គណៈអធិបតីថតរូបអនុស្សាវរីយ៍ក្នុងសន្និសីទមីក្រូហិរញ្ញវត្ថុកម្ពុជាប្រចាំឆ្នាំ ២០២៤។ CMA
សៀមរាប៖ ឥណទានដែលគ្រឹះស្ថានមីក្រូហិរញ្ញវត្ថុ បានផ្តល់ឱ្យអតិថិជននៅកម្ពុជាគិតត្រឹមខែសីហា ឆ្នាំ ២០២៤ មានទឹកប្រាក់ជាង ៥ ប៊ី(ពាន់)លានដុល្លារអាមេរិក ខណៈទ្រព្យសកម្មក្នុងវិស័យនេះមានប្រមាណ ៦,២ ប៊ី(ពាន់)លានដុល្លារ។ នេះបើយោងតាមទេសាភិបាលរងធនាគារជាតិនៃកម្ពុជា(NBC)។
ថ្លែងក្នុងពិធីបើកសន្និសីទមីក្រូហិរញ្ញវត្ថុកម្ពុជាប្រចាំឆ្នាំ ២០២៤ ស្តីពីនិរន្តរភាព និងបរិយាបន្នមីក្រូហិរញ្ញវត្ថុ «បច្ចុប្បន្នភាព និងដំណើរវិវឌ្ឍន៍នៃវិស័យ» ដែលរៀបចំនៅក្នុងខេត្តសៀមរាប កាលពីថ្ងៃទី ៤ ខែវិច្ឆិកា លោក ស៊ុំ សន្និសិទ្ធ ទេសាភិបាលរងធនាគារជាតិនៃកម្ពុជា(NBC) បានឱ្យដឹងថា គិតត្រឹមខែសីហា ឆ្នាំ ២០២៤ វិស័យមីក្រូហិរញ្ញវត្ថុកម្ពុជា មានទ្រព្យសកម្មចំនួន ២៥ ទ្រីលានរៀល (ស្មើនឹង ៦,២ ប៊ីលានដុល្លារអាមេរិក) ដោយបានផ្តល់ឥណទានជូនអតិថិជនចំនួន ២១,៣ ទ្រីលានរៀល(ស្មើនឹង ៥,២ ប៊ីលានដុល្លារអាមេរិក) និងមានគណនីឥណទានចំនួន ១,៦ លានគណនី។
លោកបន្ថែមថា ទោះយ៉ាងណា វិស័យមីក្រូហិរញ្ញវត្ថុកម្ពុជាក្នុងពេលនេះក៏កំពុងជួបបញ្ហាប្រឈមមួយចំនួន ដែលបណ្តាលមកពីបញ្ហាបំណុលលើសលប់ កង្វះចំណេះដឹងផ្នែកហិរញ្ញវត្ថុ និងកិច្ចការពារអតិថិជននៅមានកម្រិត។ ជាយន្តការដោះស្រាយ ធនាគារជាតិនៃកម្ពុជា បាននិងកំពុងបន្តដាក់ចេញនូវក្របខ័ណ្ឌបទប្បញ្ញត្តិ ក្របខ័ណ្ឌត្រួតពិនិត្យធនាគារ និងវិធានបុរេសកម្មក្នុងការពង្រឹងកិច្ចការពារអតិថិជន ស្របតាមការរីកចម្រើននៃប្រព័ន្ធធនាគារនៅកម្ពុជា។
