រាជរដ្ឋាភិបាលកម្ពុជាកំពុងខិតខំពង្រឹកការផ្សព្វផ្សាយពីផលិតផលកសិកម្ម ជាពិសេសអង្ករ អាហារកែច្នៃ និងគ្រាប់ស្វាយចន្ទី ទៅកាន់ទីផ្សារអន្តរជាតិ ពិសេសប្រទេសបារាំង ខណៈការនាំចេញផលិតផលទាំងអស់នេះនៅមានបរិមាណតិចតួចនៅឡើយ។
រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារជំរុញការនាំចេញ លោក សំហេង បូរ៉ា (SAMHENG Bora, Secretary of State of the Ministry of Commerce and Chairman of the Export Promotion Task Force) កាលពីថ្ងៃទី១៩ ខែតុលា បានដឹកនាំគណៈប្រតិភូក្រសួងពាណិជ្ជកម្មទៅចូលរួមទស្សនកិច្ចកម្មវិធីពិព័រណ៍ Salon International de l’Alimentation (SIAL) Paris នាទីក្រុងបារីស ប្រទេសបារាំង។
ក្នុងកម្មវិធីនេះ គឺមានដាក់តាំងបង្ហាញស្តង់ពិព័រណ៍ប្រមាណជាង ៧,៥០០ ស្តង់មកពីបណ្តាប្រទេសនៃតំបន់ជាច្រើនរួមមាន អាស៊ី អឺរ៉ុប អាម៉េរិក និងអាហ្វ្រិក និងមានអ្នកចូលរួមប្រមាណជិត ៣០ម៉ឺននាក់។
ក្រសួងពាណិជ្ជកម្មបានឱ្យដឹងថា ក្នុងដំណើរទស្សនកិច្ចនេះ គណៈប្រតិភូកម្ពុជាក៏បានជួបពិភាក្សាជាមួយក្រុមហ៊ុនមួយចំនួនក្នុងគោលបំណងលើកបង្ហាញអំពីផលិតផលសក្តានុពលរបស់កម្ពុជា ជាពិសេសអង្ករ អាហារកែច្នៃ និងគ្រាប់ស្វាយចន្ទី។
ក្រសួងបានបញ្ជាក់ថា៖«ដំណើរទស្សនកិច្ច និងជំនួបពិភាក្សានេះបានផ្តោតសំខាន់ក្នុងការស្វែងរកឱកាសសហការក្នុងភាពជាដៃគូ ដើម្បីជំរុញការនាំចេញផលិតផលកសិកម្មកម្ពុជា ជាពិសេសអង្ករ អាហារកែច្នៃ និងគ្រាប់ស្វាយចន្ទីមកដាក់លក់ក្នុងទីផ្សារនៅប្រទេសបារាំង»។
ប្រធានសមាគមស្វាយចន្ទីកម្ពុជា លោក អួន ស៊ីឡូត បានប្រាប់ភ្នំពេញប៉ុស្តិ៍ក្នុងថ្ងៃទី២១ ខែតុលាថា ការនាំចេញផលិតផលស្វាយចន្ទីកែច្នៃរួចទៅទីផ្សារតំបន់អ៊ឺរ៉ុប រួមទាំងប្រទេសបារាំង គឺមានក្នុងបរិមាណតិចតួចនៅឡើយ។
លោកបន្តថា មូលហេតុដែលកម្ពុជាមិនទាន់អាចមានទីផ្សារនាំចេញធំនៅបណ្តាប្រទេសទាំងនោះ គឺដោយសារសមត្ថភាពផលិតកម្ម (ការកែច្នៃ) នៅមានកម្រិត បញ្ហាកង្វះទុនបង្វិលក្នុងការប្រមូលទិញគ្រាប់ស្វាយចន្ទីយកមកស្តុកទុករបស់រោងចក្រកែច្នៃ និងកត្តាថ្លៃដើមផលិតខ្ពស់។
