កម្មករលើកបង្ហាញគ្រាប់ស្វាយចន្ទីមិនទាន់បានកែច្នៃ។ ភ្នំពេញប៉ុស្តិ៍
រោងចក្រកែច្នៃគ្រាប់ស្វាយចន្ទីតម្លៃប្រមាណ ១២ លានដុល្លារនៅខេត្តកំពង់ធំ របស់ក្រុមហ៊ុន CSNC Agriculture Co.,Ltd ដែលចាប់ផ្តើមសាងសង់កាលពីចុងឆ្នាំ ២០២៣ នៅពេលនេះបានបញ្ចប់ការសាងសង់ស្ទើរ ១០០ភាគរយហើយ ដោយអាចនឹងចាប់ផ្តើមដំណើរការនាដើមឆ្នាំ២០២៥ ខាងមុខ។
បច្ចុប្បន្ននៅកម្ពុជាមានសិប្បកម្ម/រោងចក្រកែច្នៃគ្រាប់ស្វាយចន្ទីចំនួនជាង ៤០ កំពុងដំណើរការ។
CSNC Agriculture Co., Ltd ដែលជាក្រុមហ៊ុនវិនិយោគរួមរវាងកម្ពុជា-សិង្ហបុរី បានបើកការដ្ឋានសាងសង់រោងចក្រកែច្នៃគ្រាប់ស្វាយចន្ទីនៅក្នុងស្រុកកំពង់ស្វាយ ខេត្តកំពង់ធំ កាលពីថ្ងៃទី ០៦ ខែធ្នូ ឆ្នាំ ២០២៣។ រោងចក្រនេះសាងសង់លើផ្ទៃដីសរុប ១៤ ហិកតា ដោយអាចត្រូវការកម្លាំងពលកម្មជិត ២០០ នាក់នៅពេលដំណើរការ។
ប្រធានសមាគមស្វាយចន្ទីកម្ពុជា លោក អួន ស៊ីឡុត បានប្រាប់ភ្នំពេញប៉ុស្តិ៍ក្នុងថ្ងៃទី ២៥ ខែតុលាថា តាមគម្រោងនៅដើមឆ្នាំ ២០២៥ ខាងមុខ កម្ពុជានឹងមានរោងចក្រកែច្នៃគ្រាប់ស្វាយចន្ទី ទំហំមធ្យម ១ ទៀតចាប់ផ្តើមដំណើរការ ដោយរោងចក្រថ្មីនេះមានសមត្ថភាពកែច្នៃគ្រាប់ស្វាយចន្ទី បានចំនួន ៤០ តោនក្នុង ១ ថ្ងៃ ឬប្រមាណ ១២ ០០០តោនក្នុង ១ ឆ្នាំ។
លោកបន្តថា នៅពេលមានរោងចក្រកែច្នៃក្នុងស្រុកកាន់តែច្រើន វាមិនត្រឹមតែជួយកាត់បន្ថយការនាំចេញគ្រាប់ស្វាយចន្ទីមិនទាន់កែច្នៃទៅក្រៅប្រទេសដែលនាំឱ្យកម្ពុជាបាត់បង់តម្លៃបន្ថែមប៉ុណ្ណោះទេ ប៉ុន្តែវាក៏ជួយបង្កើតការងារ និងប្រាក់ចំណូលទៅដល់គ្រួសារប្រជាកសិករ អ្នកកែច្នៃ និងសេដ្ឋកិច្ចជាតិកម្ពុជាទាំងមូល។
លោកបានថ្លែងថា៖«នៅពេលរោងចក្ររបស់ CSNC Agriculture ដំណើរការ វានឹងជួយលើកកម្ពស់សមត្ថភាពនាំចេញគ្រាប់ស្វាយចន្ទីកែច្នៃទៅលក់នៅទីផ្សារបានកាន់តែច្រើន។ CSNC Agriculture នឹងក្លាយជារោងចក្រកម្រិតមធ្យមទី ៧ នៅកម្ពុជា»។
បើតាមលោក ស៊ីឡុត គិតមកដល់ពេលនេះ នៅកម្ពុជាមានរោងចក្រកែច្នៃគ្រាប់ស្វាយចន្ទីកំពុងដំណើរការចំនួន ៤៤ ក្នុងនោះ រោងចក្រទំហំមធ្យម មានចំនួន ៦(អាចកែច្នៃគ្រាប់ស្វាយចន្ទីបានចន្លោះពី ៧ ០០០- ១៤ ០០០តោនក្នុង ១ ឆ្នាំ) និងរោងចក្រតូចៗលក្ខណៈសិប្បកម្មចំនួន ៣៨។ ភាគច្រើននៃរោងចក្រ/សិប្បកម្មកែច្នៃគ្រាប់ស្វាយចន្ទី គឺស្ថិតក្នុងខេត្តកំពង់ធំ កំពង់ចាម ព្រះវិហារ និងត្បូងឃ្មុំ។
