ពិព័រណ៍ផលិតផលខ្មែរ ដែលរៀបចំនៅកោះពេជ្រ នាពេលកន្លងមក។ ភ្នំពេញប៉ុស្តិ៍
កម្ពុជានឹងរៀបចំព្រឹត្តិការណ៍«ពិព័រណ៍ពាណិជ្ជកម្ម ឆ្នាំ ២០២៤» ប្រចាំឆ្នាំ ២០២៤ នៅចុងសប្តាហ៍នេះ ដែលនឹងមានការដាក់តាំងបង្ហាញផលិតផលសក្តានុពលជាច្រើនបង្ហាញដល់អ្នកចូលរួម ព្រមទាំងផ្តល់ឱកាសឱ្យម្ចាស់ក្រុមហ៊ុន និងអាជីវកម្ម បានជួបជាមួយក្រុមហ៊ុនបញ្ជាទិញពីទីផ្សារអន្តរជាតិផងដែរ។
«ពិព័រណ៍ពាណិជ្ជកម្ម ឆ្នាំ ២០២៤» នឹងធ្វើឡើងរយៈពេល ៤ ថ្ងៃ ចាប់ពីថ្ងៃទី១៣-១៦ ខែធ្នូ នៅមជ្ឈមណ្ឌលភីរេច ក្នុងបុរីប៉េងហួត បឹងស្នោ(ច្បារអំពៅ) ក្រោមមូលបទ«យុគសម័យថ្មីនៃពាណិជ្ជកម្ម» 2024 Theme: “Trade Renaissance”។
មានស្តង់ចំនួន ២៤៦ សម្រាប់ពាណិជ្ជករក្នុងស្រុក និងក្រៅប្រទេសដាក់តាំងបង្ហាញផលិតផល។ ក្រសួងពាណិជ្ជកម្មរំពឹងថា ព្រឹត្តិការណ៍នេះនឹងមានអ្នកចូលរួមទស្សនាប្រមាណ ៥០ ០០០ នាក់ ក្នុងនោះក៏មានតំណាងក្រុមហ៊ុនបញ្ជាទិញទំនិញពីបរទេសផងដែរ។
នៅក្នុងពិធីជំនួបជាមួយអ្នកសារព័ត៌មាន កាលពីថ្ងៃទី៩ ខែធ្នូ លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បានឱ្យដឹងថា ពិព័រណ៍នេះធ្វើឡើងក្នុងគោលបំណងដើម្បីជំរុញសកម្មភាពពាណិជ្ជកម្មនៅកម្ពុជា និងធ្វើឱ្យកាន់តែប្រសើរឡើងនូវបរិយាកាសវិនិយោគ។ ព្រឹត្តិការណ៍នេះ ក៏ជាវេទិកានៃការកសាងបណ្តាញរវាងអ្នកតាំងពិព័រណ៍ក្នុងស្រុក និងភ្ញៀវជាតិ-អន្តរជាតិដែលចូលទស្សនាអ្នកទស្សនាពិព័រណ៍ផងដែរ។
បើតាមលោក ប៉ែន សុវិជាតិ ក្នុងព្រឹត្តិការណ៍ខាងមុខ នឹងមានការតាំងបង្ហាញផលិតផលសក្តានុពលនាំចេញ និងមានគុណភាពខ្ពស់ជាច្រើនរបស់កម្ពុជា ជាពិសេសផលិតផលចំនួន ១០ មុខ រួមមាន៖ ស្រូវ, អង្ករ, ស្វាយចន្ទី, ម្រេច, ស្វាយ, ចេកអំបូងលឿង, ដំឡូងមី, មៀនប៉ៃលិន, ទឹកឃ្មុំ, អំបិល និងដូង ជាទំនិញមានសក្តានុពល ដែលក្រសួងជំរុញការនាំចេញ។
លោក សុវិជាតិ បាននិយាយថា៖«យើងមានផលិតផល៖ ស្រូវ, អង្ករ, ស្វាយចន្ទី, ម្រេច, ស្វាយ, ចេកអំបូងលឿង, ដំឡូងមី, មៀនប៉ៃលិន, ទឹកឃ្មុំ, អំបិល និងដូង។ ទាំងអស់នេះមានទំនិញខ្លះជាទំនិញ ម៉កសម្គាល់ភូមិសាស្ត្រ(GI) និងទំនិញខ្លះទៀតជាទំនិញសក្ដានុពលដែលកំពុងតែមានភាពទាក់ទាញទៅលើទីផ្សារបច្ចុប្បន្ន»។
