រូប ក្រុមប្រឹក្សាអភិវឌ្ឍន៍កម្ពុជា
ក្រុមប្រឹក្សាអភិវឌ្ឍន៍កម្ពុជា (CDC) បានបើកកិច្ចពិភាក្សាការងារជាមួយក្រសួងការបរទេស និងសហប្រតិបត្តិការអន្តរជាតិ ក្រសួងពាណិជ្ជកម្ម អគ្គនាយកដ្ឋានគយ និងរដ្ឋាករ និងតំណាងក្រុមហ៊ុន XDS Bicycle ដើម្បីស្វែងរកដំណោះស្រាយផ្នែកបច្ចេកទេសពាក់ព័ន្ធនឹងបញ្ហាទីផ្សារ និងថែមទាំងវិនិយោគិន។
កិច្ចពិភាក្សានេះ បានប្រព្រឹត្តទៅកាលពីព្រឹកថ្ងៃទី១២ ខែមករា ឆ្នាំ២០២៤ ដែលដឹកនាំកិច្ចពិភាក្សានេះ ដោយលោក សួន សុផល អគ្គលេខាធិការរងគណៈកម្មាធិការវិនិយោគកម្ពុជា (គ.វ.ក.) និងជាអនុប្រធានអចិន្ត្រៃយ៍នៃក្រុមការងារអន្តរក្រសួងដើម្បីពិនិត្យ វាយតម្លៃ និងស្វែងរកដំណោះស្រាយករណីការនាំចេញទំនិញកម្ពុជាទៅកាន់ទីផ្សារអន្តរជាតិ។
នៅក្នុងកិច្ចពិភាក្សានេះ លោក សួន សុផល បានថ្លែងថា កិច្ចពិភាក្សានេះ សំដៅធ្វើយ៉ាងណាធានាឱ្យបានថា វិនិយោគិននឹងទទួលបានសេវាថែទាំវិនិយោគប្រកបដោយភាពកក់ក្តៅ និងទំនុកចិត្ត ខណៈពន្លឺនៃដំណោះស្រាយផ្នែកបច្ចេកទេសលើបញ្ហាទីផ្សាររបស់ក្រុមហ៊ុន XDS Bicycle នឹងកាន់តែមានរស្មីនាពេលដ៏ខ្លីខាងមុខ។
លោកបានបង្ហាញពីការជឿជាក់ថា៖«ការបំពេញភារកិច្ចយ៉ាងស្វាហាប់របស់ក្រុមការងារដោយឈរលើអភិក្រម “ពេលវេលាជាមាសប្រាក់ ប្រសិទ្ធផលគឺជាអាយុជីវិត” នឹងនាំមកនូវផ្លែផ្កាគួរជាទីគាប់ប្រសើរ ក៏ដូចជាបង្កលក្ខណៈសម្រាប់ទាក់ទាញគម្រោងវិនិយោគដែលមានសែស្រឡាយ ឬមុខសញ្ញាប្រហាក់ប្រហែលគ្នានាពេលអនាគត សំដៅចូលរួមចំណែករុញច្រានកំណើនសេដ្ឋកិច្ចរបស់កម្ពុជាឈានឆ្ពោះសម្រេចបាននូវបង្គោលចរដែលរាជរដ្ឋាភិបាលនីតិកាលទី៧ បានកំណត់ក្នុងយុទ្ធសាស្ត្របញ្ចកោណដំណាក់កាលទី ១»។
គួររំឭកថា កាលពីអំឡុងខែតុលា ឆ្នាំ២០២៣ នៅក្នុងដំណើរចុះទៅទស្សនកិច្ចថែទាំវិនិយោគិន នៅទីក្រុង Shenzhen សាធារណរដ្ឋប្រជាមានិតចិន លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជា ធ្លាប់បានថ្លែងថា ក្រុមហ៊ុន XDS Bicycle បានពង្រីកសង្វាក់ផលិតកម្មរបស់ខ្លួនបានយ៉ាងឆាប់រហ័សក្នុងព្រះរាជាណាចក្រកម្ពុជា។
ជាពិសេសជាងនេះទៅទៀត ក្រុមហ៊ុនបានបង្ហាញអំពីចក្ខុវិស័យ ក្នុងការពង្រីករោងចក្ររបស់ខ្លួនដែលមានទីតាំងក្នុងក្រុងបាវិត ឱ្យមានទំហំធំដូចរោងចក្រ ក្នុងទីស្នាក់ការកណ្តាលទីក្រុង Shenzhen នេះផងដែរ។
នាឱកាសនោះ លោក ស៊ុន ចាន់ថុល បានថ្លែងថា ៖«យើងសូមស្វាគមន៍ចំពោះសំណូមពររបស់ក្រុមហ៊ុន ជាពិសេសបញ្ហាប្រឈមដែលក្រុមហ៊ុនកំពុងជួប ដើម្បីឱ្យរដ្ឋាភិបាលកម្ពុជាចូលរួមដោះស្រាយ ក្នុងទិសដៅជំរុញឱ្យក្រុមហ៊ុនវិនិយោគពង្រីករោងចក្របន្ថែមទៀតនៅកម្ពុជា ព្រមទាំងអាចប្រែក្លាយជាមជ្ឈមណ្ឌលនៃឧត្តមភាព (Center of Excellence) នៅក្នុងតំបន់ និងនៅលើពិភពលោក ដើម្បីបង្កើតការងារបន្ថែមដល់ប្រជាពលរដ្ឋកម្ពុជា»។
បើតាមក្រុមប្រឹក្សាអភិវឌ្ឍន៍កម្ពុជា ក្រុមហ៊ុន XDS Bicycle បានសម្រេចចិត្តចូលមកវិនិយោគបង្កើតរោងចក្រនៅកម្ពុជា រហូតបច្ចុប្បន្ននេះបានផ្តល់ឱកាសការងារជូនដល់ប្រជាពលរដ្ឋប្រមាណ ១ ៤០០ នាក់រួចមកហើយ៕