លោកបានថ្លែងថា៖«ធនាគារជាតិនៃកម្ពុជាបានយកចិត្តទុកដាក់ខ្ពស់ក្នុងការលើកកម្ពស់ចំណេះដឹងផ្នែកហិរញ្ញវត្ថុ និងកិច្ចការពារអតិថិជន ដោយសហការជាមួយភាគីពាក់ព័ន្ធរៀបចំសិក្ខាសាលាផ្សព្វផ្សាយស្តីពី«វិស័យមីក្រូហិរញ្ញវត្ថុនៅកម្ពុជា» ការបញ្ជ្រាបចំណេះដឹងផ្នែកហិរញ្ញវត្ថុទៅក្នុងកម្មវិធីសិក្សាចំណេះដឹងទូទៅ យុទ្ធនាការ «តោះ!និយាយពីលុយ៖ តក់ៗពេញបំពង់» និងការលើកកម្ពស់ចំណេះដឹងផ្នែកហិរញ្ញវត្ថុដល់ស្រ្តី និងសហគ្រិនភាពស្ត្រី ព្រមទាំងបានពង្រឹងយន្តការសម្របសម្រួល និងដោះស្រាយបណ្តឹងអតិថិជនដោយផ្ទាល់ និងតាមប្រព័ន្ធទូរស័ព្ទ Hotline ជាដើម»។
ទេសាភិបាលរងធនាគារជាតិនៃកម្ពុជា លោក ស៊ុំ សន្និសិទ្ធ បានឱ្យដឹងទៀតថា ក្នុងឆមាសទី ២ ឆ្នាំ ២០២៤ នេះ សេដ្ឋកិច្ចពិភពលោកត្រូវបានបន្តស្តារឡើងវិញក្នុងសភាពយឺត ដោយសារផលអវិជ្ជមានពីវិបត្តិសង្គ្រាម ដែលជំរុញឱ្យមានការកើនឡើងខ្ពស់នៃអត្រាអតិផរណា និងការអនុវត្តគោលនយោបាយរូបិយវត្ថុចង្អៀត ជាពិសេសនៅសហរដ្ឋអាមេរិក និងសហគមន៍អឺរ៉ុប។ ស្ថិតក្នុងបរិការណ៍នៃកំណើនសេដ្ឋកិច្ចក្នុងល្បឿនយឺតជាសកលនេះ សេដ្ឋកិច្ចប្រទេសកម្ពុជាឆ្នាំ ២០២៤ ក៏បានរងនូវផលប៉ះពាល់ និងមានការថមថយនៃកំណើនសេដ្ឋកិច្ចដែរ ដោយកើនឡើង ៦ ភាគរយ។
លោក ស៊ុំ សន្និសិទ្ធ ទេសាភិបាលរងធនាគារជាតិនៃកម្ពុជា(NBC)។ CMA
លោកបានអះអាងថា៖«ក្នុងដំណាក់កាលនៃការងើបឡើងវិញនៃសេដ្ឋកិច្ច ធនាគារជាតិនៃកម្ពុជា បាននិងកំពុងបន្តរក្សាស្ថិរភាពថ្លៃ លើកកម្ពស់ការប្រើប្រាស់ប្រាក់រៀល អនុវត្តគោលនយោបាយរូបិយវត្ថុសមស្រប ពង្រឹងសុខុមាលភាពប្រព័ន្ធធនាគារ អភិវឌ្ឍប្រព័ន្ធទូទាត់ ពង្រឹងកិច្ចការពារអតិថិជន និងសុវត្ថិភាពហិរញ្ញវត្ថុ ព្រមទាំងផ្តោតការយកចិត្តទុកដាក់ខ្ពស់លើឥណទានប្រកបដោយភាពទទួលខុសត្រូវ ជាដើម»។
បើតាមលោក សន្និសិទ្ធ កាលពីថ្ងៃទី៨ ខែតុលា ឆ្នាំ ២០២៤ ធនាគារជាតិនៃកម្ពុជា បានសហការជាមួយសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ក្នុងការរៀបចំសិក្ខាសាលា ស្តីពី «ការផ្សព្វផ្សាយលទ្ធផលគម្រោងការពង្រឹងសុវត្ថិភាពហិរញ្ញវត្ថុក្នុងសហគមន៍» ក្នុងដំណាក់កាលសាកល្បងនៅក្នុងឃុំចំនួន ៤ ដោយជោគជ័យ ហើយនឹងមានគម្រោងអនុវត្តបន្តទៅកាន់ឃុំ-សង្កាត់ ក្រុង-ស្រុកផ្សេងទៀតផងដែរ។
