សកម្មភាពកម្មករនៅក្នុងរោងចក្រកាត់ដេរសម្លៀកបំពាក់មួយកន្លែងក្នុងរាជធានីភ្នំពេញ។ ភ្នំពេញប៉ុស្តិ៍
ក្រុមប្រឹក្សាអភិវឌ្ឍន៍កម្ពុជា (CDC) នៅក្នុងខែតុលា ឆ្នាំ ២០២៤ បានអនុម័តលើគម្រោងវិនិយោគថ្មីៗ និងគម្រោងពង្រីកផលិតកម្ម សរុប ៣១ គម្រោង ដែលមានទុនវិនិយោគសរុបជាង ២០០ ពាន់លានដុល្លារអាមេរិក ដោយគម្រោងទាំងអស់អាចបង្កើតការងារថ្មីបានប្រមាណ ១៦ពាន់កន្លែង។
យោងតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា (CDC) ដែលចេញផ្សាយកាលពីល្ងាចថ្ងៃទី៥ ខែវិច្ឆិកា ក្នុងខែតុលា ឆ្នាំ ២០២៤ រាជរដ្ឋាភិបាលកម្ពុជា តាមរយៈ CDC បានអនុម័តឱ្យគម្រោងវិនិយោគថ្មីចំនួន ៣០ និងគម្រោងពង្រីកផលិតកម្មចំនួន ១ ដែលមានទុនវិនិយោគសរុបជាង ២២៦ លានដុល្លារ និងអាចបង្កើតការងារបាន ១៦ ពាន់កន្លែង។
គម្រោងទាំងនោះមានដូចជា រោងចក្រដេរស្បែកជើង សម្លៀកបំពាក់, សម្ភារដេគ័រ, សម្ភារក្នុងផ្ទះ, សម្ភារបរិក្ខាបោះតង់, ភេសជ្ជៈ, កាបូប, រ៉ែ, កសិ-ឧស្សាហកម្ម, គ្រឿងបង្គុំរថយន្ត និងគ្រឿងសង្ហារឹម ជាដើម។
ការវិនិយោគរបស់វិនិយោគិនចិន មានចំនួនច្រើនជាងគេ ដោយមានទុនវិនិយោគប្រមាណ ៥៣,៣៩ ភាគរយនៃចំនួនទុនវិនិយោគសរុប ខណៈ´វិនិយោគិនក្នុងស្រុកស្ថិតនៅលេខ ២ ជាមួយនឹងទុន ២៩,៤៧ ភាគរយ ក្រៅពីនោះជាការវិនិយោគមកពីប្រទេសសិង្ហបុរី និងវៀតណាម ជាដើម។
ក្នុងចំណោមទុនវិនិយោគទាំង ២២៦ លានដុល្លារ គឺមាននៅក្នុងវិស័យឧស្សាហកម្មជាង ៩៣ ភាគរយ និងវិស័យកសិកម្មជាង ៦ ភាគរយ។ គម្រោងវិនិយោគទាំង ៣១ គឺមានចំនួន ២១ ស្ថិនៅក្រៅតំបន់សេដ្ឋកិច្ចពិសេស និង ១០ ស្ថិតក្នុងតំបន់សេដ្ឋកិច្ចពិសេស (SEZ)។ នេះបើតាម CDC។
សេដ្ឋវិទូនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ ក្នុងថ្ងៃទី៦ ខែវិច្ឆិកាថា ការបណ្តាក់ទុនពីសំណាក់វិនិយោគិនបរទេស និងក្នុងស្រុកនៅក្នុងអំឡុងពេលដែលសេដ្ឋកិច្ច និងនយោបាយពិភពលោកមិនទាន់រឹងមាំនេះ គឺបញ្ជាក់ពីទំនុកចិត្តរបស់ក្រុមវិនិយោគិនចំពោះស្ថិរភាពនយោបាយ កំណើនសេដ្ឋកិច្ច និងភាពរឹងមាំនៃទីផ្សារនាំចេញរបស់កម្ពុជា។
កំណើននៃការវិនិយោគនៅកម្ពុជានឹងរឹតតែមានច្រើនបន្ថែមទៀតនៅពេលស្ថានភាពសេដ្ឋកិច្ចពិភពលោកកាន់តែល្អប្រសើរ។
