កម្មករកំពុងធ្វើការនៅក្នុងរោងចក្រកាត់ដេរសម្លៀកបំពាក់មួយក្នុងក្រុងតាខ្មៅ។ ភ្នំពេញប៉ុស្តិ៍
ភ្នំពេញ៖ ផលិតផលវាយនភណ្ឌដែលមានទឹកប្រាក់ជាង ៩,៣ ពាន់លានដុល្លារត្រូវបានកម្ពុជានាំចេញទីផ្សារអន្តរជាតិក្នុងរយៈពេល ១០ ខែដើមឆ្នាំ ២០២៤ ដោយចំនួននេះគឺបានកើនទឹកប្រាក់ដែលបាននាំចេញកាលពីឆ្នាំ ២០២៣។ អាមេរិក និងអ៊ឺរ៉ុប នៅតែជាទីផ្សារសំខាន់ជាងគេដែលទទួលទិញផលិតផលវាយនភណ្ឌពីកម្ពុជា។
យោងតាមទិន្នន័យអគ្គនាយកដ្ឋានគយ និងរដ្ឋាករកម្ពុជា(GDCE) ដែលចេញផ្សាយកាលពីថ្ងៃទី១១ ខែវិច្ឆិកា គឺចន្លោះពីខែមករា ដល់ខែតុលា ឆ្នាំ២០២៤ ប្រភេទទំនិញដែលមានលេខកូដ៍(HS ២ខ្ទង់) ៦១ និង ៦២ ដែលរួមមាន សម្លៀកបំពាក់ និងគ្រឿងបន្ទាប់បន្សំ ធ្វើឡើងពីក្រណាត់ ឬមិនធ្វើពីក្រណាត់ និងប្រភេទទំនិញ លេខកូដ៍ ៦៤ ដែលរួមមានស្បែកជើង ស្រោមជើង និងវត្ថុវាយនភណ្ឌកែច្នៃមួយចំនួនទៀត ត្រូវបានកម្ពុជានាំចេញទៅទីផ្សារអន្តរជាតិ ក្នុងទឹកប្រាក់សរុប ៩ ៣៣២,៦៥ លានដុល្លារ កើនឡើង ២៣,៤៧ ភាគរយបើធៀបនឹងរយៈពេលដូចគ្នាក្នុងឆ្នាំ ២០២៣ ដែលមាន ៧ ៥៥៨,៦៩ លានដុល្លារ។
ទឹកប្រាក់សរុបការនាំចេញផលិតផលទាំងអស់ខាងលើ គឺស្មើនឹង ៤៣,២៥ ភាគរយនៃចំនួនទឹកប្រាក់នាំចេញសរុបរបស់កម្ពុជា រយៈពេល ១០ ខែដើមឆ្នាំ ២០២៤ ដែលមានចំនួន ២១ ៥៧៤,២៦ លានដុល្លារ។
បើញែកចេញតាមលេខកូដ៍របស់ GDCE គឺទំនិញមានប្រភេទលេខកូដ៍(HS ២ខ្ទង់) ៦១ មានទឹកប្រាក់ ៥ ៤៧២,០៧ លានដុល្លារ កើនឡើង ២០,៥ ភាគរយធៀបរយៈពេលដូចគ្នាឆ្នាំ២០២៣, លេខកូដ៍ ៦២ មានទឹកប្រាក់ ២ ៥២៨,២៥ លានដុល្លារ កើន ៣១,១ ភាគរយ និងទំនិញលេខកូដ៍ ៦៤ មានចំនួន ១ ៣៣២,៣៣ លានដុល្លារ កើន ២២,៣ ភាគរយ។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី១២ ខែវិច្ឆិកាថា ភាពធូរស្បើយនៃវិបត្តិសេដ្ឋកិច្ចពិភពលោក អស្ថិរភាពផ្នែកនយោបាយនៅប្រទេសនាំចេញផលិតផលវាយនភណ្ឌមួយចំនួន និងភាពអនុគ្រោះពន្ធនាំចេញ ព្រមទាំងការកើនឡើងនៃសមត្ថភាពផលិតនៅកម្ពុជា បានជួយឱ្យការនាំចេញផលិតផលក្នុងវិស័យវាយនភណ្ឌកើនឡើងជាបន្តបន្ទាប់ក្នុងរយៈពេលជាង ១ឆ្នាំកន្លងមកនេះ។
លោកបន្តថា ផលិតផលទាំងអស់នេះ គឺមានទំនាក់ទំនងច្រើននឹងការរស់នៅ និងធ្វើដំណើរ ដូច្នេះនៅពេលវិស័យទេសចរណ៍ពិភពលោកមានដំណើរការល្អ តម្រូវការក៏មានច្រើនដែរ។
លោកបានថ្លែងថា៖«ផ្អែកតាមស្ថានភាពសេដ្ឋកិច្ចពិភពលោកនាពេលបច្ចុប្បន្ន ខ្ញុំគិតថាការនាំចេញផលិតផលវាយនភណ្ឌរបស់កម្ពុជានឹងបន្តកើនឡើងថែមទៀត ខណៈការពង្រីកទីផ្សារនាំចេញក៏មានចំនួនកាន់តែច្រើនផងដែរ»។
