សិក្ខាសាលាស្តីពីការផ្សព្វផ្សាយលទ្ធផលគម្រោង «ការពង្រឹងសុវត្ថិភាពហិរញ្ញវត្ថុក្នុងសហគមន៍» នៅថ្ងៃទី ៨ ខែតុលា។ រូបថត សហការី
ភ្នំពេញ៖ សិក្ខាសាលាស្តីពីការផ្សព្វផ្សាយលទ្ធផលគម្រោង «ការពង្រឹងសុវត្ថិភាពហិរញ្ញវត្ថុក្នុងសហគមន៍» ត្រូវបានរៀបចំឡើងក្នុងទីក្រុងភ្នំពេញកាលពីម្សិលមិញនៅថ្ងៃទី ៨ ខែតុលា ដោយប្រមូលផ្តុំអ្នកពាក់ព័ន្ធសំខាន់ៗមកពីស្ថាប័នត្រួតពិនិត្យហិរញ្ញវត្ថុ ធនាគារ មីក្រូហិរញ្ញវត្ថុ និងហិរញ្ញវត្ថុរបស់កម្ពុជា។
គំនិតផ្តួចផ្តើមនេះរៀបចំឡើងដើម្បីលើកកម្ពស់ចំណេះដឹងផ្នែកហិរញ្ញវត្ថុ និងការការពារអតិថិជនដែលបង្កើតនិរន្ដរភាពដល់សហគមន៍មូលដ្ឋានដោយផ្ដល់ឱ្យបុគ្គលម្នាក់ៗនូវបំណិនជីវិតសម្រាប់ការគ្រប់គ្រងហិរញ្ញវត្ថុផ្ទាល់ខ្លួននិងគ្រួសារ។
ការផ្ដោតលើការអប់រំសហគមន៍ជនបទអំពីសិទ្ធិ និងការទទួលខុសត្រូវផ្នែកហិរញ្ញវត្ថុដើរតួនាទីយ៉ាងសំខាន់ក្នុងការកាត់បន្ថយហានិភ័យនៃការក្លែងបន្លំ និងជួយពួកគេចៀសវាងការធ្លាក់ចូលទៅក្នុងបំណុលច្រើនពេក។
លោកស្រី ឌិត នីតា ប្រធានសមាគមមីក្រូហិរញ្ញវត្ថុកម្ពុជា បានសង្កត់ធ្ងន់លើសារៈសំខាន់នៃការរៀបចំប្រជាជនក្នុងស្រុកនូវចំណេះដឹងផ្នែកហិរញ្ញវត្ថុ។
លោកស្រីបានថ្លែងថា៖ «គម្រោងនេះនឹងចូលរួមចំណែកយ៉ាងសំខាន់ក្នុងការបង្កើនបំណិនជីវិតក្នុងការគ្រប់គ្រង ចាត់ចែងលុយកាក់ក្នុងក្រុមគ្រួសារ ជួយឱ្យពលរដ្ឋនៅមូលដ្ឋានយល់ដឹងពីសិទ្ធិ និងកាតព្វកិច្ចរបស់ខ្លួនពាក់ព័ន្ធនឹងកម្ចី និងចៀសផុតពីការចាញ់បោកផ្នែកហិរញ្ញវត្ថុក្នុងប្រការណាមួយ ឬជួយបញ្ចៀសនូវបំណុលច្រើនលើសលប់»។
លោកស្រី នីតា បានបន្ថែមថា តាមរយៈការពង្រឹងចំណេះដឹងដល់អាជ្ញាធរមូលដ្ឋាន និងអ្នកដឹកនាំសហគមន៍ គំនិតផ្តួចផ្តើមបង្កើតនូវឥទ្ធិពលនៃការចែករំលែកចំណេះដឹង ដោយធានាថា សូម្បីតែសហគមន៍ដាច់ស្រយាលបំផុតក៏អាចទទួលបានការអនុវត្តហិរញ្ញវត្ថុប្រកបដោយសុវត្ថិភាពផងដែរ។
