សកម្មភាពកម្មករកំពុងធ្វើការក្នុងរោងចក្រកាត់ដេរមួយនៅភ្នំពេញ។ ភ្នំពេញ ប៉ុស្តិ៍
កម្ពុជាប្រមូលប្រាក់បានជិត ៩ ពាន់លានដុល្លារពីការនាំចេញផលិតផលវាយនភណ្ឌទៅកាន់ទីផ្សារអន្តរជាតិ ក្នុងរយៈពេល ៣ ត្រីមាសដំបូងឆ្នាំ ២០២៤ ដោយកើនឡើងជិត ២៥ ភាគរយបើធៀបនឹងរយៈពេលដូចគ្នាក្នុងឆ្នាំ២០២៣ ខណៈចំនួនទឹកប្រាក់នេះស្មើនឹងជិតពាក់កណ្តាលនៃចំនួនទឹកប្រាក់ដែលកម្ពុជានាំចេញទំនិញសរុប។ នេះបើតាមអគ្គនាយកដ្ឋានគយ និងរដ្ឋាករកម្ពុជា(GDCE)។
ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា(GDCE) បានឱ្យដឹងថា ចាប់ពីខែមករា-ខែកញ្ញា ឆ្នាំ២០២៤ កម្ពុជាបាននាំចេញផលិតផលក្នុងវិស័យវាយនភណ្ឌលេខកូដ៍(HS ២ខ្ទង់) ៦១, ៦២, ៦៣, និង ៦៤ ដែលរួមមាន សម្លៀកបំពាក់ និងគ្រឿងបន្ទាប់បន្សំ ធ្វើឡើងពីក្រណាត់ ឬមិនធ្វើពីក្រណាត់(Articles of apparel and clothing accessories, Knitted and not knitted or crocheted) ស្បែកជើង ស្រោមជើង និងវត្ថុវាយនភណ្ឌកែច្នៃមួយចំនួនទៀត មានទឹកប្រាក់សរុប ៨ ៧៥៨,៦២ ពាន់លានដុល្លារ កើនឡើង ២៤,៥១ ភាគរយបើធៀបនឹងរយៈពេលដូចគ្នាក្នុងឆ្នាំ២០២៣ ដែលមានចំនួន ៧ ០៣៤,៣១ លានដុល្លារ។
ចំនួនទឹកប្រាក់សរុបនៃការនាំចេញផលិតផលទាំងអស់ខាងលើ ស្មើនឹង ៤៤,១៦ ភាគរយនៃចំនួនទឹកប្រាក់នាំចេញសរុបរបស់កម្ពុជាក្នុងរយៈពេល ៩ខែដើមឆ្នាំ ២០២៤ ដែលមានចំនួន ១៩ ៨៣៣,២៨ លានដុល្លារ។
យោងតាម GDCE គឺក្នុងចំនួនសរុបខាងលើ គឺការនាំចេញទំនិញលេខកូដ៍ ៦១ មានទឹកប្រាក់ ៥ ០៣៤,៧២លានដុល្លារ កើន ២១,៥ ភាគរយ, ទំនិញលេខកូដ៍ ៦២ ចំនួន ២ ៣៥៣,៨៣ លានដុល្លារ កើន ៣១,៩ ភាគរយ, លេខកូដ៍ ៦៣ ចំនួន ១៥៥,៦៩ លានដុល្លារ កើន ៣៧,៧ ភាគរយ, និងលេខកូដ៍ ៦៤ មានចំនួន ១ ២១៤,៣៩ លានដុល្លារ កើនឡើង ២២,៤ ភាគរយ។
ប្រធានសហព័ន្ធសមាគមអ្នកវិនិយោគកម្ពុជា និងជាប្រធានសមាគមស្បែកជើងកម្ពុជា លោក លី ឃុនថៃ បានប្រាប់ភ្នំពេញប៉ុស្តិ៍ក្នុងថ្ងៃទី១១ ខែតុលាថា បន្ទាប់ពីធ្លាក់ចុះមួយរយៈដោយសារឥទ្ធិពលនៃការរីករាលដាលជំងឺកូវីដ១៩ ការនាំចេញផលិតផលវាយនភណ្ឌកម្ពុជា បានចាប់ផ្តើមមានសញ្ញាវិជ្ជមានឡើងវិញចាប់ពីពាក់កណ្តាលឆមាសទី២ ឆ្នាំ២០២៣ មក។
