កម្មករលីអង្ករពីឃ្លាំងយកទៅដាក់លើរថយន្ត មុននឹងដឹកទៅកាន់កំពង់ផែ។ ភ្នំពេញប៉ុស្តិ៍
កម្ពុជាបាននាំចេញអង្ករជិត ៤៥ ម៉ឺនតោនទៅកាន់ទីផ្សារអន្តរជាតិ ក្នុងរយៈពេល ៩ខែ ដើមឆ្នាំ ២០២៤ ដែលចំនួននេះគឺធ្លាក់ចុះតិចតួចបើធៀបនឹងរយៈពេលដូចគ្នាក្នុងឆ្នាំ ២០២៣ ខណៈនៅចុងសប្តាហ៍នេះថ្នាក់ដឹកនាំរបស់សហព័ន្ធស្រូវអង្ករកម្ពុជា(CRF) នឹងដឹកនាំក្រុមហ៊ុននាំចេញអង្ករចំនួន ១២ ទៅចូលរួមព្រឹត្តិការណ៍ម្ហូបអាហារអន្តរជាតិ Salon International de l’Alimentation (SIAL) Paris នៅទីក្រុងប៉ារីស ប្រទេសបារាំង។
របាយការណ៍របស់សហព័ន្ធស្រូវអង្ករកម្ពុជា(CRF) ឱ្យដឹងថា ចន្លោះពីខែមករា ដល់ខែកញ្ញា ឆ្នាំ ២០២៤ ការនាំចេញអង្ករទៅទីផ្សារអន្តរជាតិសម្រេចបានក្នុងបរិមាណ ៤៤៥ ៩១៣ តោន គិតជាប្រាក់មានចំនួន ៣៣៥,៤ លានដុល្លារ។
សម្រាប់បរិមាណអង្ករនាំចេញគឺថយចុះ ២,៣ ភាគរយបើធៀបនឹងរយៈពេលដូចគ្នាឆ្នាំ ២០២៣ ប៉ុន្តែចំនួនទឹកប្រាក់ដែលទទួលបាន គឺកើនឡើង ២,៤ ភាគរយ។
យោងតាម CRF អង្ករកម្ពុជា ត្រូវបាននាំចេញទៅកាន់គោលដៅចំនួន ៦៥ ប្រទេស/ដែនដី តាមរយៈក្រុមហ៊ុននាំចេញអង្ករចំនួន ៥៤។ គោលដៅសំខាន់ៗរួមមាន តំបន់អឺរ៉ុប(២៦ប្រទេស) បានបរិមាណ ២២៨ ៧៣១ តោន ស្មើនឹង ១៨៦,៦៧ លានដុល្លារ, ប្រទេសចិន រួមទាំងហុងកុង និងម៉ាកាវ ចំនួន ៨១ ៤២៣ តោន ស្មើ ៥២,៦៣ លានដុល្លារ, ប្រទេសក្នុងអាស៊ាន រួមទាំងទីម័រខាងកើត ៨៦ ០៤៣ តោន ស្មើ ៥២,២៣ លានដុល្លារ, និងទៅគោលដៅ ២៩ ប្រទេសផ្សេងទៀត(អាហ្វ្រិក មជ្ឈឹមបូព៌ា អាមេរិក កាណាដា អូស្ត្រាលី ... នូវែលសេឡង់) បានចំនួន ៤៩ ៧១៦ តោន ស្មើនឹង ៤៣,៨៧ លានដុល្លារ។
ចំពោះប្រភេទអង្ករនាំចេញ គឺអង្ករក្រអូប ចំនួន ៧២,០១ ភាគរយ ប្រភេទអង្ករសធម្មតា ២២,៥២ ភាគរយ អង្ករចំហ៊ុយ ៣,៣១ភាគរយ អង្ករសរីរាង្គ ១,៨២ ភាគរយ និងអង្ករផ្សេងៗចំនួន ០,៣៤ ភាគរយ។
យោងតាម CRF ក្រៅពីអង្ករ កម្ពុជាក៏បាននាំចេញស្រូវចំនួន ៣ ៣៦៨ ០១២ តោន ដែលគិតជាប្រាក់ជាង ១ ០៦៦ លានដុល្លារ ក្នុងនោះ ៨៦,៣ ភាគរយបាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញពីអាជ្ញាធរមានសមត្ថកិច្ច។
អគ្គលេខាធិការនៃសហព័ន្ធស្រូវអង្ករកម្ពុជា លោក លន់ យេង បានប្រាប់ភ្នំពេញប៉ុស្តិ៍នាល្ងាចថ្ងៃទី ១៥ ខែតុលា ថា ទោះបីការនាំចេញអង្ករទៅសហភាពអ៊ឺរ៉ុប និងតំបន់មជ្ឈឹមបូព៌ា មានភាពវិជ្ជមាន ប៉ុន្តែការធ្លាក់ចុះបរិមាណនាំទៅប្រទេសចិនដែលជាទីផ្សារធំជាងគេ គឺធ្វើឱ្យតួលេខនាំចេញអង្ករសរុបក្នុងរយៈពេល ៣ ត្រីមាសដំបូង ឆ្នាំ ២០២៤ ធ្លាក់ចុះបន្តិចបន្តួច។
លោកបន្តថា សម្រាប់តម្លៃស្រូវ-អង្ករឆ្នាំ ២០២៤ គឺកើនឡើងបន្តិចបើធៀបនឹងឆ្នាំ ២០២៣។
លោកថ្លែងថា៖«ទោះបរិមាណនាំចេញអង្ករក្នុងរយៈពេល ៩ ខែឆ្នាំ ២០២៤ ធ្លាក់ចុះខ្លះ ប៉ុន្តែយើងក៏ចាប់អារម្មណ៍ចំពោះកំណើននៃការនាំចេញទៅប្រទេសឥណ្ឌូនេស៊ី តំបន់អ៊ឺរ៉ុប និងប្រទេសទីម័រខាងកើត ផងដែរ»។
