ទិដ្ឋភាពសំណង់អគារខ្ពស់ៗជាច្រើននៅក្នុងរាជធានីភ្នំពេញ៕ ហ៊ឹន ពិសី
អ្នកសេដ្ឋកិច្ចបានលើកឡើងថា ស្ថានភាពនៃការគ្រប់គ្រងចំនួនប្រាក់កម្ចីរបស់កម្ពុជានឹងនៅតែបន្តស្ថិតក្នុងភាពល្អប្រសើរ ខណៈសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៥ នឹងអនុញ្ញាតឱ្យរាជរដ្ឋាភិបាលខ្ចីប្រាក់ពីគេក្នុងកម្រិត ២ ប៊ីលានអេសដេអ៊ែ។
ក្នុងឆ្នាំ ២០២៤ ច្បាប់ថវិកាបានកំណត់ឱ្យប្រាក់កម្ចីនេះមានចំនួន ១ ៧០០ លានអេសដេអ៊ែ។
សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៥ ដែលទទួលបានការឯកភាពពីគណៈរដ្ឋមន្ត្រីក្នុងសម័យប្រជុំពេញអង្គ នាថ្ងៃទី ២៥ ខែតុលា ឆ្នាំ ២០២៤ ត្រង់ជំពូកទី ២ មាត្រា ៦ បានសរសេរថា៖ សម្រាប់ការគ្រប់គ្រងឆ្នាំ ២០២៥ អនុម័តយល់ព្រមឱ្យរាជរដ្ឋាភិបាលខ្ចីប្រាក់ពីគេ ក្នុងកម្រិត ២ ០០០ ០០០ ០០O SDR (ពីរប៊ីលានអេសដេអ៊ែ)។
ការខ្ចីប្រាក់ពីគេដែលត្រូវចុះកិច្ចសន្យាក្នុងកម្រិតខាងលើ ត្រូវមានលក្ខណៈជាការខ្ចីសម្បទាន ដែលត្រូវសងវិញជាមួយការប្រាក់អនុគ្រោះ។
សេចក្តីព្រាងច្បាប់ខាងលើបានឱ្យដឹងទៀតថា នៅក្នុងលក្ខខណ្ឌនេះ រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ជាអ្នកមានសិទ្ធិស្របច្បាប់តែមួយគត់ តាមការប្រទានសិទ្ធិជាលាយលក្ខណ៍អក្សររបស់នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការចុះហត្ថលេខាលើការខ្ចីប្រាក់ពីគេ សម្រាប់ហិរញ្ញប្បទានគម្រោងវិនិយោគសាធារណៈ និងគាំទ្រមូលនិធិទ្រទ្រង់ថវិកា ជាគុណប្រយោជន៍នៃថវិកាទូទៅរបស់រដ្ឋ ឬលើការធានារបស់រដ្ឋ ហើយត្រូវធ្វើរបាយការណ៍ស្តីពីការអនុវត្តនៃការខ្ចីប្រាក់ពីគេ និងការធានានេះជូនរដ្ឋសភា និងព្រឹទ្ធសភា រៀងរាល់ ៦ ខែម្តង។
អគ្គលេខាធិការដ្ឋាននៃរដ្ឋសភា កាលពីថ្ងៃទី២០ ខែវិច្ឆិកា ឆ្នាំ២០២៤ បានឱ្យដឹងថា សេចក្តីព្រាងច្បាប់«ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៥» នឹងត្រូវដាក់ចូលពិភាក្សានៅក្នុងសម័យប្រជុំរដ្ឋសភា លើកទី៣ នីតិកាលទី ៧ នៅថ្ងៃទី ២៧ ខែវិច្ឆិកា ឆ្នាំ២០២៤ វេលាម៉ោង ៨.០០នាទីព្រឹក។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី២១ ខែវិច្ឆិកា ថា ក្នុងឋានៈជាប្រទេសកំពុងអភិវឌ្ឍន៍ កម្ពុជាប្រាកដជាមានតម្រូវការថវិកាច្រើនសម្រាប់យកទៅវិនិយោគលើការកសាងហេដ្ឋារចនាសម្ព័ន្ធគ្រប់ប្រភេទរាប់ចាប់តាំងពីផ្លូវថ្នល់ ផ្លូវដែក ស្ពាន អាកាសយានដ្ឋាន និងកំពង់ផែ ដើម្បីបង្កើតបរិយាកាសទាក់ទាញសម្រាប់ការចូលមកវិនិយោគក្នុងប្រទេស និងដើម្បីជំរុញកំណើនសេដ្ឋកិច្ចជាតិឱ្យឈានទៅមុខឆាប់រហ័ស។ លោកបន្តថា រាល់ប្រាក់កម្ចីដែលរដ្ឋាភិបាលទទួលបានពីម្ចាស់បំណុលនាពេលកន្លងមក គឺសុទ្ធតែបានប្រើប្រាស់ចំគោលដៅតាមការស្នើសុំ និងមានប្រសិទ្ធភាពខ្ពស់។
