រធានសមាគមមីក្រូហិរញ្ញវត្ថុកម្ពុជា(CMA) និងជានាយកប្រតិបត្តិនៃគ្រឹះស្ថានមីក្រូហិរញ្ញវត្ថុ LOLC។ សហការី
ភ្នំពេញៈ ទោះបីជាមានភាពមិនប្រាកដប្រជានៃសេដ្ឋកិច្ចសកល និងក្នុងតំបន់ដែលកើតចេញពីការអូសបន្លាយពេលនៃសង្គ្រាមរុស្ស៊ី-អ៊ុយក្រែន និងបញ្ហាភូមិសាស្ត្រនយោបាយរវាងប្រទេសមហាអំណាចធំៗវិស័យហិរញ្ញវត្ថុកម្ពុជានៅតែមានភាពធន់នឹងកត្តាខាងក្រៅ។
យោងតាមទិន្នន័យសមាគមមីក្រូហិរញ្ញវត្ថុកម្ពុជា (CMA) គិតត្រឹមដំណាច់ត្រីមាសទី៣ ឆ្នាំ ២០២៣ វិស័យនេះមានសមតុល្យប្រាក់កម្ចីសរុបជាង ៥ ពាន់លានដុល្លារ និងមានអតិថិជនកម្ចីជាង ១,៥ លាននាក់ ខណៈគ្រឹះស្ថានមីក្រូហិរញ្ញវត្ថុទទួលប្រាក់បញ្ញើ មានប្រាក់បញ្ញើប្រមាណ ២ ពាន់លានដុល្លារ ជាមួយនឹងអ្នកដាក់ប្រាក់ជិត ២ លាននាក់។
ក្នុងន័យនេះលោក សុខ វឿន ប្រធាន CMA និងជានាយកប្រតិបត្តិនៃគ្រឹះស្ថានមីក្រូហិរញ្ញវត្ថុ LOLC(Cambodia)Plc បានផ្តល់បទសម្ភាន៍ជាមួយនឹងកាសែតភ្នំពេញប៉ុស្តិ៍ពិភាក្សាពីប្រតិបត្តិការអាជីវកម្មនៃវិស័យមីក្រូហិរញ្ញវត្ថុក្នុងឆ្នាំ ២០២៣ និងទស្សនវិស័យសម្រាប់ឆ្នាំ ២០២៤ ខាងមុខ។
រយៈពេលប៉ុន្មានឆ្នាំចុងក្រោយ នេះ វាជាឆ្នាំដ៏លំបាកសម្រាប់អាជីវកម្ម។ តើលោកយល់បែបណាដែរចំពោះឧស្សាហកម្មហិរញ្ញវត្ថុនៅកម្ពុជា?
វិស័យសេវាកម្មហិរញ្ញវត្ថុនៅតែដើរតួនាទីដ៏សំខាន់ក្នុងការផ្តល់សេវាហិរញ្ញវត្ថុដល់អតិថិជនទាំងបុគ្គល និងសាជីវកម្ម។ វិស័យនេះគឺជាផ្នែកមួយសំខាន់នៃសេដ្ឋកិច្ចកម្ពុជា ដែលចូលរួមដោយមានគ្រឹះស្ថានហិរញ្ញវត្ថុជាច្រើនរួមមាន ធនាគារ គ្រឹះស្ថានមីក្រូហិរញ្ញវត្ថុ ក្រុមហ៊ុនភតិសន្យា ប្រតិបត្តិករឥណទាន ... និងក្រុមហ៊ុនធានារ៉ាប់រង។
បើយោងតាមរបាយការណ៍ពាក់កណ្តាលឆ្នាំ ២០២៣ របស់ធនាគារជាតិនៃកម្ពុជា (NBC) ផលប័ត្រប្រាក់កម្ចីបានកើនឡើងប្រហែល ៤,៩ ភាគរយកាលពីខែមិថុនាឆ្នាំនេះធៀបទៅនឹងផលប័ត្រប្រាក់កម្ចីកាលពីចុងឆ្នាំ ២០២២ ខណៈប្រាក់បញ្ញើអតិថិជនបានកើនឡើងប្រហែល ៣,១ ភាគរយ។
សម្រាប់ប្រាក់កម្ចីត្រូវបានផ្តល់ទៅឱ្យវិស័យសំខាន់ៗដូចជា ពាណិជ្ជកម្ម លំនៅឋានសំណង់ និងអចលនទ្រព្យ កសិកម្ម សណ្ឋាគារ ភោជនីយដ្ឋាន និងផលិតកម្ម និងនៅក្នុងចំណោមវិស័យផ្សេងៗជាច្រើនទៀត។ ប្រាក់កម្ចីមិនដំណើរការនៅតាមធនាគារ និងគ្រឹះស្ថានមីក្រូហិរញ្ញវត្ថុ ស្ថិតក្នុងអត្រាមួយទាបដែលអាចគ្រប់គ្រងបាន។
