ភ្នំពេញៈ គម្រោងវិនិយោគវិស័យសំណង់ចំនួនជាង ៣ ពាន់ក្រោមទុនវិនិយោគជាង ៥,២ ពាន់លានដុល្លារ ត្រូវបានរដ្ឋាភិបាលអនុម័តនៅក្នុងរយៈពេល ១១ ខែ ដើមឆ្នាំ ២០២៣ ដោយចំនួនទុនវិនិយោគកើនឡើងជិត ១០០ ភាគរយបើធៀបនឹងរយៈពេលដូចគ្នាឆ្នាំ ២០២២។ នេះបើយោងតាមក្រសួងសេដ្ឋកិច្ច និងហិរញ្ញវត្ថុ។
ឯកសារនិន្នាការសេដ្ឋកិច្ចសង្គមប្រចាំខែវិច្ឆិកា ឆ្នាំ ២០២៣ នៃក្រសួងសេដ្ឋកិច្ច និងហិរញ្ញវត្ថុឱ្យដឹងថា ចន្លោះពីខែមករា-ខែវិច្ឆិកា ឆ្នាំ ២០២៣ រាជរដ្ឋាភិបាលតាមរយៈក្រសួងរៀបចំដែនដី នគរូបនីយកម្ម និងសំណង់ បានអនុម័តឱ្យគម្រោងសាងសង់សរុប ៣ ១៤២ ស្មើ នឹងផ្ទៃក្រឡា ១២,៦៩ លានម៉ែត្រការ៉េ និងទុនវិនិយោគ ៥ ២៥៥ លានដុល្លារ។ ចំនួននេះបើធៀបនឹងរយៈពេលដូចគ្នាក្នុងឆ្នាំ ២០២២ គឺចំនួនគម្រោងសាងសង់បានធ្លាក់ចុះ ៦៨៤ គម្រោង ប៉ុន្តែផ្ទៃក្រឡាសំណង់ និងទុនវិនិយោគបានកើន ៩២,៨ ភាគរយ និង ៩៩,៧ ភាគរយរៀងគ្នា។
ឯកសារខាងលើឱ្យដឹងទៀតថា សម្រាប់ខែវិច្ឆិកា ឆ្នាំ ២០២៣ គម្រោងទទួលបានការអនុញ្ញាតមានចំនួន ២១៨ ស្មើផ្ទៃក្រឡា ៣៦២ ៥១៧ ម៉ែត្រការ៉េ, និងទុនវិនិយោគ ១៤៥,៧ លានដុល្លារ។
ឯកសារឱ្យដឹងថា៖ «ស្ថានភាពវិស័យសំណង់ក្នុងខែវិច្ឆិកាមានភាពល្អប្រសើរបន្តិចធៀបនឹងខែមុន (ខែតុលា) ខណៈគិតត្រឹម ១១ ខែ ឆ្នាំ ២០២៣ មានកំណើនល្អឡើងវិញគួរឱ្យកត់សម្គាល់»។
ប្រធានគ្រប់គ្រងទូទៅសមាគមអ្នកសាងសង់កម្ពុជា លោក ជីវ ស៊ីវផេង បាននិយាយថា ការធ្លាក់ចុះចំនួនគម្រោងវិនិយោគក្នុងអំឡុងពេលដើមទុនវិនិយោគ និងផ្ទៃក្រឡាអគារកើនឡើងមានន័យថា ភាគច្រើននៃគម្រោងដែលអាជ្ញាធរអនុម័តគឺជាគម្រោងធំ និងមានដើមទុនវិនិយោគច្រើន។ ការណ៍នេះបញ្ជាក់អំពីទំនុកចិត្តរបស់វិនិយោគិនធំៗ ពិសេសជនបរទេសចំពោះការបណ្តាក់ទុននៅកម្ពុជា។ លោកបន្តថា វិស័យសំណង់ត្រូវបានរំពឹងថា នឹងងើបឡើងវិញបណ្តើរៗពីការធ្លាក់ចុះយ៉ាងគំហុកអំឡុងពេលការរីករាលដាលជំងឺកូវីដ ១៩។
