ចរាចរណ៍ទំនិញរវាងកម្ពុជា-សិង្ហបុរី ក្នុងឆ្នាំ ២០២៣ មានទឹកប្រាក់ជិត ៩២០ លានដុល្លារ។ ហេង ជីវ័ន
ភ្នំពេញៈ ទឹកប្រាក់នៃការនាំចេញ នាំចូលទំនិញរវាងកម្ពុជា-សិង្ហបុរី កាលពីឆ្នាំ ២០២៣ មានចំនួនជិត ៩២០ លានដុល្លារ កើនជាង ៧ ភាគរយបើធៀបនឹងឆ្នាំ ២០២២ ដោយក្នុងនោះទំនិញសិង្ហបុរីនាំមកកម្ពុជាមានចំណែកជាង ៩៤ ភាគរយ។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា (GDCE)។
តារាងស្ថិតិជញ្ជីងពាណិជ្ជកម្មអន្តរជាតិ ដែលកត់ត្រាដោយ GDCE បានឱ្យដឹងថា ប្រទេសសិង្ហបុរីគឺជាដៃគូពាណិជ្ជកម្មធំជាងគេទី ៩ របស់កម្ពុជា ដោយក្នុងឆ្នាំ ២០២៣ ការធ្វើពាណិជ្ជកម្មរវាងប្រទេសទាំង ២ មានទឹកប្រាក់សរុប ៩១៧,៤៥ លានដុល្លារ កើន ៧,១ ភាគរយធៀបឆ្នាំ ២០២២ ដែលមាន ៨៥៦,៩ លានដុល្លារ។
ក្នុងចំនួនទឹកប្រាក់នេះ គឺទំនិញកម្ពុជានាំទៅសិង្ហបុរី ៥១,២៣ លានដុល្លារ ធ្លាក់ចុះ ៩,៨ ភាគរយ និងទំនិញសិង្ហបុរីនាំមកកម្ពុជា ៨៦៦,២២ លានដុល្លារ កើន ៨,៣ភាគរយ។ ផ្អែកតាមតួលេខជញ្ជីងពាណិជ្ជកម្មកម្ពុជា-សិង្ហបុរី ឆ្នាំ ២០២៣ គឺជញ្ជីងពាណិជ្ជកម្មកម្ពុជាមានឱនភាព ៨១៤,៩៩ លានដុល្លារ កើនពី ៧៤៣,៣៣ លានដុល្លារក្នុងឆ្នាំ ២០២២។
អនុប្រធានសភាពាណិជ្ជកម្មកម្ពុជា លោក លឹម ហេង បាននិយាយថា សិង្ហបុរី គឺជាប្រទេសតូចក្នុងតំបន់អាស៊ាន ប៉ុន្តែមានសេដ្ឋកិច្ច និងឧស្សាហកម្មរីកចម្រើន ដូច្នេះកម្ពុជាតែងទទួលបានលំហូរសម្ភារ គ្រឿងបរិក្ខារប្រើបច្ចេកវិទ្យាទំនើបៗជាច្រើនពីសិង្ហបុរី ខណៈកម្ពុជាដែលជាប្រទេសកំពុងអភិវឌ្ឍន៍ក៏បាននាំទំនិញមួយចំនួន(ភាគច្រើនផលិតផលវាយនភណ្ឌ និងកសិកម្ម)ទៅប្រទេសសិង្ហបុរី។ លោកបន្តថា ដោយសារកម្ពុជា-សិង្ហបុរី គឺជាសមាជិកអាស៊ាន ហើយប្រទេសទាំង ២ ក៏ជាសមាជិកកិច្ចព្រមព្រៀង RCEP ដូច្នេះការផ្លាស់ប្តូរទំនិញរវាងប្រទេសទាំង ២ ប្រាកដជានឹងកើនឡើងបន្ថែមទៀតនៅពេលកំណើនសេដ្ឋកិច្ចពិភពលោកមានភាពរឹងមាំ។
លោកបានប្រាប់ភ្នំពេញប៉ុស្តិ៍នៅថ្ងៃទី ២៤ ខែមករា ថា៖«ជាមួយនឹងការព្យាករកំណើនសេដ្ឋកិច្ចសកលឆ្នាំ ២០២៤ នឹងល្អជាងឆ្នាំ ២០២៣ នោះ ខ្ញុំមានសុទិដ្ឋិនិយមថា ការនាំចេញនាំចូលទំនិញរវាងប្រទេសទាំង ២ នឹងឡើងព្រមគ្នា»។
លោកប្រាប់ទៀតថា ក្រៅពីទំនាក់ទំនងពាណិជ្ជកម្មទំនិញ ប្រទេសទាំង ២ ក៏មានភាពល្អប្រសើរជាមួយគ្នាលើវិស័យទេសចរណ៍ និងការបណ្តាក់ទុនផ្ទាល់របស់វិនិយោគិនសិង្ហបុរីនៅកម្ពុជាដែរ។