អគ្គនាយកក្រុមហ៊ុន City Rice Import Export លោក ឡាយ ឈុនហួ (Lay Chhun Hour, CEO of City Rice Import Export Co Ltd,) ដែលជាក្រុមហ៊ុនរោងម៉ាស៊ីនកិនស្រូវ និងនាំចេញអង្ករទៅទីផ្សារអន្តរជាតិ បានប្រាប់ថា មូលហេតុដែលធ្វើឱ្យការនាំចេញអង្ករកម្ពុជាទៅទីផ្សារក្រៅប្រទេសធ្លាក់ចុះបន្តិច គឺអាចមកពីកត្តាមួយចំនួនដូចជា កំណើនទិន្នផលស្រូវនៅប្រទេសចិនដែលធ្លាប់ជាទីផ្សារធំរបស់កម្ពុជា, ប្រទេសឥណ្ឌាចាប់ផ្តើមបើកឱ្យមានការនាំចេញអង្ករស ឡើងវិញ, និងចុងក្រោយគឺក្រុមឈ្មួញប្រទេសជិតខាងនៅតែបន្តប្រមូលទិញស្រូវពីកម្ពុជាក្នុងបរិមាណច្រើន។
លោកអះអាងថា៖«ការនាំចេញអង្កររបស់យើងពិតជាធ្លាក់ចុះខ្លះ ដោយសារប្រទេសចិនប្រមូលផលស្រូវបានច្រើនជាងមុន ហើយឥណ្ឌាដែលជាប្រទេសនាំចេញអង្ករ ក៏បើកឱ្យមានការនាំចេញអង្កសឡើងវិញដែរ»។
ដើម្បីពង្រឹង និងពង្រីកទីផ្សារនាំចេញអង្ករឱ្យបានកាន់តែច្រើន សហព័ន្ធស្រូវអង្ករកម្ពុជា នឹងដឹកនាំក្រុមហ៊ុននាំចេញអង្ករចំនួន ១២ ទៅចូលរួមតាំងបង្ហាញនូវផលិតផលអង្ករដែលមានគុណភាពល្អបំផុតរបស់កម្ពុជា និងធ្លាប់បានឈ្នះពានអង្ករល្អបំផុតពិភពលោក នៅក្នុងព្រឹត្តិការណ៍ម្ហូបអាហារអន្តរជាតិ Salon International de l’Alimentation (SIAL) Paris នៅទីក្រុងប៉ារីស ប្រទេសបារាំង។ កម្មវិធីនេះនឹងប្រព្រឹត្តទៅចាប់ពីថ្ងៃទី ១៩ ដល់ ថ្ងៃទី ២៣ ខែតុលា ឆ្នាំ ២០២៤។
សេចក្តីប្រកាសព័ត៌មានរបស់ CRF ឱ្យដឹងថា ការចូលរួមព្រឹត្តិការណ៍ម្ហូបអាហារអន្តរជាតិ SIAL Paris នេះគឺជាការចូលរួមលើកទី ២ របស់សហព័ន្ធស្រូវអង្ករកម្ពុជា បន្ទាប់ពីការចូលរួមលើកទី ១ កាលពីឆ្នាំ ២០១៤។
គោលបំណងនៃការចូលរួមព្រឹត្តិការណ៍នេះ គឺដើម្បីធ្វើពិពិធកម្មទីផ្សារដែលស្របទៅតាមគោលនយោបាលរបស់រាជរដ្ឋាភិបាលដែលមានក្រសួងពាណិជ្ជកម្ម ក្រសួងឧស្សាហកម្មវិទ្យាសាស្ត្របច្ចេកវិទ្យា និងនវានុវត្តន៍ លើបទដ្ឋានស្តង់ដារ និងលក្ខខណ្ឌសុវត្ថិភាពចំណីអាហារ និងក្រសួងកសិកម្ម រុក្ខាប្រមាញ់ និងនេសាទ ជាសេនាធិការក្នុងការជំរុញផលិតផលចូលទីផ្សារ និងការដាំដុះតម្រូវតាមទីផ្សារ។
កាលពីឆ្នាំ ២០២៣ កម្ពុជាបាននាំចេញអង្ករទៅទីផ្សារអន្តរជាតិសរុប ៦៥៦ ៣២៣ តោន កើនឡើង ៣ ភាគរយបើធៀបនឹងឆ្នាំ ២០២២ ចំណែកទឹកប្រាក់ប្រមូលបានមានចំនួន ៤៦៦ លានដុល្លារ កើនឡើង ១៣ ភាគរយ។
អង្ករកម្ពុជាត្រូវបាននាំចេញទៅកាន់គោលដៅចំនួន ៦១ ប្រទេស/ដែនដី តាមរយៈក្រុមហ៊ុននាំចេញចំនួន ៦៣។ ចំណែកការនាំចេញស្រូវមានបរិមាណ ៤ ៣៨៧ ៣៦៣ តោន គិតជាប្រាក់ប្រមាណ ១,៣២ ពាន់លានដុល្លារ ក្នុងនោះ ៦៤ ភាគរយបាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញពីអាជ្ញាធរមានសមត្ថកិច្ច។ បរិមាណនាំចេញស្រូវ បានកើនប្រមាណ ២៦,៥ ភាគរយ និងចំនួនប្រាក់កើនប្រហែល ៥៦,៦៩ ភាគរយធៀបឆ្នាំ ២០២២។ នេះបើតាម CRF៕
