ទិដ្ឋភាពកំពង់ផែស្វយ័តក្រុងព្រះសីហនុ ដែលជាច្រកដឹកជញ្ជូនទំនិញតាមផ្លូវសមុទ្រធំជាងគេនៅកម្ពុជា។ កំពង់ផែស្វយ័តក្រុងព្រះសីហនុ
ភាពល្អប្រសើរនៃទំនាក់ទំនងការទូតបានធ្វើឱ្យលំហូរពាណិជ្ជកម្មទ្វេភាគីកម្ពុជា-ចិនកើនឡើងជាបន្តបន្ទាប់ ដោយក្នុងរយៈពេល ១០ ខែឆ្នាំ ២០២៤ មានទឹកប្រាក់សរុបជាង ១២ ពាន់លានដុល្លារ កើនជាង ២០ ភាគរយបើធៀបនឹងរយៈពេលដូចគ្នាឆ្នាំ ២០២៣ ខណៈទឹកប្រាក់ដែលប្រទេសចិននាំចូលមកកម្ពុជាបានគ្របដណ្តប់ជិត ៩០ ភាគរយនៃចំនួនទឹកប្រាក់សរុប។
យោងតាមអគ្គនាយកដ្ឋានគយ និងរដ្ឋាករកម្ពុជា(GDCE) ចាប់ពីខែមករា ដល់ខែតុលា ឆ្នាំ ២០២៤ ការផ្លាស់ប្តូរទំនិញរវាងប្រទេសទាំង ២ មានទឹកប្រាក់សរុប ១២,៣៨ ពាន់លានដុល្លារ កើនឡើង ២៣ ភាគរយបើធៀបនឹងរយៈពេលដូចគ្នាក្នុងឆ្នាំ ២០២៣ ដែលមានចំនួន ១០,០៧ ពាន់លានដុល្លារ។
ប្រទេសចិន គឺជាដៃគូពាណិជ្ជកម្មអន្តរជាតិធំជាងគេរបស់កម្ពុជា ដោយទឹកប្រាក់នៃការផ្លាស់ប្តូរពាណិជ្ជកម្មរវាងប្រទេសទាំង ២ មានចំណែក ២៧,៤៦ ភាគរយនៃទំហំពាណិជ្ជកម្មអន្តរជាតិរបស់កម្ពុជារយៈពេល ១០ ខែដើមឆ្នាំ ២០២៤ ដែលមានចំនួន ៤៥,០៦ ពាន់លានដុល្លារ។
បើយោងតាម GDCE ក្នុងចំនួនទឹកប្រាក់នេះ គឺទំនិញដែលប្រទេសចិននាំមកកម្ពុជា មានចំនួន ១០,៩៥ ពាន់លានដុល្លារ កើនឡើង ២៣,២ ភាគរយ ចំណែកទំនិញកម្ពុជានាំទៅប្រទេសចិនវិញ មានត្រឹមតែ ១,៤៣ ពាន់លានដុល្លារ កើន ២១,១ ភាគរយ។
ទឹកប្រាក់នៃទំនិញចិននាំចូលកម្ពុជា គឺមានចំណែកប្រមាណ ៨៨,៤៦ ភាគរយនៃចំនួនទឹកប្រាក់ពាណិជ្ជកម្មទ្វេភាគី។ ផ្អែកតាមតួលេខនេះ គឺជញ្ជីងពាណិជ្ជកម្មរបស់កម្ពុជាមានឱនភាពប្រមាណ ៩,៥២ ពាន់លានដុល្លារ ខណៈរយៈពេលដូចគ្នាឆ្នាំ ២០២៣ មានចំនួន ៧,៧១ ពាន់លានដុល្លារ។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ភ្នំពេញប៉ុស្តិ៍ក្នុងថ្ងៃទី១៩ ខែវិច្ឆិកាថា លក្ខខណ្ឌនៃទីតាំងភូមិសាស្រ្ត និងទំនាក់ទំនងជាប្រវត្តិសាស្រ្តដែលមានអាយុកាលរាប់រយឆ្នាំរវាងប្រទេសទាំង ២ គឺជាកម្លាំងចលករដ៏សំខាន់ដែលជួយជំរុញឱ្យសកម្មភាពនៃការផ្លាស់ប្តូរទំនិញរវាងប្រទេសទាំង ២ កើនឡើងជាលំដាប់ ខណៈរដ្ឋាភិបាលនៃប្រទេសទាំង ២ ក៏តែងខិតខំជំរុញឱ្យវិនិយោគិនរបស់ខ្លួនបង្កើនកិច្ចសហការជាមួយគ្នាផងដែរ។
