ទិដ្ឋភាពនៃពិធីសម្ពោធដាក់ឱ្យដំណើរការប្រព័ន្ធគ្រប់គ្រងគម្រោងវិនិយោគកម្ពុជា(ប្រព័ន្ធ cdcIPM) កាលពីពេលថ្មីៗនេះ។ CDC
រដ្ឋាភិបាលកម្ពុជាកំពុងខិតខំយ៉ាងខ្លាំងក្នុងការបង្កើនសក្តានុពលដើម្បីទាក់ទាញវិនិយោគិនជាតិ និងអន្តរជាតិឱ្យចូលមកបណ្តាក់ទុនផ្ទាល់ និងបញ្ជាទិញទំនិញផលិតនៅកម្ពុជាកាន់តែច្រើនតាមរយៈការធ្វើកំណែទម្រង់ប្រព័ន្ធច្បាប់វិនិយោគ និងការដាក់ចេញយុទ្ធសាស្រ្តថ្មីៗ ខណៈប្រទេសកម្ពុជានឹងត្រូវចាកចេញពីឋានៈជាប្រទេសក្រីក្រនៅត្រឹមចុងឆ្នាំ ២០២៩ ខាងមុខ។
នាយករដ្ឋមន្ត្រី និងជាប្រធានក្រុមប្រឹក្សាអភិវឌ្ឍន៍កម្ពុជា(CDC) លោក ហ៊ុន ម៉ាណែត នៅក្នុងកិច្ចប្រជុំផ្លូវការលើកទី ១ ក្នុងនីតិកាលទី៧ នៃរដ្ឋសភា ជាមួយនឹងថ្នាក់ដឹកនាំក្រុមប្រឹក្សាអភិវឌ្ឍន៍កម្ពុជា នៅទីស្តីការក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី២០ ខែធ្នូ បានលើកឡើងថា ក្នុងអំឡុងពេលដែលស្ថានភាពនយោបាយ និងសេដ្ឋកិច្ចពិភពលោកកំពុងមានការវិវឌ្ឍប្រែប្រួលលឿនបែបនេះ គឺកម្ពុជាចាំបាច់ត្រូវតែត្រៀម និងរៀបចំខ្លួនឱ្យបានរួចរាល់ដើម្បីឆ្លើយតបនឹងការប្រែប្រួលស្ថានភាពភូមិសាស្រ្តនយោបាយពិភពលោក។
លោកអះអាងថា ការធ្វើកំណែទម្រង់គឺជាភាពចាំបាច់ ដោយបច្ចុប្បន្នរាជរដ្ឋាភិបាលកំពុងបន្តយកចិត្តទុកដាក់លើវិស័យឯកជន ដែលជាតួអង្គសំខាន់ក្នុងការជំរុញកំណើនសេដ្ឋកិច្ចកម្ពុជា។
លោកបន្តថា ក្រុមប្រឹក្សាអភិវឌ្ឍន៍កម្ពុជា ក្នុងនាមជាតួអង្គជួរមុខជួបផ្ទាល់ជាមួយវិនិយោគិន និងដៃគូអភិវឌ្ឍន៍ គឺមានភាពចាំបាច់ណាស់ក្នុងការខិតខំផ្សព្វផ្សាយអំពីកាលានុវត្តភាព និងភាពរីកចម្រើនរបស់កម្ពុជាលើគ្រប់វិស័យទៅកាន់ឆាកអន្តរជាតិ ដែលកំពុងមានការប្រែប្រួលដ៏ឆាប់រហ័ស។