និយាយជារួម យើងប្រឈមនឹងស្ថានការណ៍ពិបាកខ្លាំងទាំងអាជីវកម្ម និងការរស់នៅរបស់ប្រជាពលរដ្ឋ ដោយសារប្រទេសកម្ពុជា ក៏ដូចជាពិភពលោកប្រឈមនឹងវិបត្តិសេដ្ឋកិច្ច ហើយទើបតែបានស្ទុះងើបឡើងវិញពីជំងឺកូវីដ ១៩។ ទោះបីជាយ៉ាងណា ក្រោមយុទ្ធសាស្ត្រច្បាស់លាស់ និងការគាំទ្រយ៉ាងល្អពីនិយ័តករទាំងអស់ ជាពិសេស NBC និងរដ្ឋាភិបាល ដំណើរការនៃឧស្សាហកម្មហិរញ្ញវត្ថុនៅតែរក្សាសុវត្ថិភាពរួមគ្នាជាមួយអតិថិជនរបស់យើង។
តើប្រតិបត្តិការអាជីវកម្មរបស់ស្ថាប័នលោកនៅឆ្នាំនេះមានលក្ខណៈដូចម្តេចដែរ?
បើគិតត្រឹមខែកញ្ញា ក្នុងឆ្នាំ ២០២៣ ផលប័ត្រប្រាក់កម្ចីរបស់ LOLC មានជាង ១,២៤ ពាន់លានដុល្លារ និងសមតុល្យប្រាក់បញ្ញើមានចំនួន ៨៦៥ លានដុល្លារ។
យើងក៏មានទ្រព្យសកម្មដែលមានតម្លៃជាង ១,៥៤ ពាន់លានដុល្លារអាមេរិក និងបុគ្គលិកដែលមានបទពិសោធន៍ ជាង ៣ ៥០០ នាក់ផងដែរ។ LOLC (Cambodia)Plc. គឺជាគ្រឹះស្ថានមីក្រូហិរញ្ញវត្ថុឈានមុខគេមួយនៅក្នុងប្រទេសកម្ពុជា។ LOLC មានគោលបំណងចង់បង្កើតឥទ្ធិពលជាវិជ្ជមានយូរអង្វែងលើសហគមន៍ដែលខ្លួនបានបម្រើតាមរយៈការផ្តល់សេវាកម្មហិរញ្ញវត្ថុប្រកបដោយនិរន្តរភាព បរិយាប័ន្ន និងផ្តោតលើអតិថិជនស្របពេលជាមួយគ្នានឹងការបង្កើតតម្លៃបន្ថែមគ្រប់ភាគីពាក់ព័ន្ធ។
យើងមើលឃើញថាអ្នកខ្ចីប្រាក់កំពុងប្រឈមនឹងបញ្ហាលើការសងប្រាក់ត្រឡប់ទៅវិញ ដោយសារការធ្លាក់ចុះនៃសេដ្ឋកិច្ច។
តើអ្វីជាយុទ្ធសាស្ត្ររបស់លោកក្នុងការជួយពួកគេក្នុងពេលដ៏លំបាកនេះ?
ដើម្បីជួយដល់អតិថិជនមួយចំនួនដែលកំពុងប្រឈម មុខនឹងការលំបាកផ្នែកហិរញ្ញវត្ថុក្នុងអំឡុងពេលសេដ្ឋកិច្ចធ្លាក់ចុះនេះ LOLC ក៏បានព្យាយាមស្វែងយល់អំពីស្ថានភាព និងលំហូរសាច់ប្រាក់របស់អតិថិជន ហើយបានផ្តល់ការរៀបចំឥណទានឡើងវិញស្របតាមស្ថានភាពជាក់ស្តែង ដោយផ្តល់នូវជម្រើសដល់អតិថិជន ដើម្បីជួយសម្រួលដល់ការសងប្រាក់ និងរយៈពេលអនុគ្រោះដើម្បីស្តារអាជីវកម្មរបស់ពួកគេឡើងវិញ។ ទាក់ទងនឹងបញ្ហានេះ យើងចាំបាច់ត្រូវផ្តល់ការបន្ថែមសម្រាប់អ្នកដែលរៀបចំរៀបចំឥណទានឡើងវិញ។
រដ្ឋាភិបាល បានបង្កើតធនាគារសហគ្រាសធុនតូច និងមធ្យម (SME Bank) ដើម្បីធ្វើការជាមួយគ្រឹះស្ថានហិរញ្ញវត្ថុផ្សេងទៀត ចាក់បញ្ចូលថវិកាដល់ SMEs តើ LOLC បានចូលរួមជាមួយដែរឬទេ?
