ហាងភីហ្សា Little Caesars ដែលគ្រោងនឹងបើកដំណើរការនៅកោះពេជ្រ។ សហការី
ស្ថិរភាពនយោបាយ កំណើនសេដ្ឋកិច្ច និងច្បាប់វិនិយោគដែលមានលក្ខណៈអំណោយផលបានជួយឱ្យកម្ពុជាអាចស្រូបទាញបានក្រុមហ៊ុនលំដាប់ពិភពលោកកាន់តែច្រើនឱ្យចូលមកបើកអាជីវកម្មនៅកម្ពុជា ខណៈនៅចុងសប្តាហ៍នេះក្រុមហ៊ុនភីហ្សាលំដាប់ពិភពលោកថ្មីមួយនឹងបង្ហាញវត្តមានជាផ្លូវការនៅកម្ពុជា។
ក្រុមហ៊ុនភីហ្សាលំដាប់ពិភពលោក Little Caesars ដែលមានមូលដ្ឋាននៅក្នុងទីក្រុង Detroit នៃរដ្ឋ Michigan បានប្រកាសពីការចាប់ផ្តើមអាជីវកម្មនៅកម្ពុជាចាប់ពីថ្ងៃទី១០ ខែវិច្ឆិកា នេះតទៅ។ Little Caesars ត្រូវបានបង្កើតឡើងក្នុងឆ្នាំ ១៩៥៩ គឺជាភោជនីយដ្ឋានដែលគ្រប់គ្រងដោយគ្រួសារមួយ។ សព្វថ្ងៃ Little Caesars មានភោជនីយដ្ឋាននៅក្នុងរដ្ឋចំនួន ៥០ នៅសហរដ្ឋអាមេរិក និង ២៩ ប្រទេស/ដែនដី។
ប្រធានក្រុមប្រឹក្សាភិបាលក្រុមហ៊ុន World Bridge Group លោក សៀ ឬទ្ធី ដែលបាននាំយក franchise យីហោភោជនីយដ្ឋានលំដាប់ពិភពលោក Little Caesars មកកម្ពុជា បាននិយាយថា នេះគឺជាការចាប់ផ្តើមនៃការពង្រីកម៉ាកយីហោរបស់ Little Caesars មកកាន់ប្រទេសកម្ពុជា ដោយតាមផែនការហាងទី ២ គ្រោងនឹងបើកដំណើរការនៅដើមឆ្នាំ ២០២៥។
លោកបានថ្លែងថា៖«យើងមានក្តីរីករាយក្នុងការធ្វើការជាមួយម៉ាកល្បីលំដាប់ពិភពលោកដូចជា Little Caesars ដើម្បីនាំយកជម្រើសអាហារថ្មីៗដល់ប្រជាជនកម្ពុជា។ ចក្ខុវិស័យរបស់យើងគឺមិនត្រឹមតែណែនាំភីហ្សាដែលមានតម្លៃសមរម្យ និងគុណភាពខ្ពស់ប៉ុណ្ណោះទេ ប៉ុន្តែថែមទាំងរួមចំណែកដល់កំណើនសេដ្ឋកិច្ចរបស់ប្រទេសតាមរយៈការបង្កើតការងារ និងឱកាសទិញសិទ្ធិផ្តាច់មុខផងដែរ»។
បើយោងតាមលោក សៀ ឫទ្ធី ការមកដល់របស់ Little Caesars នឹងជំរុញសេដ្ឋកិច្ចក្នុងស្រុក។ ទីតាំងដំបូងនៅលើកោះពេជ្រ នឹងផ្តល់ឱកាសការងារដល់ប្រជាជនកម្ពុជាជាមួយនឹងមុខតំណែងជាច្រើនចាប់ពីការរៀបចំអាហាររហូតដល់ការគ្រប់គ្រង។
