សកម្មភាពក្រុមកម្មករកំពុងដេរសម្លៀកបំពាក់ក្នុងរោងចក្រមួយកន្លែងនៅរាជធានីភ្នំពេញ។ សហការី
កម្ពុជាប្រមូលប្រាក់បានជាង ៤ ពាន់លានដុល្លារពីការនាំចេញទំនិញទៅសហភាពអឺរ៉ុបក្នុងរយៈពេល ១១ ខែដើមឆ្នាំ ២០២៤ កើនឡើងជាង ២០ ភាគរយបើធៀបនឹងរយៈពេលដូចគ្នាកាលពីឆ្នាំមុន ខណៈទំហំពាណិជ្ជកម្មសរុបរវាងដៃគូទាំង ២ មានប្រមាណជិត ៤,៩ ពាន់លានដុល្លារ។
របាយការណ៍បូកសរុបលទ្ធផលការងារពាណិជ្ជកម្មឆ្នាំ ២០២៤ និងទិសដៅការងារពាណិជ្ជកម្មឆ្នាំ ២០២៥ របស់ក្រសួងពាណិជ្ជកម្ម បានបង្ហាញថា ចន្លោះពីខែមករា ដល់ខែវិច្ឆិកា ឆ្នាំ ២០២៤ ការនាំចេញ នាំចូលទំនិញរវាងកម្ពុជាជាមួយសហភាពអឺរ៉ុប មានទឹកប្រាក់សរុប ៤ ៨៨៧ លានដុល្លារ កើនឡើង ១៥,១ ភាគរយធៀបនឹងរយៈពេលដូចគ្នាកាលពីឆ្នាំ ២០២៣ ក្នុងនោះទំនិញកម្ពុជានាំទៅសហភាពអឺរ៉ុប មានទឹកប្រាក់ ៤ ០៣២ លានដុល្លារ កើនឡើង ២០,៤៥ ភាគរយ ចំណែកទំនិញសហភាពអឺរ៉ុបនាំមកកម្ពុជាចំនួន ៨៥៤ លានដុល្លារ ធ្លាក់ចុះ ៤,៨៥ ភាគរយ។
ផ្អែកតាមរបាយការណ៍ ប្រទេសសមាជិកសហភាពអឺរ៉ុប ដែលទទួលទិញទំនិញច្រើនពីកម្ពុជា រួមមានប្រទេសអេស្ប៉ាញ មានទឹកប្រាក់ ៩៥៣ លានដុល្លារ កើន ៤៦,៩៩ ភាគរយ, អាល្លឺម៉ង់ ៨២៨ លានដុល្លារ កើនឡើង ១១,៥៦ ភាគរយ, ហូឡង់ ៧២៩ លានដុល្លារ កើន ៤៣,១៩ ភាគរយ, បារាំង ៣៦៨ លានដុល្លារ កើន ១០,៨១ ភាគរយ និងប្រទេសបែលហ្ស៊ិក ៣៣៤ លានដុល្លារ ថយចុះ ១៦,០៨ ភាគរយ។
ក្រសួងពាណិជ្ជកម្ម បានឱ្យដឹងថា ដើម្បីជំរុញសកម្មភាពពាណិជ្ជកម្មជាមួយសហភាពអឺរ៉ុបឱ្យបោះជំហានទៅមុខកាន់តែលឿន ក្នុងឆ្នាំ ២០២៤ ថ្នាក់ដឹកនាំក្រសួងពាណិជ្ជកម្មបានចូលរួមកិច្ចប្រជុំសំខាន់ៗមួយចំនួនដូចជា កិច្ចប្រជុំអនុក្រុមពាណិជ្ជកម្ម និងវិនិយោគលើកទី១២ (Subgroup on Trade and Investment-SGTI) ក្រោមកិច្ចប្រជុំគណៈកម្មាធិការចម្រុះកម្ពុជា-សហភាពអឺរ៉ុប លើកទី១២ (JC12)។ ជាលទ្ធផលភាគីទាំង ២ បានពង្រឹងកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម វិនិយោគ ជំនួយបច្ចេកទេសសម្រាប់វិស័យពាណិជ្ជកម្ម និងវិស័យដទៃទៀត។
ក្រសួងឱ្យដឹងទៀតថា៖«បន្ថែមពីលើនេះថ្នាក់ដឹកនាំក្រសួងក៏បានជួបពិភាក្សាការងារជាមួយសមាជិកសភាអឺរ៉ុប និងធុរជនអឺរ៉ុប ដើម្បីពង្រឹងកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងកម្ពុជា-សហភាពអឺរ៉ុប ដែលក្នុងនោះប្រតិភូធុរជនមកពីប្រទេសប៉ូឡូញបានចូលរួមពិគ្រោះយោបល់ ក្នុងការពង្រីកចំណែកទីផ្សារបន្ថែមទៀត សម្រាប់ធ្វើពិពិធកម្មទំនិញកម្ពុជាទៅកាន់ប្រទេសប៉ូឡូញ»។
