បុរសម្នាក់កំពុងស្វែងរកមើលវិធីសាស្រ្តក្នុងការបង់ពន្ធដារតាមប្រព័ន្ធអនឡាញ។ ហុង មិនា
ភ្នំពេញៈ ប្រាក់ប្រមាណជាង ៣,៦ ពាន់លានដុល្លារ ត្រូវបានអគ្គនាយកដ្ឋានពន្ធដារ (GDT) ប្រមូលបាននៅក្នុងឆ្នាំ ២០២៣ ដោយកើនលើសផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣ និងលើសឆ្នាំ ២០២២ បន្តិចបន្តួច។
សេចក្តីប្រកាសព័ត៌មានរបស់ GDT ស្តីអំពីកិច្ចប្រជុំបូកសរុបលទ្ធផលការងារគ្រប់គ្រងប្រមូលចំណូលពន្ធប្រចាំខែ និងប្រចាំឆ្នាំ ២០២៣ កាលពីថ្ងៃទី ២៣ ខែមករា បានបង្ហាញថា នៅក្នុងឆ្នាំ ២០២៣ អគ្គនាយកដ្ឋានពន្ធដារប្រមូលចំណូលចូលថវិកាជាតិបានប្រមាណ ៣ ៦១២,១២ លានដុល្លារ ស្មើ ១០១,១៣ ភាគរយនៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣ ឬកើនឡើង ១៥៥,១៣ លានដុល្លារ ស្មើនឹង ៤,៤៩ ភាគរយបើធៀបនឹងឆ្នាំ ២០២២។
សេចក្តីប្រកាសព័ត៌មានបញ្ជាក់ថា៖ «អគ្គនាយកដ្ឋានពន្ធដារ បានអនុវត្តប្រកបដោយជោគជ័យនូវយុទ្ធសាស្ត្រកៀរគរចំណូល ២០១៩-២០២៣ របស់រាជរដ្ឋាភិបាល ដែលផ្តោតសំខាន់លើការធ្វើបច្ចុប្បន្នភាព និងទំនើបកម្មគោលនយោបាយ និងរដ្ឋបាលសារពើពន្ធជាបន្តបន្ទាប់ ដើម្បីជំរុញ បង្កើនសមត្ថភាព ប្រសិទ្ធភាព និងស័ក្តិសិទ្ធិភាព នៃការគ្រប់គ្រងប្រមូលចំណូលពន្ធ»។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ដែលបានចូលរួមក្នុងកិច្ចប្រជុំខាងលើបានឱ្យដឹងថា អគ្គនាយកដ្ឋានពន្ធដារ គឺជាស្ថាប័នប្រមូលចំណូលដ៏សំខាន់សម្រាប់ជាតិ ហើយអ្វីដែលពិសេសគឺចំណូលដែលប្រមូលបានមានចំនួនលើសពីផែនការកំណត់ បើទោះបីជាសេដ្ឋកិច្ចសកល កំពុងស្ថិតក្នុងសភាពការណ៍លំបាកដោយប្រឈមនឹងហានិភ័យនៃភាពមិនប្រាកដប្រជា និងនយោបាយសកលយ៉ាងណាក៏ដោយ។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ ភ្នំពេញ ប៉ុស្តិ៍ នៅថ្ងៃទី ២៥ ខែមករាថា ការពង្រឹងការអនុវត្តច្បាប់ពន្ធដារ ការធ្វើកំណែទម្រង់លើនីតិវិធីបង់ពន្ធកាន់-តែមានភាពងាយស្រួល និងការយល់ដឹងពីសំណាក់អ្នកជាប់កាតព្វកិច្ចបង់ពន្ធ បានជួយឱ្យការប្រមូលចំណូលពន្ធកើនឡើងជាលំដាប់ ជាពិសេសក្នុងដំណាក់កាលសេដ្ឋកិច្ចពិភពលោកកំពុងបន្តជួបនឹងបញ្ហាប្រឈមជាបន្តបន្ទាប់នារយៈពេលប៉ុន្មានឆ្នាំមកនេះ។
លោកបានបន្ថែមថា ប្រាក់ចំណូលពន្ធបានដើរតួនាទីសំខាន់ក្នុងការជួយឱ្យរដ្ឋាភិបាលមានថវិកាសម្រាប់យកទៅប្រើប្រាស់លើការវិនិយោគសាធារណៈនានាសំដៅជំរុញកំណើនសេដ្ឋកិច្ចឱ្យបោះជំហានទៅមុខកាន់តែលឿន ជាពិសេសឈានទៅសម្រេចចក្ខុវិស័យប្រែក្លាយកម្ពុជាជាប្រទេសមានចំណូលមធ្យមកម្រិតខ្ពស់ក្នុងឆ្នាំ ២០៣០ និងចំណូលខ្ពស់នៅឆ្នាំ ២០៥០។