លោកបានថ្លែងថា៖«រាជរដ្ឋាភិបាលបានមើលឃើញពីឱកាសក្នុងការជំរុញល្បឿនការអភិវឌ្ឍប្រទេសតាមរយៈការស្វែងរកប្រាក់កម្ចីដែលមានអត្រាការប្រាក់ទាបពីស្ថាប័នហិរញ្ញវត្ថុអន្តរជាតិ រួមទាំងប្រទេសដៃគូ។ ប្រាក់កម្ចីទាំងអស់នោះ ភាពច្រើនត្រូវបានប្រើប្រាស់សម្រាប់ការវិនិយោគសាធារណៈដើម្បីជួយឱ្យកម្ពុជារត់ទាន់ប្រទេសក្នុងតំបន់ និងពិភពលោក ខណៈកម្ពុជាបានបាត់បង់ពេលវេលាជាច្រើនទសវត្សដើម្បីដោះស្រាយវិបត្តិក្នុងប្រទេស»។
បើតាមលោក វណ្ណៈ ស្ថាប័នហិរញ្ញវត្ថុដែលផ្តល់ប្រាក់កម្ចីឱ្យកម្ពុជាមានដូចជា ធនាគារពិភពលោក (WB) មូលនិធិរូបិយវត្ថុអន្តរជាតិ (IMF) ធនាគារអភិវឌ្ឍន៍អាស៊ី (ADB) និងធនាគារអភិវឌ្ឍន៍ហេដ្ឋារចនាសម្ព័ន្ធអាស៊ី (AIIB) ជាដើម។
ទាក់ទងនឹងលទ្ធភាពនៃការសង់ត្រឡប់ទៅម្ចាស់បំណុល លោកអះអាងថា៖ «អ្នកផ្តល់កម្ចីមុននឹងសម្រេចផ្តល់ឱ្យអតិថិជនណាមួយ គឺគេតែងធ្វើការសិក្សាយ៉ាងល្អិតល្អន់ទៅលើ ប្រទេស/ស្ថាប័ន ស្នើសុំពីលទ្ធភាពការបង់សងទៅវិញ។ កម្ពុជាគឺតែងមានទំនួលខុសត្រូវល្អលើកិច្ចការនេះ»។
លោកបន្តថា៖«ក្នុងនាមជាប្រទេសកំពុងអភិវឌ្ឍន៍ កម្ពុជាតែងទទួលបានកម្ចីដែលមានភាពអនុគ្រោះ ឬអត្រាការប្រាក់ទាប»។
សម្រាប់ពិដានបំណុលរបស់កម្ពុជានៅពេលនេះ បើតាមឯកសារដែលផ្សព្វផ្សាយកន្លងមកគឺស្ថិតក្នុងកម្រិតជាង ៣០ ភាគរយធៀបនឹងប្រាក់ចំណូលសរុបក្នុងស្រុក (GDP)។
ឯកសារច្បាប់ថវិកាសង្ខេបឆ្នាំ ២០២៤ បានឱ្យដឹងថា ក្នុងឆ្នាំ២០២៤ រដ្ឋាភិបាលបានកំណត់ទំហំនៃការខ្ចីប្រាក់ពីដៃគូអភិវឌ្ឍ ក្នុងកម្រិត ១ ៧០០ លានអេសដេអ៊ែ គឺរក្សាពិតានដូចក្នុងឆ្នាំ ២០២៣។
យោងតាមឯកសារច្បាប់ថវិកា ឆ្នាំ២០២៤ ប្រាក់កម្ចីត្រូវផ្អែកលើទិដ្ឋភាពសំខាន់ៗចំនួន ៥ គឺ
១-ទំហំនៃតម្រូវការវិនិយោគសាធារណៈដែលកម្ពុជាមានភាពចាំបាច់ក្នុងការកៀរគរធនធានបន្ថែមឱ្យបានច្រើនដើម្បីបំពេញតម្រូវការសម្រាប់ជំរុញកំណើនសេដ្ឋកិច្ចឡើងវិញ,
២-កម្មវិធី/គម្រោងអភិវឌ្ឍន៍ដែលនឹងចុះកិច្ចព្រមព្រៀងឥណទានសម្បទានក្នុងឆ្នាំ ២០២៤ ជាកម្មវិធីគម្រោងវិនិយោគសាធារណៈក្នុងវិស័យអាទិភាព (ហេដ្ឋារចនាសម្ព័ន្ធរូបវ័ន្ត និងការបង្កើនផលិតភាពសេដ្ឋកិច្ច និងផលិតភាពផលិតកម្ម) ដែលមានចរិតយុទ្ធសាស្ត្រក្នុងការទ្រទ្រង់ដល់ចីរភាពនៃកំណើនសេដ្ឋកិច្ចក្នុងរយៈពេលមធ្យម និងវែង,
៣-ឥណទានមានកម្រិតសម្បទានខ្ពស់,
៤-ស្ថានភាពបំណុលសាធារណៈកម្ពុជាបច្ចុប្បន្ន និងក្នុងរយៈពេលមធ្យមនៅតែមាន«ចីរភាព» និង«ហានិភ័យកម្រិតទាប», និង
៥-ការបន្តបង្កើនប្រសិទ្ធភាពខ្ពស់ក្នុងការគ្រប់គ្រង និងអនុវត្តគម្រោង៕
