ជំនួបពិភាក្សារវាងថ្នាក់ដឹកនាំក្រុមប្រឹក្សាអភិវឌ្ឍន៍កម្ពុជា(CDC) ជាមួយក្រុមវិនិយោគិនអាមេរិក នៅទីស្តីការ CDC។ CDC
គណៈប្រតិភូវិនិយោគអាមេរិកជាង ១០ ក្រុមហ៊ុនបានបង្ហាញការចាប់អារម្មណ៍ចំពោះសក្តានុពល និងភាពអំណោយផលនៃការវិនិយោគនៅកម្ពុជាលើ ខណៈការនាំទំនិញកម្ពុជាទៅទីផ្សារអាមេរិក ក្នុងរយៈពេល ១១ ខែដើមឆ្នាំ ២០២៤ មានទឹកប្រាក់ជាង ៩ ពាន់លានដុល្លារ កើនជាង ១១ ភាគរយបើធៀបនឹងរយៈពេលដូចគ្នាឆ្នាំ ២០២៣។
នៅទីស្តីការក្រុមប្រឹក្សាអភិវឌ្ឍន៍កម្ពុជា(CDC) កាលពីថ្ងៃទី៩ ខែធ្នូ ឆ្នាំ ២០២៤ ក្រុមវិនិយោគិនអាមេរិកចំនួន ១៦ ក្រុមហ៊ុន ដែលដឹកនាំដោយ លោក គឹម ឆាហួត អគ្គកុងស៊ុលកិត្តិយសកម្ពុជា និងជាប្រធានការិយាល័យតំណាងសភាពាណិជ្ជកម្មកម្ពុជាប្រចាំរដ្ឋកាលីហ្វ័រញ៉ា សហរដ្ឋអាមេរិក (Mr. Kim Chha Hout, the President of the Representative Office of the Cambodia Chamber of Commerce in California, USA) បានចូលជួបពិភាក្សាជាមួយ លោក ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា។
លោក គឹម ឆាហួត បានលើកឡើងថា ដំណើរទស្សនកិច្ចរបស់គណៈប្រតិភូវិនិយោគអាមេរិកនាពេលនេះ គឺកើតឡើងបន្ទាប់ពីដំណើរទស្សនកិច្ចទៅទាក់ទាញ និងជំរុញការវិនិយោគរបស់ក្រុមប្រឹក្សាអភិវឌ្ឍន៍កម្ពុជា ដែលដឹកនាំដោយ លោក ស៊ុន ចាន់ថុល នៅសហរដ្ឋអាមេរិក កាលពីខែកញ្ញា ឆ្នាំ ២០២៤។
លោកបានថ្លែងថា៖«តាមរយៈដំណើរទស្សនកិច្ចមកប្រទេសកម្ពុជាដោយផ្ទាល់នេះ គណៈប្រតិភូវិនិយោគអាមេរិកបានបង្ហាញពីការចាប់អារម្មណ៍ និងភាពទាក់ទាញប្រកបដោយសក្តានុពល និងភាពអំណោយផលនៃការវិនិយោគក្នុងប្រទេសកម្ពុជា។ ក្រុមហ៊ុនទាំងអស់បានបង្ហាញចំណាប់អារម្មណ៍លើវិស័យមានជាអាទិ៍ដូចជា បច្ចេកវិទ្យា កសិ-ឧស្សាហកម្ម និងអប់រំជាដើម»។
ក្រៅពីជំនួបខាងលើ ក្នុងថ្ងៃទី១០ ខែធ្នូ គណៈប្រតិភូវិនិយោគអាមេរិក ក៏បានជួបជាមួយ លោក លឹម ហេង អនុប្រធានសភាពាណិជ្ជកម្មកម្ពុជា ដើម្បីស្វែងរកឱកាសវិនិយោគ និងស្វែងរកការយល់ដឹងអំពីការអភិវឌ្ឍសេដ្ឋកិច្ច កាលានុវត្តភាព កម្លាំងពលកម្មវ័យក្មេង និងទីផ្សារដ៏ទូលំទូលាយរបស់កម្ពុជាផងដែរ។
លោក លឹម ហេង បានប្រាប់គណៈប្រតិភូអាមេរិកថា៖«អាមរិកគឺជាទីផ្សារនាំចេញដ៏ធំមួយរបស់កម្ពុជា ហើយអាមរិកក៏ជាដៃគូវិនិយោគដ៏ចម្បងរបស់កម្ពុជា។ ក្រុមហ៊ុនធំៗជាច្រើនរបស់អាមរិកបាននិងកំពុងវិនិយោគនៅកម្ពុជា»។