លោកបានថ្លែងថា៖«ការប្រែប្រួលយ៉ាងឆាប់រហ័សនៃស្ថានភាពភូមិសាស្ត្រនយោបាយពិភពលោក និងការប្រកួតប្រជែងនៅក្នុងតំបន់ ទាមទារឱ្យកម្ពុជាត្រូវត្រៀមលក្ខណៈឱ្យបានកាន់តែល្អប្រសើរ ដែលមានភាពឆ្លើយតប និងភាពធន់ខ្ពស់ ទៅនឹងការផ្លាស់ប្តូរនិម្មាបនកម្មសេដ្ឋកិច្ច និងពាណិជ្ជកម្មអន្តរជាតិ នាពេលអនាគត»។
យោងតាមសេចក្តីប្រកាសព័ត៌មានរបស់ CDC នៅក្នុងកិច្ចប្រជុំខាងលើ លោកនាយករដ្ឋមន្ត្រី ហ៊ុន ម៉ាណែត បានដាក់ចេញនូវអនុសាសន៍ណែនាំជាទិសដៅទៅដល់ CDC ដែលមានដូចជាៈ ការបន្តអនុវត្តយន្តការពិគ្រោះយោបល់ជាមួយសហភាគី រួមមាន ជប៉ុន កូរ៉េខាងត្បូង សហរដ្ឋអាម៉េរិក និងសហភាពអឺរ៉ុប ក្នុងក្របខណ្ឌក្រុមប្រឹក្សាអភិវឌ្ឍន៍កម្ពុជា ឱ្យបាន ២ ដងក្នុង ១ ឆ្នាំ បន្ថែមលើយន្តការវេទិការាជរដ្ឋាភិបាល-ផ្នែកឯកជន ដែលប្រព្រឹត្តឡើង ១ ឆ្នាំម្តង, សិក្សាវាយតម្លៃ និងធ្វើអាទិភាវូបនីយកម្មសម្រាប់លើកទឹកចិត្តវិនិយោគតាមវិស័យ និងទីតាំងភូមិសាស្រ្ត, ការរៀបចំយន្តការតាមដានត្រួតពិនិត្យការអនុវត្តគម្រោងវិនិយោគមានលក្ខណៈសម្បត្តិគ្រប់គ្រាន់ក្រោយទទួលបានវិញ្ញាបនបត្រ, ការរៀបចំយន្តការប្រទាក់ក្រឡាធ្វើឱ្យមានសង្គតិភាពនៃលំហូរការងារវិនិយោគរវាងថ្នាក់ជាតិ និងថ្នាក់ក្រោមជាតិ, ការអនុវត្តឱ្យបានពេញលេញលើការប្រើប្រាស់ប្រព័ន្ធគ្រប់គ្រងគម្រោងវិនិយោគកម្ពុជា(ប្រព័ន្ធ cdcIPM), ជំរុញការរៀបចំការផ្តល់ព័ត៌មានវិនិយោគសម្បូរបែប ចំគោលដៅ និងមានភាពទាក់ទាញ, និងពង្រឹងការលើកកម្ពស់ធនធានមនុស្សសម្រាប់ការផ្តល់សេវាជូនវិនិយោគិនប្រកបដោយគុណភាព ប្រសិទ្ធភាព និងស័ក្តិសិទ្ធភាព។
អ្នកសេដ្ឋកិច្ច លោក ឌុច ដារិន្ទ បានប្រាប់ភ្នំពេញប៉ុស្តិ៍ថា ការធ្វើកំណែទម្រង់ប្រព័ន្ធច្បាប់វិនិយោគ ព្រមទាំងការដាក់ចេញនូវវិធានការណ៍ថ្មីៗជាបន្តបន្ទាប់របស់រដ្ឋាភិបាលបានជួយឱ្យសេដ្ឋកិច្ចកម្ពុជាទទួលបានអត្រាកំណើនគួរឱ្យកត់សម្គាល់ បើទោះបីសេដ្ឋកិច្ចសកលមិនទាន់មានភាពរឹងមាំក៏ដោយ។
