ទិដ្ឋភាពកំពង់ផែស្វយ័តខេត្តព្រះសីហនុកាលពីខែមេសា ឆ្នាំ២០២៣។ ភ្នំពេញប៉ុស្តិ៍
ទំនាក់ទំនងពាណិជ្ជកម្មទ្វេភាគីកម្ពុជា-ចក្រភពអង់គ្លេសនឹងកាន់តែល្អប្រសើរ ខណៈផ្នែកឯកជនកម្ពុជា គ្រោងជួបពិភាក្សាទ្វេភាគីជាមួយក្រុមធុរកិច្ចចក្រភពអង់គ្លេស ក្នុងអំឡុងពេលនៃការអមដំណើរប្រមុខរាជរដ្ឋាភិបាលកម្ពុជា ទៅចូលរួមកិច្ចប្រជុំកំពូលអាស៊ាន នៅប្រទេសឡាវ នាសប្តាហ៍នេះ។
នាយករដ្ឋមន្ត្រីកម្ពុជា លោក ហ៊ុន ម៉ាណែត នឹងដឹកនាំគណៈប្រតិភូរាជរដ្ឋាភិបាលកម្ពុជា ព្រមទាំងផ្នែកឯកជននៅកម្ពុជាដែលតំណាងដោយសភាពាណិជ្ជកម្មកម្ពុជា(CCC) ទៅចូលរួមកិច្ចប្រជុំកំពូលអាស៊ានលើកទី ៤៤ និង ៤៥ និងកិច្ចប្រជុំកំពូលពាក់ព័ន្ធនានា នៅរដ្ឋធានីវៀងចន្ទន៍ ប្រទេសឡាវ ដែលប្រព្រឹត្តទៅចាប់ពីថ្ងៃទី ៨ ដល់ថ្ងៃទី ១១ ខែតុលា ឆ្នាំ២០២៤។
យោងតាមសេចក្តីប្រកាសព័ត៌មានរបស់ CCC ក្នុងឱកាសនៃដំណើរទស្សនកិច្ចនេះ គណៈប្រតិភូសភាពាណិជ្ជកម្មកម្ពុជា នឹងអញ្ជើញចូលរួមកិច្ចប្រជុំកំពូលធុរកិច្ច និងវិនិយោគអាស៊ានឆ្នាំ ២០២៤ ដែលផ្តោតលើប្រធានបទសំខាន់ៗរួមមានៈ ១-គោលជំហរបស់អាស៊ាននៅក្នុងភូមិសាស្ត្រនយោបាយសកល, ២-ការលើកកម្ពស់តំណភ្ជាប់សេដ្ឋកិច្ចនិងភាពធន់នឹងវិបត្តិ, ៣-តួនាទីរបស់អាស៊ានក្នុងសេដ្ឋកិច្ចសកល និង ៤-ទិដ្ឋភាពអនាគតអាស៊ាននៅក្នុងតំបន់ឥណ្ឌូប៉ាស៊ីហ្វិក។ ក្រៅពីនេះគណៈប្រតិភូសភាពាណិជ្ជកម្មកម្ពុជា នឹងអញ្ជើញចូលរួមកម្មវិធីធុរកិច្ចផ្សេងទៀតដូចជា វេទិកាឡូជីស្ទិកអាស៊ាន និងជំនួបពិភាក្សាធុរកិច្ចជាមួយភាគីពាក់ព័ន្ធផ្សេងទៀត។
នៅក្នុងដំណើរទៅប្រទេសឡាវ លោក គិត ម៉េង ប្រធានសភាពាណិជ្ជកម្មកម្ពុជា(CCC) ក៏នឹងមានជំនួបពិភាក្សាការងារជាមួយលោក Lord Vaizey ប្រធានក្រុមប្រឹក្សាធុរកិច្ចចក្រភពអង់គ្លេស-អាស៊ាន ដែលផ្តោតជាសំខាន់លើការពង្រឹងកិច្ចសហប្រតិបត្តិការរវាងក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា និងក្រុមប្រឹក្សាធុរកិច្ចចក្រភពអង់គ្លេស-អាស៊ាន ក្នុងការជំរុញទំនាក់ទំនងធុរកិច្ច និងវិនិយោគរវាងចក្រភពអង់គ្លេស និងកម្ពុជា។
ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា(GDCE) ឱ្យដឹងថា សកម្មភាពនៃការផ្លាស់ប្តូរទំនិញរវាងប្រទេសកម្ពុជា-ចក្រភពអង់គ្លេស បានបង្ហាញភាពល្អប្រសើរនៅក្នុងឆ្នាំ២០២៤ នេះ។ ជាក់ស្តែងក្នុងរយៈពេល ៨ខែ ដើមឆ្នាំ ២០២៤ ការនាំចេញ នាំចូលទំនិញរវាងភាគីទាំង ២ មានទឹកប្រាក់សរុប ៦៨០,៣៤ លានដុល្លារ កើនឡើង ១៥,៥ ភាគរយបើធៀបរយៈពេលដូចគ្នាក្នុងឆ្នាំ២០២៣។