ជាការពិតណាស់សម្រាប់ការបង្កើតធនាគារ SME Bank នេះគឺយើងគ្រឹះស្ថានមីក្រូហិរញ្ញវត្ថុ LOLC របស់យើងក៏បានចូលរួម និងចូលរួមជាសមាជិកនៃគម្រោងនេះផងដែរ។ LOLC បានបញ្ចេញប្រាក់កម្ចីក្រោមគម្រោងនេះចំនួនប្រមាណ ២ លានដុល្លារ ដល់អតិថិជនដែលជា SME នៅទូទាំងប្រទេស។
យើងសង្កេតឃើញថាសេវាធនាគារតាមទូរស័ព្ទបានផ្លាស់ប្តូរបទពិសោធន៍របស់អតិថិជនក្នុងវិស័យធនាគារ និងទីផ្សារហិរញ្ញវត្ថុកម្ពុជា។ តើលោកយល់យ៉ាងដូចម្តេច?
សម្រាប់ការកើនឡើងនៃសេវាធនាគារចល័តគឺជាការផ្លាស់ប្តូរគួរឱ្យកត់សម្គាល់បំផុតមួយនៅក្នុងវិស័យហិរញ្ញវត្ថុរបស់កម្ពុជាយើងក្នុងរយៈពេលប៉ុន្មានឆ្នាំចុងក្រោយនេះ។
វិស័យហិរញ្ញវត្ថុបានក្លាយជាវិស័យនាំមុខគេក្នុងការចាប់យកចលនាឌីជីថល ពិសេសតាមរយៈតម្រូវការខ្ពស់ក្នុងការប្រើប្រាស់ធនាគារចល័ត។ ការរីករាលដាលកូវីដ១៩ ក្នុងរយៈពេលប៉ុន្មានឆ្នាំចុងក្រោយនេះ ក៏ជាមូលហេតុដែលជំរុញនិន្នាការនេះផងដែរ ដោយបញ្ជាក់ពីតម្រូវការ សុវត្ថិភាព រហ័ស កាត់បន្ថយការចំណាយ និងពេលវេលាដោយមិនចាំបាច់ត្រូវធ្វើដំណើរទៅការិយាល័យធនាគារដោយផ្ទាល់ ដើម្បីទទួលបានសេវាកម្មនោះទេ។
ការផ្លាស់ប្តូរនេះកំពុងជះឥទ្ធិពលយ៉ាងខ្លាំងដល់ទីផ្សារហិរញ្ញវត្ថុកម្ពុជាតាមរយៈការលើកកម្ពស់បរិយាបន្នហិរញ្ញវត្ថុ ការបង្កើនប្រសិទ្ធភាព និងការជំរុញនវានុវត្តន៍។ ធនាគារ និងគ្រឹះស្ថានហិរញ្ញវត្ថុក្នុងស្រុកជាច្រើនបានចូលរួមយ៉ាងសកម្មក្នុងកិច្ចខិតខំប្រឹងប្រែងបរិវត្តកម្មឌីជីថល ដើម្បីបំពេញតម្រូវការទីផ្សារដែលកំពុងកើនឡើង។
តើ LOLC បានធ្វើការស្ទង់មតិដើម្បីស្វែងយល់ពីការយល់ឃើញរបស់អតិថិជនដែលប្រើប្រាស់ផលិតផល និងសេវាកម្មរបស់ LOLC ដែរឬទេ?
