ទិដ្ឋភាពរោងចក្រផលិតសំបកកង់រថយន្តនៅក្នុងតំបន់សេដ្ឋកិច្ចពិសេសក្រុងព្រះសីហនុ នាពេលកន្លងមក។ សហការី
កម្ពុជាប្រមូលប្រាក់បានជិត ៨០០ លានដុល្លារពីការនាំចេញសំបកកង់រថយន្តទៅទីផ្សារអន្តរជាតិ នារយៈពេល ១១ ខែដើមឆ្នាំ ២០២៤ ដោយកើនឡើងជាង ១៣០ ភាគរយបើធៀបនឹងរយៈពេលដូចគ្នាក្នុងឆ្នាំ ២០២៣។ នេះបើយោងតាមក្រសួងពាណិជ្ជកម្ម។
របាយការណ៍បូកសរុបលទ្ធផលការងារពាណិជ្ជកម្មឆ្នាំ ២០២៤ និងទិសដៅការងារពាណិជ្ជកម្មឆ្នាំ ២០២៥ របស់ក្រសួងពាណិជ្ជកម្ម បានឱ្យដឹងថា ចន្លោះពីខែមករា ដល់ខែវិច្ឆិកា ឆ្នាំ ២០២៤ ការនាំចេញសំបកកង់រថយន្តទៅទីផ្សារអន្តរជាតិ មានទឹកប្រាក់សរុប ៧៧២,៥៥ លានដុល្លារ កើនឡើង ១៣៥,៣៤ ភាគរយបើធៀបនឹងរយៈពេលដូចគ្នាក្នុងឆ្នាំ ២០២៣ ដែលមាន ៣២៨,២៧ លានដុល្លារ។
ចំនួនទឹកប្រាក់នាំចេញសំបកកង់រថយន្ត គឺស្មើនឹង ៣,១៧ ភាគរយនៃទឹកប្រាក់នាំចេញទំនិញសរុបរបស់កម្ពុជាក្នុងរយៈពេល ១១ ខែ ឆ្នាំ ២០២៤ ដែលមានចំនួន ២៤ ៣៤៨,៩៤ លានដុល្លារ។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ភ្នំពេញប៉ុស្តិ៍ក្នុងថ្ងៃទី ២៣ ខែធ្នូ ថា កំណើនទឹកប្រាក់នាំចេញសំបកកង់រថយន្តផលិតនៅកម្ពុជាទៅទីផ្សារអន្តរជាតិ គឺដោយសារវត្តមានរបស់ក្រុមហ៊ុនផលិតសំបកកង់រថយន្តម៉ាក់ល្បីៗកម្រិតអន្តរជាតិកាន់តែច្រើនចូលមកបើករោងចក្រផលិតនៅកម្ពុជា។
លោកបន្តថា មូលហេតុដែលជំរុញឱ្យក្រុមហ៊ុនទាំងនោះចូលមកវិនិយោគនៅកម្ពុជា ព្រោះការវិនិយោគនៅកម្ពុជាទទួលបានផលចំណេញច្រើន ទាំងកត្តាក្នុងស្រុក និងទីផ្សារនាំចេញ។
លោកពន្យល់ថា កត្តាខាងក្នុង គឺកម្ពុជាជាប្រទេសមានស្ថិរភាពនយោបាយល្អ មានច្បាប់វិនិយោគអំណោយផល សម្បូរពលកម្មវ័យក្មេងនិងមានតម្លៃសមរម្យ មានហេដ្ឋារចនាសម្ព័ន្ធដឹកជញ្ជូនល្អ និងជាពិសេសបរិមាណជ័រកៅស៊ូដែលកម្ពុជាប្រមូលបានគឺមានច្រើនជារៀងរាល់ឆ្នាំ ហើយមានតម្លៃសមរម្យទៀតផង។
ចំណែកកត្តាខាងក្រៅ គឺរដ្ឋាភិបាលកម្ពុជាបានបង្កើត ឬចូលជាសមាជិកក្នុងកិច្ចព្រមព្រៀងពាណិជ្ជកម្មជាមួយប្រទេសជាច្រើន បន្ថែមពីលើប្រព័ន្ធអនុគ្រោះពន្ធដែលទទួលបានពីប្រទេសមួយចំនួន។
លោកបញ្ជាក់ថា៖«ទឹកប្រាក់ដែលកម្ពុជាប្រមូលបានពីការនាំចេញសំបកកង់រថយន្តទៅទីផ្សារអន្តរជាតិនឹងកើនឡើងច្រើនថែមទៀត។ ចំណែកក្រុមហ៊ុនផលិតសំបកកង់រថយន្តក៏កំពុងបន្តឈានចូលមកវិនិយោគនៅកម្ពុជាច្រើនដែរ»។
បើតាមលោក លឹម ហេង ក្រុមហ៊ុនផលិតសំបកកង់រថយន្តដែលកំពុងមានវត្តមាននៅកម្ពុជាភាគច្រើនមកពីប្រទេសចិន។ រោងចក្រផលិតសំបកកង់រថយន្តភាគច្រើនស្ថិតនៅក្នុងតំបន់សេដ្ឋកិច្ចពិសេសខេត្តស្វាយរៀង(បាវិត) តំបន់សេដ្ឋកិច្ចពិសេសខេត្តព្រះសីហនុ និងក្រចេះ ជាដើម។
រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ បាននិយាយថា កំណើនទឹកប្រាក់នាំចេញសំបកកង់រថយន្ត ឆ្លុះបញ្ចាំងពីការធ្វើពិពិធកម្មនៃការនាំចេញរបស់កម្ពុជាទៅទីផ្សារអន្តរជាតិ ខណៈចំនួនរោងចក្រផលិតសំបកកង់រថយន្តក៏កំពុងកើនឡើង។
កំណើនទឹកប្រាក់នាំចេញសំបកកង់រថយន្ត គឺជាវឌ្ឍនភាពនៃការខិតខំរបស់រដ្ឋាភិបាលក្នុងការធ្វើកំណែទម្រង់ប្រព័ន្ធច្បាប់វិនិយោគ និងការចរចាបើកទីផ្សារជាមួយប្រទេសកាន់តែច្រើន។
លោកថ្លែងថា៖«ការនាំចេញផលិតផលសំបកកង់រថយន្ត គឺជាភាពជោគជ័យថ្មីមួយទៀតដែលកម្ពុជាអាចយកផលិតផលរបស់ខ្លួនទៅដាក់លក់នៅទីផ្សារអន្តរជាតិ។ ការនាំចេញផលិតផលក្នុងវិស័យឧស្សាហកម្មមានកាន់តែច្រើន»។
កាលពីខែកញ្ញា ក្រុមប្រឹក្សាអភិវឌ្ឍន៍កម្ពុជា(CDC)បានអនុម័តឱ្យគម្រោងវិនិយោគលើរោងចក្រផលិតសំបកកង់រថយន្ត ចំនួន ២ ដោយ ១ មានទីតាំងស្ថិតនៅតំបន់សេដ្ឋកិច្ចពិសេស យូ ប៊ី អី ស្នួល(UBE Snuol Special Economic Zone) នៅស្រុកស្នួល ខេត្តក្រចេះ និង ១ ទៀតនៅក្នុងតំបន់សេដ្ឋកិច្ចពិសេស ស៊ីន បាវិត ក្នុងក្រុងបាវិត ខេត្តស្វាយរៀង។
នៅក្នុងពិធីបើកសម្ពោធរោងចក្រផលិតសំបកកង់រថយន្តរបស់ក្រុមហ៊ុន Newbustar Group នៅតំបន់សេដ្ឋកិច្ចពិសេស យូ ប៊ី អ៊ី (UBE Snuol Special Economic Zone) ក្នុងស្រុកស្នួល ខេត្តក្រចេះ កាលពីខែកញ្ញា ឆ្នាំ ២០២៤ លោក ជា វុទ្ធី អគ្គលេខាធិការគណៈកម្មការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានលើកឡើងថា ការសម្រេចរបស់ថ្នាក់ដឹកនាំក្រុមហ៊ុនលើរោងចក្រផលិតសំបកកង់រថយន្តនៅកម្ពុជា គឺជាការសម្រេចចិត្តដ៏ត្រឹមត្រូវ។
លោកបញ្ជាក់ថា ការបោះទុនវិនិយោគដ៏ច្រើនសន្ធឹកសន្ធាប់នេះ គឺជាការចូលរួមចំណែកក្នុងការធ្វើពិពិធកម្មសេដ្ឋកិច្ចកម្ពុជា ក៏ដូចជាចូលរួមជំរុញការអភិវឌ្ឍសង្គម-សេដ្ឋកិច្ច និងបង្កើតការងារជូនប្រជាពលរដ្ឋក្នុងមូលដ្ឋានផ្ទាល់។
លោកនាយករដ្ឋមន្ត្រី ហ៊ុន ម៉ាណែត កាលពីខែឧសភា ធ្លាប់បានស្នើឱ្យរោងចក្រផលិតសំបកកង់រថយន្តទាំងអស់ ចូលរួមប្រើប្រាស់ជ័រកៅស៊ូក្នុងស្រុកធ្វើជាវត្ថុធាតុដើម ដើម្បីចូលរួមជួយលើកកម្ពស់ទីផ្សារផលិតផលក្នុងស្រុក។
យោងតាមអគ្គនាយកដ្ឋានកៅស៊ូ ក្នុងរយៈពេល ១១ ខែដើមឆ្នាំ ២០២៤ កម្ពុជាបាននាំចេញជ័រកៅស៊ូ ចំនួនជាង ៣៤ ម៉ឺនតោន កើនឡើងជិត ៨ ពាន់តោន ឬស្មើនឹង ៣,១២ ភាគរយបើធៀបនឹងរយៈពេលដូចគ្នាក្នុងឆ្នាំ ២០២៣។ ជ័រកៅស៊ូកម្ពុជា ភាគច្រើនត្រូវបាននាំចេញទៅប្រទេសម៉ាឡេស៊ី វៀតណាម សិង្ហបុរី និងចិន។
នៅកម្ពុជាបច្ចុប្បន្ន មានផ្ទៃដីដាំកៅស៊ូ ប្រមាណ ៤០៧ ១៧២ ហិកតា ក្នុងនោះផ្ទៃដីកៅស៊ូចៀរជ័រ មានចំនួន ៣២០ ១៨៤ ហិកតា ក្រៅពីនោះជាដីទើបដាំថ្មី មិនទាន់ប្រមូលផល)៕
