ភ្ញៀវទេសចរជាតិ និងអន្តរជាតិ នៅតំបន់ Pub Street ខេត្តសៀមរាប នៅថ្ងៃទី១ ខែតុលា ឆ្នាំ២០២៤។ ក្រសួងទេសចរណ៍
ការបន្តលើកលែងពន្ធមួយចំនួនសម្រាប់សហគ្រាសទេសចរណ៍ក្នុងខេត្តសៀមរាប គឺជាការកាត់បន្ថយការចំណាយ និងចូលរួមដល់ការស្ដារវិស័យទេសចរណ៍នៅក្នុងខេត្តនេះឡើងវិញ ទោះបីតិចឬច្រើន។ នេះជាការលើកឡើងរបស់អ្នកនៅក្នុងវិស័យនេះ និងអ្នកវិភាគ។
ក្រសួងសេដ្ឋកិច្ចបានចេញប្រកាសស្ដីពីការលើកទឹកចិត្តពន្ធដារសម្រាប់សហគ្រាសក្នុងវិស័យទេសចរណ៍នៅខេត្តសៀមរាប ដោយការលើកលែងពន្ធជាក់លាក់សម្រាប់ឆ្នាំ២០២៤ និង ឆ្នាំ២០២៥។ នេះបើតាមប្រកាសចុះថ្ងៃទី១០ ខែតុលា ដែលទើបផ្សព្វផ្សាយថ្មីៗនេះ។
សហគ្រាសដែលនឹងទទួលបានការលើកទឹកចិត្តនេះរួមមាន សណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុនភ្នាក់ងារទេសចរណ៍ ដែលនឹងទទួលបានការលើកលែងការបង់ពន្ធអាករប្រចាំខែគ្រប់ប្រភេទ គិតចាប់ពីខែកក្កដា ឆ្នាំ២០២៤ រហូតដល់ដំណាច់ខែមិថុនា ឆ្នាំ២០២៥។ ប៉ុន្តែ ពន្ធប្រភេទនេះមិនរាប់បញ្ចូលអាករលើតម្លៃបន្ថែម និងអាករលើការស្នាក់នៅទេ។
ការលើកលែងមួយប្រភេទទៀត គឺពន្ធលើប្រាក់ចំណូលប្រចាំឆ្នាំ២០២៤។ ប្រាក់រំដោះពន្ធលើប្រាក់ចំណូលដែលសហគ្រាសបានបង់រួចនឹងត្រូវបានអនុញ្ញាតជាឥណទានពន្ធសម្រាប់កាត់កងជាមួយពន្ធលើប្រាក់ចំណូលប្រចាំឆ្នាំ២០២៥។
ការលើកទឹកចិត្តមួយទៀតគឺ សហគ្រាសទាំងបីប្រភេទខាងលើង មិនទទួលរងការធ្វើសវនកម្មពន្ធដារ សម្រាប់ការិយបរិច្ឆេទឆ្នាំ២០២៤ទេ។
ក្រសួងសេដ្ឋកិច្ចបានបញ្ជាក់ថា គោលបំណងផ្តល់ការលើកទឹកចិត្តពន្ធដារដល់សហគ្រាសក្នុងវិស័យទេសចរណ៍នៅខេត្តសៀមរាប គឺដើម្បីជួយស្ដារវិស័យទេសចរណ៍ឱ្យបានល្អប្រសើរឡើងវិញ។
យ៉ាងណាក៏ដោយ ក្រសួងតម្រូវឲ្យអ្នកជាប់ពន្ធមធ្យម និងអ្នកជាប់ពន្ធធំទាំងអស់ដាក់លិខិតប្រកាសពន្ធអាករ តាមរយៈ e-Filingជារៀងរាល់ខែ និងដាក់លិខិតប្រកាសពន្ធលើប្រាក់ចំណូលប្រចាំឆ្នាំតាម Tol e-Filing។