បើតាម GDCE ក្នុងចំណោមទឹកប្រាក់ខាងលើ គឺទំនិញកម្ពុជានាំទៅចក្រភពអង់គ្លេស មានចំនួន ៦៤៣,៨៤ លានដុល្លារ កើនឡើង ២២ ភាគរយ ចំណែកទំនិញអង់គ្លេសនាំមកកម្ពុជា ៣៦,៥ លានដុល្លារ ធ្លាក់ចុះ ៤០,១ ភាគរយ។ ផ្អែកតាម GDCE ជញ្ជីងពាណិជ្ជកម្មកម្ពុជាក្នុងរយៈពេល ៨ខែ ដើមឆ្នាំ២០២៤ គឺមានឧត្តមភាព ៦០៧,៣៤ លានដុល្លារ។ ចក្រភពអង់គ្លេស គឺជាដៃគូពាណិជ្ជកម្មធំទី ១០ របស់កម្ពុជា។
ថ្លែងប្រាប់ភ្នំពេញប៉ុស្តិ៍ក្នុងថ្ងៃទី៧ ខែតុលា នេះ លោក ងួន ម៉េងតិច អគ្គនាយកសភាពាណិជ្ជកម្មកម្ពុជា ឱ្យដឹងថា ជំនួបពិភាក្សាទ្វេភាគីកម្ពុជា-ចក្រភពអង់គ្លេសដែលគ្រោងធ្វើឡើងក្នុងដំណើរទស្សនកិច្ចទៅចូលរួមកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ នៅប្រទេសឡាវ នឹងផ្តល់ផលប្រយោជន៍សម្រាប់ជំរុញកិច្ចសហប្រតិបត្តិការផ្នែកពាណិជ្ជកម្ម និងការទូតរបស់កម្ពុជា ជាមួយនឹងប្រទេសដៃគូទាំងអស់។
លោកថ្លែងថា៖«ក្នុងនាមផ្នែកឯកជន យើងពិតជាចង់ពង្រឹង និងបង្កើនទំនាក់ទំនងជាមួយចក្រភពអង់គ្លេស ដើម្បីបង្កើន និងជំរុញការធ្វើពាណិជ្ជកម្មឱ្យបានកាន់តែច្រើនបន្ថែមទៀត»។
ទោះយ៉ាងណា លោក ម៉េងតិច អះអាងថា បើនិយាយថាវានឹងផ្តល់ផលវិជ្ជមានកម្រិតណាដល់កំណើនពាណិជ្ជកម្ម និងការវិនិយោគនៅកម្ពុជា គឺគេមិនទាន់អាចដឹងបានទេ។
សេដ្ឋវិទូនៃរាជបណ្ឌិត្យសភាកម្ពុជា លោក ហុង វណ្ណៈ បាននិយាយថា ចក្រភពអង់គ្លេស គឺជាទីផ្សារធំដែលតែងតែទទួលទិញទំនិញពីកម្ពុជា ដោយភាគច្រើនជាផលិតផលសម្លៀកបំពាក់ កាបូបធ្វើដំណើរ ស្បែកជើង និងកង់ ជាដើម។ ការបង្កើនកិច្ចសហប្រតិបត្តិការជាមួយអង់គ្លេស ដែលជាប្រទេសធំ មានប្រជាជនច្រើន និងមានសេដ្ឋកិច្ចរីកចម្រើន ប្រាកដជានឹងហុចផលវិជ្ជមានច្រើនដល់សេដ្ឋកិច្ចកម្ពុជា។ លោកបន្តថា ម៉្យាងទៀតដោយសារចក្រភពអង់គ្លេសស្ថិតក្នុងទ្វីបអ៊ីរ៉ុប ដូច្នេះតាមរយៈចក្រភពអង់គ្លេស ក៏អាចជួយឱ្យមានលំហូរទំនិញកម្ពុជាទៅទីផ្សារប្រទេសក្នុងតំបន់អ៊ឺរ៉ុបផងដែរ។
លោកបញ្ជាក់ថា៖ «គ្រប់ការបង្កើនកិច្ចសហប្រតិបត្តិការល្អ គឺវានឹងផ្តល់ផលជាវិជ្ជមានសម្រាប់ប្រទេសដៃគូទាំង ២»។
លោកបន្ថែមថា ប្រសិនបើកម្ពុជាទទួលបានចំណែកទីផ្សារនៅចក្រភពអង់គ្លេសកាន់តែច្រើន វានឹងជួយឱ្យកម្ពុជាទាក់ទាញអ្នកវិនិយោគឱ្យមកបណ្តាក់ទុនផ្ទាល់កាន់តែច្រើន ដើម្បីផលិត/កែច្នៃទំនិញ សម្រាប់នាំទៅលក់នៅទីផ្សារអន្តរជាតិ រួមទាំងចក្រភពអង់គ្លេស។
កាលពីឆ្នាំ២០២៣ ដោយសារស្ថានភាពសេដ្ឋកិច្ច និងនយោបាយពិភពលោក ជួបនឹងវិបត្តិច្រើនជាបន្តបន្ទាប់ បានធ្វើឱ្យចំនួនទឹកប្រាក់ផ្លាស់ប្តូរទំនិញរវាងប្រទេសកម្ពុជា និងចក្រភពអង់គ្លេស សម្រេចបានប្រមាណ ៨៧២,៩៦ លានដុល្លារ ថយចុះ ១០,៧ភាគរយធៀបនឹងឆ្នាំ ២០២២ ដែលមាន ៩៧៧,៤៤ លានដុល្លារ។ ក្នុងចំនួនខាងលើគឺទំនិញដែលកម្ពុជានាំទៅចក្រភពអង់គ្លេស ៧៩៦,៣៨ លានដុល្លារ ថយចុះ ១០,២ ភាគរយ ចំណែកទំនិញអង់គ្លេសនាំមកកម្ពុជាចំនួន ៧៦,៥៨ លានដុល្លារ ធ្លាក់ចុះ ១៦ ភាគរយ។ នេះបើផ្អែកតាម GDCE៕
