រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លោក ហែម វណ្ណឌី លើកទឹកចិត្តធុរកិច្ចថ្មីឱ្យរួមចំណែកប្រែក្លាយកម្ពុជាឱ្យទៅជាប្រទេសបង្កើតបច្ចេកវិទ្យា និងនវានុវត្តន៍។
ការលើកទឹកចិត្តបែបនេះត្រូវបានធ្វើឡើងក្នុងពិធីបិទកម្មវិធីប្រកួតនវានុវត្តន៍បច្ចេកវិទ្យារដូវកាលទី២ ដែលរៀបចំឡើងដោយសាកលវិទ្យាល័យខេមតិច និងគាំទ្រដោយសហគ្រិនខ្មែរ កាលពីថ្ងៃទី១៩ ខែតុលា ឆ្នាំ២០២៤។ កម្មវិធីប្រកួតវានុវត្តន៍បច្ចេកវិទ្យា និងសហគ្រិនភាព មានការចូលរួមពីសិស្សិត១១៤ក្រុម មកពីសាកលវិទ្យាល័យចំនួន ២០ នៅទូទាំងប្រទេសកម្ពុជា។
លោក ហែម វណ្ណឌី បានលើកឡើងដូច្នេះថា៖ «វឌ្ឍនភាពនៃធុរកិច្ចថ្មីផ្នែកបច្ចេកវិទ្យា (Tech Startups) គឺជាកាតាលីករថ្មីមួយដើម្បីលើកកម្ពស់កម្រិតនវានុវត្តន៍ជាតិ និងដើរតួនាទីសំខាន់ក្នុងដំណើរឆ្ពោះទៅសម្រេចបានចក្ខុវិស័យកម្ពុជា ដែលមានមូលដ្ឋានសង្គមសេដ្ឋកិច្ចផ្អែកលើចំណេះដឹង»។
ដោយទឹកចិត្តឱ្យធុរកិច្ចថ្មីផ្នែកបច្ចេកវិទ្យាចាប់យកឱកាសទីផ្សារតំបន់ និងពិភពលោក លោក ហែម វណ្ណឌី បានថ្លែងបន្តថា៖ «ធុរកិច្ចថ្មីផ្នែកបច្ចេកវិទ្យាគប្បីសម្លឹងមើលទីផ្សារឱ្យបានធំទូលាយ ពោលគឺត្រូវស្វែងយល់ពីឱកាសទីផ្សារទាំងក្នុងតំបន់ និងសកលលោក បន្ថែមពីលើទីផ្សារក្នុងស្រុកដែលមានស្រាប់ ដូចជាទីផ្សារអាស៊ានដែលមានប្រជាជនចំនួន ៦៨០លាននាក់ និងមានផលិតផលក្នុងស្រុកសរុប ៤,២ទ្រីលានដុល្លារ»។
កម្មវិធីប្រកួតនវានុវត្តន៍បច្ចេកវិទ្យារដូវកាលទី២ បានរកឃើញជ័យលាភីចំនួន ៣ក្រុម រួមមានចំណាត់ថ្នាក់លេខ១ បានទៅលើក្រុមមកពី Fintory ដែលទទួលបានប្រាក់រង្វាន់ ១៤ លានរៀល (ប្រមាណ៣៥០០ដុល្លារ) លេខ២ បានទៅលើក្រុម PAWhere ទទួលបានប្រាក់រង្វាន់ ១០ លានរៀល (២៥០០ដុល្លារ) និងលេខ ៣ បានទៅលើ Voat-វត្ត ទទួលបានប្រាក់រង្វាន់ ៨ លានរៀល (២០០០ដុល្លារ)។
ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឲ្យដឹងថា កម្មវិធីប្រកួតនវានុវត្តន៍បច្ចេកវិទ្យានេះ បានបង្ហាញពីកំណើននៃប្រព័ន្ធអេកូឡូស៊ីធុរកិច្ចថ្មីផ្នែកបច្ចេកវិទ្យាដែលនឹងដើរតួនាទីសំខាន់ក្នុងការធ្វើទំនើបកម្មឧស្សាហកម្មរបស់កម្ពុជា, បង្កើតការងារក្នុងវិស័យបច្ចេកវិទ្យាទំនើបដូចជាបញ្ញាសិប្បនិម្មិតនិងការវិភាគទិន្នន័យ ព្រមទាំងគាំទ្រសហគ្រាសធុនតូច និងមធ្យមឱ្យកាន់តែរីកចម្រើន។
កាលពីមុនការប្រឡងបាក់ឌុបឆ្នាំ២០២៤ ដែលបានប្រព្រឹត្តទៅកាលពីពីរសប្ដាហ៍មុន លោក ហែម វណ្ណឌី ក៏បានលើកទឹកចិត្តឲ្យសិស្សានុសិស្សចាប់យកមុខជំនាញផ្នែកបច្ចេកវិទ្យា និងនវានុវត្តន៍ ដែលលោកចាត់ទុកថាជាមុខវិជ្ជាដែលងាយរកការងារធ្វើ និងទទួលបាប្រាក់ចំណូលខ្ពស់ ស្រពពេលដែលរាជរដ្ឋាភិបាលអាណត្តិទី៧នេះ ផ្ដោតការយកចិត្តទុកដាក់លើបច្ចេកវិទ្យា និងនវានុវត្តន៍ ដោយចាត់ទុកជាមុំអាទិភាពមួយ៕