នៅឆ្នាំ ២០២៣ LOLC បានសហការជាមួយ Oiko Credit ដែលជាអង្គការអន្តរជាតិដែលធ្វើការជាមួយគ្រឹះស្ថានមីក្រូហិរញ្ញវត្ ថុ(MFI) ដើម្បីជួយដល់ SMEs និងមូលនិធិផ្សេងទៀតដែលត្រូវការតាមរយៈការផ្តល់ហិរញ្ញប្បទានកម្ចី និងមធ្យោបាយផ្សេងទៀតបានធ្វើការស្ទង់មតិ ១ (ទំហំគំរូប្រមាណ ៨០០ នាក់) ក្នុងគោលបំណងស្វែងយល់ពីការយល់ឃើញរបស់អតិថិជន កំណត់កម្រិតនៃការយល់ដឹងរបស់អតិថិជនជាមួយនឹងផលិតផល និងសេវាកម្មរបស់យើង ស្វែងរកចំណុចខ្វះខាតរបស់ LOLC ដើម្បីបង្កើនគុណភាពផលិតផល និងសេវាកម្មតាមរយៈការប្រតិកម្មតបរបស់អតិថិជន និងផ្តល់អនុសាសន៍មួយចំនួនដើម្បីបង្កើនតម្រូវការការយល់ឃើញរបស់អតិថិជន។
ជាលទ្ធផលយើងកត់សម្គាល់លើចំណុចសំខាន់ៗមួយចំនួនដូចជា អ្នកឆ្លើយសំណួរ ៥៤ ភាគរយនៃអតិថិជនយើងគឺមានការសន្សំប្រាក់។ នៅក្នុងចំណោមអ្នកដែលមានប្រាក់សន្សំទាំងនោះ ចំនួន ៨០ ភាគរយ បានឱ្យដឹងថា ប្រាក់សន្សំរបស់ពួកគេបានកើនឡើងក្នុងរយៈពេល ១២ ខែមកនេះ។
ជាមួយគ្នានេះដែរ អ្នកឆ្លើយសំណួរ ៤២ ភាគរយ គឺប្រកបរបរកសិកម្មជាប្រភពចំណូលចម្បងរបស់ពួកគេ ខណៈអ្នកឆ្លើយសំណួរ ៦៦ ភាគរយ បានឱ្យដឹងថាពួកគេជាធុរជនធ្វើការងារដោយឯករាជ្យឬធ្វើការងារដើម្បីរកប្រាក់ចំណូលបន្ថែម។ ក្នុងចំណោមមនុស្សជិត ៨០០ នាក់ក្នុងនោះ ៩០ ភាគរយបានឱ្យដឹងថា LOLC មានឥទ្ធិពលជាវិជ្ជមានទៅលើជីវិតពួកគេ។មនុស្ស ៥៤៩ នាក់ក្នុងចំណោមមនុស្សជិត ៨០០ នាក់ដែលមានប្រាក់ចំណូលកើនចន្លោះពីខែឧសភា ឆ្នាំ ២០២២ ដល់ខែឧសភា ឆ្នាំ ២០២៣ ពួកគេមានចំនួន ៩៤ ភាគរយមានប្រាក់ចំណូលកើនឡើង ដោយពួកគេបានឱ្យដឹងថា LOLC មានឥទ្ធិពលខ្លះៗក្នុងការធ្វើឱ្យប្រាក់ចំណូលកើនឡើង។
សម្រាប់អ្នកឆ្លើយសំណួរ ៩២ ភាគរយដែលជាអតិថិជនរបស់ LOLC មានលទ្ធភាពប្រើប្រាស់អ៊ីនធឺណិតតាមទូរស័ព្ទដៃរបស់ពួកគេ ដែលជាគុណសម្បត្តិដ៏អស្ចារ្យសម្រាប់ការធ្វើឌីជីថលនីយកម្មហិរញ្ញវត្ថុ ការកាត់បន្ថយចំណាយប្រតិបត្តិការ និងប្រើប្រាស់ពេលវេលា មានសុវត្ថិភាពជាងមុន និងងាយស្រួលក្នុងការគាំទ្រប្រតិបត្តិការហិរញ្ញវត្ថុប្រចាំថ្ងៃ។
តើលោកមានទស្សនៈយ៉ាងណាចំពោះទស្សនវិស័យវិស័យនេះសម្រាប់ឆ្នាំ ២០២៤?
ទស្សនវិស័យសម្រាប់វិស័យមីក្រូហិរញ្ញវត្ថុរបស់កម្ពុជានៅឆ្នាំ ២០២៤ គឺខ្ញុំនៅតែមានសុទិដ្ឋិនិយមខ្លាំង ដោយសារតែកំណើនសេដ្ឋកិច្ចនៅតែរឹងមាំជាមួយនឹងការព្យាកររបស់រដ្ឋាភិបាលគឺក្នុងរង្វង់ ៦ ភាគរយនៅឆ្នាំក្រោយ។ ដោយមានការគាំទ្រពីរដ្ឋាភិបាល និងការឆាប់ទទួលយកនូវបច្ចេកវិទ្យាបានផ្តល់ឱកាសសម្រាប់ការពង្រីក និងបង្កើនការរួមបញ្ចូលផ្នែកហិរញ្ញវត្ថុ។ វិស័យចាំបាច់មួយចំនួនត្រូវសម្របខ្លួន បង្កើតថ្មី និងផ្តល់អាទិភាពដល់ការផ្តល់ប្រាក់កម្ចីប្រកបដោយការទទួលខុសត្រូវ ដើម្បីធានាបាននូវកំណើនប្រកបដោយចីរភាព និងឥទ្ធិពលវិជ្ជមាន៕