ភាគច្រើននៃទំនិញដែលកម្ពុជានាំទៅសិង្ហបុរី គឺជាផលិតផលសម្លៀកបំពាក់ កាបូប និងស្បែកជើង គ្រឿងបង្គុំអគ្គិសនី និងផលិតផលកសិកម្ម និងកសិឧស្សាហកម្ម ចំណែកទំនិញសិង្ហបុរីនាំមកកម្ពុជា គឺសម្ភារអេឡិចត្រូនិកអគ្គិសនី ភេសជ្ជៈ ចំណីអាហារ សម្ភារសំណង់ និងឱសថ ជាដើម។ នេះបើតាមលោក លឹម ហេង។
ដើម្បីជំរុញពាណិជ្ជកម្មទ្វេភាគីឱ្យមានទំហំកាន់តែធំ កម្ពុជា និងសិង្ហបុរី កាលពីថ្ងៃទី ២ ខែវិច្ឆិកា ឆ្នាំ ២០២៣ នៅទីស្តីការក្រសួងសេដ្ឋកិច្ច និងហិរញ្ញវត្ថុ បានធ្វើពិធីចុះហត្ថលេខា «ពិធីសារ ទី២» ដើម្បីធ្វើវិសោធនកម្មលើកិច្ចព្រមព្រៀងរវាងរដ្ឋាភិបាលកម្ពុជា និងសាធារណរដ្ឋសិង្ហបុរី ស្តីពី«ការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល»។
ពិធីសារទី ២ នេះ ត្រូវបានចុះហត្ថលេខាដោយ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាមួយលោកស្រី Teo Lay Cheng ឯកអគ្គរដ្ឋទូតសិង្ហបុរីប្រចាំកម្ពុជា។
សេចក្តីប្រកាសព័ត៌មានក្រសួងសេដ្ឋកិច្ច បានឱ្យដឹងថា៖«គោលបំណងនៃការរៀបចំឱ្យមាន «ពិធីសារទី ២»នេះគឺដើម្បីធ្វើវិសោធនកម្មលើកិច្ចព្រមព្រៀង DTA កម្ពុជា-សិង្ហបុរី ឱ្យមានសង្គតិភាពជាមួយបទដ្ឋានអន្តរជាតិ ដែលត្រូវបានវិវត្តចុងក្រោយ ជាពិសេសនៅក្រោមក្របខ័ណ្ឌបរិយាបន្នរបស់អង្គការសហប្រតិបត្តិការ និងអភិវឌ្ឍន៍សេដ្ឋកិច្ច (OECD) សម្រាប់ប្រឈមនឹងការបន្ថយមូលដ្ឋានគិតពន្ធ និងការបង្វែរប្រាក់ចំណេញ (Base Erosion and Profit Shifting-BEPS)»។
យោងតាមក្រសួងសេដ្ឋកិច្ច«កិច្ចព្រមព្រៀង DTA កម្ពុជា-សិង្ហបុរី» ត្រូវបានចុះហត្ថលេខាកាលពីថ្ងៃទី ២០ ខែមេសា ឆ្នាំ ២០១៦ ហើយបានចូលជាធរមាន និងមានប្រសិទ្ធភាពអនុវត្តចាប់តាំងពីថ្ងៃទី ១ ខែមករា ឆ្នាំ ២០១៨។
យោងតាមធនាគារជាតិនៃកម្ពុជា គិតត្រឹមត្រីមាសទី ១ ឆ្នាំ ២០២៣ កម្ពុជាទទួលបានការវិនិយោគផ្ទាល់បរទេស ក្នុងទឹកប្រាក់សរុប ១៨៥,៧ ទ្រីលានរៀល កើន ៩ភាគរយធៀបរយៈពេលដូចគ្នាឆ្នាំ ២០២២។ សិង្ហបុរីជាប្រទេសដែលវិនិយោគផ្ទាល់នៅកម្ពុជាច្រើនជាងគេទី ៣ ដោយមានទឹកប្រាក់សរុប ១២,១ ទ្រីលានរៀល(កើន ៨,៨ ភាគរយធៀបរយៈពេលដូចគ្នាឆ្នាំ ២០២២) គឺបន្ទាប់ពីចិន និងកូរ៉េ។ វិនិយោគិនសិង្ហបុរី ភាគច្រើនវិនិយោគក្នុងវិស័យហិរញ្ញវត្ថុ អចលនទ្រព្យ កម្មន្តសាល និងកសិកម្ម៕