លោកបានអះអាងថា៖ «ការប្រមូលចំណូលពន្ធដារកើនលើសផែនការប្រចាំឆ្នាំបែបនេះគឺជារឿងគួរឱ្យកោតសរសើរ ព្រោះក្នុងដំណាក់កាលដែលសេដ្ឋកិច្ចពិភពលោកកំពុងបន្តជួបនឹងបញ្ហា គឺសកម្មភាពសេដ្ឋកិច្ចជាតិ និងអន្តរជាតិមួយចំនួនក៏ជាប់គាំងដែរ។ ចំណូលពន្ធកាន់តែច្រើន គឺបើកលទ្ធភាពឱ្យរដ្ឋាភិបាលអាចយកទៅប្រើប្រាស់សម្រាប់កិច្ចការអភិវឌ្ឍន៍ប្រទេសបានកាន់តែច្រើន»។
ខណៈបច្ចុប្បន្នកម្ពុជាកំពុងទទួលបានគម្រោងវិនិយោគថ្មីៗលើវិស័យចម្រុះជាច្រើននោះ លោក វណ្ណៈ បានប្រាប់ថា នៅពេលអាជីវកម្មទាំងអស់នោះដំណើរការ កម្ពុជាក៏អាចប្រមូលចំណូលពន្ធបានកាន់តែច្រើនទៀត។
ទោះយ៉ាងណា លោកជំរុញឱ្យ GDT ត្រូវខិតខំបន្ថែមទៀតដើម្បីធ្វើឱ្យការប្រមូលចំណូលកាន់តែមានប្រសិទ្ធភាព និងតម្លាភាព ជាពិសេសក្នុងវិស័យអចលនទ្រព្យទាក់ទងនឹងការធ្វើបច្ចុប្បន្នភាពសំណង់អគារ (កម្ពស់ទំហំ) និងប្រភេទដីធ្លីមិនប្រើប្រាស់។
អគ្គនាយកនៃអគ្គនាយកដ្ឋានពន្ធដារ លោក គង់ វិបុល កន្លងមកបាននិយាយថា ទោះបីការប្រមូលចំណូលរបស់ GDT នៅបន្តរក្សាបានសញ្ញាវិជ្ជមាន ក៏ប៉ុន្តែបញ្ហានៃភាពមិនប្រាកដប្រជានៃបរិបទសេដ្ឋកិច្ចសកល ការធ្លាក់ចុះកំណើនសេដ្ឋកិច្ចពិភពលោក ពិសេសវិបត្តិសង្គ្រាមរុស្ស៊ី-អ៊ុយក្រែន គឺបានបន្តដាក់សម្ពាធទៅដល់បណ្តាក្រុមហ៊ុន/ប្រទេស ដែលជាប្រភពទុន សម្រាប់វិនិយោគធំៗមកកម្ពុជា។
លោកថ្លែងថា៖ «កំណើនអតិផរណា គឺអាចជាហានិភ័យក្នុងការប្រមូលចំណូលពន្ធដែលមិនគ្រប់តាមផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣ និងជាពិសេស មូលដ្ឋានក្នុងការព្យាករផែនការសម្រាប់ឆ្នាំបន្តបន្ទាប់ទៀត»។
យោងតាម GDT ឆ្នាំ ២០២៣ គឺជាឆ្នាំចុងក្រោយនៃយុទ្ធសាស្ត្រកៀរគរចំណូលរយៈពេល ៥ ឆ្នាំ ២០១៩-២០២៣ ហើយឆ្នាំ ២០២៤ គឺជាឆ្នាំទី១ នៃការអនុវត្តយុទ្ធសាស្ត្រកៀរគរចំណូលដំណាក់កាល ៥ ឆ្នាំ ២០២៤-២០២៨។ សម្រាប់រយៈពេល ៥ ឆ្នាំកន្លងមកគឺក្នុងឆ្នាំ ២០១៩ ការប្រមូលចំណូលពន្ធ សម្រេចបាន ២ ៨១៩,៣៣ លានដុល្លារ ស្មើ ១២៣,២ ភាគរយ, ឆ្នាំ ២០២០ បាន ២ ៨៨៩,០២ លានដុល្លារ ស្មើ ១០១,៣៦ ភាគរយ, ឆ្នាំ ២០២១ ចំនួន ២ ៧៨១,៩២ លានដុល្លា ស្មើ ១២៤,០២ ភាគរយ, និងឆ្នាំ ២០២២ ចំនួន ៣ ៤៥៥,១១ លានដុល្លារ ស្មើ ១២២,៥៤ ភាគរយ៕