លោកបន្តថា សម្រាប់ចំនួនទឹកប្រាក់ដែលភាគីចិនមានចំនួនលើសលប់ធៀបនឹងការនាំចេញរបស់កម្ពុជា គឺដោយសារប្រទេសចិនបានដើរតួនាទីយ៉ាងសំខាន់ក្នុងការផ្គត់ផ្គង់វត្ថុធាតុដើមឱ្យកម្ពុជា។
វត្ថុធាតុដើមទាំងអស់នោះត្រូវបានប្រើប្រាស់ជាគ្រឿងផ្សំសម្រាប់ការកែច្នៃតាមរោងចក្រនៅកម្ពុជា មុននឹងនាំចេញទៅលក់បន្តនៅទីផ្សារអន្តរជាតិ។
លោកថ្លែងថា៖«ភាពវិជ្ជមាននៃទំហំពាណិជ្ជកម្មរវាងប្រទេសទាំង ២ នឹងមានកាន់តែច្រើននាពេលខាងមុខ។ ប្រទេសចិននឹងបន្តធ្វើជាមូលដ្ឋានសម្រាប់ផ្គត់ផ្គង់វត្ថុធាតុដើមឱ្យកម្ពុជាយូរទៅមុខទៀត»។
លោកបន្ថែមថា ទោះយ៉ាងណាមួយរយៈចុងក្រោយនេះ ទំនិញរបស់កម្ពុជាក៏មានឱកាសកាន់តែច្រើនក្នុងការឈានចូលទីផ្សារប្រទេសចិនដែរ ពិសេសផលិតផលកសិកម្ម និងវាយនភណ្ឌ។
ទាក់ទងនឹងកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន(CCFTA) លោក លឹម ហេង បានបញ្ជាក់ថា កិច្ចព្រមព្រៀងនេះកំពុងចូលរួមចំណែកសំខាន់ក្នុងការជំរុញពាណិជ្ជកម្មទ្វេភាគី ក៏ដូចជាទាក់ទាញអ្នកវិនិយោគចិនឱ្យចូលមកបណ្តាក់ទុនផ្ទាល់នៅកម្ពុជា។
បើតាមលោក លឹម ហេង ផលិតផលសំខាន់ៗដែលកម្ពុជានាំទៅទីផ្សារប្រទេសចិននាពេលនេះមានដូចជា កសិផល វាយនភណ្ឌ ធនធានធម្មជាតិ និងរ៉ែមួយចំនួន ចំណែកទំនិញចិននាំចូលមកកម្ពុជាមានស្ទើគ្រប់មុខទំនិញរាប់ចាប់ពី ចំណីអាហារ គ្រឿងទេស គ្រឿងអលង្ការ គ្រឿងសំណង់ អគ្គិសនី អេឡិចត្រូនិក ឱសថ យានយន្ត និងវត្ថុធាតុដើមជាច្រើនប្រភេទ។
សេដ្ឋវិទូនៃរាជបណ្ឌិត្យសភាកម្ពុជា លោក ហុង វណ្ណៈ បាននិយាយថា ទឹកប្រាក់នៃការផ្លាស់ប្តូរទំនិញរវាងកម្ពុជា-ចិនកើនឡើងដោយសារភាពល្អប្រសើរនៃទំនាក់ទំនងការទូត ខណៈប្រទេសទាំង ២ ក៏មានកិច្ចព្រមព្រៀងពាណិជ្ជកម្មសេរីទ្វេភាគីជាមួយគ្នា(CCFTA) និងជាសមាជិកនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់(RCEP) ផងដែរ។