ប្រធានផ្នែកលក់រាយសកលនៅ Little Caesars លោក Paula Vissing បាននិយាយថា៖“ប្រទេសកម្ពុជាបង្ហាញពីទីផ្សារដ៏ស្វាហាប់ និងរីកចម្រើនយ៉ាងឆាប់រហ័ស។ ជាមួយនឹងការកើនឡើងចំនួនប្រជាជន និងការកើនឡើងនៃតម្រូវការសម្រាប់ការទទួលទានអាហាររហ័សទាន់ចិត្ត យើងពិតជារំភើបក្នុងការនាំយកភីហ្សា Little Caesars ដែលមានតម្លៃសមរម្យ និងងាយស្រួលមកកាន់ទីក្រុងភ្នំពេញ ខណៈពេលយើងពង្រីកទៅកាន់ប្រទេសទី ២៩»។
ចំនួនយីហោអន្តរជាតិដែលចូលមកប្រទេសកម្ពុជាបានកើនឡើងជាង ៣០ ភាគរយ ក្នុងរយៈពេលប្រាំឆ្នាំចុងក្រោយនេះ។ កំណើននេះឆ្លុះបញ្ចាំងពីភាពទាក់ទាញរបស់កម្ពុជា ដែលជាទីផ្សារកំពុងរីកចម្រើនសម្រាប់ម៉ាកយីហោពិភពលោក។
អ្នកសេដ្ឋកិច្ចនៅរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី៥ ខែវិច្ឆិកាថា កំណើនសេដ្ឋកិច្ច និងប្រាក់ចំណូលរបស់ប្រជាជនកម្ពុជា ព្រមទាំងកំណើនភ្ញៀវទេសចរអន្តរជាតិ គឺបានទាក់ទាញហាងអាហារលំដាប់ ភោជនីយដ្ឋាន និងផលិតផលចំណីអាហារកាន់តែច្រើនឱ្យចូលមកបើកដំណើរការអាជីវកម្មនៅកម្ពុជា ជាក់ស្តែងដូចជា Burger king, Starbuck, Pizza Hut, Papa Johns, The Pizza Company, KFC, 7 Eleven ជាដើម។
លោកបន្តថា ការមកដល់នៃយីហោលំដាប់ពិភពលោកទាំងអស់នេះ គឺពិតជាចូលរួមចំណែកយ៉ាងច្រើនក្នុងការជំរុញកំណើនសេដ្ឋកិច្ចជាតិ ព្រមទាំងបានបង្ហាញពីទំនុកចិត្តរបស់វិនិយគិនអន្តរជាតិចំពោះឱកាសទីផ្សារកម្ពុជា។
លោកបានថ្លែងថា៖«វត្តមានរបស់ក្រុមហ៊ុនលំដាប់ពិភពលោក នឹងក្លាយជាចំណែកក្នុងផ្សព្វផ្សាយ និងទាក់ទាញអ្នកវិនិយោគ និងភ្ញៀវទេសចរបរទេសឱ្យធ្វើដំណើរមកកម្ពុជាកាន់តែច្រើន»។
របាយការណ៍និន្នាការសេដ្ឋកិច្ច-សង្គម(Socio-Economic Trends Report) របស់ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា ក្នុងរយៈពេល ៦ ខែដើមឆ្នាំ ២០២៤ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន ១៩០ ដែលមានទុនវិនិយោគសរុប ៣ ២៥៨ លានដុល្លារ និងអាចបង្កើតការងារថ្មីបាន ១៦៨ ៥៧២ កន្លែង។
បើធៀបនឹងរយៈពេលដូចគ្នាឆ្នាំ ២០២៣ ចំនួនគម្រោងវិនិយោគបានកើនឡើង ៦២ (ស្មើនឹង ៦៨,១ភាគរយ), ទុនវិនិយោគ កើនឡើង ១៩៤,៧ភាគរយ(ស្មើនឹង ២ ១១១ លានដុល្លារ), ការងារកើនឡើង ៧៦ ភាគរយ(ស្មើនឹង ៦២ ៨៧៩ ការងារ)៕
