ជំនួបពិភាក្សារវាងលោក ស៊ុន ចាន់ថុល(ស្តាំ) ជាមួយលោក Felipe De La Morena Casado នៅទីស្នាក់ការ CDC។ CDC
ប្រមុខការទូតអេស្ប៉ាញបានស្នើឱ្យកម្ពុជាពិនិត្យលទ្ធភាពក្នុងការសម្របសម្រួលរៀបចំវេទិកាធុរកិច្ចនៅក្នុងប្រទេសកម្ពុជា ដើម្បីបញ្ជ្រាបព័ត៌មានវិនិយោគ និងគោលនយោបាយលើកទឹកចិត្តផ្សេងៗរបស់កម្ពុជាចំពោះធុរជនអេស្ប៉ាញ ខណៈទឹកប្រាក់ពីការផ្លាស់ប្តូរទំនិញរវាងប្រទេសទាំង ២ មានចំនួនជិត ៩០០ លានដុល្លារក្នុងរយៈពេល ១០ ខែដើមឆ្នាំ២០២៤។
នៅក្នុងឱកាសជួបពិភាក្សាការងារជាមួយលោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី ១ ក្រុមប្រឹក្សាអភិវឌ្ឍន៍កម្ពុជា(CDC) នៅទីស្នាក់ការក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី១៩ ខែវិច្ឆិកា ឯកអគ្គរាជទូតអេស្ប៉ាញប្រចាំនៅកម្ពុជា លោក Felipe De La Morena Casado បានលើកឡើងថា បើទោះបីទំនាក់ទំនងរវាងរដ្ឋាភិបាលកម្ពុជា និងអេស្ប៉ាញកំពុងមានភាពល្អប្រសើរ ប៉ុន្តែការផ្សព្វផ្សាយព័ត៌មានអំពីសក្តានុពលវិនិយោគនៅកម្ពុជាទៅដល់វិនិយោគិនអេស្ប៉ាញហាក់នៅមានកម្រិតតិចតួចនៅឡើយ។
ក្នុងនាមរដ្ឋាភិបាលអេស្ប៉ាញប្រចាំនៅកម្ពុជា លោកពិតជាចង់ឱ្យក្រុមប្រឹក្សាអភិវឌ្ឍន៍កម្ពុជាពិនិត្យលទ្ធភាពក្នុងការសម្របសម្រួលរៀបចំវេទិកាធុរកិច្ចក្នុងប្រទេសកម្ពុជា ដើម្បីបញ្ជ្រាបព័ត៌មានវិនិយោគ និងវិស័យលើកទឹកចិត្តនានាជូនដល់ធុរជនអេស្ប៉ាញបន្ថែមទៀត។
បន្ថែមពីលើនេះ លោក Felipe De La Morena Casado ក៏បានលើកឡើងអំពីកង្វល់មួយចំនួនក្នុងកិច្ចការងារទាក់ទាញ និងជំរុញវិនិយោគិនរបស់ខ្លួនឱ្យចូលមកបណ្តាក់ទុនផ្ទាល់នៅកម្ពុជា។
ជាការឆ្លើយតប លោក ស៊ុន ចាន់ថុល បានលើកឡើងពីវឌ្ឍនភាពនៃដំណើរទស្សនកិច្ចរបស់លោក និងក្រុមការងារ CDC ទៅប្រទេសអេស្ប៉ាញកាលពីអំឡុងខែមិថុនាកន្លងមក ដើម្បីគោះទ្វារវិនិយោគនៅប្រទេសអេស្ប៉ាញឱ្យចូលមកវិនិយោគនៅកម្ពុជា ព្រោះថាកម្ពុជាជាប្រទេសដែលមានលក្ខណៈអំណោយផលយ៉ាងច្រើនសម្រាប់វិនិយោគិន។
លោកបន្ថែមថា កម្ពុជាពិតជារង់ចាំស្វាគមន៍ និងសូមគាំទ្រពេញទំហឹងចំពោះក្រុមហ៊ុនអេស្ប៉ាញ ដែលគ្រោងនឹងបណ្ដាក់ទុនវិនិយោគនៅកម្ពុជា។
កាលពីថ្ងៃទី១០-១១ ខែមិថុនា លោក ស៊ុន ចាន់ថុល បានដឹកនាំគណៈប្រតិភូកម្ពុជាទៅធ្វើការផ្សព្វផ្សាយអំពីសក្តានុពល និងកាលានុវត្តភាពវិនិយោគនៅកម្ពុជា ទៅកាន់បណ្តាក្រុមហ៊ុន/សហគ្រាស ព្រមទាំងសភាពាណិជ្ជកម្មអេស្ប៉ាញ និងសហព័ន្ធអង្គការពាណិជ្ជកម្មអេស្ប៉ាញ(CEOE) ជាដើម។
ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា(GDCE) បានឱ្យដឹងថា ចាប់ពីខែមករា-ខែតុលា ឆ្នាំ ២០២៤ ការនាំចេញនាំចូលទំនិញរវាង កម្ពុជា-អេស្ប៉ាញ មានទឹកប្រាក់សរុប ៨៨៣,៩៣ លានដុល្លារ កើនឡើង ៤២,៩ ភាគរយបើធៀបនឹងរយៈពេលដូចគ្នាក្នុងឆ្នាំ២០២៣ ក្នុងនោះទំនិញកម្ពុជានាំទៅប្រទេសអេស្ប៉ាញ មានចំនួន ៨៦២,៥ លានដុល្លារ កើនឡើង ៤៤ ភាគរយ ចំណែកទំនិញអេស្ប៉ាញនាំចូលមកកម្ពុជា ២១,៤៣ លានដុល្លារ កើន ៨,៥ ភាគរយ។
ផ្អែកតាមតួលេខខាងលើ គឺជញ្ជីងពាណិជ្ជកម្មកម្ពុជាមានឧត្តមភាព ៨៤១,០៦ លានដុល្លារ ខណៈរយៈពេលដូចគ្នាឆ្នាំ ២០២៣ មានចំនួន ៥៧៩,២៤ លានដុល្លារ។ ប្រទេសអេស្ប៉ាញ គឺជាដៃគូពាណិជ្ជកម្មអន្តរជាតិធំជាងគេទី ៨ របស់កម្ពុជា បន្ទាប់ពីប្រទេសចិន អាមេរិក វៀតណាម ថៃ ជប៉ុន កាណាដា និងឥណ្ឌូនេស៊ី។
កាលពីឆ្នាំ ២០២៣ ពាណិជ្ជកម្មទ្វេភាគីកម្ពុជា-អេស្ប៉ាញ មានចំនួនសរុប ៧៣៧,០៧ លានដុល្លារ កើនឡើង ៤៦,៣ ភាគរយ ដោយទំនិញកម្ពុជានាំចេញចំនួន ៧១៣,៤៧ លានដុល្លារ កើន ៥០,៣ ភាគរយ និងអេស្ប៉ាញនាំចូល ២៣,៦ លានដុល្លារ ធ្លាក់ចុះ ១៨,៧ ភាគរយ។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ ភ្នំពេញប៉ុស្តិ៍នាថ្ងៃទី២១ ខែវិច្ឆិកាថា ក្នុងនាមជាប្រទេសកំពុងអភិវឌ្ឍន៍ រាជរដ្ឋាភិបាល និងផ្នែកឯកជននៅកម្ពុជា កំពុងធ្វើកិច្ចការធំៗជាច្រើនដើម្បីជំរុញល្បឿនកំណើនសេដ្ឋកិច្ចរបស់ខ្លួនឱ្យបោះជំហានទៅមុខកាន់តែលឿន។ ការរៀបចំខ្លួនឱ្យមានសក្តានុពលគ្រប់គ្រាន់ដើម្បីទាក់ទាញវិនិយោគិនបរទេសឱ្យចូលមកបណ្តាក់ទុនផ្ទាល់ ឬបញ្ជាទិញទំនិញដែលផលិតបាន គឺជារឿងសំខាន់។
លោកបន្តថា សម្រាប់ប្រទេសអេស្ប៉ាញទោះបីលោកមិនសូវមានព័ត៌មាន ប៉ុន្តែប្រទេសនេះជាសមាជិកសហគមន៍អ៊ឺរ៉ុប ដែលតែងទទួលទិញផលិតផលមួយចំនួនពីកម្ពុជាដូចជា សម្លៀកបំពាក់ ស្បែកជើង កាបូប កង់ និងផលិតផលកសិកម្មមួយចំនួន។
លោកបន្ថែមថា៖«អេស្ប៉ាញជាប្រទេសរីកចម្រើនមួយនៅអ៊ឺរ៉ុប ដូច្នេះប្រសើនបើយើងអាចទាក់ទាញវិនិយោគិនរបស់គេឱ្យចូលមកវិនិយោគនៅកម្ពុជានោះ គឺជាការល្អណាស់ ព្រោះក្រៅពីជួយបង្កើតការងារឱ្យប្រជាជនកម្ពុជា វាក៏អាចជួយធ្វើឱ្យទំនិញផលិតនៅកម្ពុជាកាន់តែមានលក្ខណៈចម្រុះច្រើនប្រភេទ និងទីផ្សារក្រៅប្រទេសកាន់តែច្រើន»។
ក្រៅពីទំនាក់ទំនងផ្នែកពាណិជ្ជកម្ម វិស័យទេសចរណ៍កម្ពុជាក៏បានទាក់ទាញភ្ញៀវជនជាតិអេស្ប៉ាញជាច្រើននាក់ឱ្យធ្វើដំណើរមកកម្ពុជាផងដែរ ជាក់ស្តែងក្នុងរយៈពេល ៩ ខែដើមឆ្នាំ ២០២៤ កម្ពុជាទទួលបានភ្ញៀវជនជាតិអេស្ប៉ាញសរុប ២៥ ៩៩៥ នាក់ កើនឡើង ២៤,៣ ភាគរយធៀបរយៈពេលដូចគ្នាកាលពីឆ្នាំ ២០២៣។ នេះបើយោងតាមក្រសួងទេសចរណ៍៕
