ទិដ្ឋភាពក្នុងកិច្ចប្រជុំក្រុមប្រឹក្សាផ្តល់យោបល់សម្រាប់ការអភិវឌ្ឍវិស័យយានយន្ត និងអេឡិចត្រូនិកកម្ពុជា។ CDC
រាជរដ្ឋាភិបាលកម្ពុជាកំពុងខិតខំជំរុញការអភិវឌ្ឍវិស័យយានយន្ត និងអេឡិចត្រូនិកនៅក្នុងប្រទេសដើម្បីឱ្យដើរស្របនឹងការវិវឌ្ឍរបស់ពិភពលោក តាមរយៈការជួបពិភាក្សាជាមួយផ្នែកឯកជន និងអ្នកពាក់ព័ន្ធ ដើម្បីស្វែងរកបញ្ហាប្រឈម និងដំណោះស្រាយក្នុងន័យអភិវឌ្ឍន៍វិស័យទាំង ២ ឱ្យកាន់តែរីកចម្រើន។
ឧបនាយករដ្ឋមន្ត្រី អនុប្រធានទី ១ ក្រុមប្រឹក្សាអភិវឌ្ឍន៍កម្ពុជា (CDC) លោក ស៊ុន ចាន់ថុល កាលពីថ្ងៃទី ១០ ខែតុលា បានដឹកនាំកិច្ចប្រជុំជាមួយក្រុមប្រឹក្សាផ្តល់យោបល់សម្រាប់ការអភិវឌ្ឍវិស័យយានយន្ត និងអេឡិចត្រូនិក (ក.ប.យ.អ.) កម្ពុជា លើកទី ២។
កិច្ចប្រជុំនេះមានចូលរួមធ្វើពីផ្នែកឯកជន ទាំង ២ គឺ លោក ងន សាំង នាយកប្រតិបត្តិក្រុមហ៊ុន RMA (CAMBODIA) PLC. ដែលជាសហប្រធានផ្នែកយានយន្ត និង លោក Yoshihiro Sakanushi ប្រធានក្រុមប្រឹក្សាភិបាលក្រុមហ៊ុន MINEBEA (CAMBODIA) CO., LTD. ដែលជាសហប្រធានផ្នែកអេឡិចត្រូនិក រួមនឹងអ្នកពាក់ព័ន្ធប្រមាណ ១០០ រូប។
សេចក្តីប្រកាសព័ត៌មានរបស់ CDC បានឱ្យដឹងថា កិច្ចប្រជុំនេះធ្វើឡើងក្នុងគោលបំណងដើម្បីពិភាក្សាលើការធ្វើអាទិភាវូបនីយកម្មលើវិធានការដែលមានចែងក្នុងផែនទីបង្ហាញផ្លូវ, ស្ថានភាពបច្ចុប្បន្ន និងបញ្ហាប្រឈមក្នុងវិស័យយានយន្ត និងអេឡិចត្រូនិក, និងការចូលរួមចំណែករបស់ផ្នែកឯកជនក្នុងការអភិវឌ្ឍវិស័យទាំង ២។
លោក ស៊ុន ចាន់ថុល បានលើកឡើងថា កិច្ចប្រជុំក្រុមប្រឹក្សាផ្តល់យោបល់សម្រាប់ការអភិវឌ្ឍវិស័យយានយន្ត និងអេឡិចត្រូនិក នេះពិតជាមានសារៈសំខាន់ ព្រោះវានឹងដើរតួនាទីក្នុងការគាំទ្រដល់ការអនុវត្តផែនទីបង្ហាញផ្លូវ ការអភិវឌ្ឍវិស័យយានយន្ត និងអេឡិចត្រូនិកកម្ពុជា។
ក្នុងកិច្ចប្រជុំខាងលើតំណាងផ្នែកឯកជនក៏បានបង្ហាញពីការត្រៀមលក្ខណៈរបស់ខ្លួនក្នុងការចូលរួមជាមួយរដ្ឋាភិបាល តាមរយៈការផ្តល់ធាតុចូលនានា សម្រាប់ពិចារណាធ្វើការកែលម្អការអនុវត្ត និងការធ្វើអាទិភាវូបនីយកម្មវិធានការដែលមានផលវិជ្ជមាន និងអវិជ្ជមានទៅលើការអភិវឌ្ឍវិស័យយានយន្ត និងអេឡិចត្រូនិកកម្ពុជា។
