ទឹកប្រាក់នៃការផ្លាស់ប្តូរទំនិញរវាងប្រទេសកម្ពុជា-កូរ៉េខាងត្បូង ក្នុងរយៈពេល ៣ ត្រីមាសដំបូងឆ្នាំ ២០២៤ មានប្រមាណជិត ៦៣០ លានដុល្លារ កើនជាង ១០ ភាគរយបើធៀបនឹងរយៈពេលដូចគ្នាកាលពីឆ្នាំ២០២៣។ កូរ៉េខាងត្បូង គឺជាដៃគូពាណិជ្ជកម្មធំទី ១៣ របស់កម្ពុជា។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា(GDCE)។
ទិន្នន័យ GDCE ឱ្យដឹងថា ចាប់ពីខែមករា ដល់ខែកញ្ញា ឆ្នាំ ២០២៤ ការនាំចេញនាំចូលទំនិញរវាងកម្ពុជា-កូរ៉េខាងត្បូង មានទឹកប្រាក់សរុប ៦២៧,៧៤ លានដុល្លារ កើនឡើង ១២,៩ ភាគរយបើធៀបរយៈពេលដូចគ្នាក្នុងឆ្នាំ ២០២៣ ដែលមានចំនួន ៥៥៥,៩៥ លានដុល្លារ។ ក្នុងចំនួននេះ គឺទំនិញកម្ពុជានាំទៅប្រទេសកូរ៉េ មានទឹកប្រាក់ ២៤២,១៦ លានដុល្លារ កើនឡើង ១៦,៤ ភាគរយ ចំណែកទំនិញកូរ៉េនាំចូល មានចំនួន ៣៨៥,៥៨ លានដុល្លារ កើនឡើង ១០,៨ ភាគរយ។
តាមរយៈតួលេខនេះ គឺជញ្ជីងពាណិជ្ជកម្មកម្ពុជាមានឱនភាពប្រមាណ ១៤៣,៤២ លានដុល្លារ ខណៈរយៈពេលដូចគ្នាឆ្នាំ ២០២៣ មានចំនួន ១៣៩,៩១ លានដុល្លារ។
GDCE បានឱ្យដឹងទៀតថា សម្រាប់ខែកញ្ញា ឆ្នាំ ២០២៤ ការផ្លាស់ប្តូរទំនិញនៃប្រទេសទាំង ២ មានទឹកប្រាក់សរុប ៧១,៤៨ លានដុល្លារ កើនឡើង ៣៦,៩៤ ភាគរយធៀបខែកញ្ញា ឆ្នាំ ២០២៣ ដែលមានត្រឹមតែ ៥២,១៩ លានដុល្លារ។ ក្នុងនោះ គឺកម្ពុជានាំចេញចំនួន ២៣,៥៧ លានដុល្លារ កើន ២៦,៥ ភាគរយ និងទំនិញកូរ៉េនាំចូល ៤៧,៩១ លានដុល្លារ កើន ៤២,៨ ភាគរយ។
អនុប្រធានសភាពាណិជ្ជកម្មកម្ពុជា (CCC) លោក លឹម ហេង បានប្រាប់ភ្នំពេញប៉ុស្តិ៍ក្នុងថ្ងៃទី២១ ខែតុលាថា ការចូលជាធរមាននៃកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា និងកូរ៉េ(CKFTA) ព្រមទាំងទំនាក់ទំនងល្អរវាងរដ្ឋាភិបាល និងផ្នែកឯកជនប្រទេសទាំង ២ បានធ្វើឱ្យសកម្មភាពនៃការផ្លាស់ប្តូរទំនិញកើនឡើងជាបន្តបន្ទាប់។
លោកបន្តថា ផលិតផលវាយនភណ្ឌ និងកសិកម្ម គឺជាចំណែកសំខាន់នៃការនាំចេញរបស់កម្ពុជាទៅប្រទេសកូរ៉េ ខណៈទំនិញកូរ៉េនាំមកកម្ពុជា មានដូចជាឧបករណ៍អេឡិចត្រូនិក យានយន្ត ឱសថ គ្រឿងសម្អាងនិងចំណីអាហារ ជាដើម។
លោកថ្លែងថា៖«ខ្ញុំគិតថាទឹកប្រាក់នៃការផ្លាស់ប្តូរទំនិញរវាងប្រទេសទាំង ២ នឹងកើនឡើងថែមទៀត ខណៈបច្ចុប្បន្នមានវិនិយោគិនកូរ៉េជាច្រើនកំពុងបណ្តាក់ទុននៅកម្ពុជាដើម្បីផលិតទំនិញនាំចេញទៅប្រទេសកូរ៉េ និងទីផ្សារអន្តរជាតិ»។