លោកបាននិយាយថា៖«ខ្ញុំគិតថាបើសិនយើងអាចមានទីផ្សារនាំចេញកាន់តែច្រើន គឺជាការល្អណាស់ បុន្តែទន្ទឹមនឹងនោះសហគ្រាសក្នុងស្រុកក៏ត្រូវខិតខំពង្រឹងសមត្ថភាពភាពផលិតកម្ម និងគុណភាព ព្រមទាំងត្រូវមានទុនបង្វិលឱ្យបានគ្រប់គ្រាន់ផងដែរ»។
លោកប្រាប់ទៀតថា បច្ចុប្បន្នក្នុង ១ឆ្នាំៗ ការប្រមូលផលស្វាយចន្ទីមានបរិមាណច្រើន គ្រាន់តែការកែច្នៃ និងការវិចខ្ចប់តាមស្តង់ដានៅមានកម្រិត ដែលបណ្តាលឱ្យមានការនាំចេញគ្រាប់ស្វាយចន្ទីមិនទាន់កែច្នៃជាច្រើនម៉ឺនតោនជារៀងរាល់ឆ្នាំទៅកាន់ប្រទេសជិតខាង។ ការនាំចេញផលិតផលមិនទាន់កែច្នៃ គឺធ្វើឱ្យកម្ពុជាត្រូវខាតបង់ប្រាក់ជាច្រើន។
ទោះយ៉ាងណា លោកមានជំនឿថា ការនាំចេញស្វាយចន្ទីកែច្នៃរួចទៅទីផ្សារអន្តរជាតិនឹងសម្រេចបានក្នុងបរិមាណកាន់តែច្រើន ខណៈកាលពីខែកញ្ញា សមាគមស្វាយចន្ទីកម្ពុជា ទើបបានអនុស្សារណៈយោគយល់គ្នា (MoU) ជាមួយរដ្ឋបាលគយខេត្តគ័ងហ្ស៊ី ដើម្បីបើកផ្លូវសម្រាប់ការនាំចេញស្វាយចន្ទី ទៅកាន់ប្រទេសចិន។
ទិន្នន័យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា បច្ចុប្បន្ននៅកម្ពុជាមានផ្ទៃដីដាំដុះដំណាំស្វាយចន្ទីជាង ៥៨ ម៉ឺនហិកតា និងប្រមូលផលបានជាង ៨០ ម៉ឺនតោនក្នុង ១ ឆ្នាំ។ សម្រាប់រយៈពេល ៨ ខែ ដើមឆ្នាំ២០២៤ កម្ពុជាបាននាំចេញគ្រាប់ស្វាយចន្ទីប្រមាណជាង ៥៦ ម៉ឺនតោន ទៅកាន់ ១១ ប្រទេស។
សម្រាប់ទីផ្សារនាំចេញអង្ករទៅប្រទេសបារាំង លោក លន់ យេង អគ្គលេខាធិការនៃសហព័ន្ធស្រូវអង្ករកម្ពុជា(CRF) បានប្រាប់ថា បារាំងគឺជាទីផ្សារធំជាងគេក្នុងតំបន់អ៊ឺរ៉ុប ដែលទទួលទិញអង្ករច្រើនជាងគេពីកម្ពុជា។
លោកបន្ថែមថា៖«ជាមធ្យមបារាំងទិញអង្ករពីកម្ពុជាក្នុងចន្លោះពី ៦-៧ម៉ឺនតោនក្នុង១ឆ្នាំ ដោយភាគច្រើនជាប្រភេទអង្ករក្រអូប»។
របាយការណ៍របស់សហព័ន្ធស្រូវអង្ករកម្ពុជា(CRF) ឱ្យដឹងថា ចន្លោះពីខែមករា ដល់ខែកញ្ញា ឆ្នាំ ២០២៤ ការនាំចេញអង្ករទៅទីផ្សារអន្តរជាតិសម្រេចបានក្នុងបរិមាណ ៤៤៥ ៩១៣ តោន គិតជាប្រាក់មានចំនួន ៣៣៥,៤ លានដុល្លារ។ សម្រាប់បរិមាណអង្ករនាំចេញគឺថយចុះ ២,៣ ភាគរយបើធៀបនឹងរយៈពេលដូចគ្នាឆ្នាំ ២០២៣ ប៉ុន្តែចំនួនទឹកប្រាក់ដែលទទួលបាន គឺកើនឡើង ២,៤ ភាគរយ៕