ប្រធានសមាគមបច្ចេកវិទ្យាឌីជីថលនៃកម្ពុជា លោក ឈិន កេន បានប្រាប់ភ្នំពេញប៉ុស្តិ៍នៅថ្ងៃទី ១១ ខែតុលា ថា សម្ទុះនៃការយល់ដឹង និងការប្រើប្រាស់បច្ចេកវិទ្យានៅកម្ពុជាបានកើនឡើងយ៉ាងលឿនក្នុងរយៈពេលប៉ុន្មានឆ្នាំចុងក្រោយនេះ តាមរយៈកំណើននៃការប្រើប្រាស់គ្រឿងអេឡិចត្រូនិក ដូចជា ទូរស័ព្ទ កុំព្យូទ័រ និងការធ្វើទំនាក់ទំនងតាមប្រព័ន្ធអនឡាញ ជាដើម។
លោកបន្តថា៖«ចំនួននៃអ្នកសិក្សា និងស្រាវជ្រាវពីបច្ចេកវិទ្យានៅកម្ពុជា មានចំនួនកាន់តែច្រើន ខណៈការរៀនសូត្រ ការងារ និងអាជីវកម្មភាគច្រើន ពិសេសក្នុងទីក្រុង ឬទីប្រជុំជន គឺទាមទារឱ្យមានការប្រើប្រាស់ប្រព័ន្ធបច្ចេកវិទ្យា»។
លោកនាយករដ្ឋមន្ត្រី ហ៊ុន ម៉ាណែត ក្នុងឱកាសសម្ពោធរោងចក្រដំឡើងរថយន្ត តូយ៉ូតា កាលពីខែឧសភា ឆ្នាំ ២០២៤ បានលើកឡើងថា គិតត្រឹមខែឧសភា ឆ្នាំ២០២៤ កម្ពុជាមានរោងចក្រផ្គុំ និងដំឡើងរថយន្តចំនួន ៦ ហើយ ក្នុងនោះ ៤ កំពុងដំណើរការ និងចំនួន ២ ផ្សេងទៀតកំពុងសាកល្បងដំណើរការខ្សែច្រវាក់ផលិតកម្មរបស់ខ្លួន។ រោងចក្រផ្គុំ និងដំឡើងរថយន្តទាំងនោះមានទីតាំងស្ថិតនៅខេត្តបន្ទាយមានជ័យ ខេត្តពោធិ៍សាត់ ខេត្តកោះកុង ខេត្តស្វាយរៀង ខេត្តកណ្ដាល និងរាជធានីភ្នំពេញ។
លោកបាននិយាយថា កម្ពុជាក៏មានចក្ខុវិស័យប្រែក្លាយខ្លួនជាមជ្ឈមណ្ឌលផ្ដុំសកម្មភាពផលិតគ្រឿងបង្គុំយានយន្ត និងបរិក្ខាអេឡិចត្រូនិក សម្រាប់នាំចេញទៅកាន់ទីផ្សារក្នុងតំបន់ និងសកលលោក ដែលការសម្រេចបាននូវចក្ខុវិស័យនេះនឹងនាំមកនូវជាផ្លែផ្កាវិជ្ជមានជាច្រើនសម្រាប់ការអភិវឌ្ឍសង្គម សេដ្ឋកិច្ចជាតិ។
លោកបន្តថា ដើម្បីសម្រេចបានចក្ខុវិស័យនេះ ផែនទីបង្ហាញផ្លូវការអភិវឌ្ឍវិស័យយានយន្ត និងអេឡិចត្រូនិកកម្ពុជា គឺពិតជាមានសារសំខាន់ណាស់។ ចំណុចអាទិភាពដែលត្រូវធ្វើមានដូចជា ១.ការយុទ្ធសាស្ត្រ និងការសម្របសម្រួលអន្តរស្ថាប័ន ២. ធនធានមនុស្ស និងនវានុវត្តន៍ ៣. ហេដ្ឋារចនាសម្ព័ន្ធ ៤. កិច្ចសម្រួលពាណិជ្ជកម្ម និង ៥. បរិកាសធុរកិច្ច និងការវិនិយោគ ។
បច្ចុប្បន្នក្រៅពីរោងចក្រផ្គុំ និងដំឡើងរថយន្ត នៅកម្ពុជាបច្ចុប្បន្នក៏មានរោងចក្រផលិតគ្រឿងបង្គុំអេឡិចត្រូនិក ជាច្រើនផងដែរ៕
