ភ្ញៀវទេសចរជាតិ និងអន្តរជាតិយ៉ាងច្រើនកុះករ មើលព្រះអាទិត្យរះចំកំពូលប្រាសាទអង្គរវត្ត កាលពីខែមីនា ឆ្នាំ ២០២៣។ រូបថត ក្រសួងទេសចរណ៍
ភ្ញៀវទេសចរបរទេសចំនួនជិត ៧០ ម៉ឺននាក់បានទិញសំបុត្រចូលទស្សនារមណីយដ្ឋានអង្គរ ដែលជួយឱ្យគ្រឹះស្ថានអង្គរប្រមូលប្រាក់បានជាង ៣២ លានដុល្លារក្នុងរយៈពេល ៩ខែដើមឆ្នាំ២០២៤ កើនឡើងជាង ៣០ ភាគរយបើធៀបនឹងរយៈពេលដូចគ្នាក្នុងឆ្នាំ ២០២៣។ នេះបើយោងតាមទិន្នន័យរបស់គ្រឹះស្ថានអង្គរ។
គ្រឹះស្ថានអង្គរ គឺជាគ្រឹះស្ថានសាធារណៈរដ្ឋបាលដែលត្រូវបង្កើតឡើងកាលពីឆ្នាំ២០១៦ ដោយស្ថិតក្រោមអាណាព្យាបាលបច្ចេកទេសនៃក្រសួងទេសចរណ៍ និងស្ថិតក្រោមអាណាព្យាបាលហិរញ្ញវត្ថុ នៃក្រសួងសេដ្ឋកិច្ច និងហិរញ្ញវត្ថុ។ ការប្រមូលចំណូលរបស់គ្រឹះស្ថានអង្គរ រួមមាន រមណីយដ្ឋានអង្គរ, ប្រាសាទកោះកែរ, និងសំបុត្រទូកនៅកំពង់ផែចុងឃ្នៀស។ សម្រាប់តម្លៃតម្លៃសំបុត្រចូលទស្សនារមណីយដ្ឋានអង្គរ ត្រូវបានចែកចេញជា ៣ប្រភេទ គឺសំបុត្រចូលទស្សនា ១ថ្ងៃមានតម្លៃ ៣៧ដុល្លារ, រយៈពេល ៣ថ្ងៃតម្លៃ ៦២ដុល្លារ និង ៧ថ្ងៃ មានតម្លៃ ៧២ដុល្លារ។
សេចក្តីប្រកាសព័ត៌មានរបស់គ្រឹះស្ថានអង្គរ បានឱ្យដឹងថា ចាប់ពីខែមករា ដល់ខែកញ្ញា ឆ្នាំ២០២៤ មានភ្ញៀវបរទេស ៦៩៩ ៨៥០ នាក់បានទិញសំបុត្រចូលទស្សនារមណីយដ្ឋានអង្គរ ដោយចំនួននេះបានកើនឡើង ២៩,៧១ ភាគរយបើធៀបនឹងរយៈពេលដូចគ្នាក្នុងឆ្នាំ ២០២៣។ ចំណែកទឹកប្រាក់ដែលទទួលបានពីការលក់សំបុត្រ មានសរុប ៣២,៥២ លានដុល្លារ កើនឡើង ៣០,៣២ ភាគរយ។
បើយោងតាម គ្រឹះស្ថានអង្គរ ក្រៅពីចំណូលពីការលក់សំបុត្រឱ្យភ្ញៀវបរទេសចូលទស្សនារមណីយដ្ឋានអង្គរ គ្រឹះស្ថានអង្គរ ក៏រកចំណូលបាន ២០៨ ០៥០ ដុល្លារពីភ្ញៀវបរទេសទិញសំបុត្រចូលទស្សនាតំបន់ប្រាសាទកោះកែរ, និង ៥៥៣ ៤៥៣ ដុល្លាពីការលក់សំបុត្រទូកនៅកំពង់ផែចុងឃ្នៀស(ខេត្តសៀមរាប)។
ប្រធានសមាគមមគ្គុទ្ទេសក៍ទេសចរអង្គរ លោក ខៀវ ធី បានប្រាប់ភ្នំពេញប៉ុស្តិ៍នាដើមសប្តាហ៍នេះថា ចំនួនភ្ញៀវទេសចរបរទេសដែលធ្វើដំណើរមកកម្សាន្តនៅតាមប្រាសាទបុរាណនានាក្នុងខេត្តសៀមរាប ចាប់ពីដើមឆ្នាំ ២០២៣ មកដល់ជិតចុងឆ្នាំ២០២៤ (គិតត្រឹមខែកញ្ញា) គឺពិតជាកើនឡើង ប៉ុន្តែបើនិយាយថា កើនឡើងគំហុក និងមានបរិមាណច្រើនដូចមុនអំឡុងមានវត្តមានជំងឺកូវីដ១៩ គឺមិនទាន់ទេ។ លោកបន្តថា វិស័យទេសចរណ៍អាចនឹងមានភាពល្អប្រសើរឡើងវិញលុះត្រាតែស្ថានភាពសេដ្ឋកិច្ច និងនយោបាយពិភពលោកល្អឡើងវិញ។
