រូប ធនាគារជាតិនៃកម្ពុជា
លោកស្រី ជា សិរី ទេសាភិបាល ធនាគារជាតិនៃកម្ពុជា (NBC) បានថ្លែងថា ការប្រែប្រួលអាកាសធាតុ មិនត្រឹមតែបង្កហានិភ័យជារូបវន្តប៉ុណ្ណោះទេ តែវាក៏នឹងប៉ះពាល់ទៅលើសេដ្ឋកិច្ចសង្គមទាំងមូល ដោយគ្មានព្រំដែន តាមរយៈវិស័យពាណិជ្ជកម្ម ការវិនិយោគ អតិផរណា អត្រាការប្រាក់ ភាពអត់ការងារធ្វើ រហូតដល់អស្ថិរភាពសេដ្ឋកិច្ច និងសង្គមទាំងមូល។
ការថ្លែងរបស់លោកស្រីទេសាភិបាល ធនាគារជាតិនៃកម្ពុជា (NBC) បានធ្វើឡើងនៅក្នុងសន្និសីទម៉ាក្រូសេដ្ឋកិច្ចលើកទី ១០ ប្រចាំឆ្នាំ២០២៣ ស្តីពី «ហានិភ័យអាកាសធាតុ និងអន្តរកាលឆ្ពោះទៅកាន់សេដ្ឋកិច្ចបៃតង» សហការរៀបចំដោយធនាគារជាតិនៃកម្ពុជា និងកម្មវិធីអភិវឌ្ឍន៍សហប្រជាជាតិ (UNDP) កាលពីថ្ងៃទី៨ ខែធ្នូ ឆ្នាំ ២០២៣ នៅរាជធានីភ្នំពេញ។
លោកស្រីបានលើកឡើងទៀតថា ការសម្រេចយក ប្រធានបទស្តីពី ហានិភ័យអាកាសធាតុ និងអន្តរកាលឆ្ពោះទៅកាន់សេដ្ឋកិច្ចបៃតង នៅក្នុងសន្និសីទម៉ាក្រូសេដ្ឋកិច្ចលើកទី១០ ប្រចាំឆ្នាំ២០២៣នេះ ដោយសារតែមជ្ឈដ្ឋានជាតិ តំបន់ និងអន្តរជាតិ បាននិងកំពុងផ្តោតការយកចិត្តទុកដាក់កាន់តែខ្លាំង ហើយបានជំរុញឱ្យភាគីពាក់ព័ន្ធបញ្ជ្រាបបញ្ហានេះទៅក្នុងការអនុវត្តគោលនយោបាយនិងសកម្មភាពរបស់ខ្លួន។
លោកស្រីបានបញ្ជាក់ថា៖«កម្ពុជា ក៏បានដើរតួយ៉ាងសកម្ម ក្នុងការរួមចំណែកកាត់បន្ថយបម្រែបម្រួលអាកាសធាតុ និងបានប្តេជ្ញាដាក់ចេញគោលនយោបាយ ឆ្ពោះទៅកាន់សេដ្ឋកិច្ចបៃតង»។
លោកស្រីបានបន្ថែមថា ប្រទេសកម្ពុជា ជាប្រទេសដែលមានការបញ្ចេញឧស្ម័នកាបូនទាប ប៉ុន្តែជាប្រទេសមួយដែលងាយរងគ្រោះនឹងការប្រែប្រួលអាកាសធាតុ ជាពិសេសតាមរយៈវិស័យកសិកម្ម។
យោងតាមរបាយការណ៍ដែលទើបចេញផ្សាយកាលពីចុងខែតុលា របស់ធនាគារពិភពលោក កម្ពុជា កំពុងរងផលប៉ះពាល់ខ្លាំងពីការប្រែប្រួលអាកាសធាតុ ដោយភាពរាំងស្ងួត និងទឹកជំនន់ បានកើតមានញឹកញាប់និងខ្លាំងជាងមុន ដោយក្នុងនោះផលស្រូវត្រូវបានបាត់បង់ប្រមាណ១០០លានដុល្លារ ដោយសារការរងគ្រោះរាំងស្ងួត ដែលបណ្តាលមកពីបាតុភូត អែលនីណូ កាលពីឆ្នាំ ២០១៩ ខណៈដែលទឹកជំនន់នៅខែកញ្ញា ឆ្នាំ២០២២ បានប៉ះពាល់ដល់ខេត្តចំនួន១៤ និងប្រជាពលរដ្ឋប្រមាណជាង ៨,៥ ម៉ឺនគ្រួសារ។
លោកស្រី ជា សេរី បានបញ្ជាក់បន្ថែមថា៖«ជាទូទៅផលប៉ះពាល់ នៃការប្រែប្រួលអាកាសធាតុ បានប៉ះពាល់ដល់ជីវភាពប្រជាពលរដ្ឋក្នុងវិស័យកសិកម្ម ដោយផ្ទាល់ និងវិស័យដទៃទៀតដោយប្រយោល។ ដូចនេះផលប៉ះពាល់ពីការប្រែប្រួលអាកាសធាតុទៅលើវិស័យកសិកម្ម អាចបង្កជាបញ្ហាសន្តិសុខស្បៀង និងទំនិញឡើងថ្លៃ ដែលប៉ះពាល់ដល់ជីវភាពរស់នៅរបស់ប្រជាពលរដ្ឋជារួម»៕