លោកបន្តថា បច្ចុប្បន្នកម្ពុជាមិនត្រឹមតែជាទីតាំងផលិត និងនាំចេញផលិតផលវាយនភណ្ឌទៅទីផ្សារពិភពលោកក្នុងបរិមាណច្រើនប៉ុណ្ណោះទេ ប៉ុន្តែក៏ជាទីតាំងផលិត និងនាំចេញផលិតផលចម្រុះជាច្រើនផ្សេងទៀតដូចជា គ្រឿងបង្គុំអេឡិចត្រូនិក អគ្គិសនី ផលិតផលកសិកម្ម ភេសជ្ជៈ និងធនធានរ៉ែមួយចំនួន។
លោកបានថ្លែងថា៖«ទោះស្ថានភាពសេដ្ឋកិច្ចពិភពលោកនៅមិនទាន់ល្អប្រសើរ ប៉ុន្តែកម្ពុជានៅតែអាចទទួលបានគម្រោងវិនិយោគថ្មីៗ និងគម្រោងពង្រីកសមត្ថភាពផលិតកម្មជាបន្តបន្ទាប់ ហើយគម្រោងទាំងនោះមិនមែនប្រមូលផ្តុំតែប្រភេទវាយនភណ្ឌដូចកាលពីជាង ១ទសវត្សមុនទៀតឡើយ»។
លោកបានពន្យល់ទៀតថា រោងចក្រ/សហគ្រាសផលិតនៅក្នុងស្រុក គឺមិនត្រឹមតែជួយបំពេញតម្រូវការប្រើប្រាស់ក្នុងស្រុក និងបង្កើតការងារឱ្យប្រជាពលរដ្ឋប៉ុណ្ណោះទេ ប៉ុន្តែវាក៏ចូលរួមចំណែកលើកកម្ពស់សមត្ថភាពនាំចេញរបស់កម្ពុជាទៅទីផ្សារអន្តរជាតិផងដែរ។
កិច្ចព្រមព្រៀងពាណិជ្ជកម្មសេរី ដែលកម្ពុជាបានចុះហត្ថលេខាជាលក្ខណៈទ្វេភាគី និងពហុភាគីជាមួយប្រទេសនានា ក៏ជាចំណែកក្នុងការលើកទឹកចិត្តដល់វិនិយោគិនក្នុងស្រុក និងបរទេស ឱ្យមកបើករោងចក្រ ឬអាជីវកម្មនៅកម្ពុជាផងដែរ។
លោក អ៊ុង លុយណា អគ្គនាយកនៃអគ្គនាយកដ្ឋានគោលនយោបាយ ក្រសួងសេដ្ឋកិច្ចនិងហិរញ្ញវត្ថុ(Ung Luyna, Director General of The General Department of Policy, Ministry of Economics and Finance) ក្នុងសន្និសីទមីក្រូហិរញ្ញវត្ថុ ប្រចាំឆ្នាំ ២០២៤ នៅខេត្តសៀមរាប នាដើមសប្តាហ៍នេះបានលើកឡើងថា បើទោះបីស្ថានភាពសេដ្ឋកិច្ចពិភពលោកមិនទាន់មានភាពល្អប្រសើរ ប៉ុន្តែការនាំចេញរបស់កម្ពុជាបានងើបឡើងគួរឱ្យកត់សម្គាល់ ពិសេសផលិតផលវាយនភណ្ឌ។ ភាពវិជ្ជមាននេះនឹងបន្តមានបន្ថែមទៀតនាពេលខាងមុខ។
លោកបន្តថា កំណើនសេដ្ឋកិច្ចរបស់ប្រទេសកម្ពុជាក្នុងឆ្នាំ២០២៤ គឺល្អជាងឆ្នាំ២០២៣ ហើយវានឹងកាន់តែប្រសើរបន្ថែមទៀតនៅឆ្នាំ២០២៥។ កំណើននេះគឺទទួលបានពីការនាំចេញក្នុងវិស័យវាយនភណ្ឌ កំណើនភ្ញៀវទេសចរ និងវិស័យសំណង់។
ក្នុងខែកញ្ញា ឆ្នាំ ២០២៤ CDC បានអនុម័តឱ្យគម្រោងវិនិយោគថ្មីចំនួន ២៦ និងគម្រោងពង្រីកផលិតកម្មចំនួន ២ ដែលមានទុនវិនិយោគសរុបជាង ៤៤៣ លានដុល្លារ និងអាចបង្កើតការងារបានជិត ២៥ ពាន់កន្លែង។ ក្នុងចំណោមគម្រោងទាំង ២៨ គឺមានចំនួន ២២ ស្ថិតក្នុងតំបន់សេដ្ឋកិច្ចពិសេស និង ៦ នៅក្រៅតំបន់សេដ្ឋកិច្ចពិសេស។