លោកបន្ថែមថា ភ្ញៀវបរទេសដែលមកខេត្តសៀមរាបក្នុងអំឡុងពេលចុងក្រោយនេះ គឺមានចម្រុះជាតិសាសន៍ ដោយមិនមែនភាគច្រើនជាអ្នកមកពីប្រទេសជិតខាងដូចជា ចិន វៀតណាម និងថៃ នោះទេ គឺមានមកពីប្រទេសតំបន់អ៊ឺរ៉ុប និងអាមេរិក ជាដើម។
លោកអះអាងថា៖«ចំនួនភ្ញៀវពេលនេះធៀបនឹងរយៈពេលដូចគ្នាឆ្នាំមុន គឺកើនឡើង ប៉ុន្តែបើធៀបនឹងមុនឆ្នាំ២០២០ គឺនៅមានចំនួនតិចតួចនៅឡើយ»។ លោកបន្តថា៖«ទោះយ៉ាងណា ខ្ញុំនៅតែមានសុទិដ្ឋិនិយមថា អ្វីៗនឹងប្រសើរ ខណៈរដ្ឋាភិបាល និងផ្នែកឯកជនកម្ពុជាកំពុងខិតខំពង្រីកការផ្សព្វផ្សាយ និងកសាងហេដ្ឋារចនាសម្ព័ន្ធផ្លូវថ្នល់ ព្រលានយន្តហោះ ព្រមទាំងផលិតផលទេសចរណ៍ថ្មីៗកាន់តែច្រើនបន្ថែមទៀត»។
ទោះយ៉ាងណា ក្នុងនាមមគ្គុទ្ទេសក៍ទេសចរ លោកក៏ស្នើឱ្យអាជ្ញាធរ និងប្រជាជនខ្មែរទាំងអស់ចូលរួមសហការគ្នាក្នុងការរៀបចំសោភណ្ឌភាព អនាម័យ និងសន្តិសុខនៅទូទាំងប្រទេសឱ្យកាន់តែស្រស់ស្អាត និងមានភាពទាក់ទាញ។
នៅក្នុងឆ្នាំ២០១៩ ដែលជាពេលប្រទេសកម្ពុជាទទួលបានភ្ញៀវទេសចរបរទេសច្រើន គឺជាង ៦,៦លាននាក់ ប្រាក់ចំណូលដែលគ្រឹះស្ថានអង្គររកបានមានចំនួនជាង ៨០,៧លានដុល្លារ៕
លោក អនហេង សុភ័ក្រ ប្រធានសមាគមមគ្គុទេសក៍ទេសចរណ៍ភាសាចិនកម្ពុជា(ខេត្តសៀមរាប) ថ្មីៗនេះ បាននិយាយថា ស្ថិតក្នុងស្ថានភាពនេះកម្ពុជាត្រូវតែខិតខំធ្វើការផ្សព្វផ្សាយបន្ថែមទៀតដើម្បីទាក់ទាញចំណាប់អារម្មណ៍ភ្ញៀវបរទេសឱ្យចូលមកកម្សាន្ត និងមកវិនិយោគនៅកម្ពុជាកាន់តែច្រើន។
លោកបាននិយាយថា៖«បច្ចុប្បន្នកម្ពុជាមានកន្លែងដែលមានសក្តានុពលក្នុងការទាក់ទាញភ្ញៀវបរទេសឱ្យមកកម្សាន្តហើយ ប៉ុន្តែការរៀបចំ និងអភិវឌ្ឍន៍កន្លែងទាំងនោះឱ្យកាន់តែមានសម្រស់ និងបរិស្ថានល្អក៏ជារឿងចាំបាច់ដែរ»។
ក្នុងឆ្នាំ២០២៣ មានភ្ញៀវទេសចរបរទេសចំនួន ៧៩៨ ០៦៩នាក់បានទិញសំបុត្រចូលទស្សនារមណីយដ្ឋានអង្គរ កើនឡើង ១៧៧,៦៣ភាគរយបើធៀបនឹងឆ្នាំ២០២២ ចំណែកទឹកប្រាក់ដែលប្រមូលបានពីការលក់សំបុត្រ មានសរុប ៣៧ ១៩៨ ៩៨៨ដុល្លារ កើនឡើង ២២២,៦៨ភាគរយ។
ក្រៅពីចំណូលខាងលើ គ្រឹះស្ថានអង្គរ ក៏ទទួលបានភ្ញៀវ ១៤ ៨០៦នាក់ ស្មើនឹងប្រាក់ ២២២ ០៩០ដុល្លារពីការលក់សំបុត្រឱ្យភ្ញៀវបរទេសចូលទស្សនាតំបន់ប្រាសាទកោះកែរ, និងប្រាក់ចំនួន ៥៦៤ ៦៧១ដុល្លារ ពីការលក់សំបុត្រទូកនៅកំពង់ផែចុងឃ្នៀស។ នេះបើយោងតាមគ្រឹះស្ថានអង្គរ៕
