រដ្ឋាភិបាលចាប់ផ្តើមពិភាក្សាសេចក្តីព្រាង MoU ស្តីពីការបង្កើនទំនាក់ទំនងពាណិជ្ជកម្មជាមួយអារ៉ាប៊ីសាអ៊ូឌីត។ ហុង មិនា
កម្ពុជា កំពុងដំណើរការឆ្ពោះទៅរកការចាប់ផ្តើមកិច្ចពិភាក្សាលើសេចក្តីព្រាងអនុស្សរណៈនៃការយោគយល់គ្នា (MoU) ស្តីពីការបង្កើនទំនាក់ទំនងពាណិជ្ជកម្មជាមួយអារ៉ាប៊ីសាអ៊ូឌីត ជាវិធានការមួយ ដើម្បីជំរុញការងារឆ្ពោះទៅមុខតាមទិសដៅរបស់រដ្ឋាភិបាលក្នុងការលើកកម្ពស់ពាណិជ្ជកម្ម ទេសចរណ៍ និង ការវិនិយោគ។
លោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្ម កាលពីថ្ងៃទី១៦ ខែមករា បានដឹកនាំកិច្ចប្រជុំផ្ទៃក្នុង ដើម្បីពិនិត្យសេចក្តីព្រាង MoU ស្តីពីការបង្កើនទំនាក់ទំនងពាណិជ្ជកម្មរវាងកម្ពុជា និងអារ៉ាប៊ីសាអ៊ូឌីត។
លោក ប៉ែន សុវិជាតិ រដ្ឋលេខាធិការក្រសួងពាណិជ្ជកម្ម បានប្រាប់ភ្នំពេញប៉ុស្តិ៍នៅថ្ងៃទី១៧ ខែមករា ថា ក្រសួងបានរៀបចំកិច្ចប្រជុំផ្ទៃក្នុងពិភាក្សាលើសេចក្តីព្រាងអនុស្សរណៈនៃការយោគយល់គ្នា (MoU) ស្តីពីការបង្កើនទំនាក់ទំនងពាណិជ្ជកម្មរវាងកម្ពុជា និងអារ៉ាប៊ីសាអ៊ូឌីត ដើម្បីជំរុញពាណិជ្ជកម្ម និងការវិនិយោគរវាងប្រទេសទាំង២បណ្ដាប្រទេសជាច្រើនទៀតនៅមជ្ឈិមបូព៌ា។
លោកថ្លែងថា៖ «ការពិភាក្សាផ្ទៃក្នុង នឹងត្រួសត្រាយផ្លូវសម្រាប់ការចរចាបើកទីផ្សារថ្មីជាមួយអារ៉ាប៊ីសាអ៊ូឌីត។ ហើយដើម្បីបង្កើតវាជាច្រកទ្វារមួយដើម្បីផ្សព្វផ្សាយផលិតផលរបស់យើងទៅកាន់បណ្តាប្រទេសមជ្ឈិមបូព៌ា ខណៈពេលដែលយើងក៏កំពុងចរចាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា-អេមីរ៉ាតអារ៉ាប់រួម (CAM-UAE CEPA)»។
លោកបន្ថែមថា៖ «នៅពេលយើងសម្រេចបានកិច្ចព្រមព្រៀងជាមួយប្រទេសទាំងនេះ យើងមិនត្រឹមតែអាចពង្រីកផលិតផលរបស់យើងទៅកាន់ប្រទេសទាំងនេះប៉ុណ្ណោះទេ ប៉ុន្តែយើងក៏អាចប្រើប្រាស់វាជាច្រកមួយទៅកាន់បណ្តាប្រទេសនៅអាហ្វ្រិកផងដែរ»។
លោកលើកឡើងថា៖ «យើងជឿជាក់ថានៅពេលអនាគតដ៏ខ្លីខាងមុខនេះ យើងនឹងមើលឃើញការធ្វើពាណិជ្ជកម្ម និងការវិនិយោគពីបណ្តាប្រទេសអារ៉ាប់មកពួកយើងកើនឡើងយ៉ាងខ្លាំង។ ការណ៍នេះក៏នឹងផ្តល់អត្ថប្រយោជន៍ផងដែរសម្រាប់យើងក្នុងការជំរុញការនាំចេញកសិផលទៅកាន់ប្រទេសមួយនេះ និងបណ្ដាប្រទេសផ្សេងទៀតឱ្យកាន់តែមានភាពប្រសើរឡើង»។