ប្រធានក្រុមប្រឹក្សាភិបាលនៃសមាគមមីក្រូហិរញ្ញវត្ថុកម្ពុជា(CMA) លោកស្រី ឌិត នីតា បានឱ្យដឹងថា ប្រជាជនកម្ពុជាប្រមាណ ៧៤,៤ ភាគរយរស់នៅតំបន់ជនបទ ហើយលទ្ធភាពនៃការទទួលបាននូវសេវាកម្មហិរញ្ញវត្ថុរបស់ពួកគាត់ គឺនៅមានកម្រិត។ វិស័យមីក្រូហិរញ្ញវត្ថុ បាននិងកំពុងចូលរួមចំណែកយ៉ាងសំខាន់ក្នុងការបំពេញចន្លោះខ្វះខាតនេះតាមរយៈការផ្តល់ឱ្យបុគ្គលម្នាក់ៗ និងម្ចាស់អាជីវកម្មខ្នាតតូច និងមធ្យមនានានូវលទ្ធភាពទទួលបានប្រភពទុនដែលចាំបាច់។
លោកស្រី ឌិត នីតាប្រធានក្រុមប្រឹក្សាភិបាលនៃសមាគមមីក្រូហិរញ្ញវត្ថុកម្ពុជា(CMA)។ CMA
លោកស្រីបានថ្លែងថា៖«សមាគមមីក្រូហិរញ្ញវត្ថុកម្ពុជា បាននិងកំពុងដើរតួជាអ្នកប្រមូលផ្តុំនូវសំឡេងរួមនៃស្ថាប័នជាសមាជិក ដើម្បីធានាឱ្យបានថាសហគមជនបទទទួលបាននូវសេវាហិរញ្ញវត្ថុប្រកបដោយគុណភាព និងការទទួលខុសត្រូវ»។
លោកស្រីបានបន្តថា៖«និរន្ដរភាព និងបរិយាបន្ននៃវិស័យមីក្រូហិរញ្ញវត្ថុ មានសារៈសំខាន់ក្នុងការធានាឱ្យបានថាប្រជាជនកម្ពុជាគ្រប់រូបទទួលបាននូវផ្លែផ្កាពីកំណើនសេដ្ឋកិច្ច ជាពិសេសប្រជាជនដែលរស់នៅតាមតំបន់ជនបទ និងតំបន់ដែលជួបការលំបាកតាមរយៈការប្រើប្រាស់នូវសេវា និងផលិតផលហិរញ្ញវត្ថុ»។
បើយោងតាមសមាគមមីក្រូហិរញ្ញវត្ថុកម្ពុជា បច្ចុប្បន្នសមាគមមីក្រូហិរញ្ញវត្ថុមានសមាជិកប្រមាណ ១៣២ គ្រឹះស្ថាន ដែលមានផលប័ត្រឥណទានសរុបប្រមាណ ៥.១១ ប៊ីលានដុល្លាអាមេរិក និងកំពុងផ្តល់សេវាជូនអតិថិជនប្រមាណ ១,៥៥ លានគណនីក្នុងនោះ ៥៤ ភាគរយ ជាស្រ្តី។ ទន្ទឹមនឹងនេះគ្រឹះស្ថានទទួលប្រាក់បញ្ញើទាំង ៤ (LOLC, មហានគរ, អម្រឹត, និងអេអឹមខេ) មានប្រាក់បញ្ញើសរុបប្រមាណ ២.២ ប៊ីលានដុល្លាអាមេរិក (កំណើន ៤,៨ ភាគរយ) និងមានអ្នកដាក់ប្រាក់បញ្ញើសរុបប្រមាណ ២ លាននាក់ ក្នុងនោះ ៦៧ ភាគរយជាស្រ្តី៕
