ប្រធានព្រឹទ្ធសភាកម្ពុជា លោក ហ៊ុន សែន ជួបពិភាក្សាជាមួយលោក Abdullah Mohammed Ibrahim Al-Sheikh ប្រធានសភាប្រទេសអារ៉ាប៊ីសាអូឌីត។ SHS
ប្រធានព្រឹទ្ធសភាកម្ពុជា លោក ហ៊ុន សែន បានស្នើឱ្យប្រទេសអារ៉ាប៊ីសាអូឌីត ជួយទិញអង្ករពីកម្ពុជា ព្រមទាំងលើកទឹកចិត្តឱ្យវិនិយោគិនអារ៉ាប៊ីសាអូឌីតចូលមកវិនិយោគលើការកែច្នៃផលិតកម្មស្រូវអង្ករកម្ពុជា ដើម្បីនាំទៅប្រទេសអារ៉ាប៊ីសាឌីត ខណៈរយៈពេល ១១ ខែដើមឆ្នាំ ២០២៤ នេះកម្ពុជាបាននាំចេញអង្ករទៅប្រទេសអារ៉ាប៊ីសាអូឌីត បានជាង ៧ ០០០ តោន។
លោក ហ៊ុន សែន ចន្លោះពីថ្ងៃទី ៨-១៤ ខែធ្នូ បានដឹកនាំគណៈប្រតិភូកម្ពុជាធ្វើដំណើរទៅបំពេញទស្សនកិច្ចផ្លូវការនៅប្រទេសចំនួន ៤ នៅតំបន់មជ្ឈឹមបូព៌ា និងអ៊ឺរ៉ុប ដែលរួមមាន ប្រទេសអារ៉ាប៊ីសាអូឌីត កាតា តួកគី និងប្រទេសអេមីរ៉ាតអារ៉ាប់រួម។ គោលបំណងនៃដំណើរទស្សនកិច្ចនេះ គឺដើម្បីពង្រឹង និងពង្រីកកិច្ចសហប្រតិបត្តិការរវាងស្ថាប័ននីតិបញ្ញាត្តិកម្ពុជា ជាមួយស្ថាប័ននីតិបញ្ញាត្តិនៃបណ្តាប្រទេសក្នុងតំបន់មជ្ឈឹមបូព៌ា និងអឺរ៉ុប។
នៅក្នុងឱកាសជួបពិភាក្សាជាមួយ លោក Abdullah Mohammed Ibrahim Al-Sheikh ប្រធានរដ្ឋសភាប្រទេសអារ៉ាប៊ីសាអូឌីត នៅវិមានរដ្ឋសភា រាជធានីរីយ៉ាដ កាលពីថ្ងៃទី៩ ខែធ្នូ លោក ហ៊ុន សែន បានថ្លែងអំណរគុណដល់រដ្ឋាភិបាលអារ៉ាប៊ីសាអូឌីតដែលបានទទួលស្វាគមន៍លោក ព្រមទាំងសង្ឃឹមថាទំនាក់ទំនងទ្វេភាគីរវាងប្រទេសទាំងពីរនឹងរឹតតែល្អប្រសើរបន្ថែមទៀត តាមរយៈការជំរុញវិស័យទេសចរណ៍ ពាណិជ្ជកម្ម និងកីឡា។
បន្ថែមពីលើនេះ លោក ហ៊ុន សែន ក៏បានលើកទឹកចិត្តឱ្យវិនិយោគិនអារ៉ាប៊ីសាអូឌីតចូលមកវិនិយោគនៅកម្ពុជា ជាពិសេសលើរោងម៉ាស៊ីនកិនស្រូវ ឃ្លាំងស្តុក និងការវេចខ្ចប់នៅកម្ពុជា ដើម្បីនាំចេញអង្ករទៅប្រទេសអារ៉ាប៊ីសាអូឌីត និងប្រទេសនានាក្នុងតំបន់។
លោកលើកឡើងថា៖«ប្រទេសយើងទាំង ២(កម្ពុជា-អារ៉ាប៊ីសាអូឌីត) គួរចាប់ផ្តើមធ្វើកិច្ចសហប្រតិបត្តិការជាស្នូល តាមរយៈកម្ពុជានាំចេញអង្ករមកកាន់អារ៉ាប៊ីសាអូឌីត ដោយសារកម្ពុជាមានប្រព័ន្ធស្រោចស្រពល្អជាងមុន និងមានអតិរេកស្រូវ។
ដូច្នេះសូមស្នើលោកប្រធានសភា ជំរុញវិនិយោគិនអារ៉ាប៊ីសាអូឌីត ឱ្យមកវិនិយោគលើការរៀបចំម៉ាស៊ីនកិនស្រូវ ស្តុក និងវេចខ្ចប់នៅកម្ពុជា សម្រាប់ធ្វើការនាំចេញអង្ករមកកាន់ប្រទេសអារ៉ាប៊ីសាអូឌីត និងប្រទេសនានាក្នុងតំបន់»។
លោក ហ៊ុន សែន បានបន្ថែមថា៖«អារ៉ាប៊ីសាអូឌីតមានសន្តិសុខថាមពល រីឯកម្ពុជា មានសន្តិសុខស្បៀង។ ប្រទេសយើងទាំងពីរអាចបំពេញឱ្យគ្នាទៅវិញទៅមក»។