សិក្ខាសាលានេះធ្វើឡើងនៅមជ្ឈមណ្ឌលសិក្សាបច្ចេកទេសធនាគារ ក្រោមអធិបតីភាពលោក យឹម លាត ទេសាភិបាលរងធនាគារជាតិនៃកម្ពុជា និងមានការចូលរួមពីឥស្សរជនមកពីវិស័យហិរញ្ញវត្ថុនានា។
ក្នុងចំណោមអ្នកចូលរួមសំខាន់ៗមានតំណាងមកពីធនាគារជាតិនៃកម្ពុជា សមាគមមីក្រូហិរញ្ញវត្ថុកម្ពុជា និងក្រុមហ៊ុន ក្រេឌីត ប្យួរ៉ូ (ខេមបូឌា) ខូ អិលធីឌី (CBC) រួមជាមួយនិងតំណាងមកពីគ្រឹះស្ថានធនាគារ និងហិរញ្ញវត្ថុ អាជ្ញាធរភូមិ ឃុំនៃខេត្តអនុវត្តគម្រោង ដៃគូអភិឌ្ឍន៍ និងអង្គការសង្គមស៊ីវិលប្រមាណជាង ២០០នាក់ ។
លោក រ័ត្ន សោភ័ណ ប្រធានសមាគមធនាគារនៅកម្ពុជា បានសម្ដែងការសាទរចំពោះសមិទ្ធផលដែលសម្រេចបានក្នុងការអនុវត្តសាកល្បងនៃគម្រោងនេះ ដែលបានលើកកម្ពស់ធុរកិច្ចធនាគារប្រកបដោយការទទួលខុសត្រូវ និងការលើកកម្ពស់កិច្ចការពារអ្នកប្រើប្រាស់ ព្រមទាំងការអបរំផ្នែកចំណេះដឹងហិរញ្ញវត្ថុ គឺជារបៀបវារៈស្នូលរបស់សមាគមធនាគារនៅកម្ពុជា ព្រមទាំងសមាជិករបស់ខ្លួនផងដែរ។
សិក្ខាសាលាមានការចូលរួមពីតំណាងធនាគារជាតិនៃកម្ពុជា សមាគមមីក្រូហិរញ្ញវត្ថុកម្ពុជា និងក្រុមហ៊ុន ក្រេឌីត ប្យួរ៉ូ (ខេមបូឌា) ខូ អិលធីឌី (CBC) គ្រឹះស្ថានធនាគារ និងហិរញ្ញវត្ថុ អាជ្ញាធរភូមិ ឃុំនៃខេត្តអនុវត្តគម្រោង ដៃគូអភិឌ្ឍន៍ និងអង្គការសង្គមស៊ីវិលប្រមាណជាង ២០០នាក់។ រូបថត សហការី
លោកបានឱ្យដឹងថា៖ «សមាគមធនាគារនៅកម្ពុជា ពិតជាមានកិត្តិយស ដែលក្លាយជាផ្នែកមួយនៃគម្រោង ការពង្រឹងសុវត្ថិភាពហិរញ្ញវត្ថុក្នុងសហគមន៍ និងសមាជិកក្រុមប្រឹក្សានៃគណៈកម្មាធិការដឹកនាំថ្នាក់កណ្តាល និងសមាជិកប្រតិបត្តិនៃគណៈកម្មាធិការដឹកនាំថ្នាក់កណ្តាលគម្រោងផងដែរ»។
លក្ខណៈសំខាន់នៃគម្រោងគឺការរួមចំណែកក្នុងការលើកកម្ពស់ការអប់រំផ្នែកហិរញ្ញវត្ថុនៅកម្រិតមូលដ្ឋាន។
