លោក ហួត ហាក់(ឆ្វេង) ប្រគល់វត្ថុអនុស្សាវរីយឱ្យលោក Wang Haimin។ ក្រសួងទេសចរណ៍
វិស័យទេសចរណ៍កម្ពុជារំពឹងនឹងអាចស្រូបភ្ញៀវជនជាតិចិន ពិសេសអ្នករស់នៅក្នុងតំបន់រដ្ឋបាលពិសេសហុងកុង និងម៉ាកាវបានកាន់តែច្រើន បន្ទាប់ពីភាគីកម្ពុជា-ចិនបានជួបពិភាក្សាគ្នា និងសន្យាជួយជំរុញការផ្សព្វផ្សាយពីផលិតផលទេសចរណ៍កម្ពុជាឱ្យកាន់តែទូលំទូលាយ។
ការសន្យានេះធ្វើឡើងនៅទីក្រុងហុងកុង កាលពីថ្ងៃទី២១ ខែធ្នូ នាជំនួបពិភាក្សារវាងលោក ហួត ហាក់ រដ្ឋមន្រ្តីក្រសួងទេសចរណ៍ ជាមួយលោក Wang Haimin ប្រធានក្រុមប្រឹក្សាភិបាលក្រុមហ៊ុន China Tourism Group Corporation Limited(CTG) និងសហការីដែលជាអគ្គនាយក/អគ្គនាយករងក្រុមហ៊ុនបុត្រសម្ព័ន្ធផ្នែកទីភា្នក់ងារទេសចរណ៍ និង China Duty Free Shop។
ក្រសួងទេសចរណ៍ ឱ្យដឹងថា ក្នុងជំនួបនេះបានលើកយកបញ្ហាប្រឈមជាច្រើនមកពិភាក្សាគ្នាក្នុងន័យដើម្បីផ្លាស់ប្តូរទស្សនៈ និងយុទ្ធសាស្រ្តសម្រាប់ពង្រឹងកិច្ចសហប្រតិបត្តិការ ព្រមទាំងរៀបចំកញ្ចប់ទស្សនកិច្ច និងជំរុញលំហូរភ្ញៀវទេសចររវាងភាគីទាំង ២ ជាពិសេសប្រជាពលរដ្ឋរស់នៅក្នុងតំបន់រដ្ឋបាលពិសេសហុងកុង តំបន់រដ្ឋបាលពិសេសម៉ាកាវ និងតំបន់ជុំវិញឱ្យមកកម្ពុជាកាន់តែច្រើន។
ក្រសួងបញ្ជាក់ថា៖«តាមរយៈជំនួបពិភាក្សាកម្រិតខ្ពស់ និងប្រកបដោយផ្លែផ្កានេះ កិច្ចសហប្រតិបត្តិការទេសចរណ៍ថ្មីៗនិងសំខាន់ៗ ត្រូវបានឯកភាពផ្តួចផ្តើមរួមមានការបង្កើតក្រុមការងារអនុវត្តអនុស្សរណៈនៃការយោគយល់គ្នាដែលបានចុះកន្លងមក»។
ប្រធានសមាគមមគ្គុទេសក៍ទេសចរណ៍ភាសាចិនកម្ពុជា(ខេត្តសៀមរាប) លោក អនហេង សុភ័ក្រ បានប្រាប់ភ្នំពេញប៉ុស្តិ៍ថា ទោះបីពេលនេះភ្ញៀវទេសចរចិនមកកម្ពុជាមិនមានចំនួនច្រើនដូចមុនឆ្នាំ ២០២០ ប៉ុន្តែភ្ញៀវជនជាតិចិនត្រូវបានគេចាត់ទុកជាភ្ញៀវមានសក្តានុពលសម្រាប់វិស័យទេសចរណ៍កម្ពុជា។
លោកបន្តថា ដោយសារពេលនេះមិនសូវមានជើងហោះហើរត្រង់ពីទីក្រុងធំៗប្រទេសចិន មកព្រលានយន្តហោះអន្តរជាតិសៀមរាប ដូច្នេះធ្វើឱ្យការស្នាក់នៅរបស់ភ្ញៀវជនជាតិចិនត្រូវចំណាយពេលយូរជាងមុន ដោយភ្ញៀវចិនស្នាក់នៅកម្ពុជាជាមធ្យមចន្លោះពី ៥-៨ថ្ងៃ។
លោកនិយាយថា៖«ជាទូទៅការស្នាក់នៅកម្ពុជារបស់ភ្ញៀវទេសចរចិន គឺយូរជាងមុនសម័យកូវីដ១៩ ដោយសារដំណើរទេសចរណ៍ភាគច្រើនត្រូវភ្ជាប់រវាងរាជធានីភ្នំពេញ បូកជាមួយតំបន់ប្រាសាទក្នុងខេត្តសៀមរាប»។
