អាជីវកម្មចំនួនជាង ១១ ពាន់ទទួលបានជោគជ័យនៃការចុះបញ្ជីតាមអនឡាញ។ ក្រសួងពាណិជ្ជកម្ម
ភ្នំពេញៈ ក្រុមហ៊ុនអាជីវកម្មចំនួនជាង ១១ពាន់ ដែលមានដើមទុនសរុប ៣,៨ ពាន់លានដុល្លារបានទទួលជោគជ័យលើការចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានដំណាក់កាលទី១ ក្នុងឆ្នាំ២០២៣ ដែលធ្វើឱ្យចំនួនក្រុមហ៊ុនទទួលជោគជ័យលើការចុះបញ្ជីអាជីវកម្មតាមថ្នាលបច្ចេកវិទ្យាគិតត្រឹមដើមឆ្នាំ២០២៤ កើនដល់ជាង ៣,២ ពាន់ក្រុមហ៊ុន។ នេះបើយោងតាម (OBRS) បានឱ្យដឹងទៀតថា ក្រៅពីនេះក្រុមហ៊ុនទាំង ៣២ ៣២៣ ខាងលើ ក៏មានក្រុមហ៊ុន ១៧ ៧១១ ផ្សេងទៀត ដែលទទួលជោគជ័យលើការសុំនាមករណ៍បម្រុងទុក និងចំនួន ៣ ត្រូវបានបដិសេធ។
ប្រធានសមាគមបច្ចេកវិទ្យាឌីជីថលនៃកម្ពុជា លោក ឈិន កេន បានប្រាប់ភ្នំពេញប៉ុស្តិ៍ ថា ចំណេះដឹងពីកាតព្វកិច្ចផ្លូវច្បាប់នៃម្ចាស់អាជីវកម្ម និងការបង្កើតបរិយាកាសងាយស្រួលក្នុងការចុះបញ្ជី បានលើកទឹកចិត្តម្ចាស់អាជីវកម្មកាន់តែច្រើនឱ្យនាំគ្នាទៅចុះបញ្ជីដើម្បីធ្វើឱ្យអាជីវកម្មរបស់ខ្លួនស្របច្បាប់។ នៅពេលគ្រប់អាជីវកម្មសុទ្ធតែត្រូវបានអាជ្ញាធរទទួលស្គាល់វានឹងធ្វើឱ្យការប្រកួតប្រជែងមានតម្លាភាពជាងមុន។
លោកបានបន្តថា ម៉្យាងទៀតវាក៏អាចជួយឱ្យរដ្ឋាភិបាលអាចគ្រប់គ្រងចំនួននៃប្រភេទអាជីវកម្ម និងអាចរៀបចំគោលនយោបាយលើកទឹកចិត្តផ្នែកពន្ធដារ ឬការបើកវគ្គបណ្តុះបណ្តាលបច្ចេកទេសផ្សេងៗតាមប្រភេទអាជីវកម្មនីមួយៗផងដែរ។
លោកបញ្ជាក់ថា៖«នៅពេលគ្រប់អាជីវកម្មទាំងអស់ត្រូវបានចុះបញ្ជី វានឹងផ្តល់ផលចំណេញច្រើនទៅរដ្ឋាភិបាល និងផ្នែកឯកជន ហើយជាមួយគ្នានេះវាក៏នឹងជួយកាត់បន្ថយការលក់បង្ខូចថ្លៃពីសំណាក់ម្ចាស់អាជីវកម្មមិនចុះបញ្ជីមួយចំនួនដែលរកស៊ីដោយមិនបង់ពន្ធ»។
លោកនាយករដ្ឋមន្ត្រី ហ៊ុន ម៉ាណែត ក្នុងពិធីប្រកាសដាក់ឱ្យអនុវត្តជាផ្លូវការយុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ២០២៣-២០២៨ កាលពីថ្ងៃទី១០ ខែតុលា ឆ្នាំ២០២៣ បានលើកឡើងអំពីកម្លាំងចលករដ៏សំខាន់របស់អ្នកប្រកបអាជីវកម្មសម្រាប់សេដ្ឋកិច្ចជាតិ និងបានជំរុញឱ្យម្ចាស់អាជីវកម្មទាំងអស់ត្រូវទៅចុះបញ្ជីនៅអាជ្ញាធរ ដើម្បីអាចឱ្យរដ្ឋាភិបាលមានព័ត៌មាន និងអាចជួយដោះស្រាយបញ្ហាបានទាន់ពេលវេលា។
លោកបន្ថែមថា គោលនយោបាយរបស់រដ្ឋាភិបាល គឺលើកទឹកចិត្តឱ្យអ្នកប្រកបមុខរបរ (ជាពិសេសសេដ្ឋកិច្ចក្រៅប្រព័ន្ធ)ចូលទៅចុះបញ្ជីដោយមិនមានការបង្ខិតបង្ខំ។ លោកបានបន្តថា ហេតុអ្វីត្រូវចុះឈ្មោះចូលទៅក្នុងប្រព័ន្ធ? អស់លុយប៉ុន្មាន? ត្រូវជាប់ពិន័យអ្វីដែរទេ? ជាប់កាតព្វកិច្ចអ្វីខ្លះ? បានផលអ្វីមកវិញ? ទាំងនេះជាសំណួរដែលក្រុមគោលនយោបាយតែងយកចិត្តទុកដាក់ខ្លាំងបំផុត ដោយមានការជជែកយ៉ាងច្រើនក្នុងកិច្ចប្រជុំអន្តរក្រសួង។
លោកថ្លែងថា៖«យើងចង់បានបងប្អូនចូលរួមឱ្យបានច្រើន ក្នុងដំណាក់កាលអន្តរកាលនេះ ដើម្បីងាយស្រួលរដ្ឋាភិបាលចង់បានទិន្នន័យ ដើម្បីឱ្យងាយស្រួលក្នុងការគ្រប់គ្រងគោលនយោបាយ ដើម្បីជួយបងប្អូនឱ្យទាន់ពេលវេលា និងចំគោលដៅ ពិសេសក្នុងពេលលំបាក»។
បើតាមលោកនាយករដ្ឋមន្ត្រីផលប្រយោជន៍នៃការចុះបញ្ជីដោយស្ម័គ្រចិត្ត នៅក្នុងដំណាក់កាលអន្តរកាលនេះ អ្នកដែលស្ថិតក្នុងសហគ្រាសមីក្រូ តូច និងមធ្យម នឹងទទួលបានផលប្រយោជន៍ នៃការលើកលែងការពិន័យនានា បំណុលពន្ធ ផ្តល់ការលើកទឹកចិត្តពន្ធដារ រួមទាំងអាចទទួលបានការគាំទ្រហិរញ្ញវត្ថុ និងការបណ្តុះបណ្តាលនានា ពាក់ព័ន្ធនឹងការគ្រប់គ្រង៕