លោកថ្លែងថា៖ «ស្ថិរភាពនយោបាយ និងកំណើនសេដ្ឋកិច្ចរឹងមាំ គឺជាហេតុផលចម្បងដែលជួយឱ្យកម្ពុជាអាចទាក់ទាញវិនិយោគិនវិស័យអចលនទ្រព្យ និងសំណង់មកបណ្តាក់ទុនកាន់តែច្រើន។ នៅពេលមានការវិនិយោគផ្ទាល់កាន់តែច្រើនតម្រូវការអគារការិយាល័យ និងរោងចក្រក៏កើនឡើងដែរ»។
អ្នកជំនាញផ្នែកអចលនទ្រព្យ លោក វ៉ា វិរៈ បានលើកឡើងក្នុងសន្និបាតបូកសរុបលទ្ធផលការងារ ឆ្នាំ ២០២៣ របស់សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) កាលពីខែធ្នូ ឆ្នាំ ២០២៣ ថា កំណើនសេដ្ឋកិច្ចសកលនិងការជួយអន្តរាគមន៍របស់រដ្ឋាភិបាលលើវិស័យអចលនទ្រព្យ និងសំណង់ នឹងជួយធ្វើឱ្យវិស័យអចលនវត្ថុ និងសំណង់នៅកម្ពុជា រីកចម្រើនឡើងវិញក្នុងពេលឆាប់ៗ ខណៈឆ្នាំ ២០២៣ អាចចាត់ទុកថា ជាពេលមិនសូវល្អសម្រាប់ទីផ្សារអចលនទ្រព្យ និងសំណង់ដោយរាប់តាំងពីការទិញ លក់ ជួល និងសកម្មភាពសាងសង់។
លោកបន្តថា ផ្អែកតាមការព្យាករដោយស្ថាប័នហិរញ្ញវត្ថុអន្តរជាតិធំៗ ដូចជា ADB, IMF និង WB ជាដើមនោះ គឺកំណើនសេដ្ឋកិច្ចកម្ពុជាឆ្នាំ ២០២៤ និងខ្ពស់ជាងឆ្នាំ ២០២៣ ដូច្នេះវិស័យអចលនទ្រព្យ និងសំណង់នឹងល្អប្រសើរជាងឆ្នាំ ២០២៣។
លោកនិយាយថា៖ «ខ្ញុំគិតថា ចាប់ពីពេលនេះទៅវាគឺជាឱកាសដ៏ល្អសម្រាប់អ្នកដែលចង់ទិញអចលនទ្រព្យ ឬចង់វិនិយោគលើវិស័យអចលនទ្រព្យ និងសំណង់ប្រសិនបើគាត់មានលំហូរសាច់ប្រាក់ល្អត្រឹមត្រូវ ប៉ុន្ដែបើសិនគាត់ប្រើប្រាស់កម្ចី ដែលមានការប្រាក់ខ្ពស់គួរតែកុំវិនិយោគអី»។
ឯកសារនិន្នាការសេដ្ឋកិច្ចសង្គម ឆ្នាំ ២០២២ បានឱ្យដឹងថា ក្នុងឆ្នាំ ២០២២ គម្រោងដែលបានទទួលការអនុញ្ញាតពីក្រសួងរៀបចំដែនដីមានសរុប ៤ ២៧៥ គម្រោង ធ្លាក់ចុះ ២៨ ធៀបឆ្នាំ ២០២១ និងមានទុនវិនិយោគសរុប ២ ៩៦៨ លានដុល្លារ ធ្លាក់ចុះ ៤៦,៨ ភាគរយ។ នៅក្នុងចំណោមគម្រោងទាំងនោះ គឺគម្រោងលំនៅឋានមានចំនួន ៣ ៧៦៨ គម្រោង ស្មើ ៨៨,១ ភាគរយនៃសំណើសុំសាងសង់សរុប កើន ៤៨ ធៀបនឹងឆ្នាំ ២០២១ ក្រៅពីនោះរួមមាន អគារពាណិជ្ជកម្ម ឧស្សាហកម្ម ទេសចរណ៍ និងគម្រោងផ្សេងៗទៀត៕