លោកបន្តថា ការកើនឡើងចំនួនទឹកប្រាក់នាំចេញផលិតផលវាយនភណ្ឌនារយៈពេលជិត ១ ឆ្នាំមកនេះ គឺដោយសារកម្ពុជាជាប្រទេសមានស្ថិរភាពនយោបាយល្អ មានច្បាប់វិនិយោគអំណោយផល សម្បូរកម្លាំងពលកម្មជំនាញ ហេដ្ឋារចនាសម្ព័ន្ធដឹកជញ្ជូនល្អប្រសើរ និងមានទីផ្សារទទួលទិញកាន់តែច្រើន។
លោកបានថ្លែងថា៖«កំណើនទឹកប្រាក់នាំចេញផលិតផលវាយនភណ្ឌនៅពេលនេះ គឺដោយសារប្រទេសកម្ពុជាមានស្ថិរភាពនយោបាយនឹងនរនៅក្នុងចំណោមប្រទេសអាស៊ាន កត្តាកម្មករកម្មការិនីធ្វើការមានភាពរហ័សរហួន មានស្នាដៃល្អសម្រាប់ចង្វាក់ផលិតកម្មទាំងគុណភាព និងបរិមាណ»។
លោកបានលើកឡើងទៀតថា សមិទ្ធិផលដែលសម្រេចបាននាពេលនេះ ក៏ដោយសារតែមានការយកចិត្តដាក់ខ្លាំងផងដែរពីប្រមុខរាជរដ្ឋាភិបាលដែលតែងខិតខំផ្សព្វផ្សាយ និងទាក់ទាញអ្នកវិនិយោគឱ្យមកបណ្តាក់ទុនផ្ទាល់នៅកម្ពុជា ក៏ដូចជាបញ្ជាទិញទំនិញផលិតនៅកម្ពុជា។
បើតាមលោក ឃុនថៃ ទីផ្សារសំខាន់ៗដែលបញ្ជាទិញផលិតផលវាយនភណ្ឌពីកម្ពុជា មានដូចជា អាមេរិក សហគមន៍អឺរ៉ុប ចក្រភពអង់គ្លេស ជប៉ុន កូរ៉េ និងប្រទេសចិន ជាដើម។
ទាក់ទងនឹងស្ថានភាពការនាំចេញសម្រាប់រយៈពេលនៅសល់ក្នុងឆ្នាំ២០២៤ និងឆ្នាំ ២០២៥ ខាងមុខ លោក ឃុនថៃ បានអះអាងថា ការនាំចេញផលិតផលវាយនភណ្ឌនឹងបន្តកើនឡើងបន្ថែមទៀត។
បន្ថែមពីលើនេះ លោក លឹម ហេង អនុប្រធានសភាពាណិជ្ជកម្មកម្ពុជា បានប្រាប់ថា ការកើនឡើងនៃតម្រូវការទីផ្សារសកល ព្រមជាមួយនឹងអស្ថិរភាពនយោបាយនៅប្រទេសនាំចេញផលិតផលវាយនភណ្ឌ (បង់ក្លាដែស និងមីយ៉ាន់ម៉ា) បានធ្វើឱ្យការបញ្ជាទិញទំនិញរបស់ប្រទេសទាំងអស់នេះពីកម្ពុជាកើនឡើងគួរឱ្យកត់សម្គាល់។
លោកប្រាប់ទៀតថា នៅក្នុងពេលនេះក៏មានវិនិយោគិនបរទេសជាច្រើនបានចូលមកវិនិយោគលើរោងចក្រផលិតផលិតផលវាយនភណ្ឌនៅកម្ពុជាផងដែរ។
លោកបញ្ជាក់ថា៖«ភាពល្អប្រសើរនៃស្ថានភាពនយោបាយ គឺកំពុងទាក់ទាញចំណាប់អារម្មណ៍ក្រុមហ៊ុនបញ្ជាទិញជាច្រើនឱ្យងាកមកបញ្ជាទិញពីកម្ពុជា ខណៈសមត្ថភាពផលិតកម្មនៅកម្ពុជាក៏កំពុងបោះជំហានទៅមុខ»។
ទិន្នន័យរបស់ GDCE បានឱ្យដឹងថា ក្នុងឆ្នាំ២០២៣ ការនាំចេញផលិតផលទាំងអស់ខាងលើមានទឹកប្រាក់សរុប ៩,៣៩ពាន់លានដុល្លារ ធ្លាក់ចុះ ១៤,១៨ភាគរយធៀបនឹងឆ្នាំ២០២២ ដែលមានចំនួន ១០,៩១ពាន់លានដុល្លារ៕