ក្នុងរយៈពេលមួយឆ្នាំកន្លងមក គម្រោងនេះត្រូវបានសាកល្បងនៅក្នុងខេត្តចំនួនបួនគឺ កំពង់ធំ កំពង់ស្ពឺ ស្វាយរៀង និងបាត់ដំបង ដោយបណ្តុះបណ្តាលគ្រូបង្គោលក្នុងស្រុកដើម្បីផ្សព្វផ្សាយចំណេះដឹងផ្នែកហិរញ្ញវត្ថុសំខាន់ៗនៅក្នុងសហគមន៍របស់ពួកគេ។
គំនិតផ្តួចផ្តើមនេះស្របតាមយុទ្ធសាស្រ្តជាតិស្តីពីបរិយាបន្នហិរញ្ញវត្ថុឆ្នាំ ២០១៩-២០២៥ ដែលមានគោលបំណងកែលម្អលទ្ធភាពទទួលបានសេវាហិរញ្ញវត្ថុប្រកបដោយការទទួលខុសត្រូវ និងការពារសិទ្ធិអ្នកប្រើប្រាស់ ជាពិសេសអ្នកនៅតំបន់ជនបទ។
សមិទ្ធផលសំខាន់ៗមួយដែលត្រូវបានគូសបញ្ជាក់ក្នុងសិក្ខាសាលានេះគឺការបណ្តុះបណ្តាលគ្រូបង្គោលថ្នាក់ឃុំចំនួន ៥៩ នាក់ ក្នុងនោះស្ត្រី ១៦ នាក់មកពីខេត្តនានា។
ក្រោយមក គ្រូបណ្តុះបណ្តាលទាំងនេះនឹងអប់រំអ្នកភូមិរាប់ពាន់នាក់អំពីរបៀបធ្វើការសម្រេចចិត្តប្រកបដោយការយល់ដឹងអំពីប្រាក់កម្ចី ការសន្សំ និងការធ្វើផែនការហិរញ្ញវត្ថុ។
គម្រោងនេះក៏បានផលិតសៀវភៅសិក្សាហិរញ្ញវត្ថុសហគមន៍ចំនួន ៧៥០០ក្បាល ដែលមានគោលបំណងផ្តល់នូវព័ត៌មានដែលអាចចូលប្រើបាន និងងាយយល់អំពីមូលដ្ឋានគ្រឹះនៃការគ្រប់គ្រងហិរញ្ញវត្ថុប្រកបដោយសុវត្ថិភាព។
ទេសាភិបាលរងធនាគារជាតិនៃកម្ពុជា លោក យឹម លាត បានសរសើរគំនិតផ្តួចផ្តើមនេះ ដោយបានហៅថាជាជំហានដ៏សំខាន់មួយក្នុងកិច្ចខិតខំប្រឹងប្រែងលើកកម្ពស់ឥរិយាបថហិរញ្ញវត្ថុប្រកបដោយការទទួលខុសត្រូវ។
លោកបានថ្លែងថា៖ «ភាពជោគជ័យនៃការអនុវត្តគម្រោងនេះក្នុងដំណាក់ការសាកល្បងនេះ នឹងក្លាយជាឧត្តមានុវត្តន៍សម្រាប់ក្រុមការងារអាចប្រើប្រាស់សម្រាប់ការពង្រីកវិសាលភាពនៃគម្រោងនេះទៅកាន់ ឃុំ-សង្កាត់ ក្រុង-ស្រុកផ្សេងទៀត»។
លោកបានលើកទឹកចិត្តបន្ថែមទៀតដល់ភាគីពាក់ព័ន្ធឱ្យសហការគ្នាក្នុងការលើកកម្ពស់ចំណេះដឹងផ្នែកហិរញ្ញវត្ថុ ដោយផ្តោតជាពិសេសលើការប្រើប្រាស់ប្រាក់រៀល និងការការពារពីការក្លែងបន្លំហិរញ្ញវត្ថុ។
សិក្ខាសាលាបានគូសបញ្ជាក់ពីផលប៉ះពាល់យ៉ាងទូលំទូលាយនៃការអប់រំផ្នែកហិរញ្ញវត្ថុលើការលើកកម្ពស់សុខុមាលភាពរបស់សហគមន៍៕