បន្ថែមពីលើនេះលោកប្រាប់ថា ក្រសួងពាណិជ្ជកម្ម មានបំណងចង់ជំរុញទំនិញ ទាំងទំនិញដែលជាទំនិញម៉ាកសម្គាល់ភូមិសាស្ត្រ និងទំនិញដែលផលិតនៅកម្ពុជា «Made in Cambodia» ឱ្យមានភាពល្បីល្បាញ ទាំងនៅក្នុងស្រុក និងនៅលើឆាកអន្តរជាតិ។
ពិព័រណ៍នេះ គឺជាព្រឹត្តិការណ៍ពិព័ណ៍ពាណិជ្ជកម្មកម្រិតអន្តរជាតិដ៏ធំប្រចាំឆ្នាំ របស់ក្រសួងពាណិជ្ជកម្ម ដើមឡើយមានឈ្មោះថា «ពិព័រណ៍ផលិតផលខ្មែរ និងទំនិញនាំចេញ-នាំចូល ដែលចាប់តាំងពីឆ្នាំ ២០០៦ មក ត្រូវបានរៀបចំឡើងទទួលបានជោគជ័យចំនួន ១៦ លើក។
ប្រធានសម័្ពន្ធសមាគមសហគ្រាសធុនតូច និងមធ្យមកម្ពុជា(FASMEC) លោក តែ តាំងប៉រ បានប្រាប់ភ្នំពេញប៉ុស្តិ៍ក្នុងថ្ងៃទី១០ ខែធ្នូ ថា ព្រឹត្តិការណ៍ពិព័រណ៍ពាណិជ្ជកម្ម ឆ្នាំ ២០២៤ ដែលរៀបចំដោយក្រសួងពាណិជ្ជកម្ម នឹងផ្តល់ផលវិជ្ជមានយ៉ាងច្រើនសម្រាប់ផលិតករក្នុងស្រុក ដូចជាផ្តល់ឱកាសសម្រាប់ក្រុមហ៊ុន និងអាជីវកម្មក្នុងស្រុកបង្ហាញផលិតផល និងសេវាកម្មទៅកាន់ទីផ្សារ, ជួយបង្កើនការយល់ដឹងអំពីផលិតផលខ្មែរ, និងបង្កើនការជឿជាក់ទៅដល់ម្ចាស់អាជីវកម្ម។
លោកបន្ថែមថា សម្រាប់សមាជិករបស់ FASMEC នឹងមានផលិតផលជាច្រើនយកទៅចូលរួមតាំងបង្ហាញដែលមានដូចជា ផលិតផលគ្រាប់ស្វាយចន្ទី ត្រីងៀត សាច់ក្រក ងៀតគោ និងដំណាប់ផ្លែឈើ ជាដើម។
លោកថ្លែងថា៖«ក្នុងនាម FASMEC យើងពេញចិត្តក្នុងការគាំទ្រដល់កម្មវិធីបែបនេះដែលផ្តោតលើការផ្សព្វផ្សាយផលិតផលខ្មែរ។ កម្មវិធីបែបនេះគួរតែមានជាថ្មីជារៀងរាល់ឆ្នាំ ដើម្បីរួមចំណែកក្នុងការកែលំអសេដ្ឋកិច្ច និងបង្កើនការចូលទៅកាន់ទីផ្សារអន្តរជាតិ»។
លោកប្រាប់ទៀតថា និន្នាការនៃការនាំចេញទំនិញរបស់កម្ពុជាកំពុងកើនឡើងជារៀងរាល់ឆ្នាំ គឺដោយសារតែគុណភាពត្រូវបានទីផ្សារអន្តរជាតិទទួលស្គាល់កាន់តែច្រើន ខណៈការចរចាលើកិច្ចព្រមព្រៀងពាណិជ្ជកម្មមួយចំនួនជាមួយប្រទេសផ្សេង៕
