ទិដ្ឋភាពការលើកដាក់ទំនិញ នៅកំពង់ផែស្វយ័តខេត្តព្រះសីហនុ។ ភ្នំពេញប៉ុស្តិ៍
ចរាចរណ៍ទំនិញកម្ពុជា ជាមួយបណ្តាប្រទេសដៃគូ នៅក្នុងរយៈពេល ៩ ខែដើមឆ្នាំ ២០២៤ សម្រេចបានក្នុងទឹកប្រាក់ជិត ៤១ ពាន់លានដុល្លារ កើនឡើងជិត ២០ភាគរយបើធៀបនឹងរយៈពេលដូចគ្នាឆ្នាំ ២០២៣ ខណៈគម្លាតទឹកប្រាក់នាំចេញ និងនាំចូលស្ថិតនៅជាង ១ ពាន់លានដុល្លារ។
ស្ថិតិរបស់អគ្គនាយកដ្ឋានគយ និងរដ្ឋាករកម្ពុជា(GDCE) ចេញផ្សាយក្នុងថ្ងៃទី ១០ ខែតុលា បង្ហាញថា ចន្លោះពីខែមករា ដល់ខែកញ្ញា ឆ្នាំ ២០២៤ ការនាំចេញ-ចូលទំនិញរវាងកម្ពុជាជាមួយប្រទេសដៃគូពាណិជ្ជកម្មទាំងអស់មានទឹកប្រាក់សរុប ៤០,៩៤ ពាន់លានដុល្លារ កើនឡើង ១៦,៤ ភាគរយបើធៀបនឹងរយៈពេលដូចគ្នាឆ្នាំ ២០២៣ ដែលមានចំនួន ៣៥,១៦ ពាន់លានដុល្លារ។
បើតាម GDCE ក្នុងចំនួននេះ គឺការនាំចេញទំនិញរបស់កម្ពុជា មានចំនួន ១៩,៨៣ ពាន់លានដុល្លារ កើនឡើង ១៧ ភាគរយពីចំនួន ១៦,៩៤ ពាន់លានដុល្លារ និងទំនិញនាំចូលពីក្រៅប្រទេសមានចំនួន ២១,១ ពាន់លានដុល្លារ កើនឡើង ១៥,៩ ភាគរយពីចំនួន ១៨,២១ ពាន់លានដុល្លារ។
ផ្អែកតាមស្ថិតិខាងលើ គឺជញ្ជីងពាណិជ្ជកម្មកម្ពុជា មានឱនភាពប្រមាណជាង ១,២៧ ពាន់លានដុល្លារ ដែលចំនួននេះគឺប្រហាក់ប្រហែលនឹងរយៈពេលដូចគ្នាកាលពីឆ្នាំមុន។
ដោយឡែក សម្រាប់ពាណិជ្ជកម្មអន្តរជាតិក្នុងខែកញ្ញា ឆ្នាំ ២០២៤ គឺមានទឹកប្រាក់សរុប ៤,៤៦ ពាន់លានដុល្លារ កើនឡើង ១៦,១៨ ភាគរយបើធៀបខែកញ្ញា ឆ្នាំ ២០២៣។ ទំនិញដែលកម្ពុជានាំចេញចំនួន ២,២៥ ពាន់លានដុល្លារ កើន ១៩,៨ ភាគរយ និងនាំចូល ២,២ ពាន់លានដុល្លារ កើនឡើង ១២,៧ ភាគរយ។
អនុប្រធានសមាគមពាណិជ្ជកម្មកម្ពុជា-ចិន លោក ឡោ វិចិត្រ បានប្រាប់ភ្នំពេញប៉ុស្តិ៍ នៅថ្ងៃទី ១០ ខែតុលាថា ទោះបីស្ថានភាពនយោបាយពិភពលោកក្នុងពេលនេះមិនទាន់ល្អ ប៉ុន្តែកម្ពុជាមានសក្តានុពលគ្រប់គ្រាន់ក្នុងការពង្រីកការធ្វើពាណិជ្ជកម្មអន្តរជាតិរបស់ខ្លួនកាន់តែប្រសើរ។
លោកបន្តថា មូលហេតុធំៗដែលជួយឱ្យកម្ពុជាអាចរក្សាបានកំណើនពាណិជ្ជកម្មអន្តរជាតិ ព្រមទាំងអាចទាក់ទាញបានការវិនិយោគថ្មីៗ និងគម្រោងពង្រីកអាជីវកម្មជាបន្តបន្ទាប់ គឺដោយសារ កម្ពុជាមានស្ថិរភាពនយោបាយល្អ តម្លៃប្រាក់ឈ្នួលពលកម្មសមរម្យ ច្បាប់វិនិយោគ ព្រមទាំងច្បាប់ពន្ធដារ និងគយ មានលក្ខណៈអនុគ្រោះ។