លោក អនហេង សុភ័ក្រ្ត ប្រធានសមាគមមគ្គុទេសក៍ទេសចរណ៍ភាសាចិនកម្ពុជា បានថ្លែងថា ការប្រកាសលើកលែងពន្ធមួយចំនួននេះ គឺជា «ដំណឹងដ៏រីករាយមួយ» និងជាជួយសម្រាលនិងជួយផ្តល់លទ្ធភាពក្នុងការស្ដារឡើងវិញនៃវិស័យទេសចរណ៍កម្ពុជា។
លោកថា៖ «ខ្ញុំគិតថារាជរដ្ឋាភិបាលគួរបន្តលើកទឹកចិត្តដល់វិស័យទេសចរណ៍ ដើម្បីឲ្យវិស័យនេះមានឱកាសអភិវឌ្ឍកាន់តែប្រសើរឡើងថែមទៀត»។
លោក ឈត ប៊ុនថង អ្នកស្រាវជ្រាវផ្នែកវប្បធម៌ អប់រំ និងទេសចរណ៍ យល់ឃើញថា ទោះបីតិចឬច្រើន ការលើកទឹកចិត្តរបស់រដ្ឋាភិបាល តាមរយៈការលើកលែងពន្ធនេះ អាចជួយបន្ធូរបន្ថយបន្ទុកសម្រាប់សហគ្រាសទាំងនោះ។
លោកថា៖ «យើងដឹងទាំងអស់គ្នាហើយថា ទោះបីវិស័យឯកជនខ្លួនឯង និងរាជរដ្ឋាភិបាលខិតខំប្រឹងប្រែងយ៉ាងណា ក៏វិស័យទេសចរណ៍មិនទាន់ងើបឡើងវិញដល់កម្រិតដែលយើងចង់បាន ហើយសហគ្រាសទាំងនោះនៅបន្តប៉ះពាល់។ បើសិនរដ្ឋបន្តយកពន្ធដូចពីមុន វាច្បាស់ណាស់វាប៉ះពាល់ដល់បងប្អូននៅក្នុងវិស័យទេសចរណ៍»។
លោកបន្តទៀតថា៖ «ខ្ញុំគិតថា ការលើកលែងពន្ធនេះ ទោះបីមិនបានជាដុំកំភួនក៏ដោយ ក៏ជាការរួមចំណែក ព្រោះរដ្ឋាភិបាលអាចធ្វើអ្វីដែលខ្លួនអាចធ្វើបាន បន្ថែមទៅលើការការងារទាក់ទាញភ្ញៀវទេសចរណ៍ ការរៀបចំគោលនយោបាយ ការបើកជើងហោះហើរ ឬការលើកឡើងអ្វីមួយសម្រាប់ភ្ញៀវទេសចរអន្តរជាតិ»។
យោងតាមគ្រឹះស្ថានអង្គរ ដែលជាក្រុមហ៊ុនគ្រប់គ្រងការលក់សំបុត្រទស្សនារមណីយដ្ឋានអង្គរ កោះកេរ និង ចុងឃ្នៀស ក្នុងរយៈពេល៩ខែ ឆ្នាំ២០២៤នេះ ភ្ញៀវទេសចរអន្តរជាតិដែលបានទិញសំបុត្រទស្សនាមានចំនួនសរុប ៦៩៩ ៨៥០នាក់ ដែលមានកំណើនជិត ៣០ភាគរយ ប្រៀបធៀបនឹងរយៈពេលដូចគ្នាកាលពីឆ្នាំមុន។ គិតចាប់ពីដើមឆ្នាំដល់ថ្ងៃទី១៨ ខែតុលានេះ ចំនួនភ្ញៀវទិញសំបុត្របានកើនដល់ ៧៣៨ ៧៧០នាក់។
ចំណូលសរុបរយៈពេល៩ខែមាន ៣២ ៥២២ ៧៣០ ដុល្លារ កើនឡើងជាង ៣០ភាគរយប្រៀបធៀបរយៈពេលដូចគ្នាកាលពីឆ្នាំមុន៕