លោកបន្តថា៖«ខ្ញុំសូមជំរុញលើកទឹកចិត្តធុរជនអាមេរិក ឱ្យចូលមកចាប់ដៃគូជាមួយធុរជនកម្ពុជា ដើម្បីទាញយកកាលានុវត្តភាពធុរកិច្ចនៅកម្ពុជាឱ្យបានកាន់តែច្រើន»។
នាយករដ្ឋមន្ត្រីកម្ពុជា លោក ហ៊ុន ម៉ាណែត ក្នុងពិធីបើកវេទិកាធុរកិច្ចអាមេរិក-កម្ពុជា កាលពីថ្ងៃទី ២២ ខែកញ្ញា ឆ្នាំ ២០២៣ នៅក្នុងទីក្រុងញូវយ៉ក បានលើកឡើងថា កិច្ចសហប្រតិបត្តិការល្អរវាងប្រទេសទាំង ២ គឺពិតបានផ្តល់ប្រយោជន៍ឱ្យគ្នាទៅវិញទៅមកនិងទទួលបានអត្ថប្រយោជន៍ពីទីតាំងយុទ្ធសាស្ត្រ និងកម្លាំងពលកម្មវ័យក្មេងដែលមានថ្លៃឈ្នួលទាប ព្រមទាំងមានជំនាញសម្រាប់វិស័យកម្មន្តសាល។ ការណ៍នេះបានធ្វើឱ្យថ្លៃទំនិញផលិតកម្ពុជាមានតម្លៃទាបសម្រាប់អ្នកប្រើប្រាស់ ខណៈកម្ពុជាទទួលបានអត្ថប្រយោជន៍ពីការនាំចេញទៅទីផ្សារអាមេរិក។
លោកបានបន្ថែមថា នេះជាឱកាសនោះល្អសម្រាប់វិនិយោគិន និងធុរជនសហរដ្ឋអាមេរិកមកសិក្សាស្វែងយល់ពីសក្ដានុពលរបស់កម្ពុជា។
លោកលើកឡើងថា៖ «បានឃើញម្ដង ប្រសើរជាងបានឮ ១ ពាន់ដង» ដូច្នេះសូមវិនិយោគិនមកស្វែងយល់អំពីកម្ពុជា រាជរដ្ឋាភិបាលនឹងបន្តការគាំទ្រមុតមាំដល់កាលានុវត្តភាពសម្រាប់បង្កើតកិច្ចសហប្រតិបត្តិការ និងការពង្រីកធុរកិច្ចព្រមទាំងដោះស្រាយរាល់បញ្ហាប្រឈមទាំងចាស់ និងថ្មីដើម្បីជំរុញសន្ទុះនៃការអភិវឌ្ឍវិស័យឯកជនឱ្យបានពេញលេញ និងក្លាយជាដៃគូគន្លឹះរបស់រាជរដ្ឋាភិបាល»។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា ចាប់ពីឆ្នាំ ១៩៩៤ ដល់ខែមករា ឆ្នាំ ២០២៤ ទុនវិនិយោគរបស់អាមេរិកនៅកម្ពុជា មានទឹកប្រាក់សរុបជាង ១ ០៧៧ លានដុល្លារអាមេរិក។ ក្រុមហ៊ុនរបស់អាមេរិកភាគច្រើនវិនិយោគលើវិស័យកសិកម្ម, កសិក-ឧស្សាហកម្ម, ឧស្សាហកម្ម និងទេសចរណ៍។
ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា(GDCE) ឱ្យដឹងថា រយៈពេល ១១ ខែដើមឆ្នាំ ២០២៤ ការផ្លាស់ប្តូរទំនិញរវាងកម្ពុជា ជាមួយអាមេរិក មានទឹកប្រាក់សរុប ៩,៣ ពាន់លានដុល្លារ កើនឡើង ១១,២ ភាគរយបើធៀបនឹងរយៈពេលដូចគ្នាក្នុងឆ្នាំ២០២៣ ក្នុងនោះកម្ពុជានាំទៅអាមេរិក ចំនួន ៩,០៦ ពាន់លានដុល្លារ កើនឡើង ១១,៣ ភាគរយ និងទំនិញអាមេរិកនាំមកកម្ពុជា ២៤៤,៤២ លានដុល្លារ កើនឡើង ៩,៨ ភាគរយ។ តាមតួលេខខាងលើ គឺជញ្ជីងពាណិជ្ជកម្មមានឧត្តមភាព ៨,៨២ ពាន់លានដុល្លារ៕