ជាកិច្ចឆ្លើយតប លោក Abdullah Mohammed Ibrahim Al-Sheikh បានបញ្ជាក់ថា ការលើកឡើងរបស់លោក ហ៊ុន សែន គឺពិតជាមានសារៈសំខាន់ ហើយលោកនឹងយកចិត្តទុកដាក់ និងយកទៅពិចារណា។ លោកប្រធានសភាអារ៉ាប៊ីសាអូឌីត បានលើកឡើងថា ប្រទេសអារ៉ាប៊ីសាអូឌីតនឹងបើកស្ថានទូត នៅកម្ពុជាក្នុងពេលដ៏ខ្លីខាងមុខនេះ។ ការបើកស្ថានទូតទូតនេះនឹងបង្កភាពងាយស្រួលដល់ការជំរុញ និងពង្រឹងបន្ថែមទៀតនូវទំនាក់ទំនងទ្វេភាគីរវាងប្រទេសទាំងពីរ។
អគ្គលេខាធិការដ្ឋានសហព័ន្ធស្រូវអង្ករកម្ពុជា(CRF) លោក លន់ យេង បានប្រាប់ភ្នំពេញប៉ុស្តិ៍ក្នុងថ្ងៃ១០ ខែធ្នូថា រយៈពេល ១១ ខែដើមឆ្នាំ ២០២៤ កម្ពុជានាំចេញអង្ករទៅតំបន់មជ្ឈឹមបូព៌ាបានប្រហែលជាង ៧ ៥០០ តោន ក្នុងនោះប្រទេសអារ៉ាប៊ីសាអូឌីត ស្រូបយកប្រហែល ៧ ២០០ តោន។
តំបន់មជ្ឈឹមបូព៌ា គឺជាទីផ្សារសក្តានុពលមួយសម្រាប់វិស័យស្រូវអង្ករកម្ពុជា ហើយតាមរយៈប្រទេសអារ៉ាប៊ីសាអូឌីត អង្ករកម្ពុជាក៏អាចមានលំហូរទៅកាន់ប្រទេសក្នុងតំបន់ ព្រមទាំងទៅកាន់ប្រទេសក្នុងទ្វីបអាហ្វ្រិកដែលនៅក្បែរៗនោះផងដែរ។
លោកបានថ្លែងថា៖«តំបន់មជ្ឈឹមបូព៌ាបច្ចុប្បន្ន គឺជាទីផ្សារដែលដើរនាំមុខដោយប្រទេសអារ៉ាប៊ីសាអូឌីត និងអេមីរ៉ាតអារ៉ាប់រួម។ ប្រទេសទាំង ២ គឺវាជាច្រកសំខាន់សម្រាប់បែងចែកទៅប្រទេសផ្សេងៗនៅក្នុងតំបន់មជ្ឈឹមបូព៌ា ដូចជា ប្រទេសអ៊ូម៉ង់ ...។ ដោយមើលឃើញពីសក្តានុពលទាំងអស់នេះ កាលពីឆ្នាំមុនយើង(សហព័ន្ធស្រូវអង្ករកម្ពុជា)ក៏បានចូលរួមតាំងពិព័រណ៌នៅក្នុងរាជធានីរីយ៉ាដ ប្រទេសអារ៉ាប៊ីសាអូឌីត»។
លោកបន្ថែមថា ដំណើរទស្សនកិច្ចរបស់លោក ហ៊ុន សែន គឺជាការជួយពង្រីកសក្ដានុពល និងកិច្ចសហប្រតិបត្តិការបន្ថែម ហើយក៏ជាការជួយផ្សព្វផ្សាយពីផលិតផលកម្ពុជាទៅដល់ប្រជាជននៅក្នុងពិភពអារ៉ាប់ ខណៈអារ៉ាប៊ីសាអូឌីត គឺជាប្រទេសដែលធំជាងគេ និងមានប្រជាជនច្រើនជាងគេនៅក្នុងតំបន់នោះ។
របាយការណ៍សហព័ន្ធស្រូវអង្ករកម្ពុជា(CRF) បានបង្ហាញថា ចាប់ពីខែមករា ដល់ខែវិច្ឆិកា ឆ្នាំ ២០២៤ កម្ពុជាបាននាំចេញអង្ករចំនួន ៥៧៥ ៥៦២ តោន ទៅកាន់ទីផ្សារអន្តរជាតិ និងទទួលបានប្រាក់ប្រមាណ ៤១៣ លានដុល្លារ។
គោលដៅសំខាន់ៗរួមមាន បណ្តាប្រទេសក្នុងតំបន់អឺរ៉ុប ២៨៣ ៩៨១ តោន, ប្រទេសចិន(រួមទាំងហុងកុង និងម៉ាកាវ) ១០៩ ៤៤៨ តោន, ប្រទេសក្នុងអាស៊ាន(រួមទាំងទីម័រខាងកើត) ១១៣ ៧៩២ តោន និងទៅគោលដៅផ្សេងទៀតរួមមាន អាហ្វ្រិក មជ្ឈឹមបូព៌ា អាមេរិក កាណាដា អូស្ត្រាលី ញ៉ូហ្សេឡេន បានចំនួន ៦៨ ៣៤១ តោន។
CRF បានឱ្យដឹងទៀតថា ក្រៅពីនាំចេញអង្ករ កម្ពុជា ក៏បាននាំចេញស្រូវចំនួន ៤ ៦៤២ ៥១១ តោន ដែលគិតជាទឹកប្រាក់បានប៉ាន់ប្រមាណ ១ ៣៧៨,៧៣ លានដុល្លារ៕