លោកបន្ថែមថា ភាពតានតឹងផ្នែកនយោបាយរវាងប្រទេសមហាអំណាចធំៗ បានធ្វើឱ្យជម្លោះពាណិជ្ជកម្មជាអន្តរជាតិកាន់តែកើនកម្តៅ ហើយវិធានការក្នុងការដំឡើងពន្ធរវាងប្រទេសទាំងអស់នោះ ក៏បានជួយឱ្យកម្ពុជាអាចទទួលបានផលចំណេញមួយចំនួន ពីការរើទីតាំងរោងចក្រ/សហគ្រាសពីប្រទេសផ្សេងៗ ចូលមកដាក់នៅកម្ពុជា។
លោកលើកឡើងថា៖ «នៅពេលកម្តៅនៃជម្លោះពាណិជ្ជកម្មរវាងប្រទេសមហាអំណាចកាន់តែកើនឡើង កម្ពុជាក្នុងនាមជាប្រទេសកំពុងអភិវឌ្ឍន៍ គឺនឹងទទួលមានឱកាសកាន់តែច្រើនក្នុងការនាំចេញទំនិញទៅប្រទេសដែលជាដៃគូនៃជម្លោះទាំងអស់នោះ ពិសេសទីផ្សារសហរដ្ឋអាមេរិក និងតំបន់អ៊ឺរ៉ុប»។
ទាក់ទងនឹងទឹកប្រាក់នាំចូលទំនិញពីទីផ្សារអន្តរជាតិ ដែលកើនឡើងនោះ លោក វិចិត្រ បានអះអាងថា ដោយសារកម្ពុជាបាននាំចូលវត្ថុធាតុដើម និងគ្រឿងផ្សំ/គ្រឿងបង្គុំផ្សេងៗយកមកប្រើប្រាស់ក្នុងរោងចក្រសម្រាប់កែច្នៃជាផលិតផលសម្រេច មុននឹងនាំចេញទៅលក់បន្តនៅទីផ្សារអន្តរជាតិ។
ប្រធានសមាគមបច្ចេកវិទ្យាឌីជីថលនៃកម្ពុជា លោក ឈិន កេន ថ្មីៗនេះបានប្រាប់ភ្នំពេញប៉ុស្តិ៍ថា ការបង្កើតបរិយាកាសអំណោយផលពីសំណាក់រដ្ឋាភិបាលបានជួយឱ្យកម្ពុជាទាក់ទាញអ្នកវិនិយោគក្នុងស្រុក និងបរទេសកាន់តែច្រើនមកបោះទុនផ្ទាល់។ វិស័យបច្ចេកវិទ្យាកំពុងដើរតួនាទីកាន់តែសំខាន់នៅស្ទើរគ្រប់ប្រតិបត្តិការនៅកម្ពុជា។ ការធ្វើពាណិជ្ជកម្មទំនិញរបស់កម្ពុជាជាមួយប្រទេសដៃគូ បានកើនឡើងជាបន្តបន្ទាប់។
លោកនិយាយថា៖ «ការធ្វើទំនើបកម្មបច្ចេកវិទ្យាដែលបង្កភាពងាយស្រួលដល់វិនិយោគិន និងធុរជន គឺជាផ្នែកមួយជួយឱ្យសេដ្ឋកិច្ចកម្ពុជាបោះជំហានទៅមុខកាន់តែលឿន»។
ក្នុងឆ្នាំ ២០២៣ ទឹកប្រាក់ពាណិជ្ជកម្មអន្តរជាតិរបស់កម្ពុជា មានសរុបជាង ៤៦,៨៣ ពាន់លានដុល្លារ ធ្លាក់ចុះ ១,៩ ភាគរយធៀបនឹងឆ្នាំ ២០២២ ក្នុងនោះកម្ពុជានាំចេញជាង ២២,៦៤ ពាន់លានដុល្លារ កើនឡើង ១,៨ ភាគរយ និងនាំចូលមកវិញជិត ២៤,១៨ ពាន់លានដុល្លារ ធ្លាក់ចុះ ៥ ភាគរយ។ នេះបើតាមអគ្គនាយកដ្ឋានគយ និងរដ្ឋាករកម្ពុជា៕