ទាក់ទងនឹងទីផ្សារនាំចេញ លោក ស៊ីឡុត បានប្រាប់ថា បច្ចុប្បន្នគ្រាប់ស្វាយចន្ទីកែច្នៃ ត្រូវបាននាំចេញទៅលក់នៅទីផ្សារប្រទេសជាច្រើនដូចជា ចិន អាមេរិក និងតំបន់អ៊ឺរ៉ុប ជាដើម។ ចំណែកគ្រាប់ស្វាយចន្ទីមិនទាន់កែច្នៃ ត្រូវបានឈ្មួញប្រមូលទិញយកទៅលក់នៅប្រទេសជិតខាងក្នុងបរិមាណដ៏ច្រើនជារៀងរាល់ឆ្នាំ។
លោកអះអាងថា៖«ដោយសារសមត្ថភាពរបស់រោងចក្រ/សិប្បកម្មកែច្នៃស្វាយចន្ទីនៅកម្ពុជាមានកម្រិត ដូច្នេះគ្រាប់ស្វាយចន្ទីជាង ៨០ភាគរយត្រូវបានឈ្មួញនាំចេញទៅកែច្នៃនៅតាមរោងចក្រក្នុងប្រទេសវៀតណាម។
លោក ស៊ីឡុត បានប្រាប់ទៀតថា គ្រាប់ស្វាយចន្ទី(ស្ងួត)ឆ្នាំ ២០២៤ នេះមានតម្លៃជាមធ្យម ៦ ៥០០រៀលក្នុង ១ គីឡូក្រាម កើនពី ៥ ៩០០រៀលកាលពីឆ្នាំ ២០២៣។ ចំណែកទិន្នន័យដែលប្រមូលបានគឺកើនលើសឆ្នាំមុនប្រហែល ២៦ ភាគរយ។
ក្នុងរយៈពេលជិត ១០ខែ (ពីខែមករា ដល់ថ្ងៃទី២៥ ខែតុលា) កម្ពុជាផលិតគ្រាប់ស្វាយចន្ទីបាន ៨៤០ ០០០តោន (កើនឡើង២៦%) នាំចេញទៅវៀតណាម ៧៩៦ ០០០តោន គិតជាទឹកប្រាក់ ១០១០លានដុល្លា (កើន៣១%)។ នៅបើតាមសមាគមស្វាយចន្ទីកម្ពុជា។
រាជរដ្ឋាភិបាលកម្ពុជា កាលពីថ្ងៃទី១៣ ខែមករា ឆ្នាំ ២០២៣ បានអនុម័តលើសេចក្តីព្រាង “គោលយោបាយជាតិស្តីពីស្វាយចន្ទី ឆ្នាំ ២០២២-២០២៧” ដើម្បីអភិវឌ្ឍន៍ផលិតកម្ម កែច្នៃ និងទីផ្សារស្វាយចន្ទីឱ្យមានលក្ខណៈប្រកួតប្រជែងប្រកបដោយបរិយាប័ន្ន ធានានូវនិរន្តរភាព និងការធ្វើពិពិធសេដ្ឋកិច្ច។
រដ្ឋាភិបាលធ្លាប់បានលើកឡើងថា ស្វាយចន្ទី ជាដំណាំកសិឧស្សាហកម្ម និងជាដំណាំអាទិភាពមួយក្នុងចំណោមដំណាំអាទិភាពទាំង ១២មុខ ដែលរាជរដ្ឋាភិបាលកំពុងផ្តោតការយកចិត្តទុកដាក់លើការបង្កើនផលិតភាព និងការប្រកួតប្រជែងតាមរយៈការធ្វើពិពិធកម្មសេដ្ឋកិច្ចក្នុងសកម្មភាពដែលមានតម្លៃខ្ពស់។ គោលនយោបាយជាតិស្តីពីស្វាយចន្ទី មានគោលបំណងប្រែក្លាយកម្ពុជាឱ្យទៅជាប្រទេសផលិត និងផ្គត់ផ្គង់ផលិតផលសា្វយចន្ទីដ៏សំខាន់មួយ សម្រាប់បម្រើទីផ្សារក្នុងស្រុក តំបន់ និងពិភពលោក។
ទិន្នន័យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា បច្ចុប្បន្ននៅកម្ពុជាមានផ្ទៃដីដាំដុះដំណាំស្វាយចន្ទីជាង ៥៨ ម៉ឺនហិកតា និងប្រមូលផលបានជាង ៨០ ម៉ឺនតោនក្នុង ១ ឆ្នាំ។ សម្រាប់រយៈពេល ៨ ខែ ដើមឆ្នាំ២០២៤ កម្ពុជាបាននាំចេញគ្រាប់ស្វាយចន្ទីប្រមាណជាង ៥៦ ម៉ឺនតោន ទៅកាន់ ១១ ប្រទេស៕
