ការជួបពិភាក្សារវាងថ្នាក់ដឹកនាំ CDC ជាមួយភាគីចិន នៅទីស្តីកាក្រុមប្រឹក្សាអភិវឌ្ឍន៍កម្ពុជា។ CDC
វិនិយោគិនក្រុមហ៊ុនមានមូលដ្ឋាននៅខេត្ត Zhejiang បានបង្ហាញការចាប់អារម្មណ៍ចំពោះការបណ្តាក់ទុនលើវិស័យផ្គត់ផ្គង់ថាមពលនៅកម្ពុជា ខណៈថាមពលគឺជាផ្នែកដ៏សំខាន់សម្រាប់ទាក់ទាញអ្នកវិនិយោគឱ្យមកបណ្តាក់ទុនលើគ្រប់វិស័យ និងជំរុញកំណើនសេដ្ឋកិច្ចជាតិ។
ព័ត៌មាននេះត្រូវបានលើកឡើងក្នុងជំនួបពិភាក្សារវាងលោក សួន សុផល អគ្គលេខាធិការរងគណៈកម្មាធិការវិនិយោគកម្ពុជា ជាមួយនឹងគណៈប្រតិភូចិនមកពីខេត្ត Zhejiang ដែលដឹកនាំដោយ លោក Yang Yaming ប្រធានក្រុមហ៊ុន Xianghu Ceramic Art island Zhejiang Co., Ltd. ព្រមទាំងមានការចូលរួមពីអគ្គនាយករងនៃក្រុមហ៊ុន Zhejiang Energy Group Co., Lid. នៅទីស្តីការក្រុមប្រឹក្សាអភិវឌ្ឍន៍កម្ពុជា(CDC) កាលពីថ្ងៃទី២៩ ខែវិចិ្ឆកា ឆ្នាំ ២០២៤។
ក្នុងជំនួបនោះ ភាគីចិនបានលើកឡើងពីកាលានុវត្តភាពវិនិយោគនៅកម្ពុជា និងបានធ្វើបទឧទ្ទេសនាមអំពីសកម្មភាពធុរកិច្ចរបស់ខ្លួន ព្រមទាំងបានចែករំលែកពីនិន្នាការនៃការអភិវឌ្ឍវិស័យថាមពលអគ្គិសនីរបស់ក្រុមហ៊ុននាពេលកន្លងមក។ នៅក្នុងនោះក្រុមហ៊ុន Zhejiang Energy Group Co., Lid. ក៏បានលើកឡើងពីចំណាប់អារម្មណ៍ចំពោះការបណ្តាក់ទុនក្នុងវិស័យថាមពលនៅប្រទេសកម្ពុជាផងដែរ។
យោងតាម CDC ក្រុមហ៊ុន Zhejiang Energy Group Co., Lid. គឺមានបទពិសោធក្នុងវិស័យជាច្រើន ពិសេសថាមពលអគ្គិសនីដែលប្រើប្រាស់ដោយធ្យូងថ្ម ពន្លឺព្រះអាទិត្យ និងឧស្ម័នធម្មជាតិ(LNG)។ Zhejiang Energy Group Co., Lid. គឺជាក្រុមហ៊ុនផលិតអគ្គិសនីលំដាប់លេខ១ នៅខេត្ត Zhejiang និងមានសកម្មភាពធុរកិច្ចក្នុងវិស័យដូចជា ថាមពលអគ្គិសនី, ហេដ្ឋារចនាសម្ព័ន្ធ, ការផលិតថាមពលធ្យូងថ្ម និងផលិតបន្ទះស្រូបដោយពន្លឺព្រះអាទិត្យ។
ជាការឆ្លើយតប លោក សួន សុផល បានស្វាគមន៍គណៈប្រតិភូចិនដែលធ្វើទស្សនកិច្ចសិក្សាដោយផ្ទាល់នៅកម្ពុជា ដើម្បីស្វែងយល់ពីកាលានុវត្តភាពវិនិយោគ និងសក្តានុពលវិនិយោគរបស់កម្ពុជា ដោយលោកប្រាប់ទៅភាគីចិនពីកាលានុវត្តភាពវិនិយោគក្នុងវិស័យអាទិភាពមួយចំនួន និងកំណើនខ្ពស់នៃការវិនិយោគនៅកម្ពុជា និងការអភិវឌ្ឍតំបន់សេដ្ឋកិច្ចពិសេសនៅកម្ពុជា ដែលបានចូលរួមធ្វើពិពិធកម្មសេដ្ឋកិច្ចកម្ពុជា តាមរយៈការទាក់ទាញឧស្សាហកម្មថ្មីៗដូចជា ការផលិតថាមពលប្រើប្រាស់ដោយធ្យូងថ្ម និងផលិតបន្ទះស្រូបដោយពន្លឺព្រះអាទិត្យ។