អ្នកសេដ្ឋកិច្ចនៅរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី២៤ ខែធ្នូ ថា សហភាពអឺរ៉ុប គឺជាទីផ្សារទទួលទិញទំនិញដ៏ធំពីកម្ពុជា ដែលមានប្រាក់រាប់ពាន់លានដុល្លារក្នុង១ឆ្នាំៗ។ សហភាពអឺរ៉ុប គឺជាក្រុមប្រទេសមានសេដ្ឋកិច្ចរីកចម្រើន ហើយប្រជាជនភាគច្រើនមានប្រាក់ចំណូលខ្ពស់ ដូច្នេះប្រសិនបើកម្ពុជាអាចមានផលិតផលឆ្លើយតបនឹងទីផ្សារអឺរ៉ុបកាន់តែច្រើន វានឹងជួយឱ្យកម្ពុជាទទួលបានចំណូលកាន់តែច្រើន។ លោកបន្ថែមថា ក្រៅពីការនាំចេញទំនិញទៅទីផ្សារសហភាពអឺរ៉ុប បច្ចុប្បន្នក៏មានវិនិយោគិនអឺរ៉ុបមួយចំនួនកំពុងបើកអាជីវកម្ម និងរោងចក្រនៅកម្ពុជាផងដែរ។
លោកបានថ្លែងថា៖«ការក្តាប់យកឱកាសទីផ្សារអឺរ៉ុប គឺជារឿងដែលរដ្ឋាភិបាល និងផ្នែកឯកជនកម្ពុជាកំពុងខិតខំ។ អឺរ៉ុប គឺជាទីផ្សារទំនើបស៊ីវិល័យ ដូច្នេះកម្ពុជាត្រូវតែខិតខំធ្វើពិពិធកម្មទំនិញនាំចេញរបស់ខ្លួនឱ្យកាន់តែប្រសើរបន្ថែមទៀតទាំងបរិមាណ និងគុណភាព»។
លោកលើកឡើងទៀតថា ភាគច្រើននៃទំនិញកម្ពុជានាំទៅទីផ្សារសហភាពអឺរ៉ុប គឺជាផលិតផលសម្លៀកបំពាក់ កាបូបធ្វើដំណើរ ស្បែកជើង កង់ និងផលិតផលកសិកម្ម(ជាពិសេសអង្ករ និងម្រេច)។
អនុប្រធានសភាពាណិជ្ជកម្មកម្ពុជា លោក លឹម ហេង បាននិយាយថា កំណើនទឹកប្រាក់នាំចេញទំនិញពីកម្ពុជាទៅទីផ្សារអឺរ៉ុប គឺឆ្លុះបញ្ចាំងពីតម្រូវការផលិតផលកម្ពុជានៅទីនោះ ខណៈការនាំចេញទំនិញជាច្រើនទៅកាន់ទីផ្សារសហភាពអឺរ៉ុបបានទទួលការលើកលែងពន្ធក្រោមប្រព័ន្ធ EBA។ លោកបន្តថា ប្រព័ន្ធ EBA ក៏ជាចំណែកសំខាន់ដែលបានជំរុញ និងលើកទឹកចិត្តអ្នកវិនិយោគ ឱ្យមកបង្កើតរោចក្រផលិតនៅកម្ពុជា ដើម្បីផលិតផលិតផលសម្រាប់នាំចេញទៅកាន់សហភាពអឺរ៉ុប។
ទោះយ៉ាងណា លោកអះអាងថា៖«កម្ពុជាក៏ត្រូវខិតខំពង្រឹកខ្លួនឯងដោយមិនត្រូវពឹងផ្អែកលើប្រព័ន្ធអនុគ្រោះពន្ធដែលប្រទេសនានាផ្តល់ឱ្យនោះទេ ពីព្រោះនៅពេលកម្ពុជាចាកចេញពីស្ថានភាពប្រទេសអភិវឌ្ឍន៍តិចតួច (LDC) នៅចុងឆ្នាំ២០២៩ខាងមុខ កម្ពុជាក៏នឹងត្រូវបាត់បង់ប្រព័ន្ធអនុគ្រោះពន្ធជាច្រើនផងដែរ»។
មហាសន្និបាតនៃអង្គការសហប្រជាជាតិ នៅថ្ងៃទី១៩ ខែធ្នូ ឆ្នាំ២០២៤ នេះបានអនុម័តសេចក្តីសម្រេច A/៧៩/L.៤៩ សម្រាប់ការចាកចេញរបស់ប្រទេសកម្ពុជាពីក្រុមប្រទេសអភិវឌ្ឍតិចតួច ឬ LDC។ កម្ពុជានឹងចាកចេញពីប្រទេសក្រីក្រ ចាប់ពីថ្ងៃទី១៩ ខែធ្នូ ឆ្នាំ២០២៩ បន្ទាប់ពីរយៈពេល៥ឆ្នាំដែលផ្ដល់ឱ្យសម្រាប់ការត្រៀមចាកចេញដោយរលូន។
ប្រទេសកម្ពុជា ត្រូវបានចាត់ចូលក្នុងក្រុមប្រទេសអភិវឌ្ឍន៍តិចតួច ឬប្រទេសក្រីក្រនៅឆ្នាំ១៩៩១។
អគ្គនាយកដ្ឋានគយ និងរដ្ឋាករកម្ពុជា(GDCE) ឱ្យដឹងថា ចន្លោះពីខែមករា ដល់ខែវិច្ឆិកា ឆ្នាំ ២០២៤ ការផ្លាស់ប្តូរទំនិញរបស់កម្ពុជា ជាមួយទីផ្សារអន្តរជាតិមានទឹកប្រាក់សរុប ៤៩,៨៧ ពាន់លានដុល្លារ កើនឡើង ១៧,៤ ភាគរយបើធៀបនឹងរយៈពេលដូចគ្នាឆ្នាំ ២០២៣ ដែលមាន ៤២,៥ ពាន់លានដុល្លារ ក្នុងនោះទំនិញកម្ពុជានាំទៅក្រៅប្រទេស ២៣,៩៣ ពាន់លានដុល្លារ កើនឡើង ១៦,៨ ភាគរយ និងទំនិញនាំចូល ២៥,៩៤ ពាន់លានដុល្លារ កើន ១៧,៩ ភាគរយ៕