លោកបន្ថែមថា ទោះបីទឹកប្រាក់ដែលកម្ពុជានាំទំនិញទៅកូរ៉េមានចំនួនតិចជាងនាំចូល ប៉ុន្តែកម្ពុជាក៏អាចប្រមូលប្រាក់ក្នុងបរិមាណដ៏ច្រើនផងដែរពីប្រទេសកូរ៉េ ក្នុង ១ឆ្នាំៗ តាមរយៈការទៅបំពេញការងាររបស់ប្រជាជនខ្មែរនៅទីនោះ។
ប្រធានព្រឹទ្ធសភាកម្ពុជា លោក ហ៊ុន សែន ក្នុងដំណើរទស្សនកិច្ចទៅប្រទេសកូរ៉េខាងត្បូង ដើម្បីចូលរួមវេទិកាចំណេះដឹងពិភពលោកលើកទី ២៥ កាលពីថ្ងៃទី ១០ កញ្ញា ឆ្នាំ២០២៤ បានស្នើឱ្យលោក Woo Won-Shik ប្រធានរដ្ឋសភាកូរ៉េខាងត្បូងជួយជំរុញវិនិយោគិនរបស់ខ្លួនឱ្យចូលមកវិនិយោគបន្ថែមទៀតនៅកម្ពុជា។
លោកបានអះអាងថា រាជរដ្ឋាភិបាលកម្ពុជានឹងខិតខំការពារវិនិយោគិនកូរ៉េ និងធានានូវសុខសន្តិភាពជារួមសម្រាប់អ្នកវិនិយោគពីបរទេសទាំងអស់។
លោកបន្តថា កិច្ចព្រមព្រៀងបង្កើតតំបន់សេដ្ឋកិច្ចពិសេស(SEZ) សម្រាប់ក្រុមហ៊ុនកូរ៉េនៅកម្ពុជាអាចនឹងចេញជារូបរាងឆាប់ៗ ដែលវានឹងបង្កលក្ខណៈងាយស្រួលឱ្យអ្នកវិនិយោគកូរ៉េខាងត្បូងមកវិនិយោគនៅកម្ពុជា។
កម្ពុជា និងកូរ៉េខាងត្បូង បានចុះកិច្ចព្រមព្រៀងពាណិជ្ជកម្មសេរី(CKFTA) ជាមួយគ្នាកាលពីថ្ងៃទី ២៦ ខែតុលា ឆ្នាំ ២០២១ និងបានចូលជាធរមាននៅថ្ងៃទី ០១ ខែធ្នូ ឆ្នាំ ២០២២។ តាមរយៈ CKFTA សាធារណរដ្ឋកូរ៉េ បានសន្យាលុបបំបាត់ពន្ធ ៩៥,៦ ភាគរយនៃបន្ទាត់ពន្ធរបស់ខ្លួនសម្រាប់ទំនិញពីកម្ពុជា។
ពន្ធភាគច្រើនត្រូវបានលុបចោលភ្លាមៗ។ CKFTA ត្រូវបានគេរំពឹងថានឹងជំរុញការនាំចេញរបស់កម្ពុជានូវទំនិញវាយនភណ្ឌ និងកាត់ដេរ ស្បែកជើង កាបូប និងគ្រឿងបន្លាស់ ឧបករណ៍អេឡិចត្រូនិក កៅស៊ូ ផលិតផលវារីវប្បកម្ម និងទំនិញកសិកម្មជាច្រើនប្រភេទ (សាច់ ពោត ដំឡូង កាហ្វេ ផ្លែឈើ ម្ទេស គ្រាប់ស្វាយចន្ទី មៀន ថ្នាំជក់ជា ដើម)។
ក្នុងឆ្នាំ ២០២៣ ការធ្វើពាណិជ្ជកម្មទ្វេភាគីកម្ពុជា កូរ៉េ មានទឹកប្រាក់សរុប ៧៥១,៣៨ លានដុល្លារ ធ្លាក់ចុះ ៣,៥ ភាគរយធៀបនឹងរយៈពេលដូចគ្នាកាលពីឆ្នាំ ២០២២។ ទំនិញកម្ពុជានាំទៅប្រទេសកូរ៉េ មានចំនួន ២៨១,១៤ លានដុល្លារ កើនឡើង ២០,៣ ភាគរយ ខណៈកូរ៉េនាំចូល មានចំនួន ៤៧០,២៥ លានដុល្លារ ធ្លាក់ចុះ ១៣,៨ ភាគរយ។ នេះបើតាម GDCE៕