នៅក្រៅកិច្ចប្រជុំកំពូលអាស៊ាន-ក្រុមប្រឹក្សាសហប្រតិបត្តិការឈូងសមុទ្រ (GCC) នៅទីក្រុងរីយ៉ាដ កាលពីថ្ងៃទី២០ ខែតុលា ឆ្នាំ២០២៣ លោកនាយករដ្ឋមន្ត្រី ហ៊ុន ម៉ាណែត និងព្រះអង្គម្ចាស់ Mohammed bin Salman ជានាយករដ្ឋមន្ត្រីនៃព្រះរាជាណាចក្រអារ៉ាប៊ីសាអ៊ូឌីត បានប្តេជ្ញា ចិត្តជំរុញ ពាណិជ្ជកម្ម វិនិយោគនិងទេសចរណ៍។
ក្នុងឱកាសនោះ លោកនាយករដ្ឋមន្ត្រី ហ៊ុន ម៉ាណែត បានជម្រាបជូនអំពីទិសដៅសក្តានុពលនៃការពង្រឹងទំនាក់ទំនងទ្វេភាគី ដើម្បីបង្កើនកិច្ចសហប្រតិបត្តិការលើវិស័យសំខាន់ៗមួយចំនួន រួមមានពាណិជ្ជកម្ម ការវិនិយោគ ថាមពល និងវិស័យសក្តានុពលផ្សេងទៀត ដើម្បីផលប្រយោជន៍ទៅវិញទៅមករបស់ប្រទេស និងប្រជាជនទាំង២។ នេះបើយោងតាមសេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ (MFAIC)។
កាលពីថ្ងៃទី១៦ ខែមីនា លោក ប៉ាន សូរស័ក្តិ អតីតរដ្ឋមន្ត្រីក្រសួងពាណិជ្ជកម្ម និងលោក Thani bin Ahmed al-Zeyoudiរដ្ឋមន្ត្រីក្រសួងពាណិជ្ជកម្មបរទេសអេមីរ៉ាតអារ៉ាប់រួម បានប្រកាសរួមគ្នាអំពីការបញ្ចប់កិច្ចចរចាជាផ្លូវការសម្រាប់កិច្ចព្រមព្រៀងភាពជាដៃគូសេដ្ឋកិច្ចប់ជ្រុងជ្រោយរវាងកម្ពុជា-អេមីរ៉ាតអារ៉ាប់រួម (CAM-UAE CEPA) តាមរយៈវីដេអូ។
CEPA គឺជាប្រភេទនៃកិច្ចព្រមព្រៀងពាណិជ្ជកម្មសេរី (FTA) ដែលជាទូទៅត្រូវបានបង្កើតឡើងសម្រាប់ការគ្របដណ្ដប់យ៉ាងទូលំទូលាយលើសពីទំនិញ ហើយអាចមានចែងពីការផ្តល់សេវាកម្ម ការវិនិយោគ ការដោះស្រាយវិវាទ កម្មសិទ្ធិបញ្ញា លទ្ធកម្មរបស់រដ្ឋាភិបាល និងទម្រង់បន្ថែមនៃកិច្ចសហប្រតិបត្តិការសេដ្ឋកិច្ចជាពិសេស។
យោងតាមទិន្នន័យរបស់ក្រសួងពាណិជ្ជកម្ម ពាណិជ្ជកម្មទ្វេភាគីរវាងកម្ពុជា-អារ៉ាប៊ីសាអ៊ូឌីត សម្រេចបាន៣២,២៥៨ លានដុល្លារកាលពីឆ្នាំ២០២៣ កើនឡើងជិត ២០ ភាគរយ។ ក្នុងនោះ ការនាំចេញសរុបរបស់កម្ពុជាសម្រេចបាន ៩,២៥៨ លានដុល្លារ កើនឡើង ៣៣,២៥ ភាគរយ និងការនាំចូលសរុបមានចំនួន ២៣ លានដុល្លារ កើនឡើង ១០,៣៨ ភាគរយ៕