លោកលើកឡើងទៀតថា ចំនួនភ្ញៀវទេសចរបរទេស រួមទាំងជនជាតិចិននឹងកើនឡើងបន្ថែមនៅពេលមានការតភ្ជាប់ជើងហោះហើរត្រង់កាន់តែច្រើន។ ជាទូទៅភ្ញៀវទេសចរចិនចូលចិត្តដើរទស្សនារាជធានីភ្នំពេញ សៀមរាប និងខេត្តព្រះសីហនុ។
លោកអះអាងថា៖«ខ្ញុំនាមជាអ្នកនៅក្នុងវិស័យទេសចរណ៍ ខ្ញុំចង់ឱ្យមានការបង្កើនជើងហោះហើររវាងទីក្រុងសំខាន់របស់ប្រទេសចិន និងអាកាសយានដ្ឋានអន្តរជាតិទាំង ៣ របស់កម្ពុជាឱ្យបានច្រើន។ ជើងហោះហើរត្រង់កាន់តែច្រើននឹងជួយឱ្យភ្ញៀវនៃប្រទេសទាំង ២ ធ្វើទេសចរណ៍ជាមួយគ្នាងាយស្រួល និងច្រើនជាងមុន។
ប្រធានសមាគមមគ្គុទ្ទេសក៍ទេសចរអង្គរ លោក ខៀវ ធី បាននិយាយថា អត្រាកំណើនសេដ្ឋកិច្ចពិភពលោកយឺត ព្រមទាំងវិបត្តិនៅប្រទេសមួយចំនួន បានជះឥទ្ធិពលអវិជ្ជមានដល់វិស័យទេសចរណ៍កម្ពុជា។
កំណើនភ្ញៀវទេសចរ គឺមិនត្រឹមតែធ្វើឱ្យមគ្គុទ្ទេសក៍ទេសចរមានការងារ និងទទួលបានប្រាក់ចំណូលប៉ុណ្ណោះទេ ប៉ុន្តែក៏ជាការផ្សព្វផ្សាយមួយដែលអាចទាក់ទាញឱ្យភ្ញៀវបរទេសកាន់តែច្រើនមកកម្សាន្តនៅកម្ពុជា ដែលជាប្រទេសមានផលិតផលទេសចរណ៍ជាច្រើនដូចជា វប្បធម៌ និងអរិយធម៌ដ៏ល្អ និងមានវ័យចំណាស់មួយក្នុងទ្វីបអាស៊ី។
លោកបន្តថា នៅពេលនយោបាយ និងសេដ្ឋកិច្ចពិភពលោកល្អឡើងវិញ អ្នកទេសចរលើពិភពលោកនឹងចេញដើរកម្សាន្ត។លោកបានថ្លែងថា៖«កំណើនភ្ញៀវទេសចរ នឹងនាំចំណូលយ៉ាងច្រើនចូលសេដ្ឋកិច្ចគ្រួសារ និងជាតិទាំងមូល»។
ក្រុមហ៊ុន China Tourism Group Corporation Limited (CTG) ត្រូវបានស្គាល់ថាជា China Travel Services (Holdings) Hong Kong Limited ដែលបានបង្កើតឡើងតាំងពីឆ្នាំ ១៩២៣។ បច្ចុប្បន្ន CTG គឺជាសហគ្រាសរដ្ឋរបស់ចិនដែលគ្រប់គ្រង និងចាត់ចែងផ្ទាល់ដោយគណៈកម្មការមជ្ឈឹមបក្ស មានទីស្នាក់ការកណ្តាលនៅទីក្រុងហុងកុង។
ទិន្នន័យចុងក្រោយរបស់ក្រសួងទេសចរណ៍ បង្ហាញថា រយៈពេល ១០ ខែ ដើមឆ្នាំ២០២៤ កម្ពុជាទទួលបានភ្ញៀវបរទេសសរុប ៥,៣៧ លាននាក់ កើនឡើង ២២ ភាគរយបើធៀបនឹងរយៈពេលដូចគ្នាឆ្នាំ២០២៣ ក្នុងនោះភ្ញៀវមកពីសាធារណរដ្ឋចិន មានចំនួន ៦៩១ ៧៣៦នាក់ កើនឡើង ៥២,៥ ភាគរយ។ ចំណែកភ្ញៀវមកពីតំបន់រដ្ឋបាលពិសេសហុងកុង មានចំនួន ១៣១ នាក់ កើនឡើង ១៩៧,៧ ភាគរយ និងតំបន់រដ្ឋបាលពិសេសម៉ាកាវ មាន ៧នាក់ កើន ៦០០ ភាគរយ។
ឆ្នាំ២០១៩ គឺជាពេលដែលប្រទេសកម្ពុជាទទួលបានភ្ញៀវទេសចរច្រើនបំផុត ដោយមានចំនួនសរុប ៦,៦១លាននាក់ ក្នុងនោះជនជាតិចិន មាន ២,៣៦ លាននាក់ កើនឡើង ១៦,៧ ភាគរយបើធៀបនឹងឆ្នាំ ២០១៨។ ដោយឡែកភ្ញៀវមកពីហុងកុង គឺមានចំនួន ២ ១៩១នាក់ និងមកពីម៉ាកាវ ២១៩ នាក់៕
