ទិដ្ឋភាពនៅពីមុខសាលា CIA First International School Co., Ltd។ សហការី
ភ្នំពេញៈ ក្រុមហ៊ុន CIA First International School Co., Ltd នឹងធ្វើការចុះបញ្ជីបោះផ្សាយសញ្ញាបណ្ណសាជីវកម្មនៅផ្សារមូលបត្រកម្ពុជា (CSX) ក្នុងពេលឆាប់ៗនេះ ដើម្បីកៀរគរទុនបន្ថែមសម្រាប់ការពង្រីកអាជីវកម្ម។ សាលានេះគឺជាក្រុមហ៊ុនទី២ មកពីវិស័យអប់រំដែលចុះបញ្ជីនៅលើទីផ្សារមួយនេះ។
យោងតាមសេចក្តីប្រកាសរបស់ CSX នៅថ្ងៃទី ២៩ ខែវិច្ឆិកា សាលារៀន CIA First International School Co., Ltd បានទទួលការយល់ព្រមជាគោលការណ៍ពី CSX នៅថ្ងៃទី ២៣ ខែវិច្ឆិកា។ ពួកគេនឹងស្វែងរកការអនុម័តថែមទៀតពីនិយ័តករមូលបត្រកម្ពុជា (SERC)។
សេចក្តីប្រកាសព័ត៌មានបានឱ្យដឹងថា៖ «ក្រុមហ៊ុនផ្សារមូលបត្រកម្ពុជា (CSX) មានកិត្តិយសសូមជូនដំណឹងដល់សាធារណជនថា ផ.ម.ក. បានផ្តល់ការយល់ព្រមជាគោលការណ៍លើការត្រួតពិនិត្យភាពស្របច្បាប់លើការដាក់ពាក្យសុំចុះបញ្ជីសញ្ញាបណ្ណដល់ក្រុមហ៊ុន CIA First International School Co., Ltd នៅថ្ងៃទី ២៣ ខែវិច្ឆិកា ឆ្នាំ ២០២៣។ ដើម្បីចុះបញ្ជីជាផ្លូវការ និងមានការជួញដូរមូលបត្ររបស់ខ្លួននៅលើផ្សារមូលបត្រកម្ពុជា ក្រុមហ៊ុន CIA FIRST នឹងទទួលបានការយល់ព្រមពីនិយ័តករមូលបត្រកម្ពុជា និងបំពេញតាមលក្ខខណ្ឌតម្រូវការចុះបញ្ជីបន្ថែមទៀតរបស់ CSX»។
CSX បញ្ជាក់ថា ក្រុមហ៊ុន CIA First International School Co., Ltd គឺជាក្រុមហ៊ុនទី ៣ ដែលទទួលបានការយល់ព្រមជាគោលការណ៍លើការត្រួតពិនិត្យភាពស្របច្បាប់លើការដាក់ពាក្យសុំចុះបញ្ជីមូលបត្របំណុលពី CSX ក្នុងឆ្នាំ ២០២៣។ ក្រុមហ៊ុន CIA FIRST ត្រូវបានបង្កើតឡើងកាលពីឆ្នាំ ២០១៦ ក្នុងនាមជាក្រុមហ៊ុនផ្តល់សេវាអប់រំអន្តរជាតិឈានមុខគេនៅរាជធានីភ្នំពេញ។បច្ចុប្បន្នក្រុមហ៊ុនកំពុងដំណើរការជាមួយសាខាចំនួន ៣ ដើម្បីផ្តល់សេវាអប់រំចាប់ពីថ្នាក់មត្តេយ្យ ទៅដល់ថ្នាក់ទី ១២ ប្រកបដោយស្តង់ដា និងគុណភាព។
លោក ហុង សុហួរ អគ្គនាយក CSX បានប្រាប់ ភ្នំពេញ ប៉ុស្តិ៍ កាលពីថ្ងៃទី ៤ ខែធ្នូថា បច្ចុប្បន្នក្រុមហ៊ុនកំពុងធ្វើការងារជាមួយ SERC ដើម្បីស្វែងរកការយល់ព្រមសម្រាប់ការចុះបញ្ជីនៅលើទីផ្សារហ៊ុនកម្ពុជា។
លោកថ្លែងថា៖ «យើងជឿថា ក្រុមហ៊ុននេះនឹងជម្រះការងារដែលនៅសល់ក្នុងពេលឆាប់ៗ ដូច្នេះពួកគេអាចចុះបញ្ជីនៅចុងឆ្នាំនេះបាន។ ដោយសារការចេញលក់សញ្ញាបណ្ណរបស់ពួកគេ គឺសម្រាប់វិនិយោគិនដែលមានលក្ខណសម្បត្តិគ្រប់គ្រាន់ ដូច្នេះពួកគេមិនមានបញ្ហាអ្វីសម្រាប់ការរៀបចំរបស់ពួកគេទេ»។
លោកលើកឡើងថា៖ «ចំពោះមូលនិធិដែលពួកគេគ្រោងនឹងប្រមូលពីផ្សារហ៊ុនក៏មានចំនួនច្រើនដែរ ប៉ុន្តែនៅពេលនេះពួកគេត្រូវធ្វើការងារជាមួយនិយ័តករមូលបត្រកម្ពុជា ហើយក្រុមហ៊ុនក៏កំពុងពិភាក្សាជាមួយវិនិយោគិនរបស់ពួកគេផងដែរ ដូច្នេះយើងមិនដឹងថាពួកគេនឹងប្រមូលមូលនិធិចំនួនប៉ុន្មានទេ ប៉ុន្តែវាគឺជាចំនួនដ៏ច្រើន»។
លោក ស៊ូ សុជាតិ អគ្គនាយក SERC បានប្រាប់ថា លោកបានទទួលឯកសារស្នើសុំពីក្រុមហ៊ុននេះរួចហើយ ដោយក្រុមបច្ចេកទេសកំពុងពិនិត្យមើលមុនពេលស្វែងរកការយល់ព្រមពីប្រធានអាជ្ញាធរសេវាហិរញ្ញវត្ថុមិនមែនធនាគារ។
លោកបន្តថា៖ «យើងចាំបាច់ត្រូវពិនិត្យមើលពាក្យសុំរបស់ពួកគេដោយប្រយ័ត្ន ប៉ុន្តែអ្វីដែលយើងចង់បាន គឺធ្វើឱ្យវាកាន់តែលឿនតាមដែលយើងអាចធ្វើទៅបាន។ យើងគិតថា យើងអាចអនុម័តលើពាក្យសុំមុនដំណាច់ឆ្នាំនេះ ឬដើមឆ្នាំក្រោយ ពីព្រោះក្រុមហ៊ុននេះ អាចមានពេលវេលាក្នុងការធ្វើបរិវិសកម្មមុនពេលចុះបញ្ជីនៅលើផ្សារហ៊ុន»៕
