ក្រុមហ៊ុន Thai Airway បើកការហោះត្រង់ទៅកាន់ព្រលានយន្តហោះសៀមរាប ដើម្បីឆ្លើយតបទៅនឹងការកើនឡើងនៃចំនួនអ្នកដំណើរចូលមកទស្សនាតំបន់ឧទ្យានអង្គរ។ Thai Airways
ភ្នំពេញ: ក្រុមហ៊ុនអាកាសចរណ៍ Thai Airway បានបើកទិសដៅថ្មីទៅកាន់ព្រលានយន្តហោះអន្តរជាតិសៀមរាបអង្គរ ដោយហោះហើរត្រង់ពីទីក្រុងបាងកក ដើម្បីឆ្លើយតបទៅនឹងការកើនឡើងនៃចំនួនអ្នកដំណើរចូលមកទស្សនាតំបន់ឧទ្យានអង្គរ។
យោងតាមលោក ស៊ីន ចាន់សិរីវុត្ថា ដែលជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិល (SSCA) ក្រុមហ៊ុនអាកាសចរណ៍នេះបានចុះចតនៅព្រលានយន្តហោះអន្តរជាតិសៀមរាបអង្គរ កាលពីថ្ងៃទី ១ ខែធ្នូ ដោយមានអ្នកដំណើរចំនួន ១៥០ នាក់។
លោកថ្លែងថា៖ «នេះជាការចាប់ផ្តើមជើងហោះហើរដំបូងរបស់ក្រុមហ៊ុនអាកាសចរណ៍ Thai Airways រវាងទីក្រុងបាងកកទៅខេត្តសៀមរាបចាប់ តាំងពីពួកគេបានធ្វើការនៅទីនេះអស់រយៈពេលជាច្រើនទសវត្សរ៍មកហើយដែល ក្រុមហ៊ុននេះធ្វើការហោះហើរតែរវាងបាងកក-ភ្នំពេញតែប៉ុណ្ណោះ»។ លោក ថានៅពេលនេះ ក្រុមហ៊ុនបានបើកដំណើរការជើងហោះហើរ រវាងទីក្រុងបាងកក-សៀមរាប មួយជើងក្នុងមួយថ្ងៃ និងភ្នំពេញ-បាងកក ២ ដងក្នុងមួយថ្ងៃ។
លោកបានលើកឡើងថាដោយសារតែការកើនឡើងចំនួនភ្ញៀវទេសចរមកពីប្រទេសថៃ ធ្វើដំណើរមកកម្ពុជា បច្ចុប្បន្ន នេះមានក្រុមហ៊ុនអាកាសចរណ៍មួយ ចំនួនទៀតកំពុងដំណើរការ។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក (PATA) បានប្រាប់ ភ្នំពេញ ប៉ុស្តិ៍ថា បច្ចុប្បន្ននេះមានភ្ញៀវទេសចរបរទេសចំនួនច្រើនកំពុងមកពីតំបន់នេះ ជាពិសេសប្រទេសថៃ វៀតណាម ម៉ាឡេស៊ី និងឥណ្ឌូនេស៊ី មកកម្ពុជា ខណៈដែលចំនួនភ្ញៀវទេសចរជនជាតិចិន និងអឺរ៉ុបកំពុងកើនឡើងជាលំដាប់។
លោកបានថ្លែងបន្តទៀតថា៖ «ការសម្រេចចិត្តរបស់ក្រុមហ៊ុនអាកាសចរណ៍ Thai Airway ក្នុងការបើកផ្លូវហោះហើរថ្មីទៅកាន់ខេត្តសៀមរាប ដោយសារតែមានតម្រូវការកើនឡើងយ៉ាងខ្លាំងពីអ្នកដំណើរដែលចង់មានជើងហោះហើរត្រង់ទៅខេត្តមួយនេះ។ យើងមើលឃើញថាមានភ្ញៀវទេសចរយ៉ាងច្រើនកុះករមកពីតំបន់នេះ ដើម្បីទៅទស្សនាប្រាសាទអង្គរវត្ត និងប្រាសាទផ្សេងៗទៀតក្នុងខេត្តនេះ»។
កម្ពុជាទទួលបានភ្ញៀវបរទេសសរុបជាង ៤,៤ លាននាក់ ក្នុងរយៈពេល ១០ ខែ ដោយកើនឡើងខ្ពស់បើធៀបទៅនឹងរយៈពេលដូចគ្នាកាលពីឆ្នាំមុន ខណៈប្រទេសក្នុងតំបន់អាស៊ានចំនួន ២ នៅ តែបន្តឈរលំដាប់ឈានមុខគេនៃការ មកដល់របស់ភ្ញៀវទេសចរអន្តរជាតិនេះ។ នេះបើយោងតាមតួលេខពីក្រសួងទេសចរណ៍៕