បន្ថែមពីលើនេះ លោកក៏បាន លើកទឹកចិត្តក្រុមហ៊ុនឱ្យធ្វើការពិភាក្សាជាមួយតួអង្គពាក់ព័ន្ធ ជាពិសេសក្រសួងរ៉ែ និងថាមពល ដើម្បីស្វែងរកការគាំទ្រជាលក្ខណៈបច្ចេកទេស។ លោកក៏ជំរុញឱ្យក្រុមហ៊ុនប្រញាប់មកបណ្តាក់ទុនវិនិយោគនៅកម្ពុជា ដើម្បីទទួលបានផលចំណេញ និងបានស្នើឱ្យគណៈប្រតិភូចិនជួយផ្សព្វផ្សាយពីបរិស្ថានវិនិយោគរបស់កម្ពុជាជូនទៅវិនិយោគិនចិនផ្សេងទៀត ដើម្បីពិនិត្យលទ្ធភាពមកបណ្តាក់ទុនវិនិយោគនៅកម្ពុជាឱ្យកាន់តែច្រើន។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី២ ខែធ្នូ ថា បដិវត្តឧស្សាហកម្ម និងបច្ចេកវិទ្យា បានធ្វើឱ្យតម្រូវការថាមពលកើនឡើងជាលំដាប់ ហើយក៏ក្លាយជាចំណែកដែលមិនអាចខ្វះបានសម្រាប់ការអភិវឌ្ឍលើគ្រប់វិស័យ។ ប្រទេសមួយដែលមានថាមពលអគ្គិសនីគ្រប់គ្រាន់ មានន័យថាប្រទេសនោះមានសក្តានុពលក្នុងការទាក់ទាញអ្នកវិនិយោគឱ្យចូលមកបណ្តាក់ទុនកាន់តែច្រើន។
លោកបន្តថា មានថាមពលគ្រប់គ្រាន់ គឺតម្លៃថាមពលនឹងអាចថយចុះជាងមុន នេះជាមូលហេតុចម្បងធ្វើឱ្យថ្លៃដើមផលិតថយចុះ។ ការធ្លាក់ចុះថ្លៃដើមផលិត នឹងធ្វើឱ្យសមត្ថភាពប្រកួតប្រជែងតម្លៃទំនិញនាំចេញរបស់កម្ពុជាទៅទីផ្សារអន្តរជាតិល្អប្រសើរជាងមុន។
លោកបានថ្លែងថា៖«បច្ចុប្បន្នគ្រប់ចង្វាក់ផលិតកម្មតាមរោងចក្រ/សហគ្រាស និងក្រុមហ៊ុនបម្រើសេវាកម្ម គឺសុទ្ធតែត្រូវការថាមពលអគ្គិសនី ដូច្នេះបើយើងមានប្រភពផ្គត់ផ្គង់អគ្គិសនីកាន់តែច្រើន និងមានតម្លៃសមរម្យ គឺប្រាកដជានឹងជួយឱ្យកម្ពុជាទាក់ទាញអ្នកវិនិយោគឱ្យចូលមកបើកអាជីវកម្មកាន់តែច្រើន ហើយទំនិញនាំចេញទៅទីផ្សារអន្តរជាតិក៏មានសម្ទុះច្រើនជាងមុនដែរ»។
ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា លោក តែ តាំងប៉រ ធ្លាប់បានប្រាប់ភ្នំពេញប៉ុស្តិ៍ ថា បើកម្ពុជាអាចធ្វើឱ្យតម្លៃអគ្គិសនីកាន់តែទាបថែមទៀត វានឹងក្លាយជាចំណែកដ៏សំខាន់ក្នុងការទាក់ទាញអ្នកវិនិយោគឱ្យបញ្ចេញទុនកាន់តែច្រើនមកវិនិយោគនៅកម្ពុជា។ នៅពេលតម្លៃអគ្គិសនីទាប វានឹងជួយកាត់បន្ថយចំណាយថ្លៃដើម ដែលធ្វើឱ្យសមត្ថភាពប្រកួតប្រជែងនៅលើទីផ្សារអន្តរជាតិកាន់តែខ្លាំង។
លោកអះអាងថា៖ «តម្លៃប្រេង និងតម្លៃអគ្គិសនី ជាកត្តាគួបផ្សំដ៏សំខាន់ក្នុងការទាក់ទាញអ្នកវិនិយោគ ព្រោះប្រេង និងអគ្គិសនី គឺជាធាតុផ្សំសំខាន់សម្រាប់ផ្នែកផលិតកម្ម ក្រៅពីការចំណាយទៅលើវត្ថុធាតុដើម និងកម្លាំងពលកម្ម។ កាលណាតម្លៃប្រេង និងតម្លៃអគ្គិសនីមានស្ថិរភាព និងតម្លៃទាប អ្នកវិនិយោគក្រៅស្រុកនឹងមើលឃើញឱកាសផ្សេងៗចេញពីកត្តាទាំងអស់នោះ»។
វិស័យថាមពលអគ្គិសនីនៅកម្ពុជា បានបង្ហាញពីវឌ្ឍនភាពជាបន្តបន្ទាប់ដោយចាប់ផ្តើមចេញពីចំណុចសូន្យកាលពីឆ្នាំ ១៩៧៩។ ទោះយ៉ាងណាវឌ្ឍនភាពដែលមានភាពលេចធ្លោគឺរយៈពេលជិត ២ ទសវត្សរ៍ចុងក្រោយនេះ។
ទិន្នន័យក្រសួងរ៉ែ និងថាមពល ឱ្យដឹងថា ក្នុងឆ្នាំ ២០០៩ វិស័យថាមពលអគ្គិសនីនៅកម្ពុជា មានអានុភាពចំនួន ៥៧៩ មេហ្កាវ៉ាត់(MW) ដែលចំនួននេះបានកើនដល់ ៤ ៦៤៩ មេហ្កាវ៉ាត់(MW) ត្រឹមឆ្នាំ ២០២៣ ហើយតាមផែនការនឹងកើនដល់ ៤ ៨០៩ មេហ្កាវ៉ាត់(MW) នៅត្រឹមចុងឆ្នាំ ២០២៤។ ក្នុងចំនួនខាងលើ គឺប្រភពថាមពលផលិតក្នុងស្រុក មានប្រមាណ ៨៦ភាគរយ និងនាំចូលពីប្រទេសជិតខាង ១៤ ភាគរយ៕