លោកបន្តថា ខណៈប្រទេសចិនត្រូវបានគេទទួលស្គាល់ថាជាប្រភពផ្គត់ផ្គង់វត្ថុធាតុដើម និងទំនិញដ៏ធំលើពិភពលោកនោះ ដូច្នេះចិននឹងនៅបន្តជាប្រភពផ្គត់ផ្គង់ទំនិញដ៏សំខាន់របស់កម្ពុជា ជាពិសេសវត្ថុធាតុដើមក្នុងផលិតកម្មវាយនភណ្ឌដើម្បីឱ្យកម្ពុជាយកទៅកែច្នៃជាផលិតផលសម្រេចសម្រាប់នាំចេញទៅទីផ្សារអន្តរជាតិ។
លោកបញ្ជាក់ថា៖«រយៈពេលជាយូរមកហើយដែលប្រទេសចិន គឺជាប្រភពសំខាន់នៃការផ្គត់ផ្គង់វត្ថុធាតុដើម ឬគ្រឿងផ្សំផ្សេងៗឱ្យរោងចក្រ/សហគ្រាសនៅកម្ពុជា។ ទំហំពាណិជ្ជកម្មរវាងប្រទេសទាំង ២ នឹងបន្តកើនឡើងថែមទៀតនាពេលខាងមុខ»។
ទាក់ទងនឹងការនាំទំនិញពីកម្ពុជាទៅទីផ្សារប្រទេសចិន អ្នកសេដ្ឋកិច្ចខាងលើអះអាងថា ដោយសារកម្ពុជាជាប្រទេសកំពុងអភិវឌ្ឍន៍ ដូច្នេះទំនិញដែលកម្ពុជានាំទៅប្រទេសចិនភាគច្រើនជាផលិតផលកសិកម្ម និងធនធានធម្មជាតិ។
ដើម្បីជំរុញកិច្ចសហប្រតិបត្តិការផ្នែកពាណិជ្ជកម្ម កាលពីថ្ងៃទី៥-១០ ខែវិច្ឆិកា ក្រសួងពាណិជ្ជកម្ម និងផ្នែកឯកជនកម្ពុជា បាននាំយកផលិតផលគុណភាពខ្ពស់របស់កម្ពុជាជាង ១០០ មុខ ទៅចូលរួមក្នុងព្រឹត្តិការណ៍«ពិព័រណ៍ទំនិញនាំចូលអន្តរជាតិចិន លើកទី៧» នៅក្នុងទីក្រុងសៀងហៃ សាធារណរដ្ឋប្រជាមានិតចិន ដែលមានប្រទេសចូលរួមសរុបចំនួន ១៦០ប្រទេស។
ក្រសួងពាណិជ្ជកម្ម បានឱ្យដឹងថា ក្រសួងបាននាំយកផលិតផលដែលមានគុណភាពខ្ពស់របស់កម្ពុជាជាង ១០០មុខ រួមមាន អង្ករ គ្រាប់ស្វាយចន្ទី សម្ភារធ្វើដំណើរ និងកាបូប ផលិតផលសម្គាល់ភូមិសាស្រ្តទំនិញ ទឹកឃ្មុំ កាហ្វេ ដំណាប់ស្វាយ តែម្រេច តែ ទឹកជ្រលក់ម្រេច ម្សៅប្រហុក ស្ករត្នោត ទឹកស្ករត្នោត ស្ករគ្រាប់ត្នោត មីកញ្ចប់ មីជាតិ សម្ភារកែច្នៃសំណល់ប្លាស្ទិក ។ល។ ដើម្បីចូលរួមដាក់តាំងបង្ហាញក្នុងព្រិត្តិការណ៍នេះ។
កាលពីឆ្នាំ ២០២៣ ការផ្លាស់ប្តូរទំនិញរវាងកម្ពុជា-ចិន មានទឹកប្រាក់សរុប ១២,២៦ ពាន់លានដុល្លារ កើនឡើង ៥ ភាគរយបើធៀបឆ្នាំ ២០២២ ក្នុងនោះកម្ពុជានាំទំនិញទៅប្រទេសចិន ១,៤៨ ពាន់លានដុល្លារ កើនឡើង ១៩,២ភាគរយ និងទំនិញចិននាំមកកម្ពុជា ១០,៧៩ ពាន់លានដុល្លារ កើន ៣,៣ ភាគរយ។ នេះបើយោងតាម GDCE៕