លោកបន្តថា សេដ្ឋកិច្ចកម្ពុជាកំពុងមានការអភិវឌ្ឍជាបន្តបន្ទាប់ ដោយសារកំណើនការនាំចេញដ៏រឹងមាំ កំណើនភ្ញៀវទេសចរ កំណើនការវិនិយោគសាធារណៈ និងការចូលរួមយ៉ាងសកម្មរបស់ផ្នែកឯកជន។ កម្ពុជាបាននិងកំពុងរក្សាស្ថិរភាពម៉ាក្រូសេដ្ឋកិច្ច ព្រមទាំងពង្រឹងការអភិវឌ្ឍប្រកបដោយចីរភាព និងបរិយាប័ន្ន។
លោកបន្ថែមថា នៅឆ្នាំ២០២៥ ខាងមុខចំនួនក្រុមហ៊ុន/សហគ្រាសដែលចូលមកវិនិយោគនៅកម្ពុជានឹងបន្តកើនឡើងថែមទៀត។
លោកនិយាយថា៖«វត្តមានរបស់ក្រុមហ៊ុនអន្តរជាតិធំៗ នឹងនាំមកនូវអត្ថប្រយោជន៍ដូចជា មូលធនបណ្តាក់ទន់ច្រើន ការបង្កើតការងារច្រើនកន្លែងសម្រាប់ប្រជាពលរដ្ឋ និងជួយពង្រឹងជំនាញកម្លាំងពលកម្ម និងជួញលើកកម្ពស់ស្តង់ដារអាជីវកម្មក្នុងស្រុក។ លើសពីនេះ ក្រុមហ៊ុនទាំងនេះនឹងជំរុញឱ្យមានការផ្ទេរបច្ចេកវិទ្យា និងលើកទឹកចិត្តឱ្យមានគំនិតច្នៃប្រឌិត ព្រមទាំងជួយពង្រឺងសមត្ថភាពប្រកួតប្រជែងជាសកល»។
យោងតាម CDC ក្នុងឆ្នាំ ២០២៤ ក្រុមប្រឹក្សាអភិវឌ្ឍន៍កម្ពុជាបានអនុម័តឱ្យគម្រោងវិនិយោគ ចំនួន ៤១៤គម្រោង កើនឡើង ១៤៦ គម្រោង ឬស្មើនឹង ៥៤ ភាគរយបើធៀបនឹងឆ្នាំ ២០២៣។
ចំណែកទុនវិនិយោគ មានចំនួន ៦ ៩០០ លាន ដុល្លារ កើនឡើង ១ ៩៧៣ លានដុល្លារ ឬស្មើ ៤០ ភាគរយ។ ៦៩ ភាគរយនៃគម្រោងដែល CDC បានអនុម័ត គឺស្ថិតក្នុងវិស័យឧស្សាហកម្ម។
មហាសន្និបាតនៃអង្គការសហប្រជាជាតិ នៅថ្ងៃទី១៩ ខែធ្នូ ឆ្នាំ២០២៤ នេះបានអនុម័តសេចក្តីសម្រេច A/៧៩/L.៤៩ សម្រាប់ការចាកចេញរបស់ប្រទេសកម្ពុជាពីក្រុមប្រទេសអភិវឌ្ឍតិចតួច ឬ LDC។
កម្ពុជានឹងចាកចេញពីប្រទេសក្រីក្រ ចាប់ពីថ្ងៃទី១៩ ខែធ្នូ ឆ្នាំ២០២៩ បន្ទាប់ពីរយៈពេល៥ឆ្នាំដែលផ្ដល់ឱ្យសម្រាប់ការត្រៀមចាកចេញដោយរលូន។
ប្រទេសកម្ពុជា ត្រូវបានចាត់ចូលក្នុងក្រុមប្រទេសអភិវឌ្ឍន៍តិចតួច ឬប្រទេសក្រីក្រនៅឆ្នាំ១៩៩១។ ប្រទេសដែលត្រូវចាកចេញពីក្រុមប្រទេសអភិវឌ្ឍតិចតួច ឬ ប្រទេសក្រីក្រជាមួយនិងកម្ពុជា គឺប្រទេសសេណេហ្គាល់៕
