រូប ក្រសួងកសិកម្ម រុក្ខាប្រមាញ់ និងនេសាទ
ក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី ៤ ខែមករា ឆ្នាំ ២០២៤ បានបើកកិច្ចប្រជុំស្តីពីបញ្ហាទីផ្សារសត្វសាច់ និងផលិតផលសត្វនៅកម្ពុជា ដោយមានការចូលរួមពីភាគីពាក់ព័ន្ធជាច្រើន ដើម្បីផ្តល់ដំណោះស្រាយដល់អ្នករកស៊ីនៅក្នុងវិស័យនេះ ជាពិសេសផ្តល់នូវតម្លៃសមរម្យដល់អ្នកចិញ្ចឹម និងសុខុមាលភាពដល់អ្នកបរិភោគ។
ក្រសួងកសិកម្ម បានបញ្ជាក់ថា កិច្ចប្រជុំនេះធ្វើឡើងស្វែងយល់ពីស្ថានភាពពិតប្រាកដ និងគោលជំហររបស់ភាគីពាក់ព័ន្ធទាំងអស់ រួមមានអ្នកចិញ្ចឹមសត្វ អ្នកនាំចូល កុងស៊ីឬអ្នកកាប់ អ្នកចែកចាយ និងអ្នកលក់ ដើម្បីឈានទៅដោះស្រាយបញ្ហាទីផ្សារសត្វ។
លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលបានដឹកនាំកិច្ចប្រជុំនេះ បានថ្លែងថា ក្រសួងនឹងចាត់ចែងឱ្យមានការសិក្សាទីផ្សារគ្រប់ជ្រុងជ្រោយ ដើម្បីវាយតម្លៃឱ្យបានច្បាស់លាស់ពីស្ថានភាព តម្រូវការ និងការផ្គត់ផ្គង់សត្វ ក្នុងខ្សែច្រវាក់ផលិតកម្ម និងតម្លៃ។ លោកបញ្ជាក់ថា៖«ការរៀបចំនេះ ដើម្បីដោះស្រាយ និងគ្រប់គ្រងបញ្ហានេះឱ្យបានល្អប្រសើរ និងដើម្បីផលចំណេញទាំងអស់គ្នា ក៏ដូចជាសុខុមាលភាពសម្រាប់អ្នកបរិភោគ"។
ជាមួយគ្នានោះ លោករដ្ឋមន្ត្រី បានចាត់តាំង លោក តាន់ ផាន់ណារ៉ា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ ដឹកនាំកិច្ចប្រជុំបន្ទាន់ជាមួយក្រុមការងារជំនាញ និងភាគីពាក់ព័ន្ធ ស្តីពីតម្រូវការនិងការផ្គត់ផ្គង់សត្វ ការធ្វើបំណែកសាច់តាមប្រភេទនិងស្តង់ដាគុណភាព ដើម្បីទទួលបានតម្លៃបន្ថែម និងធានាស្ថិរភាពតម្លៃទីផ្សារល្អ និងធានាផលចំណេញសមរម្យសម្រាប់អ្នកផលិត ចែកចាយ និងអ្នកបរិភោគ។
គួររំឭកថា កន្លងទៅសមាគមអ្នកចិញ្ចឹមសត្វ កសិករចិញ្ចឹមសត្វ ជ្រូក គោ មាន់រស់ បានត្អូញត្អែរពីតម្លៃសត្វថា មានការចុះថោកខ្លាំង ដោយពួកគាត់ភាគច្រើនបានលើកឡើងថា បញ្ហានេះកើតឡើងដោយសារការលួចនាំចូលសាច់បង្កកដោយខុសច្បាប់ពីប្រទេសជិតខាង ដែលសុទ្ធតែជាសាច់ខូចគុណភាព និងលក់ក្នុងតម្លៃថោក។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បាននិយាយថា សាច់បង្កកដែលលួចលាក់នាំចូលដោយខុសច្បាប់តាមច្រករបៀងនានា បានធ្វើឱ្យប៉ះពាល់យ៉ាងខ្លាំងដល់អ្នកចិញ្ចឹមសត្វនៅក្នុងស្រុក ជាពិសេសអ្នកចិញ្ចឹមជ្រូក និងអ្នកចិញ្ចឹមគោ។
លោកបានបញ្ជាក់ដូច្នេះថា៖ «អ្នកចិញ្ចឹមជ្រូក និងអ្នកចិញ្ចឹម កំពុងជួបការលំបាកខ្លាំងណាស់ដោយសារតែតម្លៃជ្រូករស់ និងគោរស់មានការចុះថ្លៃខ្លាំងពេក ដោយគោរស់តម្លៃតែ៦០០០រៀលទៅ៧០០០រៀល ខណៈដែលជ្រូករស់ចុះនៅសល់តែ៥០០០រៀល ទៅ៦០០០រៀល តែប៉ុណ្ណោះ ក្នុងមួយគីឡូក្រាម។ដូច្នេះបើសិនជាស្ថាប័នពាក់ព័ន្ធ មិនគិតគូរ មិនកែប្រែ នោះកសិករពិតជាជួបការលំបាកខ្លាំង»។
ចំពោះបញ្ហានេះដែរ លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា នៅក្នុងសន្និសីទសារព័ត៌មាន ក្រោយពីបញ្ចប់វេទិកាផ្សព្វផ្សាយវិធានការសម្រួលពាណិជ្ជកម្មក្រោមដែនសមត្ថកិច្ចគយ បានថ្លែងថា សម្រាប់វិធានការចំពោះមុខ អគ្គនាយកដ្ឋានគយ និងកម្ពុជា ប្តេជ្ញានឹងបន្ដធ្វើការងារនៅក្នុងការបង្ក្រាប ការនាំចូលសាច់ ដែលខូចគុណភាព និងខុសច្បាប់ និងស្នើទៅរាជរដ្ឋាភិបាល ក្នុងការកំណត់ អ្នកដែលអាចមានសិទ្ធិនាំចូលសាច់បង្កក ត្រូវតែមានឃ្លាំងត្រជាក់ និង អាជីវកម្មច្បាស់លាស់ ចៀសវាងកុំឱ្យមានការលបលួចនាំចូលសាច់បង្កកដោយខុសច្បាប់។
លោកបានបញ្ជាក់ថា៖«រាជរដ្ឋាភិបាលកំពុងរៀបចំកែសម្រួលលក្ខខណ្ឌមួយចំនួន ក្នុងការអនុញ្ញាតឱ្យនាំចូលសាច់បង្កក ដើម្បីពង្រឹងអំពីគុណភាពសាច់និងចៀសវាងអ្នកណាក៏អាចសុំនាំចូលសាច់បង្កកបាន ខណៈដែលក្នុងរយៈពេលចុងក្រោយនេះ មានសកម្មភាពផ្សព្វផ្សាយ នៅក្នុងបណ្ដាញសង្គមជាច្រើន ពាក់ព័ន្ធនឹងការចុះទៅត្រួតពិនិត្យឃ្លាំងសាច់បង្កក»៕