ប្រធានសហព័ន្ធសមាគមអ្នកវិនិយោគកម្ពុជា និងជាប្រធានសមាគមស្បែកជើងកម្ពុជា លោក លី ឃុនថៃ កាលពីខែតុលាបានប្រាប់ភ្នំពេញប៉ុស្តិ៍ បន្ទាប់ពីធ្លាក់ចុះមួយរយៈដោយសារឥទ្ធិពលនៃការរីករាលដាលជំងឺកូវីដ១៩ ការនាំចេញផលិតផលវាយនភណ្ឌបានចាប់ផ្តើមបង្ហាញសញ្ញាវិជ្ជមានឡើងវិញចាប់ពីពាក់កណ្តាលឆមាសទី២ ឆ្នាំ២០២៣ មក។
លោកបន្តថា ការកើនឡើងចំនួនទឹកប្រាក់នាំចេញផលិតផលវាយនភណ្ឌ គឺដោយសារកម្ពុជាជាប្រទេសមានស្ថិរភាពនយោបាយល្អ មានច្បាប់វិនិយោគអំណោយផល សម្បូរកម្លាំងពលកម្មជំនាញ ហេដ្ឋារចនាសម្ព័ន្ធដឹកជញ្ជូនល្អប្រសើរ និងមានទីផ្សារទទួលទិញកាន់តែច្រើន។
លោកបានថ្លែងថា៖«កំណើនទឹកប្រាក់នាំចេញផលិតផលវាយនភណ្ឌនៅពេលនេះ គឺដោយសារប្រទេសកម្ពុជាមានស្ថិរភាពនយោបាយនឹងនរនៅក្នុងចំណោមប្រទេសអាស៊ាន កត្តាកម្មករកម្មការិនីធ្វើការមានភាពរហ័សរហួន មានស្នាដៃល្អសម្រាប់ចង្វាក់ផលិតកម្មទាំងគុណភាព និងបរិមាណ»។
លោកបានលើកឡើងទៀតថា សមិទ្ធិផលដែលសម្រេចបាននាពេលនេះ ក៏ដោយសារតែមានការយកចិត្តដាក់ខ្លាំងផងដែរពីប្រមុខរាជរដ្ឋាភិបាលដែលតែងខិតខំផ្សព្វផ្សាយ និងទាក់ទាញអ្នកវិនិយោគឱ្យមកបណ្តាក់ទុនផ្ទាល់នៅកម្ពុជា ក៏ដូចជាបញ្ជាទិញទំនិញផលិតនៅកម្ពុជា។
បើតាមលោក ឃុនថៃ ទីផ្សារសំខាន់ៗដែលបញ្ជាទិញផលិតផលវាយនភណ្ឌពីកម្ពុជា មានដូចជា អាមេរិក សហគមន៍អឺរ៉ុប ចក្រភពអង់គ្លេស ជប៉ុន កូរ៉េ និងប្រទេសចិន ជាដើម។
ទាក់ទងនឹងស្ថានភាពការនាំចេញសម្រាប់រយៈពេលនៅសល់ក្នុងឆ្នាំ២០២៤ និងឆ្នាំ ២០២៥ ខាងមុខ លោក ឃុនថៃ បានអះអាងថា ការនាំចេញផលិតផលវាយនភណ្ឌនឹងបន្តកើនឡើងបន្ថែមទៀត។
ធនាគារអភិវឌ្ឍន៍អាស៊ី(ADB) និងមូលនិធិរូបិយវត្ថុអន្តរជាតិ(IMF) កាលពីខែកញ្ញា បានព្យាករណ៍ថា កំណើនសេដ្ឋកិច្ចប្រទេសកម្ពុជាក្នុងឆ្នាំ ២០២៤ នេះនឹងស្ថិតក្នុងកម្រិត ៥,៨ ភាគរយ និង ៥,៥ ភាគរយ។ កំណើននេះត្រូវបានគាំទ្រដោយសារការងើបឡើងវិញនៃវិស័យវាយនភណ្ឌ និងតាមពីក្រោយដោយវិស័យកសិកម្ម និងទេសចរណ៍។
លោកស្រី Jyotsana Varma នាយិកាធនាគារអភិវឌ្ឍន៍អាស៊ីប្រចាំកម្ពុជា មានថ្លែងថា៖ «ការស្ទុះងើបឡើងវិញនៃវិស័យវាយនភណ្ឌ ជាពិសេសសម្លៀកបំពាក់ ស្បែកជើង និងទំនិញធ្វើដំណើរកំពុងជំរុញកំណើនសេដ្ឋកិច្ចប្រទេសកម្ពុជា។ វិស័យកសិកម្ម និងទេសចរណ៍កំពុងបន្តកើនឡើង ខណៈការបន្តហូរចូលនៃការវិនិយោគផ្ទាល់ពីបរទេស កំពុងជួយជំរុញល្បឿនសេដ្ឋកិច្ចកម្ពុជា។ ជារួម កម្លាំងចលករទាំងនេះកំពុងនាំមកនូវស្ថានភាពល្អប្រសើរសម្រាប់ឆ្នាំ ២០២៤ ព្រមទាំងពង្រឹងមូលដ្ឋានសម្រាប់កំណើនរឹងមាំនៅឆ្នាំ ២០២៥ និងឆ្នាំបន្តបន្ទាប់ទៀត»។
ទិន្នន័យរបស់ GDCE បានឱ្យដឹងថា ក្នុងឆ្នាំ២០២៣ ការនាំចេញផលិតផលលេខកូដ៍ទាំង ៣ ខាងលើមានទឹកប្រាក់សរុប ៩,២៣ ពាន់លានដុល្លារ ធ្លាក់ចុះ ១៤,២៨ភាគរយធៀបនឹងឆ្នាំ២០២២ ដែលមានចំនួន ១០,៧៧ ពាន់លានដុល្លារ។
