ទិដ្ឋភាពកន្លែងលក់ទំនិញនៅផ្សារទំនើប Aeon។ សហការី
ផ្ទៃក្រឡាទីតាំងលក់រាយ (Retail) ក្នុងរាជធានីភ្នំពេញ គិតត្រឹមចុងត្រីមាសទី ៣ ឆ្នាំ ២០២៤ មានប្រមាណជិត ៧៧ ម៉ឺនម៉ែត្រការ៉េ ខណៈអត្រាប្រើប្រាស់ជាមធ្យមក្នុងត្រីមាសទី ៣ (Average of Occupancy rate) មានជាង ៥៨ ភាគរយ ដោយធ្លាក់ចុះបន្តិចបើធៀបនឹងត្រីមាសទី ២ កន្លងមក។ នេះបើយោងតាមការស្រាវជ្រាវរបស់ក្រុមហ៊ុនអចលនទ្រព្យ CBRE Cambodia។
ឯកសារស្រាវជ្រាវ Phnom Penh Market Insights Q3 2024 របស់ក្រុមហ៊ុន CBRE Cambodia បានឱ្យដឹងថា គិតត្រឹមត្រីមាសទី៣ ឆ្នាំ២០២៤ កន្លែងលក់រាយក្នុងរាជធានីភ្នំពេញមានផ្ទៃក្រឡាជាង ៦៦៩ ០០០ ម៉ែត្រការ៉េ។
សម្រាប់អត្រាប្រើប្រាស់ គឺបានធ្លាក់ចុះពី ៥៨,៧ ភាគរយកាលពីត្រីមាសទី២ ឆ្នាំ ២០២៤ មកនៅត្រឹម ៥៨,៣ ភាគរយក្នុងត្រីមាសទី៣ កន្លងមក។ និន្នាការនេះបានធ្លាក់ចុះជាបន្តបន្ទាប់ចាប់តាំងពីឆ្នាំ ២០១៩ ជាពិសេសក្នុងអំឡុងនៃការរីករាលដាលខ្លាំងជំងឺកូវីដ១៩ អត្រាប្រើប្រាស់បានធ្លាក់រហូតដល់ក្រោម ៥៥ភាគរយកាលពីអំឡុងឆ្នាំ ២០២១។
សម្រាប់តម្លៃជួលទីតាំងទាំង ៤ ប្រភេទ ដែលរួមមាន Shopping Mall, Community Mall, Retail Podium, និង Prime High Street គឺបានធ្លាក់ចុះចន្លោះពី ០ភាគរយ ដល់ ៥,២ភាគរយបើធៀបត្រីមាសទី ១ ឆ្នាំ២០២០។
អ្នកនាង គឹម គិនកេសា នាយិកាក្រុមហ៊ុន CBRE Cambodia (Kinkesa Kim, Managing Director of CBRE Cambodia) បានប្រាប់ភ្នំពេញប៉ុស្តិ៍ក្នុងថ្ងៃទី១៧ ខែតុលា ថា ស្ថានភាពវិស័យអចលនទ្រព្យ រួមទាំងទីផ្សារទីតាំងសម្រាប់ជួលលក់រាយនៅកម្ពុជាមិនទាន់មានភាពល្អប្រសើរទេចាប់តាំងពីឆ្នាំ ២០១៩ មក។ សម្ទុះការងើបឡើងវិញនៃវិស័យអចលនទ្រព្យ គឺត្រូវពឹងអាស្រ័យទៅលើកំណើនសេដ្ឋកិច្ចសកល ក៏ដូចជាកម្ពុជាផងដែរ។
អ្នកនាង គិនកេសា បានបន្ថែមថា ៖«ដើម្បីឱ្យវិស័យអចលនទ្រព្យទាំងមូលអាចងើបឡើងវិញក្នុងកម្រិតប្រហាក់ប្រហែលនឹងមុនឆ្នាំ ២០១៩ គឺគេត្រូវការឱ្យសកម្មភាពសេដ្ឋកិច្ចទាំងអស់ដូចជា ទេសចរណ៍ ... ការវិនិយោគ មានភាពល្អប្រសើរបន្ថែមទៀត ដែលវានឹងជួយជំរុញឱ្យប្រជាពលរដ្ឋទទួលបានចំណូលច្រើនជាងមុន។ ជាទូទៅខ្ញុំគិតថា វិស័យអចលនព្រព្យនៅកម្ពុជាទាំងមូលត្រូវការពេលយ៉ាងតិចមួយ ឬពីរឆ្នាំបន្ថែមទៀតសម្រាប់ការងើបឡើងវិញ»។
ទោះយ៉ាងណា អ្នកនាង គិនកេសា មានសុទិដ្ឋិនិយមថា អ្វីៗនឹងកាន់តែប្រសើរ ខណៈសូចនាករសេដ្ឋកិច្ចមួយចាប់ផ្តើមកម្រើកឡើងវិញខ្លះៗហើយដូចជា ការវិនិយោគ និងការទិញ លក់។
ប្រធានសមាគមអចលនទ្រព្យសកល និងជាប្រធានសម្ព័ន្ធក្រុមហ៊ុន SAM SN Group លោក សំ សុខនឿន បាននិយាយថា ទោះបីស្ថានភាពនៃការឆ្លងរាលដាលជំងឺកូវីដ១៩ បានបិទបញ្ចប់ ប៉ុន្តែបញ្ហាជម្លោះភូមិសាស្រ្តនយោបាយ និងជម្លោះប្រដាប់អាវុធរវាងប្រទេសមួយចំនួន គឺបានបន្តជះឥទ្ធិពលអវិជ្ជមានដដែលទៅលើកំណើនសេដ្ឋកិច្ចសកល។
លោកបន្តថា ដោយសារទីផ្សារអចលនទ្រព្យកម្ពុជាតែងពឹងផ្អែកលើវិនិយោគអន្តរជាតិ ដូច្នេះបើសេដ្ឋកិច្ចសកលមិនសូវល្អ ផលអវិជ្ជមានប្រាកដជាជះឥទ្ធិពលដល់វិស័យអចលនទ្រព្យកម្ពុជា។
លោកថ្លែងថា៖«សម្រាប់សកម្មភាពទិញ-លក់-ជួល និងតម្លៃអចលនទ្រព្យនៅកម្ពុជានារយៈពេល ៩ ខែដើមឆ្នាំ ២០២៤ នេះ គឺមិនទាន់មានអ្វីប្រែប្រួលឡើយបើធៀបនឹងចុងឆ្នាំ២០២៣»។
ឯកសារនិន្នាការសេដ្ឋកិច្ច-សង្គម (Socio-Economic Trend Report June 2024) ប្រចាំត្រីមាសទី២ ឆ្នាំ ២០២៤ នៃក្រសួងសេដ្ឋកិច្ច និងហិរញ្ញវត្ថុ ឱ្យដឹងថា ចន្លោះពីខែមករា ដល់ខែមិថុនា ឆ្នាំ ២០២៤ ក្រសួងរៀបចំដែនដី នគរូបនីយកម្ម និងសំណង់ បានអនុម័តឱ្យគម្រោងសាងសង់ទូទាំងប្រទេសសរុប ១ ៦៤២ គម្រោង ធ្លាក់ចុះ ១១ភាគរយបើធៀបនឹងរយៈពេលដូចគ្នាក្នុងឆ្នាំ ២០២៣ ដែលមានចំនួន ១ ៨៤៩ គម្រោង៕
